புத்தசாசன, சமய மற்றும் கலாசார அலுவல்கள் அமைச்சின் ஏற்பாட்டில் நிலைபேறான புண்ணிய கிராமம் நிகழ்ச்சித்திட்டத்தினை செயற்படுத்துதல் தொடர்பான கலந்துரையாடல் மாவட்ட அரசாங்க அதிபர் திரு.கணபதிப்பிள்ளை மகேசன் அவர்களின் தலைமையில் 18.05.2022 பிற்பகல் 3.30 மணிக்கு மாவட்டச்செயலக மாநாட்டு மண்டபத்தில் நடைபெற்றது.
இக் கலந்துரையாடலில் குற்றங்கள் அதிகம் இடம்பெறுகின்ற இடங்களாக இலங்கை பொலீஸ் தலைமையகத்தினால் யாழ்ப்பாண மாவட்டத்தில் அடையாளப்படுத்தப்பட்ட கிராமங்களில் புண்ணிய கிராமத்தை திட்டத்தினை நடைமுறைப்படுத்துவதற்கான கிராமத்தினை தெரிவு செய்தல், அடிப்படை பிரச்சினைகளை இனங்காணல், அடையாளப்படுத்தப்பட்ட குடும்பங்கள் தொடர்பான தகவல்களை பெற்றுக்கொள்ளல், புண்ணிய கிராம செயற்பாட்டுக் குழுவை நியமித்தல் , கருத்திட்டங்களை பிரதேச செயலாளருக்கு சமர்ப்பித்தல், பிரதேச செயலாளர் மாவட்டச் செயலாளருக்கு சமர்ப்பித்தல் , நடைமுறைப்படுத்தப்படும் கால அட்டவணை என்பன தொடர்பாக கலந்துரையாடப்பட்டன.
தற்போது நாட்டில் ஏற்பட்டுள்ள அசாதாரண நிலைமை மற்றும் அத்தியாவசிய பொருட்கள், சேவைகள் விநியோகம் தொடர்பான கலந்துரையாடல் மாவட்ட அரசாங்க அதிபர் திரு.கணபதிப்பிள்ளை மகேசன் அவர்களின் தலைமையில் 18.05.2022 பிற்பகல் 2.30 மணிக்கு மாவட்டச் செயலக மாநாட்டு மண்டபத்தில் நடைபெற்றது.
இக் கலந்துரையாடலில் எரிபொருள் விநியோகம், மருந்து பொருட்களின் தேவைப்பாடு, சுகாதாரத் தேவைகள் , போக்குவரத்து சேவை, விவசாயிகள் மற்றும் மீனவர்களுக்கான எரிபொருள் தேவை, அம்புலன்ஸ் சேவை, மின்சார பயன்பாடு, மாவட்டத்தின் உணவு தேவைப்பாடு மற்றும் விலைகள், காஸ் சிலிண்டர் விநியோகம் போன்ற நடைமுறை விடயங்கள் தொடர்பாக கலந்துரையாடப்பட்டன.
சமுர்த்தி அபிவிருத்தி திணைக்களத்தின் ஏற்பாட்டில் YOULEAD நிறுவனத்தின் நிதிப்பங்களிப்பின் அனுசரனையுடன் தொழிலுக்கான வழிகாட்டல் செயலமர்வு யாழ்.மாவட்ட சமுர்த்தி அபிவிருத்தி திணைக்களப்பணிப்பாளர் திரு.தி.விஸ்வரூபன் அவர்களின் தலைமையில் (05.05.2022) காலை 9.00 மணிக்கு மாவட்டச் செயலக கேட்போர்கூடத்தில் நடைபெற்றது.
2021,2022 அரச துறையில் நியமனம் பெற்று சமுர்த்தி அபிவிருத்தி திணைக்களத்திற்கு இணைக்கப்பட்ட அபிவிருத்தி உத்தியோகத்தர்களுக்கு தொழில் வழிகாட்டல் செயலமர்வானது மனிதவலு மேம்பாட்டுத் திணைக்களத்தின் பங்குபற்றலுடன் இடம்பெற்றமை குறிப்பிடத்தக்கது. அபிவிருத்தி உத்தியோகத்தர்கள் கடமை விடயப்பகிர்வு வழங்குவதற்கு ஏதுவாக இச் செயலமர்வானது இரு அமர்வுகளாக இடம் பெற்றன. முதல் அமர்வில் 68 உத்தியோகத்தர்களும், இரண்டாம் அமர்வில் 46 உத்தியோகத்தர்களும் கலந்து கொண்டனர்.
யாழ்ப்பாண மாவட்ட செயலக வளாகத்தில் புதிதாக கட்டடங்களை நிர்மாணிப்பது தொடர்பான முதன்மைத்திட்டம் (Master Plan) தயாரிப்பதற்கான முன்னேற்றக் கலந்துரையாடல் மாவட்ட அரசாங்க அதிபர் திரு.கணபதிப்பிள்ளை மகேசன் அவர்களின் தலைமையில் இன்றையதினம் (2022.05.09) அரசாங்க அதிபரின் அலுவலகத்தில் நடைபெற்றது.
இக் கலந்துரையாடலில் மேலதிக அரசாங்க அதிபர், மேலதிக அரசாங்க அதிபர் ( காணி),பிரதம கணக்காளர், திட்டமிடல் பணிப்பாளர், உதவி மாவட்டச் செயலாளர், பிரதிப் பதிவாளர் நாயகம், உள்ளக கணக்காய்வாளர், மோட்டார் திணைக்கள உதவி ஆணையாளர், மாவட்டச் செயலக பொறியியலாளர், அனர்த்த முகாமைத்துவ உதவிப் பணிப்பாளர், நகர அபிவிருத்தி அதிகார சபை உத்தியோகத்தர்கள் ஆகியோரும் கலந்துகொண்டிருந்தார்கள்
யாழ்ப்பாண மாவட்ட செயலகமும், மாவட்ட சிரேஸ்ட பிரஜைகள் பேரவையும் இணைந்து நடாத்திய "மாவட்ட சிரேஸ்ட பிரஜைகள் ஒன்று கூடல் விழா" மாவட்ட சிரேஸ்ட பிரஜைகள் பேரவையின் தலைவர் சுப்பையா பரம்சோதி அவர்களின் தலைமையில் செவ்வாய்கிழமை (03.05.2022) காலை 9.30 மணிக்கு மாவட்டச்செயலக கேட்போர்கூடத்தில் நடைபெற்றது.
இந்நிகழ்வில் முதியோர்களை முன்னிலைப்படுத்தி முதியோர்நடனம், முதியோர் வில்லுப்பாட்டு போன்ற கலை நிகழ்ச்சிகள் இடம்பெற்றதோடு பரசில்களும், அன்பளிப்புக்களும் பிரதம விருந்தினராக கலந்து கொண்ட மாவட்ட அரசாங்க அதிபர் திரு.கணபதிப்பிள்ளை மகேசன் அவர்களினால் வழங்கப்பட்டன.
அத்துடன் யாழ் மாவட்ட 15 பிரதேச செயலகங்களிலிருந்தும் வறுமைக்குட்பட்ட 60 வயதிற்கு மேற்பட்ட சிரேஸ்ட பிரஜை ஒருவர் தெரிவு செய்யப்பட்டு 2500/= பெறுமதியான உலர் உணவுப் பொருட்களும் வழங்கப்பட்டன.







