கல்விப் பொதுத்தராதர உயர்தரப் பரீட்சை2025 இல் சிறந்த பெறுபேறுகளைப் பெற்ற வடக்கு மாகாண மாணவர்களுக்கான சனாதிபதி நிதியத்தின் உதவித்தொகை வழங்கும் நிகழ்வு இன்று (26.09.2026) சனிக்கிழமை கிளிநொச்சியில் நடைபெற்றது. இந் நிகழ்வில் பிரதம விருந்தினராக பாராளுமன்ற சபாநாயகர் கௌரவ (டாக்டர்) ஜகத் விக்கிரமரத்ன கலந்துகொண்டார். சிறப்பு விருந்தினர்களாக யாழ்ப்பாணம் – கிளிநொச்சி மாவட்டங்களின் ஒருங்கிணைப்புக் குழுத் தலைவரும் கடற்றொழில், நீரியல் மற்றும் கடல்வளங்கள் அமைச்சருமான கௌரவ இராமலிங்கம் சந்திரசேகர், வட மாகாண ஆளுநர் கௌரவ நாகலிங்கம் வேதநாயகன் கூட்டுறவு பிரதியமைச்சர் கௌரவ உபாலி சமரசிங்க, வன்னி மாவட்ட பாராளுமன்ற உறுப்பினர்களான கௌரவ (டாக்டர்) செல்லத்தம்பி திலகநாதன் கெளரவ கௌரவ மயில்வாகனம் ஜெகதீஸ்வரன் ஆகியோர் கலந்துகொண்டனர். 2025ஆம் ஆண்டு நடைபெற்ற கல்விப் பொதுத்தராதர உயர்தரப் பரீட்சையில் ஒவ்வொரு மாவட்டத்திலும் ஒவ்வொரு பாடத்துறையில் சிறந்த பெறுபேறுகளைப் பெற்று முதல் 20 இடங்களுக்குள் வந்த மாணவர்களுக்கு இவ்வுதவித்தொகை வழங்கப்பட்டது. ஒவ்வொரு மாணவருக்கும் தலா ரூ.100,000 வீதம் உதவித்தொகையும் சான்றிதழும் வழங்கப்பட்டன.
சனாதிபதி நிதியத்தின் இத்திட்டத்தின் கீழ், இவ்வாண்டு ஒவ்வொரு பாடத்துறையிலும் மாவட்ட ரீதியாக அங்கீகரிக்கப்படும் மாணவர்களின் எண்ணிக்கை 10 இலிருந்து 20 ஆக அதிகரிக்கப்பட்டுள்ளது. இதன்பிரகாரம் யாழ்ப்பாண மாவட்டத்தைச் சேர்ந்த 115 மாணவர்கள், கிளிநொச்சி மாவட்டத்தைச் சேர்ந்த 91 மாணவர்கள், வவுனியா மாவட்டத்தைச் சேர்ந்த 102 மாணவர்கள், மன்னார் மாவட்டத்தைச் சேர்ந்த 86 மாணவர்கள் மற்றும் முல்லைத்தீவு மாவட்டத்தைச் சேர்ந்த 83 மாணவர்கள் என மொத்தம் 477 மாணவர்களுக்கு ரூ.100,000 வீதம் மொத்தமாக ரூ.47.70 மில்லியன் பெறுமதியான உதவித்தொகை வழங்கப்பட்டது. விருந்தினர்கள் கலாசார முறைப்படி வரவேற்கப்பட்டதைத் தொடர்ந்து, மங்கல விளக்கேற்றப்பட்டு நிகழ்வுகள் உத்தியோகபூர்வமாக ஆரம்பித்து வைக்கப்பட்டன. சனாதிபதி நிதியத்தின் செயலாளர் திரு. ரொஷான் கமகே அவர்களின் வரவேற்புரையைத் தொடர்ந்து, யாழ்ப்பாணப் பல்கலைக்கழகத்தின் சிரேஷ்ட விரிவுரையாளர் திரு. விமல் சாமிநாதன் சிறப்புரையாற்றினார். மேலும், மாணவர்களின் கலை நிகழ்வுகளும் இடம்பெற்றன. இந்நிகழ்வில் வட மாகாண பிரதம செயலாளர், யாழ்ப்பாணம், கிளிநொச்சி, முல்லைத்தீவு மற்றும் மன்னார் மாவட்டச் செயலாளர்கள், வட மாகாண கல்வி அமைச்சின் செயலாளர், வட மாகாண கல்விப் பணிப்பாளர், வவுனியா மாவட்ட மேலதிக மாவட்டச் செயலாளர், கிளிநொச்சி மாவட்டப் பிரதிப் பொலிஸ்மா அதிபர் உள்ளிட்ட அரச அதிகாரிகள், மாணவர்கள் மற்றும் பெற்றோர்கள் எனப் பலர் கலந்துகொண்டனர்.

தகவல் அறியும் உரிமைக்கான சர்வதேச தினமான செப்ரெம்பர் 28 பிரகடனப்படுத்தப்பட்டதனையொட்டி ஏற்பாடு செய்யப்பட்ட விழிப்புணர்வு செயலமர்வு, யாழ்ப்பாண மாவட்ட மேலதிக அரசாங்க அதிபர் திரு. கே. சிவகரன் தலைமையில் 25.09.2026 அன்று யாழ்ப்பாண மாவட்ட செயலக செயலமர்வு மண்டபத்தில் நடைபெற்றது. இச் செயலமர்வானது அரச சார்பற்ற நிறுவனங்களின் பிரதிநிதிகள், பல்கலைக்கழக அரசியல் விஞ்ஞான மாணவர்கள், அரசியல் விஞ்ஞான உயர்தர மாணவர்கள், முன்பள்ளி ஆசிரியர்கள் மற்றும் கிராமிய சமூக மட்ட அமைப்புகளின் பிரதிநிதிகள் ஆகியோருக்கு அறியும் உரிமைச் சட்டம், அதனைப் பயன்படுத்தும் நடைமுறை மற்றும் குறித்தளிக்கப்பட்ட அலுவலர்கள் மற்றும் தகவல் அலுவலர்களின் பொறுப்புகள் தொடர்பில் தெளிவுபடுத்தும் வகையில் இச் செயலமர்வு நடைபெற்றது.
அரசாங்க அதிபர் அவர்களின் கருத்துரை:
இதன்போது கருத்துரையாற்றிய யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள், தகவல் அறியும் உரிமைச் சட்டம் 2016ஆம் ஆண்டு 12 ஆம் இலக்க தகவல் அறியும் உரிமைச் சட்டம் அறிமுகப்படுத்தப்பட்டதன் மூலம் நடைமுறையில் இருந்தபோதிலும், அதன் மூலம் பொதுமக்கள் தமக்குத் தேவையான தகவல்களைப் பெற்றுக்கொள்ளும் உரிமை தொடர்பில் மேலும் பரந்தளவிலான விழிப்புணர்வு ஏற்படுத்தப்பட வேண்டுமெனத் தெரிவித்தார். பொதுமக்கள் அரச நிறுவனங்களிடமிருந்து தகவல்களைப் பெற்றுக்கொள்வதற்கான சட்டபூர்வ உரிமையைக் கொண்டுள்ளதுடன், அவ்வுரிமையை பொறுப்புடனும் சரியான நோக்கத்துடனும் பயன்படுத்துவது அவசியம் எனவும் அவர் குறிப்பிட்டார். தகவல் அறியும் உரிமைச் சட்டம் அரச நிர்வாகத்தில் வெளிப்படைத்தன்மை, பொறுப்புக்கூறல் மற்றும் நியாயமான நிர்வாகத்தை உறுதிப்படுத்துவதற்கு முக்கியமான கருவியாக விளங்குவதாகவும், அரச நிறுவனங்களின் செயற்பாடுகள், நிர்வாகத் தீர்மானங்கள், நியமனங்கள் உள்ளிட்ட விடயங்கள் தொடர்பில் உரிய தகவல்களைப் பெற்றுக்கொள்வதன் மூலம் தவறுகள் மற்றும் குறைபாடுகளை வெளிக்கொணரவும் சரிபார்க்கவும் முடியும் எனவும் தெரிவித்தார்.மேலும், தகவல் அறியும் உரிமை தொடர்பான விழிப்புணர்வு அரச உத்தியோகத்தர்களிடமும் பொதுமக்களிடமும் அதிகரிக்க வேண்டும் எனவும், தமது கடமைகளை முறையாகவும் வெளிப்படையாகவும் நிறைவேற்றுவதற்கும் இச்சட்டம் உத்தியோகத்தர்களுக்கு வழிகாட்டியாக அமையும் எனவும் அவர் குறிப்பிட்டார்.
பல்கலைக்கழக மாணவர்கள் தமது ஆய்வுப் பணிகளுக்காகவும், சமூக மட்ட அமைப்புகள் மற்றும் பொதுமக்கள் தமது சமூக மற்றும் பொது நலத் தேவைகளுக்காகவும் தகவல் அறியும் உரிமைச் சட்டத்தைப் பயன்படுத்தி உரிய தகவல்களைப் பெற்றுக்கொள்ள முடியும் எனவும் அரசாங்க அதிபர் சுட்டிக்காட்டினார். தகவல் அறியும் உரிமைச் சட்டத்தின் கீழ் தகவல்களைப் பெற்றுக்கொள்ளும் நடைமுறை, பொதுமக்களுக்கு வழங்கப்பட்டுள்ள உரிமைகள், குறித்தளிக்கப்பட்ட அலுவலர்கள் மற்றும் தகவல் அலுவலர்களின் கடமைகள் மற்றும் பொறுப்புகள் தொடர்பில் விரிவான விளக்கங்கள் வழங்கப்பட்டன. இச் செயலமர்வின் வளவாளராகக் கலந்துகொண்ட மேலதிக அரசாங்க அதிபர் திரு. கே. சிவகரன் அவர்களினால், தகவல் அறியும் உரிமைச் சட்டத்தின் நடைமுறைப் பயன்பாடு மற்றும் அதன் முக்கியத்துவம் தொடர்பான மேலதிக தகவல்களும் தெளிவுபடுத்தப்பட்டன. தொடர்ந்து, தகவல் அறியும் உரிமைச் சட்டத்தின் கீழ் பொதுமக்கள் எதிர்கொள்ளும் பிரச்சினைகள் மற்றும் நடைமுறைச் சிக்கல்கள் தொடர்பில் பங்கேற்பாளர்களினால் வினாக்கள் முன்வைக்கப்பட்டதுடன், அவற்றுக்கு வளவாளரினால் உரிய விளக்கங்களும் பதில்களும் வழங்கப்பட்டன. இச் செயலமர்வில் உதவி மாவட்டச் செயலாளர் செல்வி உ. தர்சினி, மாவட்ட தகவல் அறியும் உரிமைச் சட்ட பிரிவில் கடமையாற்றும் உத்தியோகத்தர்கள் திருமதி. ம. சுகன்யா மற்றும் திருமதி. பி. பரணிகா ஆகியோரும் கலந்துகொண்டனர்.

யாழ்ப்பாணம் சிறைச்சாலையில் புனர்வாழ்வு நடவடிக்கைகளின் ஒரு பகுதியாக சிறைக் கைதிகளுக்கு சாரணர் பயிற்சியை வழங்கி, சாரணர் சின்னம் அணிவிக்கும் நிகழ்வு 25.09.2026 அன்று யாழ்ப்பாணம் சிறைச்சாலை வளாகத்தில் நடைபெற்றது. நிகழ்வில் யாழ்ப்பாண மாவட்ட அரசாங்க அதிபரும் மாவட்ட சாரணர் ஆணையாளருமான திரு. மருதலிங்கம் பிரதீபன், சிறைச்சாலைகள் ஆணையாளர் – வழங்கல் மற்றும் சேவைகள் திரு. B.D.M.G.B. திஸாநாயக்க, வட மாகாண சாரணர் ஆணையாளர் திரு. P. அஜித்குமார், யாழ்ப்பாண சிறைச்சாலை பொறுப்பதிகாரி திரு. S. இந்திரகுமார், சிறைச்சாலை நலன்புரி சங்கத்தின் உறுப்பினர் பிரபல வர்த்தக பிரமுகர் திரு. ஈ. எஸ். பி. நாகரெட்ணம் உள்ளிட்ட அங்கத்தவர்கள், சாரண தலைமையக மற்றும் புனர்வாழ்வு அதிகாரிகள், மற்றும் சிறைச்சாலை உத்தியோகத்தர்கள் உள்ளிட்ட பலர் கலந்து கொண்டனர். நிகழ்வின் ஆரம்பமாக விருந்தினர்கள் வரவேற்கப்பட்டதுடன், தேசியக் கொடி, சிறைச்சாலைக் கொடி மற்றும் சாரணர் கொடி ஏற்றப்பட்டு தேசிய கீதமும் சிறைச்சாலை கீதமும் இசைக்கப்பட்டன. தொடர்ந்து யாழ்ப்பாண சிறைச்சாலை பொறுப்பதிகாரி திரு. S. இந்திரகுமார் வரவேற்புரை நிகழ்த்தினார். தொடர்ந்து, சிறைக் கைதிகளுக்கு சாரணர் சின்னம் அணிவிக்கும் நிகழ்வு இடம்பெற்றது. அரசாங்க அதிபரும், யாழ்ப்பாண மாவட்ட சாரணர் ஆணையாளருமான திரு. மருதலிங்கம் பிரதீபன் அவர்களின் உரை: சிறைச்சாலையில் உள்ளவர்களை உரிய முறையில் ஆற்றுப்படுத்தி, அவர்கள் சமூகத்திற்குத் திரும்பிச் செல்லும் போது நற்பிரஜைகளாக செயற்படுவதற்கு தேவையான நல்ல பண்புகள், தலைமைத்துவத் திறன்கள் மற்றும் சமூகப் பொறுப்புணர்வை வளர்ப்பது இத்தகைய புனர்வாழ்வு நடவடிக்கைகளின் முக்கிய நோக்கமாகும் எனத் தெரிவித்தார். சிலர் தங்களது கடந்தகால செயல்பாடுகளின் காரணமாக சிறைச்சாலைக்கு வரவேண்டிய துரதிர்ஷ்டமான சூழ்நிலையை எதிர்கொண்டிருந்தாலும், அதிலிருந்து மீண்டு தமது குடும்பங்களுக்கும் சமூகத்திற்கும் திரும்பிச் செல்லும் போது புதிய சிந்தனைகள் மற்றும் நல்ல பழக்கவழக்கங்களுடன் வாழ்க்கையை மறுசீரமைத்துக் கொள்ள வேண்டும் எனவும் வலியுறுத்தினார். மேலும், சாரணர் சின்னம் பெற்றவர்கள் தொடர்ச்சியாக சாரணர் பயிற்சிகளைப் பெற்று, நாட்டின் ஏனைய சாரணர் பயிற்சி நிலையங்களில் தமது பயிற்சிகளைப் பூர்த்தி செய்து, எதிர்காலத்திலும் சாரணர் இயக்கத்துடன் இணைந்து செயற்படுவதற்கான வாய்ப்புகள் உள்ளதாகவும் குறிப்பிட்டார்.
“ஒரு நாள் சாரணர்;
வாழ்நாள் முழுவதும் சாரணர்” என்ற சாரணியக் கொள்கையின் அடிப்படையில், சாரணர் பயிற்சியின் ஊடாகப் பெற்ற தலைமைத்துவம், ஒழுக்கம், பொறுப்புணர்வு மற்றும் நல்ல பண்புகளை வாழ்க்கையில் தொடர்ந்து கடைப்பிடிக்க வேண்டும் எனவும் அரசாங்க அதிபர் தெரிவித்தார். கடந்த காலத்தை மறந்து புதிய வாழ்க்கையை நோக்கி முன்னேறி, நல்ல சிந்தனைகளையும் பழக்கவழக்கங்களையும் வளர்த்துக்கொண்டு சமூகத்தில் பொறுப்புள்ள நற்பிரஜைகளாக உருவாக வேண்டும் என்பதே அனைவரிடமும் எதிர்பார்க்கப்படுவதாகவும் தெரிவித்தார். தொடர்ந்து சிறைச்சாலைகள் ஆணையாளர் திரு. B.D.M.G.B. திஸாநாயக்க உரையாற்றியதுடன், விருந்தினர்களுக்கு நினைவுச் சின்னங்களும் வழங்கப்பட்டன. நிகழ்வின் இறுதியில் தலைமை புனர்வாழ்வு அதிகாரி திரு. B. சுசிதரன் நன்றியுரை நிகழ்த்தினார்.

தகவல் அறியும் உரிமைக்கான சர்வதேச தினமான செப்ரெம்பர் 28 பிரகடனப்படுத்தப்பட்டதனையொட்டி ஏற்பாடு செய்யப்பட்ட விழிப்புணர்வு செயலமர்வு, யாழ்ப்பாண மாவட்ட மேலதிக அரசாங்க அதிபர் திரு. கே. சிவகரன் தலைமையில் 25.09.2026 அன்று யாழ்ப்பாண மாவட்ட செயலக செயலமர்வு மண்டபத்தில் நடைபெற்றது. இச் செயலமர்வானது அரச சார்பற்ற நிறுவனங்களின் பிரதிநிதிகள், பல்கலைக்கழக அரசியல் விஞ்ஞான மாணவர்கள், அரசியல் விஞ்ஞான உயர்தர மாணவர்கள், முன்பள்ளி ஆசிரியர்கள் மற்றும் கிராமிய சமூக மட்ட அமைப்புகளின் பிரதிநிதிகள் ஆகியோருக்கு அறியும் உரிமைச் சட்டம், அதனைப் பயன்படுத்தும் நடைமுறை மற்றும் குறித்தளிக்கப்பட்ட அலுவலர்கள் மற்றும் தகவல் அலுவலர்களின் பொறுப்புகள் தொடர்பில் தெளிவுபடுத்தும் வகையில் இச் செயலமர்வு நடைபெற்றது.
அரசாங்க அதிபர் அவர்களின் கருத்துரை:
இதன்போது கருத்துரையாற்றிய யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள், தகவல் அறியும் உரிமைச் சட்டம் 2016ஆம் ஆண்டு 12 ஆம் இலக்க தகவல் அறியும் உரிமைச் சட்டம் அறிமுகப்படுத்தப்பட்டதன் மூலம் நடைமுறையில் இருந்தபோதிலும், அதன் மூலம் பொதுமக்கள் தமக்குத் தேவையான தகவல்களைப் பெற்றுக்கொள்ளும் உரிமை தொடர்பில் மேலும் பரந்தளவிலான விழிப்புணர்வு ஏற்படுத்தப்பட வேண்டுமெனத் தெரிவித்தார். பொதுமக்கள் அரச நிறுவனங்களிடமிருந்து தகவல்களைப் பெற்றுக்கொள்வதற்கான சட்டபூர்வ உரிமையைக் கொண்டுள்ளதுடன், அவ்வுரிமையை பொறுப்புடனும் சரியான நோக்கத்துடனும் பயன்படுத்துவது அவசியம் எனவும் அவர் குறிப்பிட்டார். தகவல் அறியும் உரிமைச் சட்டம் அரச நிர்வாகத்தில் வெளிப்படைத்தன்மை, பொறுப்புக்கூறல் மற்றும் நியாயமான நிர்வாகத்தை உறுதிப்படுத்துவதற்கு முக்கியமான கருவியாக விளங்குவதாகவும், அரச நிறுவனங்களின் செயற்பாடுகள், நிர்வாகத் தீர்மானங்கள், நியமனங்கள் உள்ளிட்ட விடயங்கள் தொடர்பில் உரிய தகவல்களைப் பெற்றுக்கொள்வதன் மூலம் தவறுகள் மற்றும் குறைபாடுகளை வெளிக்கொணரவும் சரிபார்க்கவும் முடியும் எனவும் தெரிவித்தார்.மேலும், தகவல் அறியும் உரிமை தொடர்பான விழிப்புணர்வு அரச உத்தியோகத்தர்களிடமும் பொதுமக்களிடமும் அதிகரிக்க வேண்டும் எனவும், தமது கடமைகளை முறையாகவும் வெளிப்படையாகவும் நிறைவேற்றுவதற்கும் இச்சட்டம் உத்தியோகத்தர்களுக்கு வழிகாட்டியாக அமையும் எனவும் அவர் குறிப்பிட்டார்.
பல்கலைக்கழக மாணவர்கள் தமது ஆய்வுப் பணிகளுக்காகவும், சமூக மட்ட அமைப்புகள் மற்றும் பொதுமக்கள் தமது சமூக மற்றும் பொது நலத் தேவைகளுக்காகவும் தகவல் அறியும் உரிமைச் சட்டத்தைப் பயன்படுத்தி உரிய தகவல்களைப் பெற்றுக்கொள்ள முடியும் எனவும் அரசாங்க அதிபர் சுட்டிக்காட்டினார். தகவல் அறியும் உரிமைச் சட்டத்தின் கீழ் தகவல்களைப் பெற்றுக்கொள்ளும் நடைமுறை, பொதுமக்களுக்கு வழங்கப்பட்டுள்ள உரிமைகள், குறித்தளிக்கப்பட்ட அலுவலர்கள் மற்றும் தகவல் அலுவலர்களின் கடமைகள் மற்றும் பொறுப்புகள் தொடர்பில் விரிவான விளக்கங்கள் வழங்கப்பட்டன. இச் செயலமர்வின் வளவாளராகக் கலந்துகொண்ட மேலதிக அரசாங்க அதிபர் திரு. கே. சிவகரன் அவர்களினால், தகவல் அறியும் உரிமைச் சட்டத்தின் நடைமுறைப் பயன்பாடு மற்றும் அதன் முக்கியத்துவம் தொடர்பான மேலதிக தகவல்களும் தெளிவுபடுத்தப்பட்டன. தொடர்ந்து, தகவல் அறியும் உரிமைச் சட்டத்தின் கீழ் பொதுமக்கள் எதிர்கொள்ளும் பிரச்சினைகள் மற்றும் நடைமுறைச் சிக்கல்கள் தொடர்பில் பங்கேற்பாளர்களினால் வினாக்கள் முன்வைக்கப்பட்டதுடன், அவற்றுக்கு வளவாளரினால் உரிய விளக்கங்களும் பதில்களும் வழங்கப்பட்டன. இச் செயலமர்வில் உதவி மாவட்டச் செயலாளர் செல்வி உ. தர்சினி, மாவட்ட தகவல் அறியும் உரிமைச் சட்ட பிரிவில் கடமையாற்றும் உத்தியோகத்தர்கள் திருமதி. ம. சுகன்யா மற்றும் திருமதி. பி. பரணிகா ஆகியோரும் கலந்துகொண்டனர்.

யாழ்ப்பாண மாவட்டத்தில் அரச உதவியுடனான வீட்டுத்திட்டப் பயனாளிகளுக்கும், மாவட்டத்தில் முன்னெடுக்கப்படும் அபிவிருத்தி வேலைத்திட்டங்களுக்கும் தேவையான கட்டுமணல் மற்றும் பூச்சு மணலை கிளிநொச்சி மாவட்டத்திலிருந்து பெற்றுக்கொள்வதற்கு நடவடிக்கை எடுக்கப்பட்டுள்ளது. கடற்றொழில், நீரியல் மற்றும் கடல்வளங்கள் அமைச்சரும், யாழ்ப்பாணம் மற்றும் கிளிநொச்சி மாவட்ட ஒருங்கிணைப்புக் குழுக்களின் தலைவருமான கௌரவ இராமலிங்கம் சந்திரசேகர் அவர்களின் தலைமையில் 04.09.2026 அன்று நடைபெற்ற கிளிநொச்சி மாவட்ட ஒருங்கிணைப்புக் குழுக் கூட்டத்தில் எடுக்கப்பட்ட தீர்மானத்திற்கமையவும், 17.09.2026 அன்று வடக்கு மாகாண ஆளுநர் கௌரவ நாகலிங்கம் வேதநாயகன் அவர்கள் தலைமையில் மணல் விநியோகப் பொறிமுறை தொடர்பாக அரசாங்க அதிபர்களுடன் நடைபெற்ற கலந்துரையாடலின் அடிப்படையிலும் இந்நடவடிக்கை முன்னெடுக்கப்பட்டுள்ளது. இதற்கமைய, யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் இன்றைய தினம் (23.09.2026) கிளிநொச்சி மாவட்ட செயலாளருடன் தொலைபேசி மூலம் மேற்கொண்ட கலந்துரையாடலைத் தொடர்ந்து, முதற்கட்டமாக யாழ்ப்பாண மாவட்டத்திற்கு 500 கியூப் மணலை வழங்குவதற்கு நடவடிக்கை எடுக்கப்பட்டுள்ளது. மணல் விலை அரச வீட்டுத்திட்டப் பயனாளிகளுக்கு ஒரு ரிப்பர் (3 கியூப்) மணல் ரூ.44,000 என்ற விலையில் வழங்கப்படவுள்ளது.( மேற்குறிப்பிட்ட தொகையில் போக்குவரத்துக் கட்டணம் உள்ளடக்கப்படவில்லை) மணல் தேவைகள் தொடர்பில் அரசாங்க அதிபர் பிரதேச செயலாளர்களுக்கு அறிவுறுத்தல் :
ஏற்கனவே மணல் தேவைக்கான பெயர் பட்டியலைச் சமர்ப்பித்துள்ள பயனாளிகளுக்கு மேலதிகமாக, மணல் தேவைப்படும் ஏனைய அரச வீட்டுத்திட்டப் பயனாளிகளின் விபரங்களையும், மாவட்டத்தில் முன்னெடுக்கப்படும் அபிவிருத்தி வேலைத்திட்டங்களுக்குத் தேவையான மணலின் அளவு மற்றும் தேவைகள் தொடர்பான விபரங்களையும் 25.09.2026 ஆம் திகதிக்கு முன்னர் மாவட்ட செயலகத்திற்கு சமர்ப்பிக்குமாறு அனைத்து பிரதேச செயலாளர்களுக்கும் யாழ்ப்பாண மாவட்ட அரசாங்க அதிபர் அறிவுறுத்தியுள்ளார்.மேலும், ஏற்கனவே மணல் தேவைக்கான பெயர் பட்டியலைச் சமர்ப்பித்திருந்தும் இதுவரை மணலைப் பெற்றுக்கொள்ளாத பயனாளிகள், கோண்டாவிலில் அமைந்துள்ள யாழ்ப்பாண மாவட்ட பாரவூர்தி சங்கத்தில் மணலின் மாதிரியைப் பார்வையிட்டு, அதனைத் தொடர்ந்து உரிய பணத்தைச் செலுத்துமாறும் அரசாங்க அதிபர் தெரிவித்துள்ளார்.







