பால்நிலை சார் வன்முறைக்கு எதிரான செயற்பாட்டு குழு கலந்துரையாடல் யாழ் மாவட்ட அரசாங்க அதிபர் அம்பலவாணர் சிவபாலசுந்தரன் அவர்களின் தலைமையில் மாவட்ட செயலக கேட்போா் கூடத்தில் நடைபெற்றது.
யாழ் மாவட்டத்தில் பெண்கள் உரிமைகள் மற்றும் சமத்துவத்தை மேம்படுத்தும் நோக்கில் பெண்கள் எதிர்நோக்கும் பால்நிலை சார் வன்முறைகளுக்கு எதிராக செயற்படுத்தும் வேலை திட்டங்கள் தொடர்பான விடயங்கள் கலந்துரையாடப்பட்டன
குறிப்பாக பிரதேச செயலகங்களிலிருந்து பெண்கள் அபிவிருத்தி பிரிவினரால் கடந்த நான்கு ஆண்டுகளில் கிடைக்கப்பெற்ற முறைப்பாடுகள், அதிகளவு முறைப்பாடுகள் கிடைக்கப்பெற்ற இடங்கள் , நடைபெற்ற விழிப்புணர்வு நிகழ்வுகள், பெண்கள் அபிவிருத்தி உத்தியோகத்தர்கள் எதிர்நோக்கும் சவால்கள், தமிழ் பேசும் பெண் பொலீஸ் அலுவலர்களது தேவைப்பாடுகள்,SGBV சார் செயற்பாடுகளை மேலும் வினைத்திறனாக்க மேற்கொள்ள வேண்டிய நடவடிக்கைகள், பாதிக்கப்பட்டவர்களை சிகிச்சைக்கு கொண்டு செல்வதில் எதிர்நோக்கும் போக்குவரத்து சிக்கல்கள் மற்றும் பால்நிலை சார் வன்முறைக்கு எதிரான முற்காப்பு நடவடிக்கைககள் தொடர்பான விடயங்கள் விரிவாக கலந்துரையாடப்பட்டன.
யாழ் மாவட்ட செயலக வருடாந்த ஒன்றுகூடல் நிகழ்வு மாவட்ட செயலக கணக்காளரும் நலன்புரி கழக தலைவருமான அ.நிர்மல் அவர்களின் தலைமையில் நேற்றைய தினம் (26.04.2023) மாலை 3.00 மணிக்கு மாவட்ட செயலகவளாகத்தில் நடைபெற்றது.
மங்கள விளக்கேற்றலுடன் இனிதே ஆரம்பமான நிகழ்வில் வரவேற்பு நடனம் , கவிதை , நடனம் ,நாடகம், இசைநிகழ்ச்சிகள் போன்ற சிறப்பு நிகழ்வுகள் இடம்பெற்றதுடன் ஐந்தாம் தர புலமைப்பரிசில், கா.பொ.த சாதாரணதரம், க.பொ.த உயர்தரம் போன்ற பரீட்சைகளில் சித்திபெற்ற உத்தியோகத்தர்களின் பிள்ளைகளை கௌரவித்தல், ஓய்வு பெற்று சென்றோா், அரச சேவையில் வெள்ளி விழாவை பூர்த்தி செய்தோர், இடமாற்றம் பெற்று சென்றோா், போன்றோரை கௌரவித்தல் ஆகிய நிகழ்வுகளும் இடம்பெற்றமை குறிப்பிடத்தக்கது.
யாழ்ப்பாண மாவட்ட செயலகமும் வேர்ல்ட் விஷன் நிறுவனமும் இணைந்து நடாத்திய விஷேட தேவையுள்ள சிறுவர்களுக்கான அர்த்தமுள்ள குதூகலிப்பும் பிறந்த நாள் கொண்டாட்டமும் நிகழ்வு (11.04.2023) காலை 9.00 மணிக்கு சாவகச்சேரி கலாசார மண்டபத்தில் நடைபெற்றது.
இந்நிகழ்வு உடல்ரீதியாக அங்கவீனமுற்ற விசேட மாணவர்களை மகிழ்வூட்டும் நோக்கில் சாவகச்சேரி, நல்லூர் மற்றும் யாழ்ப்பாணம் ஆகிய பிரதேச செயலக பிரிவுகளைச் சேர்ந்த 100 மாணவர்களை உள்ளடக்கியதாக நடைபெற்றதுடன் கலந்துகொண்ட சிறுவர்களுக்கு கற்றல் உபகரணங்களும் வழங்கப்பட்டன.
வளவாளராக கலந்துகொண்ட உளவள வைத்தியர் திருமதி. முல்லை பரமேஸ்வரன் அவர்கள் “விஷேட தேவைகளையுடைய சிறுவர்களின் திறன்களை மேம்படுத்தல்” தொடர்பாக கருத்துக்கூறினார்.
தொழில்நுட்ப மாற்றுப் பயிற்சியில் கலந்து கொண்ட தொழில் முயற்சியாளர்களுக்கான சான்றிதழ் வழங்கும் நிகழ்வு யாழ் மாவட்ட மேலதிக அரசாங்க அதிபர் ம.பிரதீபன் அவர்கள் தலைமையில் (18.04.2023) மாவட்டச் செயலக கேட்போர்கூடத்தில் இடம்பெற்றது. கைத்தொழில் அபிவிருத்தி சபையின் மாகாண பணிப்பாளர் சி.சிவகங்காதரன், மாவட்ட உதவிப்பணிப்பாளர் சி.சசிகரன் ஆகியோரினால் ஒழுங்குப்படுத்தப்பட்ட இந் நிகழ்வில் மாவட்ட அரசாங்கஅதிபர் அ.சிவபாலசுந்தரன் அவர்கள் பிரதம விருந்தினராக கலந்து சிறப்பித்ததுடன், அவர்களுக்கான சான்றிதழ்களையும் வழங்கி வைத்தார்.
கைத்தொழில் அபிவிருத்திசபையின் யாழ் மாவட்ட அலுவலகத்தினால் தொழில்முயற்சியாளர்களுக்கு பால் சார்ந்த உற்பத்தி பொருட்களை உருவாக்கல் மற்றும் பழங்கள், மரக்கறிகள் போன்றவற்றிலிருந்து நீரகற்றல் போன்ற தொழில்நுட்ப மாற்றுப் பயிற்சிகள் 81 முயற்சியாளர்ளுக்கு வழங்கப்பட்டது.
யாழ்ப்பாண மாவட்ட அரசாங்க அதிபர் திரு. அம்பலவாணர் சிவபாலசுந்தரன் அவர்கள் சகல மக்களிற்கும் இப் புதுவருடம் நல்ல ஆரோக்கியத்தையும், சுபீட்சத்தையும், சௌபாக்கியத்தையும் வழங்கி மகிழ்ச்சிகரமான வாழ்க்கைக்கு வழியேற்படுத்த எல்லாம் வல்ல இறைவனை பிரார்த்திப்பதாக தெரிவித்ததோடு, மாவட்ட செயலக உத்தியோகத்தர்களிற்கு (2023.04.17) புத்தாண்டு வாழ்த்துக்களை தெரிவித்ததுடன், பொதுமக்களுக்கு அர்ப்பணிப்பான சேவையினை உத்தியோகத்தர்கள் வழங்க வேண்டுமெனவும் தெரிவித்தார். அத்தோடு மாவட்ட செயலக உத்தியோகத்தர்கள் அனைவருக்கும் கைவிஷேசத்தினையும் வழங்கிவைத்தார்.
இந் நிகழ்வில் மாவட்டச் செயலக பதவிநிலை உத்தியோகத்தர்கள் உட்பட உத்தியோகத்தர்கள் அனைவரும் கலந்துகொண்டு அரசாங்க அதிபரின் ஆசியுடன் கைவிஷேசத்தினை பெற்றுகொண்டனர்.







