அரசசார்பற்ற நிறுவனங்களுக்கு இடையிலான கலந்தாய்வு அரசாங்க அதிபர் திரு மருதலிங்கம் பிரதீபன் அவர்கள் அவர்களின் தலைமையில் இன்றைய தினம் (07.10.2026) காலை 9.00 மணி தொடக்கம் 01.00 மணி வரை தனியார் விடுதியில் நடைபெற்றது. இக் கலந்தாய்வில் மேலதிக அரசாங்க அதிபர் (காணி) திரு. பா.ஜெயகரன் அவர்கள் வரவேற்புரையாற்றினார்.
தலைமையுரை :
அரச மற்றும் அரச சார்பற்ற நிறுவனங்களின் ஒருங்கிணைந்த பங்களிப்புடன் மாவட்ட அபிவிருத்தி முன்னெடுக்கப்பட வேண்டும் – அரசாங்க அதிபர் யாழ்ப்பாண மாவட்டத்தின் அபிவிருத்தி என்பது கட்டுமானப் பணிகள் மற்றும் உட்கட்டமைப்பு அபிவிருத்திகளுடன் மாத்திரம் மட்டுப்படுத்தப்பட முடியாது. மனித வள அபிவிருத்தி, சமூக நலன், பொருளாதார முன்னேற்றம் உள்ளிட்ட அனைத்து துறைகளையும் உள்ளடக்கியதாகவே மாவட்டத்தின் ஒட்டுமொத்த அபிவிருத்தி முன்னெடுக்கப்பட வேண்டும் என அரசாங்க அதிபர் தெரிவித்தார். யாழ்ப்பாணம் மாவட்ட அபிவிருத்திக்கு இவ்வாண்டு 4,500 மில்லியன் ரூபாவுக்கும் அதிகமான அரச நிதி :
யாழ்ப்பாண மாவட்டத்திற்கு கடந்த ஆண்டு அரசாங்கத்தினால் ரூ.2,500 மில்லியன் அபிவிருத்தி நிதி ஒதுக்கப்பட்டிருந்த நிலையில், இவ்வாண்டு மாவட்டத்தின் பல்வேறு அபிவிருத்தி நடவடிக்கைகளுக்காக ரூ.4,500 மில்லியனுக்கும் அதிகமான நிதி ஒதுக்கப்பட்டுள்ளதாக யாழ்ப்பாண மாவட்ட அரசாங்க அதிபர் தெரிவித்தார். அதேவேளை, மாவட்டத்தில் செயற்பட்டு வருகின்ற அரச சார்பற்ற நிறுவனங்கள் அபிவிருத்திப் பணிகளுக்காக கணிசமான நிதி மற்றும் வளங்களைத் தொடர்ச்சியாகப் பயன்படுத்தி வருகின்றன. இதன்படி, ரூ.1,000 மில்லியனுக்கும் அதிகமான நிதி இவ்வாறான அபிவிருத்தி நடவடிக்கைகளுக்காக செலவிடப்பட்டு வருவதாகவும். எனவே, அரசாங்கத்தின் நிதி வளங்களுடன் அரச சார்பற்ற நிறுவனங்களின் நிதி, தொழில்நுட்ப அறிவு மற்றும் மனிதவளப் பங்களிப்புகளையும் முறையாக ஒருங்கிணைத்து, மாவட்டத்தின் முன்னுரிமைத் தேவைகளுக்கு ஏற்ப திட்டமிட்ட அடிப்படையில் பயன்படுத்துவதன் மூலம் அபிவிருத்திப் பணிகளின் பயனையும் தாக்கத்தையும் மேலும் அதிகரிக்க முடியும் எனவும் அரசாங்க அதிபர் சுட்டிக்காட்டினார். குறிப்பாக, அரச சார்பற்ற நிறுவனங்கள் மனித வள அபிவிருத்திக்கு வழங்கிவரும் முக்கியத்துவம் பாராட்டத்தக்கது எனவும் அரசாங்க அதிபர் தெரிவித்தார்.
அரச சார்பற்ற நிறுவனங்களின் பங்களிப்பு பாராட்டத்தக்கது :
யுத்தத்தினால் பாதிக்கப்பட்ட யாழ்ப்பாண மாவட்டத்தின் மீள்கட்டமைப்பு, சமூக மேம்பாடு மற்றும் மக்களின் வாழ்வாதார முன்னேற்றத்துக்கு அரச சார்பற்ற நிறுவனங்கள் நீண்டகாலமாக வழங்கிவரும் பங்களிப்புகளுக்கு அரசாங்க அதிபர் நன்றி தெரிவித்தார். மக்களின் தேவைகளை அடிப்படையாகக் கொண்டு இந்நிறுவனங்கள் முன்னெடுக்கும் திட்டங்கள் மாவட்டத்தின் அபிவிருத்திக்கு பெறுமதியான பங்களிப்பாக அமைவதாகவும் அரசாங்க அதிபர் குறிப்பிட்டார்.
அரச சார்பற்ற நிறுவனங்களிடையே ஒருங்கிணைப்பு அவசியம் :
ஒரே பிரதேசத்தில் ஒரே வகையான திட்டங்கள் மீண்டும் மீண்டும் முன்னெடுக்கப்படுவதைத் தவிர்த்து, மக்களின் உண்மையான தேவைகளை அடையாளம் கண்டு வளங்களைச் சிறந்த முறையில் பயன்படுத்துவதற்கு அரச சார்பற்ற நிறுவனங்களிடையே வலுவான ஒருங்கிணைப்பு அவசியம் என அரசாங்க அதிபர் வலியுறுத்தினார். மாவட்ட நிர்வாகம், பிரதேச செயலகங்கள் மற்றும் அரச சார்பற்ற நிறுவனங்கள் தமது திட்டங்களை பரஸ்பரம் அறிந்து கொண்டு செயற்படுவதன் மூலம் வளங்களின் வீண்விரயத்தைத் தவிர்த்து, அதிக பயனாளிகளை சென்றடைய முடியும் எனவும் அரசாங்க அதிபர் தெரிவித்தார்.
அபிவிருத்தியில் வெளிப்படைத்தன்மை பேணப்பட வேண்டும் :
அரச மற்றும் அரச சார்பற்ற நிறுவனங்களால் முன்னெடுக்கப்படும் அபிவிருத்தித் திட்டங்கள் தொடர்பான தகவல்கள் உரிய தரப்பினருடன் தெளிவாகப் பகிரப்பட வேண்டும் எனவும் அரசாங்க அதிபர் தெரிவித்தார். திட்டங்களின் நோக்கம், பயனாளிகள், நடைமுறைப்படுத்தப்படும் பிரதேசங்கள் மற்றும் எதிர்பார்க்கப்படும் பெறுபேறுகள் தொடர்பான தகவல்களைப் பகிர்வதன் மூலம் வெளிப்படைத்தன்மையையும் பொறுப்புக்கூறலையும் மேலும் வலுப்படுத்த முடியும் என அரசாங்க அதிபர் சுட்டிக்காட்டினார்.
காலாண்டு கலந்துரையாடல்கள் தொடர வேண்டும் :
அரச சார்பற்ற நிறுவனங்களுடனான இத்தகைய கலந்துரையாடல்கள் காலாண்டுக்கு ஒருமுறை தொடர்ச்சியாக நடத்தப்பட வேண்டும் எனவும் அரசாங்க அதிபர் தெரிவித்தார். அனைத்து தரப்பினரும் தமது அனுபவங்கள், தேவைகள், சவால்கள் மற்றும் எதிர்காலத் திட்டங்கள் தொடர்பாக சுதந்திரமாகக் கருத்துகளைப் பகிர்ந்துகொள்ளும் வகையில் திறந்த கலந்துரையாடல்களுக்கான தளமாக இக்கலந்தாய்வுகள் அமைய வேண்டும் எனவும் தெரிவித்தார். அரச சார்பற்ற நிறுவனங்கள் எதிர்காலத்திலும் மாவட்ட நிர்வாகத்துடன் இணைந்து ஒருங்கிணைந்த முறையில் செயற்பட்டு, மக்களின் தேவைகளை முன்னுரிமைப்படுத்திய அபிவிருத்தியை முன்னெடுக்குமாறும் அரசாங்க அதிபர் கேட்டுக்கொண்டார்.
அரச சார்பற்ற நிறுவனங்களின் திட்டங்கள் தொடர்பில் மீளாய்வு :
இவ்வாண்டு அரச சார்பற்ற நிறுவனங்களால் நடைமுறைப்படுத்தப்பட்டு வருகின்ற திட்டங்களின் முன்னேற்ற மீளாய்வு, 2026 ஆம் ஆண்டு யாழ்ப்பாண மாவட்டத்தில் அரச சார்பற்ற நிறுவனங்களால் நடைமுறை ப்படுத்தவுள்ள திட்டங்கள் தொடர்பாகவும், பிரதேச செயலாளர்களின் கோரிக்கை தொடர்பாகவும் நடைமுறைப்படுத்தப்படவுள்ள திட்டங்களில் காணப்பட்ட சமநிலையின்மை தொடர்பாகவும் ஆராயப்பட்டது. மேலும், இன்றைய கலந்தாய்வில் 9 சர்வதேச அரச சார்பற்ற நிறுவனங்களும் 24 உள்ளூர் அரச சார்பற்ற நிறுவனங்களும் என மொத்தம் 33 அரச சார்பற்ற நிறுவனங்கள் தங்களது திட்ட முன்னேற்ற அறிக்கைகள் மற்றும் எதிர்காலச் செயற்பாடுகளை முன்வைப்புக்கள் (Presentation) ஊடாக சமர்ப்பித்திருந்தார்கள் என்பது குறிப்பிடத்தக்கது.
கலந்தாய்வில் பங்குபற்றியவர் விபரங்கள் :
இக் கலந்தாய்வில் மேலதிக அரசாங்க அதிபர் திரு கே. சிவகரன், திட்டமிடல் பணிப்பாளர் இ.சுரேந்திரநாதன், உதவி மாவட்டச் செயலாளர் செல்வி உ தர்சினி, அரச சார்பற்ற நிறுவனங்களின் இணைப்பாளர் திரு. ந. தயாபரன், பிரதேச செயலாளர்கள், பிரதி உதவி திட்டமிடல் பணிப்பாளர்கள், தொடர்புடைய திணைக்களத் தலைவர்கள், சர்வதேச மற்றும் உள்ளூர் அரச சார்பற்ற நிறுவன பிரதிநிதிகள் மற்றும் மாவட்டச் செயலக உத்தியோகத்தர்கள் உள்ளிட்டோர் கலந்துகொண்டிருந்தார்கள்.

வடக்கு மாகாண பண்பாட்டலுவல்கள் திணைக்களத்தின் அனுசரணையுடன், வடமராட்சி தெற்கு மேற்கு பிரதேச செயலகமும் (கரவெட்டி) பிரதேச பண்பாட்டுப் பேரவையும் இணைந்து நடத்திய “பிரதேச பண்பாட்டு விழா 2026”, இன்று (06.10.2026) செவ்வாய்க்கிழமை பி.ப. 1.30 மணிக்கு கரணவாய் மூத்த விநாயகர் திருமண மண்டபத்தில், “எழுத்து சீர்காழி சங்கீதபூஷணம்” செல்லத்துறை குமாரசாமி அரங்கில் பல்வேறு கலை நிகழ்வுகளுடன் கோலாகலமாக நடைபெற்றது. வடமராட்சி தெற்கு மேற்கு பிரதேச செயலாளரும் பிரதேச பண்பாட்டுப் பேரவைத் தலைவருமான திருவாட்டி. உமாமகள் மணிவண்ணன் அவர்களின் தலைமையில் நடைபெற்றது. இவ்விழாவில், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் பிரதம விருந்தினராகவும், யாழ்ப்பாணப் பல்கலைக்கழக சமூகவியல் துறையின் சிரேஷ்ட விரிவுரையாளர் திரு. இராஜேஸ்வரன் இராஜேஸ்கண்ணன் அவர்கள் சிறப்பு விருந்தினராகவும் கலந்துகொண்டனர். கௌரவ விருந்தினர்களாக யாழ்ப்பாண மாவட்ட செயலக சிரேஷ்ட கலாசார உத்தியோகத்தர் திருவாட்டி. மாலினி கிருஷ்ணானந்தன், கரவெட்டி கிழக்கு இசைநாடகக் கலைஞர் “கலாபூஷணம்” காசியன் வீரபுத்திரன் மற்றும் அல்வாய் நாடகக் கலைஞர் “கலாபூஷணம்” மாணிக்கம் அனந்தராசன் ஆகியோர் கலந்துகொண்டு சிறப்பித்தனர்.
நிகழ்வுகள் :
பண்பாட்டு ஊர்வலத்துடன் விழா ஆரம்பமானதையடுத்து, விருந்தினர்களை வரவேற்றல், மங்கள விளக்கேற்றல் ஆகிய நிகழ்வுகள் இடம்பெற்றன. தொடர்ந்து அமிர்தவாஹினி இசை மன்ற மாணவர்களின் தமிழ்த்தாய் வாழ்த்து மற்றும் குருக்ஷேத்திரம் நடனாலய மாணவர்களின் வரவேற்பு நடனம் ஆகியன இடம்பெற்றன. இதனைத் தொடர்ந்து வடமராட்சி தெற்கு மேற்கு உதவிப் பிரதேச செயலாளர் திரு. செல்வரத்தினம் சாருத்தன் வரவேற்புரையாற்றினார். “கலாபூஷணம்” கே.எஸ். சிவஞானராஜா அவர்களால் அரங்கு உத்தியோகபூர்வமாகத் திறந்து வைக்கப்பட்டது. பின்னர் கலாசார மத்திய நிலைய மாணவர்களின் நடேச கீர்த்தனம் இடம்பெற்றதுடன், பிரதேச செயலாளரின் தலைமையுரையும் இடம்பெற்றது. தொடர்ந்து கலையக நடனாலய மாணவர்களின் “பாரதியின் பன்முக நடனம்”, கரவெட்டி பிரதேச கலைஞர்களின் “ஏழு பிள்ளை நல்ல தங்காள்” இசை நாடகம், விக்னா இசை மன்ற கலைஞர்களின் வாத்திய சங்கமம், குருக்ஷேத்திரம் நடனாலய மாணவர்களின் அம்மன் கீர்த்தனம் மற்றும் கரவெட்டி பிரதேச கலைஞர்களின் கவியரங்கம் உள்ளிட்ட பல்வேறு கலை நிகழ்வுகள் அரங்கேற்றப்பட்டு பார்வையாளர்களைக் கவர்ந்தன. இதனையடுத்து சிறப்பு விருந்தினர் திரு. இராஜேஸ்வரன் இராஜேஸ்கண்ணன் அவர்களின் சிறப்புரையும், தொடர்ந்து முதன்மை விருந்தினர் யாழ்ப்பாண மாவட்டச் செயலாளர் திரு. மருதலிங்கம் பிரதீபன் அவர்களின் உரையும் இடம்பெற்றன. விழாவின் முக்கிய நிகழ்வாக, கலைத்துறையின் பல்வேறு பிரிவுகளில் சாதனை படைத்த மூத்த மற்றும் இளம் கலைஞர்களுக்கு சிறப்பு விருதுகள் வழங்கி கௌரவிக்கப்பட்டது. அத்துடன் கலைமன்றங்களுக்கு இடையிலான போட்டிகளில் வெற்றியீட்டியவர்களுக்கான பரிசில்களும் வழங்கப்பட்டன.
“கலை ஞான வாருதி” விருது பெற்றவர்கள்:
திருமதி. நாகேந்திரம் மங்கையற்கரசி – நடனம்
திரு. சின்னவன் சின்னராசா – கூத்து
திரு. தம்பு செல்வரத்தினம் – வாத்தியக் கலை (தவில்)
“கலை வாருதி” விருது பெற்றவர்கள்:
திருமதி. நிருஜா ஞானசம்பந்தன் – நடனம்
திருமதி. இந்திராதேவி ஆனந்தராசா – சிறுகதை
திருமதி. ஞானதயாளன் கவிதா – நடனம்
“இளங்கலைஞர்” விருது பெற்றவர்கள்:
திருமதி. விஷ்ணுகா பவித்திரகாந் – நடனம்
திரு. சக்திவேல் கமலகாந்தன் – கவிதை
திரு. ஜெயராசிங்கம் பிரதீசன் – ஓவியம்
நிகழ்வின் நிறைவில் அமிர்தவாஹினி இசை மன்ற மாணவர்களின் தமிழ் மொழி வாழ்த்து இடம்பெற்றதுடன், கரவெட்டி கலாசார உத்தியோகத்தர் திருமதி. ஹரிஹரசுதன் காயத்திரி அவர்களின் நன்றியுரையுடன் விழா இனிதே நிறைவுற்றது. வடமராட்சி தெற்கு மேற்கு பிரதேசத்தின் கலை மற்றும் பண்பாட்டுப் பாரம்பரியங்களைப் பாதுகாத்து, அவற்றை அடுத்த தலைமுறையினரிடம் கொண்டு செல்லும் நோக்கில் ஏற்பாடு செய்யப்பட்ட இவ்விழாவில், கலைஞர்கள், கலைமன்ற உறுப்பினர்கள், பிரதேச செயலக உத்தியோகத்தர்கள், பண்பாட்டுப் பேரவை உறுப்பினர்கள் மற்றும் பொதுமக்கள் எனப் பலரும் கலந்துகொண்டு சிறப்பித்தனர்.


கோப்பாய் ஆசிரியர் கலாசாலையின் ஆசிரியர் மாணவர்களினால் ஏற்பாடு செய்யப்பட்ட ஆசிரியர் தின விழா கோப்பாய் ஆசிரியர் கலாசாலையின் அதிபர் 'செந்தமிழ்ச் சொல்லருவி' எஸ். லலீசன் அவர்களின் தலைமையில் இன்று(06.10.2026) செவ்வாய்க்கிழமை காலை 8.30 மணிக்கு கலாசாலையின் ரதிலட்சுமி மண்டபத்தில் சிறப்பாக நடைபெற்றது. இந்நிகழ்வில், யாழ்ப்பாண மாவட்டச் அரசாங்க அதிபர் திரு. மருதலிங்கம் பிரதீபன் பிரதம விருந்தினராகக் கலந்துகொண்டு சிறப்பித்தார். கலாசாலையின் முன்னாள் விரிவுரையாளர் திருமதி பரமேஸ்வரி நாகரத்தினம் சிறப்பு விருந்தினராகக் கலந்துகொண்டார்.
பிரதம விருந்தினர் உரை :
அரசாங்க அதிபர் தமதுரையில், ஆசிரியர் பணி மிகவும் உயர்ந்த சமூகப் பணியாகும் எனத் தெரிவித்த அவர், வைத்தியர் ஒருவர் ஒரு நோயாளியைக் காப்பாற்றுகின்றார், பொறியியலாளர் ஒருவர் ஒரு கட்டிடத்தை உருவாக்குகின்றனர் ஆனால், ஒரு நல்ல ஆசிரியர் ஒரு நல்ல சமுதாயத்தை உருவாக்குகின்றார். மனிதனின் வளர்ச்சிக்கு அறிவு, திறன், மனப்பான்மை ஆகிய மூன்றும் முக்கியமானவை எனச் சுட்டிக்காட்டிய அரசாங்க அதிபர், ஆசிரியர்கள் இம்மூன்று துறைகளிலும் தொடர்ச்சியாகத் தங்களை மேம்படுத்திக்கொள்ள வேண்டும் என்றார். மாறிவரும் நவீன உலகில் மாணவர்கள் தகவல் தொழில்நுட்பம் மற்றும் செயற்கை நுண்ணறிவு உள்ளிட்ட நவீன தொழில்நுட்பங்களின் ஊடாகப் பரந்த அறிவைப் பெற்றுவருகின்றனர். எனவே, அவர்களைக் கற்பிக்கும் ஆசிரியர்களும் தமது அறிவையும் கற்பித்தல் திறன்களையும் தொடர்ச்சியாகப் புதுப்பித்துக்கொள்ள வேண்டியது அவசியம் என வலியுறுத்தினார். பாட அறிவை வழங்குவதுடன் ஆசிரியர்களின் பணி நிறைவடைவதில்லை என்றும், மாணவர்களிடையே சமூக விழுமியங்கள், ஒழுக்கம், பொறுப்புணர்வு மற்றும் சரியான மனப்பான்மையையும் உருவாக்குவது ஆசிரியர்களின் முக்கியமான பொறுப்பு என்றும் தெரிவித்தார். ஆசிரியர் பணி என்பது மிகவும் உன்னதமான, உயர்ந்த ஒரு பணியாகும். அந்த வரமும் வாய்ப்பும் உங்களுக்கு வழங்கப்பட்டுள்ளது. அதனைச் சரியான முறையில் பயன்படுத்துவதன் மூலம் உங்கள் சமூகத்தை மட்டுமன்றி, தேசிய மற்றும் சர்வதேச மட்டத்திலும் சிறந்த மாணவர்களை உருவாக்குவதற்கு ஆசிரியர்கள் பங்களிக்க முடியும். மேலும், ஆசிரியர் பணி சம்பளத்திற்காகவோ அல்லது ஒரு நியமனத்திற்காகவோ மேற்கொள்ளப்படும் சாதாரண தொழில் அல்ல எனக் குறிப்பிட்ட அவர், 30 ஆண்டுகளுக்கு முன்னர் பெற்ற அறிவை வைத்துக்கொண்டு 30 ஆண்டுகளுக்குப் பின்னர் மாணவர்களை வழிநடத்த முடியாது எனத் தெரிவித்தார். ஆசிரியர்கள் தொடர்ச்சியான கல்வி, உயர்கல்வி, தொழில்முறைப் பயிற்சி மற்றும் சுயமேம்பாட்டில் ஈடுபட வேண்டும் என்றும் அவர் கேட்டுக்கொண்டார். ஒரு மாணவன் வாழ்க்கையில் உயர்வடையும் போது அதைக் கண்டு முதலில் மகிழ்ச்சியடையும் நபர் ஆசிரியரே எனக் குறிப்பிட்ட அரசாங்க அதிபர், மாணவர்களின் வெற்றியில் ஆசிரியர்களின் பங்களிப்பு அளப்பரியது என்றார். ஆசிரியர்கள் தங்களை முதலில் வளப்படுத்திக்கொண்டால், அவர்கள் கற்பிக்கும் மாணவர் சமுதாயமும் அறிவு, திறன் மற்றும் சிறந்த மனப்பான்மை கொண்ட வளமான சமுதாயமாக உருவாகும் எனவும் அரசாங்க அதிபர் தெரிவித்தார். ஆசிரியர்கள் சமூகத்தின் அடித்தளக் கட்டுமான சக்திகளாகவும், இளைய தலைமுறையைச் சரியான பாதையில் வழிநடத்தும் முக்கியமான பொறுப்பை வகிப்பவர்களாகவும் உள்ளனர் எனக் குறிப்பிட்ட அவர், யாழ்ப்பாண மாவட்டம், வடமாகாணம் மற்றும் நாட்டின் முன்னேற்றத்திற்கு ஆசிரியர்களின் முழுமையான பங்களிப்பை எதிர்பார்ப்பதாகத் தெரிவித்தார்.
நிகழ்வுகள் :
விழாவின் ஆரம்ப நிகழ்வாக, விருந்தினர்கள் மற்றும் கலாசாலை விரிவுரையாளர்கள், கலாசாலை சிவன் ஆலயத்திலிருந்து மங்கல வாத்திய இசையுடன் விழா மண்டபத்திற்கு ஊர்வலமாக அழைத்துச் செல்லப்பட்டனர். இதனைத் தொடர்ந்து நடைபெற்ற பிரதான நிகழ்வில் ஆசிரியர் தினத்தின் முக்கியத்துவம், ஆசிரியர்களின் அர்ப்பணிப்பு மற்றும் சமூகத்தில் ஆசிரியர்களின் பங்களிப்பு தொடர்பான கருத்துரைகள் இடம்பெற்றன. மேலும், கலாசாலை விரிவுரையாளர்கள் மற்றும் வடக்கு மாகாணக் கல்வித் திணைக்களத்தினால் முன்னெடுக்கப்படும் பட்டதாரி ஆசிரியர் சேவைப் பயிற்சியாளர்களின் பங்குபற்றுதலுடன் பல்வேறு கலை நிகழ்வுகளும் இடம்பெற்றன. தொடர்ந்து ஆசிரியர் கலாசாலையின் ஆசிரியர் மாணவர்களின் விரிவுரையாளர்கள் கெளரவிக்கப்பட்டனர். ஆசிரியர் தொழிலின் மாண்பையும் ஆசிரியர்களின் அர்ப்பணிப்பையும் எடுத்துரைக்கும் வகையில் நடைபெற்ற இவ்விழாவில், கலாசாலை விரிவுரையாளர்கள், ஆசிரியர் மாணவர்கள் உள்ளிட்ட பலரும் கலந்துகொண்டனர்.

பால்நிலை சமத்துவம் தொடர்பான தேசிய மற்றும் சர்வதேச சட்டங்கள், கொள்கை ரீதியான கடப்பாடுகள் மற்றும் அவற்றை நடைமுறைப்படுத்துவதற்கான வழிமுறைகள் தொடர்பான விழிப்புணர்வு செயலமர்வு, யாழ்ப்பாண மாவட்ட மேலதிக அரசாங்க அதிபர் திரு. கே. சிவகரன் அவர்களின் தலைமையில் இன்று (06.10.2026) மாவட்டச் செயலக செயலமர்வு மண்டபத்தில் நடைபெற்றது. பால்நிலை சமத்துவத்தை மேம்படுத்துதல், பால்நிலை அடிப்படையிலான வன்முறைகளைத் தடுத்தல் மற்றும் அவற்றினால் ஏற்படும் பிரச்சினைகளை உரிய முறையில் கையாள்வதற்கான அறிவையும் புரிதலையும் உத்தியோகத்தர்களிடையே மேம்படுத்தும் நோக்கில் இச்செயலமர்வு ஏற்பாடு செய்யப்பட்டது.
தலமையுரை :
இதன்போது கருத்துத் தெரிவித்த மாவட்ட மேலதிக அரசாங்க அதிபர் அவர்கள் பால்நிலை சமத்துவம் தொடர்பாக மாவட்ட மற்றும் பிரதேச மட்டங்களில் பல்வேறு செயற்றிட்டங்களும் செயற்பாடுகளும் முன்னெடுக்கப்பட்டு வருவதாகத் தெரிவித்தார். கிராம மட்டங்களில் பால்நிலை சமத்துவம் தொடர்பான பல்வேறு பிரச்சினைகளை மகளிர் அபிவிருத்தி உத்தியோகத்தர்கள் எதிர்கொண்டு வருவதுடன், அவற்றுக்கான பொருத்தமான தீர்வுகளையும் வழங்கி வருவதாகக் குறிப்பிட்ட அவர், இத்தகைய பிரச்சினைகளை சட்ட ரீதியாகவும் நடைமுறை ரீதியாகவும் எவ்வாறு கையாள்வது என்பது தொடர்பான தெளிவான அறிவு உத்தியோகத்தர்களுக்கு அவசியமானது எனவும் தெரிவித்தார். தேசிய மற்றும் சர்வதேச சட்டங்கள் மற்றும் கொள்கை ரீதியான கடப்பாடுகளை பிரதேச மற்றும் மாவட்ட மட்டங்களில் மக்களுக்குப் பயனளிக்கும் வகையில் எவ்வாறு பயன்படுத்துவது, நிலையான செயற்பாடுகளை முன்னெடுப்பது மற்றும் முரண்பாடுகளைத் தவிர்த்து பிரச்சினைகளை திறம்படக் கையாள்வது போன்ற விடயங்களில் இச்செயலமர்வு பயனுள்ள அறிவைப் பெற்றுக்கொள்ள உதவும் எனவும் அவர் தெரிவித்தார். மேலும், பிரதேச மட்டங்களில் பால்நிலை சமத்துவம் தொடர்பான பிரச்சினைகள் மற்றும் முரண்பாடுகள் ஏற்படும் சந்தர்ப்பங்களில் அவற்றை உரிய முறையில் அடையாளம் கண்டு, சட்டரீதியான மற்றும் நடைமுறை ரீதியான அணுகுமுறைகளின் ஊடாக இலகுவாகக் கையாள்வதற்குத் தேவையான அறிவையும் திறன்களையும் இச்செயலமர்வின் மூலம் பெற்றுக்கொள்ளுமாறு அவர் உத்தியோகத்தர்களைக் கேட்டுக்கொண்டார்.
வளவாளர்கள் :
இச் செயலமர்வில், பால்நிலை வன்முறைகளால் ஏற்படும் உளவியல் பாதிப்புகள் மற்றும் அவற்றுக்கான வழிகாட்டல்கள் தொடர்பாக உளநல மருத்துவர் வைத்தியர் ஏ. வினோதா, பால்நிலை வன்முறைகளால் ஏற்படும் உடல் ரீதியான பாதிப்புகள் மற்றும் அவற்றை அடையாளம் காணும் முறைகள் தொடர்பாக சட்ட வைத்திய நிபுணர் வைத்தியர் எஸ். பிரணவன், பால்நிலை சமத்துவம் தொடர்பான தேசிய மற்றும் சர்வதேச சட்டங்கள் மற்றும் கொள்கை ரீதியான கடப்பாடுகள் தொடர்பாக யாழ்ப்பாணப் பல்கலைக்கழக சட்டபீட சிரேஷ்ட விரிவுரையாளர் திருமதி கோசலை மதன் ஆகியோர் வளவாளர்களாகக் கலந்துகொண்டு கருத்துரைகளை வழங்கினர். இச் செயலமர்வில் உதவி மாவட்டச் செயலாளர் செல்வி உ. தர்சினி, மகளிர் அபிவிருத்தி உத்தியோகத்தர்கள், உளவளத்துணை உத்தியோகத்தர்கள் மற்றும் மாவட்டச் செயலக சிறுவர் மற்றும் பெண்கள் அபிவிருத்தி உத்தியோகத்தர்கள் உள்ளிட்டோர் கலந்துகொண்டனர்.

தேசிய உற்பத்தித்திறன் போட்டி 2025/2026 இல் முதலாம் இடத்தைப் பெற்ற யாழ்ப்பாண மாவட்டச் செயலகத்தின் வெற்றிக்காக அர்ப்பணிப்புடன் ஒருங்கிணைந்து செயற்பட்ட உத்தியோகத்தர்களைப் பாராட்டும் நிகழ்வு, மேலதிக அரசாங்க அதிபர் திரு. கே. சிவகரன் அவர்களின் தலைமையில் இன்று (05.10.2026) மாவட்டச் செயலக கேட்போர் கூடத்தில் நடைபெற்றது.
மக்கள் சேவையை வலுப்படுத்தியமைக்கான அங்கீகாரம் :
யாழ்ப்பாண மாவட்டச் செயலகத்தின் சிறப்பான நிர்வாகச் செயற்பாடுகள், வளங்களை வினைத்திறனுடன் பயன்படுத்துதல், பணிச் செயல்முறைகளில் உற்பத்தித்திறனை மேம்படுத்துதல் ஊடாக மக்கள் சேவையை வலுப்படுத்துதல் ஆகியவற்றுக்கான அங்கீகாரமாக இவ்விருது அமைந்துள்ளது. இவ்விருதானது மாவட்டச் செயலாளர் அவர்களின் தலைமைத்துவத்தின் கீழ் அர்ப்பணிப்புடனும் பொறுப்புணர்வுடனும் பணியாற்றி வரும் அனைத்து அதிகாரிகள் மற்றும் உத்தியோகத்தர்களின் கூட்டு முயற்சி, குழுப்பணி மற்றும் தொடர்ச்சியான பங்களிப்புக்குக் கிடைத்துள்ள முக்கியமான அங்கீகாரமாகும்.
தலைமையுரை :
சிறந்த தலைமைத்துவம் – ஒருங்கிணைந்த குழுச் செயற்பாடு : யாழ்ப்பாண மாவட்டச் செயலகம் முதலிடம்
– மேலதிக அரசாங்க அதிபர் கே. சிவகரன் யாழ்ப்பாண மாவட்டச் செயலகம் தேசிய உற்பத்தித்திறன் போட்டியில் முதலாம் இடத்தைப் பெற்றிருப்பது, அரசாங்க அதிபரின் சிறந்த தலைமைத்துவம் மற்றும் வழிகாட்டலின் கீழ் முன்னெடுக்கப்பட்ட சிறப்பான செயற்பாடுகளுக்குக் கிடைத்துள்ள முக்கியமான அங்கீகாரமாகும். உற்பத்தித்திறனை உயர்த்துதல், மக்களுக்கு வழங்கப்படும் சேவைகளின் தரம், வேகம் மற்றும் வினைத்திறனை மேம்படுத்துதல் ஆகிய துறைகளில் மாவட்டச் செயலகம் குறிப்பிடத்தக்க முன்னேற்றத்தைப் பதிவு செய்துள்ளது எனத் தெரிவித்தார். இந்த வெற்றியை அடைவதில் உற்பத்தித்திறன் ஒருங்கிணைப்பாளரான உதவி மாவட்டச் செயலாளர், உற்பத்தித்திறன் உத்தியோகத்தர்கள் மற்றும் அனைத்து பதவிநிலை உத்தியோகத்தர்கள் மற்றும் உத்தியோகத்தர்களின் அர்ப்பணிப்பான பங்களிப்பும் ஒருங்கிணைந்த குழுச் செயற்பாடும் முக்கிய பங்காற்றியுள்ளன. எனவே, இவ் வெற்றி சிறந்த தலைமைத்துவத்தின் கீழ் ஒன்றிணைந்து செயற்பட்ட ஒட்டுமொத்த மாவட்டச் செயலகக் குழுவினரின் அர்ப்பணிப்பு, பொறுப்புணர்வு மற்றும் கூட்டுப்பணிக்குக் கிடைத்துள்ள கௌரவமாகும். தேசிய ரீதியில் கிடைத்துள்ள இந்த அங்கீகாரம், எதிர்காலத்தில் உற்பத்தித்திறனை மேலும் மேம்படுத்துவதற்கும், பணிச் செயல்முறைகளைத் தொடர்ந்து நவீனமயப்படுத்துவதற்கும், மக்களுக்கு இன்னும் சிறந்த, விரைவான மற்றும் வினைத்திறன்மிக்க அரச சேவையை வழங்குவதற்கும் புதிய உத்வேகம் அளித்துள்ளதாக மேலதிக அரசாங்க அதிபர் கே. சிவகரன் தெரிவித்தார்.
உற்பத்தித்திறன் விருது வெறும் போட்டி வெற்றியல்ல; மக்கள் சேவைக்கான அங்கீகாரம் – அரசாங்க அதிபர்
தேசிய உற்பத்தித்திறன் போட்டியில் யாழ்ப்பாண மாவட்டச் செயலகம் தேசிய ரீதியில் முதலாம் இடத்தைப் பெற்றிருப்பது, மாவட்ட மக்களுக்கு வினைத்திறனானதும் தரமானதுமான சேவையை வழங்குவதற்காக அனைத்து உத்தியோகத்தர்களும் மேற்கொண்ட அர்ப்பணிப்புக்கும் உழைப்புக்கும் கிடைத்துள்ள அங்கீகாரம் என யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் தெரிவித்தார். அவர் மேலும் தெரிவிக்கையில், உற்பத்தித்திறன் போட்டியில் முதலாம் இடத்தைப் பெறுவது ஒரு சாதனையாகும். ஆனால் அந்த இடத்தைத் தொடர்ந்து தக்கவைத்துக் கொள்வது அதைவிடக் கடினமானது. எனவே, தற்போது பெற்றுள்ள இந்த வெற்றியைத் தக்கவைத்துக் கொள்வதுடன், எதிர்காலத்தில் இதற்கும் மேலான நிலையை அடைவதற்கும் நாம் அனைவரும் ஒன்றிணைந்து செயற்பட வேண்டும். இந்த வெற்றியின் உண்மையான உரிமையாளர்கள் மாவட்டச் செயலகத்தின் அனைத்து மட்டங்களிலும் பணியாற்றுகின்ற ஒவ்வொரு உத்தியோகத்தருமே ஆவர். மேலதிக அரசாங்க அதிபர் மற்றும் உதவி மாவட்ட செயலாளரின் வழிகாட்டுதலுடன் உற்பத்தித்திறன் தொடர்பான உத்தியோகத்தர்கள் அர்ப்பணிப்புடன் செயற்பட்டுள்ளனர். அதேபோன்று ஒவ்வொரு கிளையிலும் பணியாற்றும் உத்தியோகத்தர்களின் ஒத்துழைப்பும் இந்த வெற்றிக்கு முக்கிய காரணமாக அமைந்துள்ளது. பதவி நிலை உத்தியோகத்தர்களுக்கிடையிலான நல்லுறவு, திறந்த தொடர்பாடல், ஒருவருக்கொருவர் வழங்கும் ஒத்துழைப்பு மற்றும் ஒரே நோக்குடன் செயற்படுதல் ஆகியவை எமது வெற்றியின் முக்கிய அடித்தளங்களாகும். உற்பத்தித்திறன் செயற்பாடுகள் ஆரம்பிக்கப்பட்ட காலங்களில் அது சிரமமான ஒரு பணியாகப் பார்க்கப்பட்டிருந்தாலும், தற்போது அது எமது அன்றாட அலுவலகப் பணிகளின் ஒரு பகுதியாக மாறியுள்ளது. இதன் மூலம் அலுவலகத்தின் செயல்திறனை மட்டுமன்றி பொதுமக்களுக்கு வழங்கப்படும் சேவையின் தரத்தையும் மேம்படுத்த முடிந்துள்ளது. அலுவலகப் பொறுப்புகளுடன் தங்களது தனிப்பட்ட மற்றும் குடும்பப் பொறுப்புகளையும் சமநிலைப்படுத்திக் கொண்டு உத்தியோகத்தர்கள் மேற்கொள்ளும் அர்ப்பணிப்பான சேவை பாராட்டுக்குரியது. இந்த முதலாம் இடம் வெறுமனே ஒரு போட்டியில் பெற்ற வெற்றியாக பார்க்கப்படக் கூடாது. மாவட்ட மக்களுக்கு நாம் வழங்கும் சேவையின் தரத்திற்கான ஒரு அங்கீகாரமாக இதனைப் பார்க்க வேண்டும். எனவே, எதிர்காலத்திலும் மக்களை மையமாகக் கொண்ட வினைத்திறனான சேவையை வழங்குவதை எமது பிரதான இலக்காகக் கொண்டு செயற்பட வேண்டும் எனத் தெரிவித்தார். மேலும், இன்றைய நாள் மாவட்டச் செயலகத்தின் அனைத்து உத்தியோகத்தர்களையும் மனதாரப் பாராட்டக்கூடிய மகிழ்ச்சியான நாளாக அமைந்துள்ளதாகத் தெரிவித்த அரசாங்க அதிபர், இந்த வெற்றியை ஏற்படுத்துவதற்கு பங்களித்த அனைத்து உத்தியோகத்தர்களுக்கும் நன்றியையும் பாராட்டையும் தெரிவித்தார். மாவட்ட நிர்வாகத்தை மேலும் வலுப்படுத்துவதற்கு எதிர்காலத்திலும் அனைத்து உத்தியோகத்தர்களினதும் ஒற்றுமையானதும் அர்ப்பணிப்பானதுமான ஒத்துழைப்பு தொடர வேண்டும் எனவும் அவர் கேட்டுக்கொண்டார்.
உற்பத்தித்திறன் செயற்பாடுகள் தொடர்பாக உத்தியோகத்தர்களின் அனுபவப் பகிர்வு :
நிகழ்வின் ஒரு பகுதியாக, மேலதிக அரசாங்க அதிபர்(காணி), திட்டமிடல் பணிப்பாளர், பிரதம கணக்காளர், பிரதம பொறியியலாளர், பிரதம உள்ளகக் கணக்காய்வாளர், உதவி மாவட்டச் செயலாளர், நிர்வாக உத்தியோகத்தர் உள்ளிட்ட பதவிநிலை உத்தியோகத்தர்கள் மற்றும் ஏனைய உத்தியோகத்தர்கள் தமது உற்பத்தித்திறன் செயற்பாடுகள் தொடர்பான பணியனுபவங்கள் மற்றும் கருத்துக்கள் தொடர்பான அனுபவப் பகிர்வுகளை வழங்கினர். இன்றைய நிகழ்வில் உற்பத்தித்திறன் செயற்பாடுகளை ஒருங்கிணைத்த உதவி மாவட்டச் செயலாளர் செல்வி உ. தர்சினி மற்றும் உற்பத்தித்திறன் உத்தியோகத்தர்களான திரு. செ. பிரசாத், திரு. அ. அ. வினிஸ்ரன், திருமதி ந. லதாங்கி, திருமதி சி. சசிதா மற்றும் திருமதி யோ.கிருஷாந்தினி ஆகியோர் ஆற்றிய சிறப்பான பங்களிப்பைப் பாராட்டி, அரசாங்க அதிபரால் கௌரவிக்கப்பட்டனர்.








