யாழ்ப்பாண மாவட்டத்தின் தீவுப் பகுதிகளுக்கான பிரதான போக்குவரத்து இணைப்பாக விளங்கும் குறிகட்டுவான் இறங்குதுறை மற்றும் அதற்கான அணுகுச் சாலை புனரமைப்புப் பணிகளின் முன்னேற்றத்தை யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் இன்றைய (23.09.2026) நேரில் களவிஜயம் மேற்கொண்டு பார்வையிட்டார். குறிகட்டுவான் இறங்குதுறைக்கான அணுகுச் சாலையின் தற்போதைய நிலைமைகளை நேரில் பார்வையிட்ட அரசாங்க அதிபர், முன்னெடுக்கப்பட்டு வரும் புனரமைப்புப் பணிகளின் முன்னேற்றம் தொடர்பில் சம்பந்தப்பட்ட அதிகாரிகளுடன் கலந்துரையாடினார். குறிகட்டுவான் இறங்குதுறை அபிவிருத்திப் பணிகள் ரூ.1,283.80 மில்லியன் செலவில் இரு கட்டங்களாக முன்னெடுப்பு! குறிகட்டுவான் இறங்குதுறை அபிவிருத்தித் திட்டத்தின் முதலாம் கட்டப் பணிகள் 04.ஒக்டோபர் மாதம் 2025 அன்று ஆரம்பிக்கப்பட்டதுடன், இரண்டாம் கட்டப் பணிகள் 2026.04.22 அன்று ஆரம்பிக்கப்பட்டன. இவ்விரு கட்டங்களின் ஆரம்ப நிகழ்வுகளில் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் கௌரவ பிமல் ரத்நாயக்க அவர்களும், கடற்றொழில், நீரியல் மற்றும் கடல்வளங்கள் அமைச்சர் மற்றும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் ஆகியோர் பங்குபற்றி அபிவிருத்தி வேலைகளை ஆரம்பித்து வைத்தார்கள் என்பது குறிப்பிடத்தக்கது.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் ரூ.1,283.80 மில்லியன் நிதி ஒதுக்கீட்டில் முன்னெடுக்கப்படும் இத்திட்டத்தின் முதலாம் கட்டமாக ரூ.299.80 மில்லியன் செலவில் அணுகுச் சாலை மற்றும் நடைபாதையுடனான வீதிப் புனரமைப்புப் பணிகளும், இரண்டாம் கட்டமாக ரூ.984 மில்லியன் செலவில் குறிகட்டுவான் இறங்குதுறை புனரமைப்புப் பணிகளும் முன்னெடுக்கப்படுகின்றன. இத்திட்டங்கள் நிறைவு பெறுவதன் மூலம் நெடுந்தீவு, நயினாதீவு உள்ளிட்ட தீவுப் பகுதிகளுக்குச் செல்லும் போக்குவரத்து மற்றும் அணுகல் வசதிகள் மேம்படுத்தப்பட்டு, பொதுமக்கள், சேவை வழங்குநர்கள் மற்றும் சுற்றுலாப் பயணிகளின் பயணங்கள் இலகுபடுத்தப்படும். இதனூடாக தீவுப் பகுதிகளின் பொருளாதாரச் செயற்பாடுகள் மற்றும் சுற்றுலாத்துறை வளர்ச்சி ஊக்குவிக்கப்படும். நெடுந்தீவு மகா வித்தியாலய விளையாட்டு அபிவிருத்தி மற்றும் வீதி அபிவிருத்தி பணிகளை நேரில் ஆராய்வு: நெடுந்தீவு மகா வித்தியாலயத்தின் விளையாட்டு அபிவிருத்திப் பணிகளுக்காக விளையாட்டு அபிவிருத்தித் திணைக்களத்தினால் ரூ.22.46 மில்லியன் நிதி ஒதுக்கீடு செய்யப்பட்டுள்ளதற்கமைவாக, அப் பணிகளையும் நேரில் ஆய்வு செய்து வித்தியாலய அதிபருடனும் கலந்துரையாடினார் என்பதுடன், வீதி அபிவிருத்தி பணிகளையும் ஆய்வு செய்தார் என்பதும் குறிப்பிடத்தக்கது.

வடக்கு மாகாண பண்பாட்டலுவல்கள் அலகு மற்றும் கலாசார அலுவல்கள் திணைக்களத்தின் அனுசரணையுடன், காரைநகர் பிரதேச செயலகமும் பிரதேச கலாசார பேரவையும் இணைந்து ஏற்பாடு செய்த பண்பாட்டுப் பெருவிழா இன்றைய தினம் (22.09.2026) காரைநகர் இந்துக் கல்லூரியில் சிறப்பாக நடைபெற்றது. காரைநகர் பிரதேச கலாசார பேரவைத் தலைவரும் பிரதேச செயலாளருமான திருவாட்டி செல்வி நவரத்தினம் ரஞ்சனா அவர்களின் தலைமையில் நடைபெற்றது. இந்நிகழ்வில், பிரதம விருந்தினராக யாழ்ப்பாண மாவட்ட அரசாங்க அதிபரும் மாவட்ட செயலாளருமான உயர் திரு. மருதலிங்கம் பிரதீபன் அவர்கள் கலந்துகொண்டார். சிறப்பு விருந்தினர்களாக வடக்கு மாகாண பண்பாட்டலுவல்கள் அலகின் பிரதிப்பணிப்பாளர் திருவாட்டி தர்சினி நிதர்சன் அவர்களும், யாழ்ப்பாணப் பல்கலைக்கழக தமிழ்த்துறை முன்னாள் தலைவர் பேராசிரியர் கிருஸ்ணபிள்ளை விசாகரூபன் அவர்களும் கலந்துகொண்டனர். கௌரவ விருந்தினர்களாக யாழ்ப்பாண மாவட்ட செயலக சிரேஷ்ட கலாசார உத்தியோகத்தர் திருமதி கிருஸ்ணானந்தன் மாலினி, காரைநகர் கிராமியக் கலை இளங்கலைஞர் திரு. சற்குணநாதன் சத்தியராஜ் மற்றும் காரைநகர் நாடகத்துறை முதுகலைஞர் திரு. திருநாவுக்கரசு பிரபாகரன் ஆகியோர் கலந்து சிறப்பித்தனர்.
நிகழ்வுகள் :
கலை ஆற்றுகைகளுடன் ஆரம்பமான விழா விழாவின் ஆரம்ப நிகழ்வாக காரைநகர் பிரதேசத்தின் பல்வேறு கலை ஆற்றுகைகளுடன் விருந்தினர்கள் மண்டபத்திற்கு அழைத்துவரப்பட்டனர். தொடர்ந்து மங்கல விளக்கேற்றும் நிகழ்வு இடம்பெற்றதுடன், பிரதேச கலைஞர்களால் தமிழ்த்தாய் வாழ்த்து இசைக்கப்பட்டது. கலாசார பேரவைப் பொருளாளர் தி. பிரபாகரன் அவர்களால் “கதிரமலை அருமைநாயகம் அரங்கு” அரங்கத் திறப்புரை நிகழ்த்தப்பட்டதைத் தொடர்ந்து, கிழவன்காடு கலாமன்ற மாணவர்களின் வரவேற்பு நடனம் மற்றும் குழு இசை நிகழ்வுகள் இடம்பெற்றன. இதனைத் தொடர்ந்து உதவிப் பிரதேச செயலாளர் திரு. பா. முகுந்தன் அவர்களால் வரவேற்புரை நிகழ்த்தப்பட்டது. ஒரே அரங்கில் பல்வேறு கலை வடிவங்கள் பண்பாட்டுப் பெருவிழாவில் காரைநகர் பிரதேசத்தின் பாரம்பரிய கலைகளையும், கலைஞர்களின் திறமைகளையும் வெளிப்படுத்தும் வகையில் பல்வேறு கலை நிகழ்வுகள் இடம்பெற்றன. அத்தி நடனக் கலை மன்ற கலைஞர்களின் பக்திப் பாடல்கள், கலைஞர் சி. பிரசாந்தன் அவர்களின் நாட்டிய நிருத்தியம், கலாசார மத்திய நிலைய மாணவர்களின் கிராமியப் பாடல்கள், பிரதேச செயலக உத்தியோகத்தர்களின் கிராமியக் கதம்பம் மற்றும் தெய்வீக கானங்கள் ஆகியன சிறப்பாக இடம்பெற்றன. மேலும், கலாசார மத்திய நிலைய மாணவர்களின் ஒயிலாட்டம் மற்றும் குழு இசை நிகழ்வுகளும் நடைபெற்றன. தொடர்ந்து “வாத்திய சங்கமம்” எனும் இசை நிகழ்வை திருநாவுக்கரசு நுண்கலை மன்ற மாணவர்கள் வழங்கினர். இறுதியாக இலவசக் கல்வி இளையோர் அமைப்பின் மாணவர்களால் நாடகம் அரங்கேற்றப்பட்டது. கலைஞர்களுக்கு “கலைஞானச்சுடர்” விருதும் “கலைமுகை” விருதும் விழாவின் முக்கிய நிகழ்வாக, காரைநகர் பிரதேசத்தின் கலைத்துறைக்கு நீண்டகாலமாக ஆற்றிவரும் பங்களிப்பைப் பாராட்டும் வகையில் கலைஞர்கள் கௌரவிக்கப்பட்டனர். கலைத்துறையில் தமது நீண்டகாலப் பணியினூடாக பிரதேசத்தின் பண்பாட்டு அடையாளங்களைப் பாதுகாத்து, அவற்றை அடுத்த தலைமுறையினரிடம் கொண்டு செல்வதில் பங்களிப்பாற்றிய கலைஞர்களை அடையாளப்படுத்தி, 2026ஆம் ஆண்டுக்கான “கலைஞானச்சுடர்” விருதுகளும் “கலைமுகை” விருதுகளும் வழங்கி வைக்கப்பட்டன. இக்கௌரவிப்பு நிகழ்வு கலைஞர்களின் பங்களிப்பை அங்கீகரிப்பதுடன், அவர்களை மேலும் ஊக்குவிக்கும் வகையிலும் அமைந்தது. வெற்றியாளர்களுக்கு பரிசில்கள் இதனுடன், பிரதேச மட்ட கலைமன்றப் போட்டிகள் மற்றும் தேசிய கலை இலக்கியப் போட்டிகளில் வெற்றிபெற்ற மாணவர்கள், கலைஞர்கள் மற்றும் போட்டியாளர்களுக்கான பரிசில்களும் வழங்கி வைக்கப்பட்டன. இந்நிகழ்வின் நிறைவாக காரைநகர் கலாசார உத்தியோகத்தரால் நன்றியுரை வழங்கப்பட்டது. இந் நிகழ்வில் கலைஞர்கள், கலை ஆர்வலர்கள், பொதுமக்கள் மற்றும் பிரதேச செயலக உத்தியோகத்தர்கள் உள்ளிட்ட பல்வேறு தரப்பினரும் ஆர்வத்துடன் பங்கேற்றார்கள்.


நேர்மறை ஒழுக்கக் கட்டுப்பாடு தொடர்பாக 60 முன்பள்ளி ஆசிரியர்களுக்கான விழிப்புணர்வு நிகழ்வு அரசாங்க அதிபர் திரு மருதலிங்கம் பிரதீபன் அவர்கள் தலைமையில் இன்றைய தூ (22.09.2026) காலை 09.30 மணிக்கு யாழ்ப்பாணம் மாவட்டச் செயலக கேட்போர் கூடத்தில் நடைபெற்றது.
அரசாங்க அதிபரின் தலைமையுரை
யாழ்ப்பாண மாவட்டத்தில் முன்பள்ளி மட்டத்திலிருந்தே பிள்ளைகளிடையே நேர்மறையான சிந்தனை, ஒழுக்கம், பொறுப்புணர்வு, தலைமைத்துவப் பண்புகள் மற்றும் சமூகப் பொறுப்புணர்வை வளர்ப்பது அவசியம் என யாழ்ப்பாண மாவட்ட அரசாங்க அதிபர் தெரிவித்தார். முன்பள்ளி ஆசிரியர்கள் மற்றும் பணியாளர்களுக்காக ஏற்பாடு செய்யப்பட்டிருந்த சிறப்பு பயிற்சிப் பட்டறையில் உரையாற்றிய அவர், ஒரு பிள்ளை தனது குடும்பச் சூழலிலிருந்து வெளியே வந்து சமூகத்துடன் முதன்முதலாக இணையும் முக்கியமான தளமாக முன்பள்ளிகள் விளங்குகின்றன எனக் குறிப்பிட்டார். ஒரு பிள்ளையின் சமூகமயமாக்கல் செயற்பாட்டில் குடும்பத்திற்கு அடுத்த முக்கியமான இடம் முன்பள்ளியாகும். எனவே, முன்பள்ளி ஆசிரியர்களின் சிந்தனைகள், அணுகுமுறைகள் மற்றும் செயற்பாடுகள் பிள்ளைகளின் எதிர்கால ஆளுமை வளர்ச்சியில் குறிப்பிடத்தக்க தாக்கத்தை ஏற்படுத்துகின்றன எனத் தெரிவித்தார். மேலும், இன்றைய பெற்றோர் இருவரும் தொழிலில் ஈடுபடும் சூழ்நிலை அதிகரித்துள்ள நிலையில், பிள்ளைகளின் பராமரிப்பு மற்றும் வழிகாட்டலில் முன்பள்ளிகளின் பொறுப்பு மேலும் அதிகரித்துள்ளதாகவும் சுட்டிக்காட்டினார். பிள்ளைகளுக்கு ஒழுக்கம் மற்றும் சுற்றுச்சூழல் பொறுப்புணர்வை கற்பிப்பது வெறுமனே அறிவுறுத்தல்களாக இல்லாமல், நடைமுறைச் செயற்பாடுகள் மூலம் கற்றுக்கொடுக்கப்பட வேண்டும் எனவும் வலியுறுத்தினார்.
திண்மக் கழிவுகளை வகைப்படுத்துவது குறித்து பிள்ளைகளுக்கு கூறுவது மட்டும் போதாது. அவர்கள் அதை நடைமுறையில் செய்து கற்றுக்கொள்ளும் வகையில் வாய்ப்புகளை ஏற்படுத்த வேண்டும். சிறு வயதில் உருவாக்கப்படும் இத்தகைய பழக்கவழக்கங்களே எதிர்காலத்தில் பொறுப்புள்ள குடிமக்களை உருவாக்குகின்றனஎனவும் தெரிவித்தார். முன்பள்ளி ஆசிரியர்களின் பங்களிப்பை நினைவுகூர்ந்த அவர், ஒருவர் எந்த உயர்ந்த பதவியை அடைந்தாலும், தனது சிறுவயதில் வழிகாட்டிய ஆசிரியர்களின் தாக்கத்தை மறக்க முடியாது எனக் குறிப்பிட்டார். இதேவேளை, சாரணர் இயக்கத்தின் ஊடாக முன்பள்ளி பிள்ளைகளிடையே தலைமைத்துவம், ஒழுக்கம், பொறுப்புணர்வு மற்றும் சமூகப் பண்புகளை வளர்ப்பதற்கான புதிய செயற்பாடுகள் முன்னெடுக்கப்படுவது வரவேற்கத்தக்கது எனவும் அரசாங்க அதிபர் தெரிவித்தார். 2027ஆம் ஆண்டு முதல் முன்பள்ளி மட்டத்திலேயே சாரணியச் சிந்தனைகள் மற்றும் தலைமைத்துவப் பண்புகளை வளர்ப்பதற்கான திட்டங்கள் முன்னெடுக்கப்படவுள்ளதாகக் குறிப்பிட்டதுடன், இத்தகைய செயற்பாடுகள் பிள்ளைகளின் ஆளுமை வளர்ச்சிக்கு பயனுள்ளதாக அமையும் எனவும் தெரிவித்தார்.
முன்பள்ளி மட்டத்திலேயே மழலைகள் சாரணர்களை (சுப்பிப்பி) உருவாக்க நடவடிக்கை
அரசாங்க அதிபரின் ஒழுங்குபடுத்தலின் கீழ், யாழ்ப்பாண மாவட்ட சாரணர் சங்கத்தின் உதவி மாவட்ட ஆணையாளர் திரு. ஞானசம்பந்தன் அவர்கள், முன்பள்ளி மட்டத்திலிருந்தே மழலைகள் சாரணர்களை உருவாக்கி, அவர்களிடையே சாரணப் பண்புகள், ஒழுக்கம், பொறுப்புணர்வு மற்றும் தலைமைத்துவப் பண்புகளை வளர்ப்பதற்கான வழிமுறைகள் தொடர்பாக முன்பள்ளி ஆசிரியர்களுக்கு விளக்கமளித்தார்.
இவ் விழிப்புணர்வு நிகழ்வின் பிரதான நோக்கம்
பிள்ளைகளின் உடல், உள மற்றும் நடத்தை சார்ந்த பிரச்சினைகளை ஆரம்ப நிலையிலேயே கண்டறிதல், வீட்டிலும் முன்பள்ளியிலும் நேர்மறையான ஒழுக்கத்தை உருவாக்குதல், சிறுவர் பாதுகாப்புச் சட்டங்கள் தொடர்பில் ஆசிரியர்களை தெளிவூட்டுதல் மற்றும் தண்டனையற்ற நேர்மறை ஒழுக்க முறைகள் மூலம் பிள்ளைகளின் நல்ல பழக்கவழக்கங்களையும் பொறுப்புணர்வையும் வளர்த்தல் தொடர்பாக விழிப்புணர்வு வழங்கப்பட்டது. அத்துடன், பிள்ளைகளின் வளர்ச்சியில் பெற்றோரின் பங்கு மற்றும் பெற்றோருக்கு ஆசிரியர்கள் விழிப்புணர்வூட்ட வேண்டியதன் அவசியம் குறித்தும் கவனம் செலுத்தப்பட்டது.
வளவாளர்கள்:
“பிள்ளைகளிடம் ஏற்படும் சமூக பிறழ்வு நடத்தைகளை கட்டுப்படுத்துதல்” தொடர்பான வளவாளர் பகிர்வை யாழ்ப்பாணப் பல்கலைக்கழக கலைப்பீட சிரேஷ்ட விரிவுரையாளர் கலாநிதி S. ஜீவசுதன் வழங்கினார். மேலும், “நேர்மறை ஒழுக்கக் கட்டுப்பாட்டினை பிள்ளைகளிடையே வளர்த்தல்” என்ற தலைப்பில் மாவட்ட முன்பிள்ளைப்பருவ அபிவிருத்தி உத்தியோகத்தர் திரு. இ. அமலன் விளக்கமளித்தார். இவ் விழிப்புணர்வு ஆரம்ப நிகழ்வில் கலந்துகொண்ட வர்கள் : யாழ்ப்பாண மாவட்ட மேலதிக அரசாங்க அதிபர் திரு கே. சிவகரன், உதவி மாவட்டச் செயலாளர் செல்வி உ. தர்சினி, மாவட்ட சிறுவர் பாதுகாப்பு உத்தியோகத்தர் திரு. இ. செந்தூரன் மற்றும் சிறுவர் மற்றும் பெண்கள் தொடர்பான அபிவிருத்தி உத்தியோகத்தர்கள் உள்ளிட்ட பலர் கலந்துகொண்டனர்.

நலன்புரி நன்மைகள் வகைப்படுத்தப்பட்ட கொடுப்பனவு தொடர்பான கலந்துரையாடல் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (22.09.2026) மு. ப. 10.00 மணிக்கு யாழ்ப்பாண மாவட்ட செயலக செயலமர்வு மண்டபத்தில் நடைபெற்றது.
அரசாங்க அதிபரின் தலைமையுரை
அஸ்வெசும திட்டத்தை யாழ்ப்பாண மாவட்டத்தில் சிறப்பாக நடைமுறைப்படுத்துவதற்கு அர்ப்பணிப்புடன் செயற்பட்டு வரும் பிரதேச செயலாளர்கள் உள்ளிட்ட அனைத்து உத்தியோகத்தர்களுக்கும் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் பாராட்டுக்களையும் நன்றிகளையும் தெரிவித்தார். அஸ்வெசும திட்டத்தை நடைமுறைப்படுத்துவதில் யாழ்ப்பாண மாவட்டம் தேசிய மட்டத்தில் தொடர்ச்சியாக சிறந்த முன்னேற்றத்தை வெளிப்படுத்தி வருவதாகவும், அரச அதிகாரிகளுக்கான மாநாடுகள் மற்றும் இணையவழிக் கலந்துரையாடல்களிலும் மாவட்டத்தின் செயற்பாடுகள் பாராட்டப்பட்டுள்ளதாகவும் அரசாங்க அதிபர் தெரிவித்தார். தகுதியுடையவர்களுக்கு உரிய நன்மைகள் சென்றடைவதையும், தகுதியற்றவர்கள் நன்மைகளைப் பெறுவதைத் தடுப்பதையும் உறுதி செய்வதே அஸ்வெசும போன்ற நலன்புரித் திட்டங்களின் அடிப்படை நோக்கமாகும் என அவர் சுட்டிக்காட்டினார். அதேவேளை, தகுதியுடைய ஒருவர் நலன்புரிக் கொடுப்பனவைப் பெற முடியாத நிலை ஏற்படாதவாறும் அதிகாரிகள் உரிய கவனம் செலுத்த வேண்டும் எனவும் வலியுறுத்தினார். முறைப்பாடுகள் கிடைக்கப்பெறும் சந்தர்ப்பங்களில் அவற்றை உரிய முறையில் ஆராய்ந்து, கணினி முறைமையில் காணப்படும் தகவல்களுடன் கள நிலவரங்களையும் பரிசீலித்து, சாத்தியமான தீர்வுகளை விரைவாக வழங்க வேண்டும் எனவும் அவர் கேட்டுக்கொண்டார்.
அஸ்வெசுமவை வெறுமனே கொடுப்பனவு வழங்கும் திட்டமாகக் கருதாமல், வறுமை ஒழிப்பு மற்றும் சமூக வலுவூட்டலின் பரந்த நோக்கத்துடன் அணுக வேண்டும் எனக் குறிப்பிட்ட அரசாங்க அதிபர், ஒரு குடும்பத்தின் வறுமை நிலையை வருமானத்தை மட்டும் அடிப்படையாகக் கொண்டு தீர்மானிக்க முடியாது எனவும் தெரிவித்தார். குடிநீர், கல்வி, சுகாதாரம், வாழ்வாதாரம் உள்ளிட்ட பல்வேறு காரணிகளையும் உள்ளடக்கிய பல்பரிமாண வறுமையை கருத்திற்கொண்டு செயற்பட வேண்டியதன் அவசியத்தையும் வலியுறுத்தினார். அஸ்வெசும போன்ற திட்டங்களின் இறுதி நோக்கம் மக்களை நிரந்தரமாக நலன்புரிக் கொடுப்பனவுகளில் தங்கியிருக்கச் செய்வது அல்ல, அவர்களை படிப்படியாக வறுமையிலிருந்து மீட்டு, பொருளாதார ரீதியாக வலுவூட்டுவதாகும் என அரசாங்க அதிபர் தெரிவித்தார். மேலும், அரச சேவையில் நாம் வகிக்கும் பதவிகள் எமக்குக் கிடைத்துள்ள பொறுப்பும் வாய்ப்பும் ஆகும். அந்த வாய்ப்பை பொதுமக்களுக்கு நன்மை பயக்கும் வகையில் பயன்படுத்துவதே எமது கடமை. எமது காலப்பகுதியில் மக்களுக்குச் செய்யக்கூடிய நல்ல பணிகளைச் செய்து முடிப்பதே அரச சேவையின் உண்மையான பெறுமதியாகும் எனவும் குறிப்பிட்டார். அஸ்வெசும திட்டத்தை நடைமுறைப்படுத்துவதில் காணப்படும் இடர்பாடுகளை அடையாளம் கண்டு அவற்றுக்குத் தீர்வு காணும் வகையில் மாவட்டச் செயலக மட்டத்தில் தொடர்ச்சியான வழிகாட்டல்களும் ஒருங்கிணைப்பும் வழங்கப்படும் எனவும் அரசாங்க அதிபர் மேலும் தெரிவித்தார்.
அஸ்வெசும வகைப்படுத்தப்பட்ட கொடுப்பனவு – நடைமுறை மற்றும் தொழில்நுட்ப சவால்கள் குறித்து ஆராய்வு :
நலன்புரி நன்மைகள் ஊடாக வழங்கப்படும் வகைப்படுத்தப்பட்ட கொடுப்பனவுகளான முதியோர் கொடுப்பனவு, மாற்றுத்திறனாளிகளுக்கான கொடுப்பனவு மற்றும் சிறுநீரக நோயாளர்களுக்கான கொடுப்பனவு ஆகியவற்றுக்கான பயனாளர்களின் தரவுகளை சமூகப் பதிவேட்டு தரவுத்தளத்தில் உள்ளீடு செய்யும் பணியில் எதிர்நோக்கப்படும் நடைமுறைச் சிக்கல்கள் தொடர்பில் விரிவாகக் கலந்துரையாடப்பட்டது. இதன்போது, தரவு உள்ளீட்டுச் செயற்பாடுகளில் காணப்படும் நடைமுறைச் சிக்கல்களைத் தீர்ப்பதற்கான வழிமுறைகள், நலன்புரி நன்மைகள் தொடர்பான கணினிமயப்படுத்தப்பட்ட செயற்பாடுகளில் ஏற்படும் தொழில்நுட்ப ரீதியான பிரச்சினைகள் மற்றும் அவற்றைத் தீர்ப்பதற்குத் தேவையான நடவடிக்கைகள் உள்ளிட்ட பல்வேறு விடயங்கள் தொடர்பில் ஆராயப்பட்டன. மேலும், கொடுப்பனவு நடவடிக்கைகளை வினைத்திறனுடனும் துரிதமாகவும் முன்னெடுப்பதற்குத் தேவையான ஒருங்கிணைப்பு, தகவல் பரிமாற்றம் மற்றும் பிரதேச செயலக மட்டத்தில் எதிர்நோக்கப்படும் நடைமுறைச் சவால்கள் தொடர்பிலும் கலந்துரையாடப்பட்டது.
இக் கலந்துரையாடலில் பங்குபற்றியவர்கள் விபரங்கள் :
யாழ்ப்பாண மாவட்டச் செயலக மேலதிக அரசாங்க அதிபர் திரு. க. சிவகரன், உதவி மாவட்ட செயலாளர் செல்வி உ. தர்சினி, நலன்புரி நன்மைகள் சபையின் வடமாகாண இணைப்பாளர் திருமதி. மோகனநாதன், நலன்புரி நன்மைகள் சபையின் மாவட்ட உத்தியோகத்தர், மாவட்ட தொழில்நுட்ப உத்தியோகத்தர், பிரதேச செயலகங்களின் உதவி பிரதேச செயலாளர்கள், பிரதேச செயலக நலன்புரி விடய உத்தியோகத்தர்கள், முதியோர் மேம்பாட்டு மாவட்ட உத்தியோகத்தர் மற்றும் சமூக சேவைகள் உத்தியோகத்தர்கள் உள்ளிட்டோர் கலந்துகொண்டனர்.

கல்லுண்டாய் திண்மக்கழிவு முகாமைத்துவம் மற்றும் அதனால் பொதுமக்களுக்கு ஏற்படும் பாதிப்புகளைத் தடுப்பது தொடர்பான விசேட கலந்துரையாடல், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் யாழ்ப்பாண மாநகர சபை முதல்வர் கௌரவ திருமதி மதிவதனி விவேகானந்தராஜா அவர்களின் பங்குபற்றுதலுடன் இன்று (21.09.2026) பி. ப. 02.30 மணிக்கு அரசாங்க அதிபர் அலுவலகத்தில் நடைபெற்றது. இக் கலந்துரையாடலில் வலிகாமம் தென் மேற்கு பிரதேச சபையின் தவிசாளர் கெளரவ க. ஜெகதீசன், யாழ்ப்பாண மாநகர பிரதி முதல்வர் கெளரவ இ. தயாளன், யாழ்ப்பாண மாவட்ட ஒருங்கிணைப்புக் குழுவின் இணைப்பாளரும், யாழ் மாநகர சபையின் உறுப்பினருமான கெளரவ எஸ். கபிலன், மாநகர சபை உறுப்பினர்களான கெளரவ என். எம். அப்துல்லாஹ், கெளரவ எஸ். சொரூபன், கெளரவ ரி. மயூரன் கிளீன் ஸ்ரீலங்கா மாவட்ட இணைப்பாளர் திரு. ப. கஜமுகன், வடமாகாண உள்ளூராட்சி அமைச்சின் உதவி சிரேஷ்ட செயலாளர் உள்ளிட்ட அரசாங்க துறைசார் அதிகாரிகளும் கலந்து கொண்டனர்.
அரசாங்க அதிபரின் தலைமையுரை :
கூட்டத்திற்கு வருகை தந்த மாநகர கெளரவ முதல்வர் உள்ளிட்டவர்களை வரவேற்றதுடன், கல்லுண்டாய் பகுதியில் கழிவு முகாமைத்துவம் தொடர்பான பிரச்சினைகளுக்கு அனைத்து தரப்பினரும் ஒன்றிணைந்து, நடைமுறைச் சாத்தியமானதும் நிலையானதுமான தீர்வொன்றை உருவாக்க வேண்டும் என்பதற்காகவே இவ் விசேட கூட்டம் கூட்டப்பட்டதாக என யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் தெரிவித்தார். கழிவு முகாமைத்துவம் தொடர்பான பிரச்சினைகளுக்கு அவசரமாகவோ அல்லது ஒரு தரப்பின் கருத்தை மாத்திரம் அடிப்படையாகக் கொண்டோ தீர்மானங்களை மேற்கொள்வது பொருத்தமானதல்ல எனக் குறிப்பிட்ட அரசாங்க அதிபர், சம்பந்தப்பட்ட அனைத்து தரப்பினரதும் கருத்துக்களைப் பெற்றுக்கொண்டு, ஒருமித்த தீர்மானத்தின் அடிப்படையில் அடுத்தகட்ட நடவடிக்கைகள் முன்னெடுக்கப்பட வேண்டும் என வலியுறுத்தினார். கல்லுண்டாய் உள்ளிட்ட பகுதிகளில் கழிவு முகாமைத்துவத்தை முறையாக முன்னெடுப்பதற்கான தீர்வுகளை அடையாளம் காண்பதுடன், அவற்றை ஒருமுறை மேற்கொள்ளப்படும் நடவடிக்கையாக மட்டுப்படுத்தாமல், தொடர்ச்சியாக நடைமுறைப்படுத்தக்கூடிய நிலையான செயற்றிட்டமாக முன்னெடுக்க வேண்டும் எனவும் அவர் வலியுறுத்தினார். குறிப்பாக, பொதுமக்களின் சுகாதாரம், பாதுகாப்பு மற்றும் சுற்றுச்சூழல் பாதுகாப்பை முதன்மைப்படுத்தி, தற்போதைய நிலைமைகளுக்கு பொருத்தமான நடைமுறைச் சாத்தியமான தீர்வுகளை அடையாளம் கண்டு, அவற்றை நீண்டகால அடிப்படையில் நிலைபேறான முறையில் நடைமுறைப்படுத்துவதற்கு நடவடிக்கை எடுக்கப்பட வேண்டும் எனவும் அரசாங்க அதிபர் தெரிவித்தார்.
கூட்டத்தில் ஆராயப்பட்ட விடயங்கள் :
கல்லுண்டாய் பகுதியில் திண்மக்கழிவு மேடு எரியூட்டப்பட்டதன் காரணமாக அப்பகுதி மக்கள் புகைமூட்டத்தால் பாதிப்புகளை எதிர்நோக்கி வருவது தொடர்பில் விரிவாக ஆராயப்பட்டதுடன், பொதுமக்களுக்கும் சுற்றுச்சூழலுக்கும் பாதிப்பு ஏற்படாத வகையில் திண்மக்கழிவுகளை முறையாக அகற்றுதல் மற்றும் முகாமைத்துவம் செய்தல் தொடர்பில் சம்பந்தப்பட்ட மாநகர சபை, பிரதேச சபை, பிரதேச செயலகங்கள் மற்றும் தொடர்புடைய திணைக்களங்களின் அதிகாரிகளுடன் கலந்துரையாடப்பட்டு அனைத்துத் தரப்பினரும் இணைந்தவகையில் பல்வேறு முக்கிய தீர்மானங்கள் மேற்கொள்ளப்பட்டன.
15 அடி உயர பாதுகாப்பு வேலி :
யாழ்ப்பாணம் மாநகர சபையினரால் கல்லுண்டாய் திண்மக்கழிவு முகாமைத்துவப் பகுதியைச் சுற்றி 15 அடி உயரமான பாதுகாப்பு வேலி அமைப்பதற்கான பணிகள் தற்போது ஆரம்பிக்கப்பட்டுள்ளன. குறித்த பாதுகாப்பு வேலியை எதிர்வரும் டிசம்பர் மாதம் 31 ஆம் திகதிக்கு முன்னர் முழுமையாக அமைத்து முடிப்பதற்கு தீர்மானிக்கப்பட்டுள்ளது. பாதுகாப்பு வேலி முழுமையாக அமைக்கப்படும் வரை, எதிர்வரும் நவம்பர் மாதம் 30 ஆம் திகதி வரை இரவு நேரங்களில் பொலிஸாரின் கண்காணிப்பை மேற்கொள்ளவும் தீர்மானிக்கப்பட்டுள்ளது. பகல் நேரங்களில் நிரந்தரமாக நியமிக்கப்பட்ட பணியாளர்கள் மூலம் கண்காணிப்பு நடவடிக்கைகள் முன்னெடுக்கப்படவுள்ளன.
20 கண்காணிப்பு கேமராக்கள் :
யாழ்ப்பாணம் மாநகர சபையினரால் கல்லுண்டாய் பகுதியின் பாதுகாப்பை உறுதிப்படுத்தும் வகையில் மொத்தம் 20 CCTV பாதுகாப்புக் கண்காணிப்பு கமராக்களை பொருத்துவதற்கு தீர்மானிக்கப்பட்டுள்ளது. இதில் தற்போது 04 கமராக்கள் பொருத்தப்பட்டுள்ள நிலையில், மீதமுள்ள 16 கமராக்களையும் எதிர்வரும் நவம்பர் மாத இறுதிக்குள் பொருத்தி கண்காணிப்பு நடவடிக்கைகளை வலுப்படுத்த தீர்மானிக்கப்பட்டுள்ளது.
தீயணைப்பு மற்றும் மின்னல் பாதுகாப்பு :
குப்பை எரியூட்டல் போன்ற சம்பவங்கள் ஏற்படும் பட்சத்தில் உடனடியாக நடவடிக்கை எடுக்கும் வகையில் தேவையான 10 நீர்த்தாங்கிகளை எதிர்வரும் நவம்பர் மாதம் முன்னர் பொருத்துவதற்கு தீர்மானிக்கப்பட்டுள்ளது. அத்துடன், இடிதாங்கி (Lightning Protection) வசதியைப் பொருத்துவதற்கும் தீர்மானிக்கப்பட்டுள்ளது.
அனர்த்த அபாய முன்னெச்சரிக்கை அறிக்கை :
கல்லுண்டாய் பகுதியில் ஏற்படக்கூடிய அனர்த்த அபாயங்கள் தொடர்பில் Disaster Risk Assessment மேற்கொண்டு, அவசரநிலை மற்றும் முன்னெச்சரிக்கை நடவடிக்கைகள் தொடர்பான அறிக்கையை இரண்டு வாரங்களுக்குள் சமர்ப்பிக்குமாறு மாவட்ட செயலக அனர்த்த முகாமைத்துவப் பணிப்பாளருக்கு அறிவுறுத்தப்பட்டுள்ளது. குறித்த அறிக்கையை யாழ்ப்பாண மாநகர சபைக்கு வழங்குவதற்கும் தீர்மானிக்கப்பட்டுள்ளது.
சேதனப் பசளை உற்பத்திக்கான காணி :
கல்லுண்டாய் பகுதியில் கிடைக்கப்பெறும் சேதனக்கழிவுகளைப் பயன்படுத்தி சேதனப் பசளை உற்பத்தித் தளம் ஒன்றை அமைப்பதற்கான அக் காணியில் ஒரு பகுதியினை நிரந்தரமாக வழங்குவதற்கான கோரிக்கை கடிதத்தினை யாழ்ப்பாண மாநகர சபை, சண்டிலிப்பாய் பிரதேச செயலாளருக்கு அனுப்புவது என தீர்மானிக்கப்பட்டது. இவ்விடயம் தொடர்பாக எதிர்வரும் ஒக்டோபர் மாதம் நடைபெறவுள்ள மாவட்ட ஒருங்கிணைப்புக் குழுக் கூட்டத்தில் விரிவாக ஆராயப்படும் என மாவட்ட அரசாங்க அதிபர் தெரிவித்தார்.
பொதுமக்கள் பாதிக்காத வகையில் திண்மக்கழிவு முகாமைத்துவம் :
கல்லுண்டாய் பகுதியில் பொதுமக்களுக்கு பாதிப்பு ஏற்படும் வகையில் கழிவுகளை எரியூட்டுவதைத் தவிர்ப்பதுடன், முறையான பராமரிப்பு நடைமுறைகளைப் பின்பற்றவும் தீர்மானிக்கப்பட்டுள்ளது. குறிப்பாக, உக்கக்கூடிய சேதனக்கழிவுகளை மாத்திரம் கல்லுண்டாய் திண்மக்கழிவு முகாமைத்துவப் பகுதிக்கு கொண்டு செல்வதற்கான நடைமுறையைப் பின்பற்றுவதுடன், உக்காத கழிவுகளை அங்கு கொண்டு செல்வதில்லை எனவும் தீர்மானிக்கப்பட்டது. மேலும், உரிய அனுமதி பெற்றவர்களுக்கு மாத்திரமே கல்லுண்டாய் திண்மக்கழிவு முகாமைத்துவப் பகுதிக்குள் பிரவேசிக்க அனுமதி வழங்கப்படும் எனவும் தீர்மானிக்கப்பட்டுள்ளது.
பொதுமக்கள் மேற்பார்வைக்கும் வாய்ப்பு :
கல்லுண்டாய் பகுதியைச் சேர்ந்த பொதுமக்களும் திண்மக்கழிவு முகாமைத்துவ நடவடிக்கைகளை மேற்பார்வை செய்வதற்கான ஏற்பாடுகள் மேற்கொள்ளப்படவுள்ளன. இதற்காக கல்லுண்டாய் பகுதி பொதுமக்களிடமிருந்து 10 பேரின் பெயர் பட்டியல் யாழ்ப்பாண மாநகர சபைக்கு வழங்கப்படும் பட்சத்தில், அவர்களுக்கு உரிய அடையாள அட்டைகள் வழங்கி, குறித்த பகுதியை மேற்பார்வையிடுவதற்கான அனுமதி வழங்குவதற்கும் தீர்மானிக்கப்பட்டுள்ளது. கல்லுண்டாய் திண்மக்கழிவு முகாமைத்துவத்தை பாதுகாப்பானதும், முறையானதும், சுற்றுச்சூழலுக்கும் பொதுமக்களுக்கும் பாதிப்பு ஏற்படாத வகையிலும் முன்னெடுப்பதற்காக மேற்கொள்ளப்பட்டுள்ள இத்தீர்மானங்கள் அனைத்தையும் உரிய காலவரையறைக்குள் நிறைவேற்றுவது எனவும் தீர்மானிக்கப்பட்டது
கல்லுண்டாய் பகுதிக்கு களவிஜயம் :
கல்லுண்டாய் பகுதியில் தற்போதுள்ள திண்மக்கழிவு முகாமைத்துவ நிலைமைகளை நேரில் பார்வையிட்டு ஆராய்வதற்கும், அப்பகுதி பொதுமக்களுடன் கலந்துரையாடி அவர்களின் கருத்துக்களை கேட்டறிவதற்கும், அரசாங்க அதிபர், மாநகர சபை கௌரவ முதல்வர், வலிகாமம் தென் மேற்கு பிரதேச சபையின் கௌரவ தவிசாளர், மாநகர சபை கெளரவ பிரதி முதல்வர், மாநகர சபை கெளரவ உறுப்பினர், மேலதிக அரசாங்க அதிபர், மாநகர சபை ஆணையாளர், பொறியியலாளர், சண்டிலிப்பாய் பிரதேச செயலாளர், பிரதேச சபை செயலாளர், உதவி மாவட்டச் செயலாளர், மாவட்ட அனர்த்த முகாமைத்துவ உதவிப் பணிப்பாளர், மத்திய சுற்றாடல் அதிகாரசபையின் உதவிப் பணிப்பாளர் உள்ளிட்ட அதிகாரிகள் மற்றும் மாநகர சபை உத்தியோகத்தர்கள் இன்று மாலை 5.00 மணியளவில் களவிஜயம் மேற்கொண்டனர்.
களவிஜயத்தின் போது எடுக்கப்பட்ட உடனடித் தீர்மானங்கள் :
களவிஜயத்தின் போது, கல்லுண்டாய் பகுதியில் திண்மக்கழிவுகளை கொட்டுவதற்காக ஒதுக்கப்பட்ட காணியின் முன்பகுதியில் ஒரு பகுதியை இராணுவத்தினரின் இயந்திர உதவியுடன் சுத்தப்படுத்தி, அவ்விடத்தை உக்கும் கழிவுகளை மாத்திரம் சேகரித்து வைப்பதற்கான ஒழுங்குபடுத்தப்பட்ட இடமாக பயன்படுத்துவதற்கு தீர்மானிக்கப்பட்டது. மேலும், இவ்விடத்தில் அப் பகுதி பொதுமக்களின் பங்கேற்புடன் கொண்டு வரப்படும் கழிவுகளைப் பரிசீலித்து, அவை உக்கும் கழிவுகளா என்பதை உறுதிப்படுத்திய பின்னரே குறித்த இடத்தில் சேகரிப்பதற்கான நடைமுறையை முன்னெடுக்கவும் தீர்மானிக்கப்பட்டது. உக்கும் கழிவுகளைத் தவிர்ந்த ஏனைய கழிவுகள் கொண்டு வரப்பட்டால், அவற்றை மாநகர சபையினால் மீள எடுத்துச் செல்வதற்கான ஏற்பாடுகளை மேற்கொள்ளவும் இணக்கம் காணப்பட்டது. அத்துடன், கல்லுண்டாய் பகுதியில் தற்போது எரிந்து கொண்டிருக்கும் கழிவுக் குவியல்களை இராணுவத்தினரின் உதவியுடன் அணைப்பதற்கும் தேவையான நடவடிக்கைகளை துரிதமாக மேற்கொள்ளத் தீர்மானிக்கப்பட்டது. மேலும், எதிர்காலத்தில் உக்கும் கழிவுகளை உரிய முறையில் சேகரித்து, அவற்றை இயற்கை உரமாக மாற்றும் திட்டமொன்றை நடைமுறைப்படுத்துவதற்கான சாத்தியக்கூறுகள் தொடர்பிலும் கலந்துரையாடப்பட்டு, அதற்கான நடவடிக்கைகளை முன்னெடுப்பதில் அதிக கவனம் செலுத்தப்பட்டது.







