மூன்றாம் நிலை முறைசாராக் கல்வி, தொழில் சார் பயிற்சி முறைமை மூலம் மாணவர்களை முன்னேற்றுதல் தொடர்பான கலந்துரையாடல் யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களின் தலைமையில் (08.08.2024) பி. ப 03.00 மணிக்கு மாவட்டச் செயலக கேட்போர் கூடத்தில் நடைபெற்றது.
இதன் போது கருத்து தெரிவித்த பதில் அரசாங்க அதிபர் அவர்கள் ஒரு முன்னோடித் திட்டமாக ( Pilot Project) - திறன் அபிவிருத்தி உத்தியோகத்தர்கள் இம்மாதம் 31 ஆம் திகதிக்கு முன்னர் ஒவ்வொரு பிரதேச செயலக ரீதியாக ஒரு கிராம சேவையாளர் பிரிவு அல்லது அதனுடன் இணைந்த கிராம சேவையாளர் பிரிவினையும் இணைத்து ஆகக் குறைந்தது 100 இளைஞர் யுவதிகளுக்கான தொழிற்கல்வியினை ஏற்படுத்தவதற்கான விழிப்புணர்வு நிகழ்ச்சியினை ஒழுங்குபடுத்த வேண்டும் எனவும், இதன் முன்னேற்றங்கள் அடுத்த மாதம் ஆராயப்படும் எனவும் தெரிவித்தார். மேலும் இவ் விழிப்புணர்வுச் செயற்பாட்டிற்கு தொழில் பயிற்சி அதிகார சபையின் (VTA) ஒத்துழைப்பினை நல்குமாறும் கேட்டுக்கொண்டார்.
இக்கலந்துரையாடலில் திட்டமிடல் பணிப்பாளர், உதவி மாவட்டச் செயலாளர், பிரதேச செயலாளர்கள், தொழில் பயிற்சி அதிகார சபையின் (VTA) பிரதிப் பணிப்பாளர், தேசிய பயிலுநர் கைத்தொழில் பயிற்சி அதிகார சபையின் (NAITA) மாவட்ட முகாமையாளர், கல்வி வலய முறைசாராப்பிரிவு உதவிக்கல்விப் பணிப்பாளர்கள் மற்றும் துறைசார் உத்தியோகத்தர்கள் உள்ளிட்டோர் கலந்துகொண்டனர்.

மூன்றாம் காலாண்டுக்கான கணக்காய்வு முகாமைத்துவக் குழுக்கூட்டமானது யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களின் தலைமையில் (08.08.2024) காலை 09.30 மணிக்கு மாவட்டச் செயலக கேட்போர் கூடத்தில் நடைபெற்றது.
இக்கலந்துரையாடலில் கடந்தகால கூட்டத்தில் கலந்துரையாடப்பட்ட விடயங்களின் முன்னேற்றங்கள் தொடர்பாகவும் ஆராயப்பட்டது.
இக் கலந்துரையாடலில் மாவட்ட மேலதிக அரசாங்க அதிபர்(காணி) , சிரேஷ்ட உதவி கணக்காய்வாளர் நாயகம், கணக்காய்வாளர் அத்தியட்சகர், பிரதம உள்ளகக் கணக்காய்வாளர், பிரதம பொறியியலாளர், திட்டமிடல் பணிப்பாளர், உதவி மாவட்டச் செயலாளர், மாவட்ட செயலக பதவிநிலை உத்தியோகத்தர்கள், பிரதேச செயலாளர்கள் மாவட்ட மற்றும் பிரதேச செயலக கணக்காளர்கள், துறைசார் கிளைத்தலைவர்கள் உள்ளிட்டோர் கலந்துகொண்டனர்.

இந்தியாவிலிருந்து மீளக்குடியமர்ந்த குடும்பங்களுக்கு கிடைக்க வேண்டிய சேவைகள் தொடர்பான கலந்தாய்வானது யாழ்ப்பாண மாவட்ட பதில் அரசாங்க அதிபர் திரு மருதலிங்கம் பிரதீபன் அவர்களின் தலைமையில் இன்று (07.08.2024) காலை 10.00 மணிக்கு மாவட்டச் செயலக கேட்போர் கூடத்தில் நடைபெற்றது.
இக் கலந்தாய்வில் தலைமையுரையாற்றிய பதில் அரசாங்க அதிபர் அவர்கள் மீளக்குடியமர்ந்தவர்களுக்கான காணி மற்றும் அடிப்படைத் தேவைகளை முழுமையாக தீர்க்க முடியாவிட்டாலும் கட்டம் கட்டமாக தீர்க்கலாம் எனவும் தொடர்புடைய திணைக்களங்களின் ஒத்துழைப்பினை வழங்குமாறும் கேட்டுக்கொண்டதுடன், இக் குடும்பங்கள் தொடர்பான முன்னேற்ற மீளாய்வினை காலக்கிரமத்தில் தொடர்புடைய திணைக்களங்கள் மேற்கொள்ள வேண்டும் எனவும் கேட்டுக்கொண்டார்.
2023 ஆம் ஆண்டிலிருந்து இற்றைவரை இந்தியாவிலிருந்து மீளக்குடியமர்ந்த 83 குடும்பங்களில் - ஆய்வின் மூலம் காணி, வாழ்வாதாரம் உட்பட்ட தேவைப்பாடுகளை எதிர்நோக்கி வரும் இனங்கானப்பட்ட 23 குடும்பங்களுக்கு வழங்க வேண்டிய தேவைகள் மற்றும் சேவைகள் அதனைப் பெற்றுக் கொள்வதற்கான வழிவகைகள் குறித்த கலந்தாய்வானது தொடர்புடைய திணைக்களங்களுடன் நடைபெற்று பயனாளிகளுக்கான தீர்வு மற்றும் வழிகாட்டுதல்கள் வழங்கப்பட்டது. இக் கலந்தாய்விற்கான அனுசரணையினை IOM நிறுவனம் வழங்கியது.
இக் கலந்தாய்வில் மேலதிக அரசாங்க அதிபர் (காணி), மாகாணக் காணி ஆணையாளர், மாவட்ட சமுர்த்தி பணிப்பாளர், உதவி மாவட்டச் செயலாளர், பிரதேச செயலாளர்கள், பிரதி உதவித் திட்டமிடல் பணிப்பாளர்கள் உள்ளிட்ட துறைசார்ந்த பதிவிநிலை உத்தியோகத்தர்கள், மாவட்டச் செயலக உத்தியோகத்தர்கள், IOM மற்றும் OfERR (Ceylon) பிரதிநிதிகள், இந்தியாவிலிருந்து மீளக்குடியமர்ந்த குடும்ப உறுப்பினர்கள் உட்பட பலர் கலந்து கொண்டனர்.

தொழில் வழிகாட்டல் நிகழ்ச்சித் திட்டத்தின் பயிற்சி நெறியினை நிறைவு செய்த மாணவர்களுக்கான சான்றிதழ் வழங்கும் நிகழ்வானது யாழ்ப்பாண மாவட்ட பதில் அரசாங்க அதிபர் திரு மருதலிங்கம் பிரதீபன் அவர்களின் தலைமையில் இன்று (07.08.2024) பி. ப 03.00 மணிக்கு மாவட்டச் செயலக கேட்போர் கூடத்தில் நடைபெற்றது.
கல்வி அமைச்சினால் தொழில் கல்வியை மேம்படுத்தும் நோக்கில் க. பொ. த உயர்தரப் பரீட்சையில் தோற்றி பெறுபேற்றினை எதிர்பார்க்கின்ற மாணவர்களுக்கான தொழில் வழிகாட்டல் மூலம் தொழில் கல்வியை மேம்படுத்தும் பயிற்சி நெறியானது 2024.03.05 ஆம் திகதி தொடக்கம் 2024.05.05 ஆம் திகதி வரை யாழ்ப்பாண மாவட்டத்தின் பிரதேச செயலக ரீதியாக தெரிவு செய்யப்பட்ட 15 பாடசாலைகளில் நடாத்தப்பட்டது. இதன் ஒரு அங்கமாக யாழ்ப்பாண பிரதேச செயலக பிரிவுக்குட்பட்ட யாழ் வைத்தீஸ்வராக் கல்லூரியில் நடாத்தப்பட்ட நிகழ்ச்சித் திட்டத்தில் பங்குபற்றிய 44 மாணவர்களுக்கு சான்றிதழ் வழங்கப்பட்டது.
இந் நிகழ்வில் உதவி மாவட்டச் செயலாளர், முறைசாராப்பிரிவு உதவிக் கல்விப் பணிப்பாளர், ஆசிரியர் ஆலோசகர், வளவாளர்கள், மாவட்டச் செயலக உத்தியோகத்தர்கள், மாணவர்கள் கலந்து கொண்டனர்.
தொகைமதிப்பு மற்றும் புள்ளிவிபரவியல் திணைக்களம் நடாத்திய விழிப்புணர்வு நிகழ்ச்சித்திட்டம் இன்றைய தினம் (06.08.2024) காலை 9.00 மணிக்கு ராஜா கீறீம்கவுஸ் மண்டபத்தில் நடைபெற்றது.
இந் நிகழ்வில் கலந்து கொண்ட யாழ்ப்பாண மாவட்ட தொகைமதிப்பு ஆணையாளரும் யாழ் மாவட்ட பதில் அரசாங்க அதிபருமாகிய திரு.மருதலிங்கம் பிரதீபன் அவர்கள் இதுவரை நடைபெற்ற தொகைமதிப்பு செயற்பாடுகளில் ஈடுப்பட்ட பிரதேச செயலாளர்கள் மற்றும் உதவி பிரதேச செயலாளர்களுக்கு தனது பாரட்டுக்களையும் நன்றிகளையும் தெரிவித்ததோடு அவர்களுக்குரிய மெச்சுரைகளையும் வழங்கிவைத்தார்.
இந் நிகழ்வில் பிரதேச செயலாளர்கள், உதவி பிரதேச செயலாளர்கள், கணக்காளர்கள் மற்றும் மாவட்ட செயலக பதவிநிலை உத்தியோகத்தர்கள் உள்ளிட்ட பலர் கலந்து கொண்டனர்.








