மாவட்டச் செயலகம் மற்றும் மனிதவலு வேலைவாய்ப்பு திணைக்களம் இணைந்து நடாத்தும் விசேட தொழிற் சந்தை தொடர்பாக பங்குதாரர்களுடனான முன்னேற்பாட்டு கலந்துரையாடல் மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (07.09.2026) பிற்பகல் 03.30 மணிக்கு மாவட்ட செயலக செயலமர்வு மண்டபத்தில் இடம்பெற்றது. இக் கலந்துரையாடலில் கருத்து தெரிவித்த மாவட்ட அரசாங்க அதிபர் அவர்கள், யாழ்ப்பாணத்தில் செப்டெம்பர் 26ஆம் திகதி தொழில் சந்தை யாழ்ப்பாண மாவட்டத்தில் தொழில் தேடுவோருக்கும் தொழில் வழங்குநர்களுக்கும் இடையிலான இடைவெளியை குறைக்கும் நோக்கில் எதிர்வரும் செப்டெம்பர் 26ஆம் திகதி யாழ்ப்பாண மாவட்ட செயலக வளாகத்தில் தொழில் சந்தையொன்று நடைபெறவுள்ளதாக தெரிவித்தார். மாவட்ட மற்றும் பிரதேச செயலகப் பிரிவு மட்டங்களில் வருடாந்தம் தொழில் சந்தைகளை நடத்துவதற்கான நடவடிக்கைகள் முன்னெடுக்கப்பட்டு வருவதாகவும் அவர் தெரிவித்தார். தற்போதைய தரவுகளின் அடிப்படையில் யாழ்ப்பாண மாவட்டத்தில் 2,261 பேர் இவ்வாண்டு வேலைவாய்ப்பற்றவர்களாகப் பதிவாகியுள்ள போதிலும், இந்தத் தரவுகள் வேலையற்றோரின் முழுமையான எண்ணிக்கையாக இருக்க முடியாது எனக் குறிப்பிட்ட அவர், தொழிற்சந்தைக்காக வேலைதேடுவோரின் தற்போதைய தகவல்களைப் பெறுவதற்காக மாவட்ட செயலகத்தின் இணையத்தளம் மற்றும் சமூக வலைத்தளங்கள் ஊடாக Google Form அறிமுகப்படுத்தப்பட்டுள்ளதாகவும் தெரிவித்தார். இதுவரை 570 பேர் அதில் பதிவு செய்துள்ளனர். மேலும், யாழ்ப்பாணத்தில் வேலைவாய்ப்புக்கான கோரிக்கை அதிகமாக இருந்தாலும், தொழில் வழங்குநர்கள் எதிர்பார்க்கும் வகையில் பணிக்கு தொடர்ச்சியாக வருதல், பொறுப்புடன் பணியாற்றுதல் மற்றும் தொழில்திறனை மேம்படுத்திக் கொள்ளுதல் போன்ற விடயங்களில் சில குறைபாடுகள் காணப்படுவதாகவும் சுட்டிக்காட்டினார்.
இதன் காரணமாக சில நிறுவனங்கள் வெளிமாவட்டங்களில் இருந்து பணியாளர்களை அழைத்து வந்து தங்குமிட வசதிகளுடன் பணியில் அமர்த்தும் நிலை காணப்படுவதாகவும் அவர் தெரிவித்தார். அதேவேளை, மாற்றுத்திறனாளிகளுக்கு வேலைவாய்ப்பு வழங்குவதில் யாழ்ப்பாண மாவட்டம் தேசிய மற்றும் மாவட்ட மட்டங்களில் முன்னிலை பெற்றுள்ளதாகவும், மாவட்டத்தில் உள்ள இளைஞர்களின் தொழில்திறன் மற்றும் பணியாற்றும் ஆர்வத்தை உரிய முறையில் பயன்படுத்துவதன் மூலம் வேலைவாய்ப்பு தொடர்பான இடைவெளியை குறைக்க முடியும் எனவும் மாவட்ட அரசாங்க அதிபர் தெரிவித்தார். தொழில் தேடுவோர் மற்றும் தொழில் வழங்குநர்கள் இருதரப்பினரையும் ஒரே தளத்தில் இணைத்து, யாழ்ப்பாண மாவட்டத்தில் நிலையான வேலைவாய்ப்புகளை உருவாக்குவதே இத்தொழில் சந்தையின் பிரதான நோக்கமாகும் எனவும் அவர் குறிப்பிட்டார். மேலும், நிறுவனங்களின் அபிப்பிராயங்கள் கேட்டறிந்து சிறப்பாக தொழில் சந்தையினை நடாத்துவதற்கும் யாழ்மாவட்ட இளைஞர் யுவதிகளுக்கு அதிகவாய்ப்பானதாக அமைய அனைவரும் ஒத்துழைத்து செயற்பட வேண்டும் என்று கேட்டுக் கொண்டார் இக்கலந்துரையாடலில் 30 இற்கு மேற்பட்ட நிறுவனங்கள் மற்றும் தொழிற்பயிற்சி நிறுவன பிரதிநிதிகள் கலந்து கொண்டனர். இக் கலந்துரையாடலில் மேலதிக அரசாங்க அதிபர் திரு கே. சிவகரன், மனித வள அபிவிருத்தி மாவட்ட இணைப்பாளர் திரு. க.கருணாகரன், மாவட்ட மனித வலு மற்றும் வேலைவாய்ப்பு திணைக்கள உத்தியோகத்தர்கள், தொழிற்சந்தை நிகழ்வில் கலந்து கொள்ளவுள்ள பங்குதாரர்கள் உள்ளிட்டவர்கள் கலந்து கொண்டனர்.
 
1 2 3 4 5 6 7 8 9
யாழ்ப்பாண மாவட்ட கால்நடை வளர்ப்போர் கூட்டுறவுச் சங்கங்களின் சமாசத்தினால் முன்வைக்கப்பட்டுள்ள பல்வேறு கோரிக்கைகள் தொடர்பில், சமாசப் பிரதிநிதிகளுக்கும் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களுக்கும் இடையிலான கலந்துரையாடல் இன்று (07.09.2026) காலை 9.30 மணிக்கு அரசாங்க அதிபர் அலுவலகத்தில் இடம்பெற்றது. சமாசத்திற்கு நிரந்தரக் கட்டடம் அமைத்துத் தருதல், யாழ். மாவட்ட கால்நடை வளர்ப்போருக்கு நல்லினப் பசுக்கள் மற்றும் கன்றுகளை மானிய அடிப்படையில் பெற்றுக்கொடுக்க நடவடிக்கை எடுத்தல் உள்ளிட்ட பல்வேறு கோரிக்கைகள் தொடர்பில் சமாசத்தினால் அரசாங்க அதிபரிடம் கடிதம் மூலம் கோரிக்கை முன்வைக்கப்பட்டிருந்தது. இதன்போது, சமாசத்தினால் முன்வைக்கப்பட்ட கோரிக்கைகள் தொடர்பில் சம்பந்தப்பட்ட துறைசார் அதிகாரிகளுடன் கலந்துரையாடி, நடைமுறையில் சாத்தியமான தீர்வுகளைப் பெற்றுக்கொடுப்பதற்கான நடவடிக்கைகள் முன்னெடுக்கப்படும் என அரசாங்க அதிபர் தெரிவித்தார். யாழ்ப்பாண மாவட்டத்தின் விவசாயம், கால்நடை வளர்ப்பு மற்றும் மீன்பிடி ஆகிய துறைகள் மக்களின் வாழ்வாதாரத்திலும் மாவட்டப் பொருளாதாரத்திலும் முக்கிய பங்கு வகிப்பதாகக் குறிப்பிட்ட அவர், இத்துறைகளின் வளர்ச்சிக்கு தேவையான வசதிகளையும் ஆதரவையும் ஏற்படுத்திக் கொடுப்பது அவசியம் எனத் தெரிவித்தார்.
சமாசத்திற்கு நிரந்தரக் கட்டடம் அமைத்துக் கொள்வதற்கான கோரிக்கை தொடர்பில் கருத்துத் தெரிவித்த அரசாங்க அதிபர், சமாசம் நீண்டகாலமாக வாடகைக் கட்டடத்தில் இயங்கி வருவது தொடர்பில் கவனம் செலுத்தப்பட வேண்டும் எனக் குறிப்பிட்டார். இதன்போது, சமாசத்திற்குச் சொந்தமான காணி இருப்பதாகவும், அக்காணியில் நிரந்தரக் கட்டடம் அமைப்பதற்கான விருப்பம் காணப்படுவதாகவும் சமாசத் தலைவர் தெரிவித்தார். எனினும், கட்டட நிர்மாணத்திற்குத் தேவையான போதிய நிதி வளம் தற்போது இல்லையெனவும் அவர் குறிப்பிட்டார். இதற்கு பதிலளித்த அரசாங்க அதிபர், யாழ்ப்பாணத்தில் தற்போது பயன்பாட்டில் இல்லாத பல கட்டடங்கள் காணப்படும் நிலையில், புதிதாக பாரிய கட்டடம் அமைப்பதற்கு முன்னர், ஏற்கனவே உள்ள அரச வளங்களை பயனுள்ள வகையில் பயன்படுத்துவதற்கான சாத்தியக்கூறுகளை ஆராய வேண்டும் எனத் தெரிவித்தார். அதன்படி, பயன்பாட்டில் இல்லாத பொருத்தமான அரச கட்டடங்கள் ஏதேனும் உள்ளனவா, அவற்றை சமாசத்தின் தேவைக்கேற்ப பயன்படுத்த முடியுமா அல்லது பொருத்தமான இடத்தில் செயற்படுத்த முடியுமா என்பன தொடர்பில் ஆராயுமாறும் கேட்டுக்கொண்டார்.
மேலும், சமாசத்திடம் காணப்படும் நிதி வளம், அரசாங்க நிதி ஒதுக்கீடுகள் மற்றும் பாராளுமன்ற உறுப்பினர்களின் பன்முகப்படுத்தப்பட்ட நிதி உள்ளிட்ட சாத்தியமான நிதி மூலங்களை ஒருங்கிணைத்து, பொருளாதார ரீதியாகவும் நடைமுறை ரீதியாகவும் சாத்தியமான தீர்வொன்றை உருவாக்குவது தொடர்பில் கவனம் செலுத்தப்பட வேண்டும் எனவும் அரசாங்க அதிபர் தெரிவித்தார். கோரிக்கைகளை முன்வைப்பது மாத்திரமன்றி, அவற்றை எவ்வாறு நடைமுறைப்படுத்த முடியும் என்பதை சம்பந்தப்பட்ட தரப்பினருடன் இணைந்து ஆராய்வதே முக்கியம் எனவும், கால்நடை வளர்ப்போரின் பிரச்சினைகளுக்கு நீடித்த தீர்வுகளைப் பெற்றுக்கொடுப்பதற்கான ஆக்கபூர்வமான அணுகுமுறையுடன் நாம் செயற்பட வேண்டும் என அரசாங்க அதிபர் வலியுறுத்தினார். இதேவேளை, அனுராதபுரம் மாவட்டத்தில் அமைந்துள்ள பரிசங்கஸ்வெவ கால்நடை விவசாயப் பண்ணையிலிருந்து, வடமாகாணத்தின் காலநிலைக்கு ஏற்ற வகையில் உயிர்வாழக்கூடிய பசுக்கள் மற்றும் கன்றுகளை உயிர் எடை அடிப்படையில் கொள்வனவு செய்வதற்கான வசதிகளை ஏற்படுத்தித் தருமாறும் கோரிக்கை முன்வைக்கப்பட்டது. இதற்கு பதிலளித்த அரசாங்க அதிபர், தேவையான பசுக்கள் மற்றும் கன்றுகளின் எண்ணிக்கையைத் தெளிவாகக் குறிப்பிட்டு கோரிக்கை கடிதம் சமர்ப்பிக்குமாறு தெரிவித்தார். குறித்த கோரிக்கை கிடைக்கப்பெற்றதும், தமது சிபார்சுடன் கால்நடை அபிவிருத்திச் சபையின் தலைவரிடம் முன்வைத்து, உரிய நடவடிக்கைகளை மேற்கொள்ள ஏற்பாடு செய்வதாகவும் அவர் தெரிவித்தார்.
சமாசத்தினால் முன்வைக்கப்பட்ட ஏனைய கோரிக்கைகள் தொடர்பிலும் சம்பந்தப்பட்ட துறைசார் அதிகாரிகளுடன் தனித்தனியாக ஆராய்ந்து, நடைமுறையில் சாத்தியமான நடவடிக்கைகளை முன்னெடுப்பதற்கு மாவட்ட செயலகம் தேவையான ஒருங்கிணைப்பை மேற்கொள்ளும் எனவும் அரசாங்க அதிபர் குறிப்பிட்டார். மேலும், கால்நடை வளர்ப்புத் துறையின் மேம்பாடு தொடர்பில் பல்வேறு விடயங்கள் குறித்து ஆக்கபூர்வமான முறையில் கலந்துரையாடப்பட்டமை குறிப்பிடத்தக்கது. இக்கலந்துரையாடலில் மேலதிக அரசாங்க அதிபர், மேலதிக அரசாங்க அதிபர் (காணி), திட்டமிடல் பணிப்பாளர், கால்நடை உற்பத்தி மற்றும் சுகாதாரத் திணைக்களத்தின் வடமாகாணப் பிரதிப் பணிப்பாளர், கூட்டுறவு அபிவிருத்தித் திணைக்களத்தின் உதவி ஆணையாளர், பிரதித் திட்டமிடல் பணிப்பாளர், சமாசத்தின் தலைவர் மற்றும் பிரதிநிதிகள் உள்ளிட்ட பலர் கலந்துகொண்டனர்.
1 2 3 4 5
 

விவசாயத் தொகைமதிப்பு நடவடிக்கைகளுக்காக நவீன தொழில்நுட்பத்தைப் பயன்படுத்தும் தொழில்நுட்ப உத்தியோகத்தர்களுக்கான (Tablet Technical Officers) ஒரு நாள் பயிற்சி நெறி மாவட்ட புள்ளிவிபரத் திணைக்களத்தின் பிரதிப் பணிப்பாளர் திரு. எம். வித்தியானந்தனேசன் அவர்கள் தலைமையில், இன்றைய தினம் (04.09.2026) காலை 9.00 மணிக்கு யாழ்ப்பாணம் மாவட்டச் செயலக மாநாட்டு மண்டபத்தில் நடைபெற்றது. இப் பயிற்சி நெறியின் ஆரம்ப நிகழ்வில், யாழ்ப்பாண மாவட்ட அரசாங்க அதிபரும் தொகைமதிப்பு ஆணையாளருமான திரு. மருதலிங்கம் பிரதீபன் அவர்கள் கலந்துகொண்டு உரையாற்றினார். இதன்போது கருத்துத் தெரிவித்த அரசாங்க அதிபர், விவசாயத் தொகைமதிப்புடன் தொடர்புடைய இப்பயிற்சி மிகவும் முக்கியத்துவம் வாய்ந்தது எனவும், எந்தவொரு அபிவிருத்தித் திட்டமிடலுக்கும் தரவு இன்றியமையாதது எனவும், நம்பகமான தரவுகள் இல்லாமல் சரியான தீர்மானங்களை மேற்கொள்ள முடியாது எனவும் தெரிவித்தார். மேலும், தரவுகள் பொதுவாக இரண்டு பிரதான வழிகளில் சேகரிக்கப்படுகின்றன எனவும், அவற்றில் முதல்நிலைத் தரவு என்பது களத்திற்குச் சென்று நேரடியாக சேகரிக்கப்படும் தரவுகளையும், இரண்டாம்நிலைத் தரவு என்பது ஏற்கனவே காணப்படும் ஆவணங்கள் மற்றும் பதிவுகளிலிருந்து பெறப்படும் தரவுகளையும் குறிக்கின்றன எனவும் அவர் விளக்கினார். அரசாங்கத்தின் உத்தியோகபூர்வ தரவுகளை வழங்கும் பிரதான நிறுவனமாக புள்ளிவிபரத் திணைக்களம் காணப்படுவதால், சேகரிக்கப்படும் புள்ளிவிபரங்கள் துல்லியமானவை, நம்பகமானவை மற்றும் உறுதிப்படுத்தப்பட்டவை என்பதனை உறுதி செய்வது அனைவரினதும் பொறுப்பாகும் எனவும் அரசாங்க அதிபர் வலியுறுத்தினார். 

விவசாயத் துறை தொடர்பான தரவுகளைச் சேகரிப்பதில் நவீன தொழில்நுட்பத்தைப் பயன்படுத்துவது தற்போதைய சூழலில் சில சவால்களை ஏற்படுத்தக்கூடும் எனவும், எனினும் காலத்தின் தேவைக்கேற்ப புதிய தொழில்நுட்ப முறைகளுக்கு நாம் பழகிக்கொள்ள வேண்டியது அவசியம் எனவும் தெரிவித்தார். இன்று நாம் சேகரிக்கும் ஒவ்வொரு தரவும் எதிர்கால சந்ததியினருக்குப் பயனளிக்கக்கூடிய பெறுமதிமிக்க வளமாகும். எனவே, தரவு சேகரிப்புப் பணியில் ஈடுபடும் ஒவ்வொருவரும் மிகுந்த பொறுப்புணர்வுடனும் அர்ப்பணிப்புடனும் செயற்பட வேண்டும் எனவும் அரசாங்க அதிபர் வலியுறுத்தினார். இப்பயிற்சி நெறியில் 58 தொழில்நுட்ப உத்தியோகத்தர்கள் கலந்துகொண்டனர். இப்பயிற்சி நெறியின் ஆரம்ப நிகழ்வில் தொகைமதிப்பு மற்றும் புள்ளிவிபரத் திணைக்களத்தின் மாவட்ட மற்றும் பிரதேச செயலக உத்தியோகத்தர்கள், தகவல் தொடர்பாடல் தொழில்நுட்ப உத்தியோகத்தர்கள் உள்ளிட்டோர் கலந்துகொண்டன.

 1 2 3 4 5 6 11

 

வடக்கு மாகாண பண்பாட்டலுவல்கள் அலகு மற்றும் கலாசார அலுவல்கள் திணைக்களம் ஆகியவற்றின் அனுசரணையுடன், வலிகாமம் வடக்கு பிரதேச செயலகமும் பிரதேச கலாசார பேரவையும் இணைந்து ஏற்பாடு செய்த “பண்பாட்டுப் பெருவிழா – 2026”இன்றைய தினம் (04.09.2026) வெள்ளிக்கிழமை பிற்பகல் தெல்லிப்பழை இராஜேஸ்வரி மண்டபத்தில் சிறப்பாக நடைபெற்றது. வலிகாமம் வடக்கு பிரதேச கலாசார பேரவைத் தலைவரும் பிரதேச செயலாளருமான திருவாட்டி சிவகெங்கா சுதீஸ்னர் அவர்களின் தலைமையில் நடைபெற்ற இந் நிகழ்வில், பிரதம விருந்தினராக யாழ்ப்பாண மாவட்ட அரசாங்க அதிபரும் மாவட்ட செயலாளருமான உயர் திரு. மருதலிங்கம் பிரதீபன் அவர்கள் கலந்து சிறப்பித்தார். சிறப்பு விருந்தினராக வடக்கு மாகாண பண்பாட்டலுவல்கள் அலகின் பிரதிப்பணிப்பாளர் திருவாட்டி தர்சினி நிதர்சன் அவர்களும், கௌரவ விருந்தினராக “கலைக்குரிசில்” திருவாட்டி பாகீரதி கணேசதுரை (மாவை பாரதி) அவர்களும் கலந்து சிறப்பித்தனர். இந் நிகழ்வில் கௌரவ விருந்தினராக
கவிஞரும் மூத்த நாடகவியலாளருமான திருவாட்டி பாகீரதி கணேசதுரை (மாவை பாரதி) அவர்கள் பங்கேற்றார். இவ்வாண்டின் பண்பாட்டுப் பெருவிழா “மாவைப் பண்டிதர்” அமரர் க. சச்சிதானந்தன் அரங்கு (மாவிட்டபுரம்) எனும் அரங்கில் நடைபெற்றது. இந் நிகழ்வில் அரசாங்க அதிபர் அவர்கள், தனது உரையில், ஒவ்வொரு கிராமமும் தனித்துவமான கலை மரபுகளையும் பண்பாட்டு அடையாளங்களையும் கொண்டுள்ளதுடன், அவற்றைப் பாதுகாத்து அடுத்த தலைமுறைக்கு எடுத்துச் செல்ல வேண்டிய பொறுப்பு அனைவருக்கும் உண்டு எனத் தெரிவித்தார். மேலும், தொழில்நுட்ப வளர்ச்சியின் தாக்கத்தால் பாரம்பரிய கலை வடிவங்கள் படிப்படியாக சுருக்கப்பட்டு இலத்திரனியல் வடிவங்களுக்கு மாற்றமடைந்து வருகின்ற நிலையில், அவற்றின் அசல் தன்மையையும் பாரம்பரிய அடையாளத்தையும் பாதுகாப்பதற்கான முயற்சிகள் அவசியமானவை என்றும் வலியுறுத்தினார்.
1990ஆம் ஆண்டு இடம்பெயர்வை எதிர்கொண்ட வலிகாமம் வடக்கு மக்களின் வாழ்வியலோடு பின்னிப் பிணைந்திருந்த கலை மற்றும் பண்பாட்டு மரபுகள், பல்வேறு சவால்களுக்கு மத்தியிலும் இன்றுவரை தொடர்ச்சியாகப் பேணப்பட்டு வருவது பாராட்டுக்குரிய விடயம் எனத் தெரிவித்த அரசாங்க அதிபர், தாயகத்தை விட்டு பிரிந்து வாழ்ந்த காலங்களிலும் தமது கலை மற்றும் பண்பாட்டு அடையாளங்களைப் பாதுகாத்து வந்த கலைஞர்களின் அர்ப்பணிப்பு அனைவருக்கும் முன்னுதாரணமாக அமைவதாகக் குறிப்பிட்டார். மேலும், கலைஞர்களை அவர்கள் வாழும் காலத்திலேயே கௌரவிப்பது அவர்களின் கலைப்பயணத்திற்கு பெருமை சேர்ப்பதுடன், இளம் தலைமுறையினரையும் கலைத்துறையில் ஈடுபடுவதற்கு ஊக்குவிக்கும் எனவும் அவர் தெரிவித்தார். மாகாணத்தின் நிதி ஆதரவுடன் முன்னெடுக்கப்படும் இத்தகைய பண்பாட்டு விழாக்கள் கிராம மட்டத்தில் தொடர்ச்சியாக நடத்தப்பட வேண்டும் எனக் குறிப்பிட்டதுடன், தமிழர் கலை, பண்பாடு மற்றும் பாரம்பரிய மரபுகளைப் பாதுகாத்து அடுத்த தலைமுறைக்கு எடுத்துச் செல்ல அனைவரும் ஒன்றிணைந்து செயற்பட வேண்டும் எனவும் கேட்டுக் கொண்டார்.
கலை ஆற்றுகைகளுடன் ஆரம்பமான விழா !
நிகழ்வின் ஆரம்ப நிகழ்வாக, பிரதேசத்தின் பல்வேறு கலை ஆற்றுகைகளுடன் விருந்தினர்கள் துர்கையம்மன் ஆலய தலைவாசல் இராஜகோபுர முன்றலில் இருந்து விழா மண்டபத்திற்கு அழைத்துவரப்பட்டனர். அதனைத் தொடர்ந்து மங்கல விளக்கேற்றும் நிகழ்வு நடைபெற்றதுடன், பிரதேச செயலக உத்தியோகத்தர்களால் தமிழ்த்தாய் வாழ்த்து இசைக்கப்பட்டது. இதனைத் தொடர்ந்து மங்கல இசையினை திரு. இ. ஞானசம்மந்தர், திரு. த. உதயசங்கர் மற்றும் குழுவினரின் கலை ஆற்றுகை இடம்பெற்றது.mஅதனைத் தொடர்ந்து பன்னாலை ஆசிரியர் திரு. நி. பாபுதரன் அவர்களால் அரங்கத் திறப்புரை நிகழ்த்தப்பட்டது. தொடர்ந்து தெல்லிப்பழை கலாசார மத்திய கலைக்குழுவினர் (அளவெட்டி தெற்கு) வழங்கிய வரவேற்பு நடனம் சிறப்பாக இடம்பெற்றது. இதனைத் தொடர்ந்து, உதவிப் பிரதேச செயலாளர் திரு. செ. நிசான் அவர்களால் வரவேற்புரை நிகழ்த்தப்பட்டது.
பல்வேறு கலை நிகழ்வுகள்
பண்பாட்டுப் பெருவிழாவில் பிரதேசத்தின் பாரம்பரிய கலைகளையும், கலைஞர்களின் திறமைகளையும் வெளிப்படுத்தும் வகையில் பல்வேறு கலை நிகழ்வுகள் இடம்பெற்றன. பிரதேச மட்ட கலைமன்றப் போட்டியில் முதலிடம் பெற்ற “சோலைக்குயில்” அவைக்காற்றுக் களத்தினர், விழிசிட்டி வழங்கிய கிராமிய இசை நிகழ்வினை நடாத்தினர். அதனைத் தொடர்ந்து “வாத்தியப்பிருந்தா” எனும் இசை நிகழ்வை வலிகாமம் வடக்கு பிரதேச அணிசெய் வாத்தியக் கலைஞர்கள் வழங்கினர். மேலும், பிரதேச மட்ட கலைமன்றப் போட்டியில் முதலிடம் பெற்ற ஆரோகணா அரங்கக் கல்லூரி கலைக்குழுவினர் – தஞ்சிட்டி, அளவெட்டி வடக்கு ஆகியோரின் சிறப்புக் கலை நிகழ்வும் இடம்பெற்றது. தொடர்ந்து மாவை பொதுச்சேவைக் கழக கலைக்குழுவினர், பளை வீமன்காமம் வடக்கு வழங்கிய பாரம்பரிய ஒயிலாட்டம் பார்வையாளர்களை வெகுவாகக் கவர்ந்தது. இவ்வாறு பிரதேசத்தின் பல்வேறு கலை வடிவங்களை ஒரே அரங்கில் வெளிப்படுத்தும் வகையில் நிகழ்வுகள் தொடர்ச்சியாக இடம்பெற்றன.
கலைஞர்கள் கௌரவிப்பு :
“கலைச்சுடர் விருது” வழங்கி வைப்பு
பண்பாட்டுப் பெருவிழாவின் முக்கிய நிகழ்வாக, பிரதேசத்தின் கலைத்துறைக்கு ஆற்றிவரும் பங்களிப்பைப் பாராட்டும் வகையில் கலைஞர்கள் கௌரவிக்கப்பட்டதுடன், 2026 ஆம் ஆண்டிற்கான பிரதேச “கலைச்சுடர் விருதுகளும்” வழங்கி வைக்கப்பட்டன. அதன்படி, ஒப்பனைக் கலையில் சிறப்பான பங்களிப்பை ஆற்றிவரும் அளவெட்டி கிழக்கைச் சேர்ந்த திரு. ஐயாத்துரை பத்மதாஸ் அவர்களுக்கு “கலைச்சுடர் விருது” வழங்கி கௌரவிக்கப்பட்டது. வாத்தியக்கலையில், குறிப்பாக ஆர்மோனியம் இசைத்துறையில் சிறப்பான பங்களிப்பை வழங்கிவரும் மல்லாகம் கிழக்கைச் சேர்ந்த திரு. சிவநாதன் றஜீவன் அவர்களுக்கும் “கலைச்சுடர் விருது” வழங்கி கௌரவிக்கப்பட்டது. அத்துடன், வயலின் வாத்தியக் கலையில் தனது திறமையை வெளிப்படுத்தி வரும் அளவெட்டி தெற்கைச் சேர்ந்த திருமதி நிக்ஸ்சனா கோகிலரூபன் அவர்களுக்கும் “கலைச்சுடர் விருது” வழங்கி கௌரவிக்கப்பட்டது. கலைத்துறையில் தமது நீண்டகாலப் பணியினூடாக பிரதேசத்தின் பண்பாட்டு அடையாளங்களைப் பாதுகாத்து, அவற்றை அடுத்த தலைமுறையினரிடம் கொண்டு செல்வதில் பங்களிப்பாற்றி வரும் கலைஞர்களை அடையாளப்படுத்தி கௌரவிக்கும் இந்நிகழ்வு, கலைஞர்களுக்கு மேலும் ஊக்கத்தையும் அங்கீகாரத்தையும் வழங்கும் வகையில் அமைந்தது. கலைமன்ற மற்றும் தேசிய போட்டிகளில் வெற்றிபெற்றோருக்கு பரிசில்கள் இதனுடன், பிரதேச மட்ட கலைமன்றப் போட்டிகள் மற்றும் தேசிய கலை இலக்கியப் போட்டிகளில் வெற்றிபெற்ற மாணவர்கள், கலைஞர்கள் மற்றும் போட்டியாளர்களுக்கான பரிசில்களும் வழங்கி வைக்கப்பட்டன. இந் நிகழ்வின் நிறைவாக, தெல்லிப்பழை கலாசார உத்தியோகத்தர் திரு. த. அமலதாஸ் அவர்களால் நன்றியுரை வழங்கப்பட்டது. இந்நிகழ்வில் கலைஞர்கள், கலை ஆர்வலர்கள், பொதுமக்கள் மற்றும் பிரதேச செயலக உத்தியோகத்தர்கள் உள்ளிட்ட பல்வேறு தரப்பினரும் ஆர்வத்துடன் கலந்துகொண்டு, நிகழ்வின் சிறப்பையும் சிறப்புறச் செய்தனர்.
 
 
 1 2 3 4 5 6 7 11 9 13 18
 
யாழ்ப்பாணம் மற்றும் வடக்கு பிராந்திய புத்தாக்கச் சூழலமைப்பை (Regional Innovation Ecosystem) வலுப்படுத்தும் நோக்கில், யாழ்ப்பாண மாவட்ட செயலகமும் இலங்கை தேசிய புத்தாக்க முகவராண்மையும் (NIA) இணைந்து ஏற்பாடு செய்த திறந்த கலந்துரையாடல் அரசாங்க அதிபர் திரு மருதலிங்கம் பிரதீபன் அவர்கள் தலைமையில், இன்றைய தினம் (04.09.2026) யாழ்ப்பாண மாவட்டச் செயலக கேட்போர் கூடத்தில் நடைபெற்றது. இதன்போது தலைமையுரையாற்றிய அரசாங்க அதிபர் அவர்கள் யாழ்ப்பாணம் மற்றும் வடக்கு மாகாணத்தில் காணப்படும் புத்தாக்கச் சிந்தனைகள், புதிய கண்டுபிடிப்புகள், தொழில்நுட்ப முயற்சிகள் மற்றும் தொழில்முனைவுகளை அடையாளம் கண்டு, அவற்றுக்கு தேசிய மட்டத்திலான அங்கீகாரம், வழிகாட்டுதல் மற்றும் தேவையான ஆதரவைப் பெற்றுக்கொடுப்பதற்கான நடவடிக்கைகளை அரசாங்கம் முன்னெடுத்து வருவதாக தெரிவித்தார். அதற்கான முதலாவது களமாக இன்றைய கலந்துரையாடல் அமைந்துள்ளதாகவும், யாழ்ப்பாணம் மற்றும் வடக்கு மாகாணத்தின் புத்தாக்க ஆற்றல்களை ஒருங்கிணைத்து, அவற்றை மேலும் மேம்படுத்துவதற்கான வாய்ப்புகளை உருவாக்குவதே இக் கலந்துரையாடலின் பிரதான நோக்கமாகும் என்றும் அரசாங்க அதிபர் மேலும் தெரிவித்தார்.
மேலும், யாழ்ப்பாண மாவட்டத்தில் யுத்த காலத்திலிருந்தே பல்வேறு புதிய கண்டுபிடிப்புகளும் புத்தாக்க முயற்சிகளும் முன்னெடுக்கப்பட்டு வருவதாகக் குறிப்பிட்டதுடன், தற்போதும் பாடசாலை மாணவர்கள், இளைஞர்கள், சமூக ஆர்வலர்கள் மற்றும் பல்வேறு துறைகளைச் சேர்ந்தவர்கள் தமது படைப்பாற்றலையும் புத்தாக்கச் சிந்தனைகளையும் வெளிப்படுத்தி வருவதாகத் தெரிவித்தார். எனினும், இவ்வாறான பல புத்தாக்க முயற்சிகள் பாடசாலை அல்லது சமூக ஊடக மட்டத்திலேயே மட்டுப்படுத்தப்படுகின்றன. எனவே, அவற்றை முறையாக அடையாளம் கண்டு, ஆவணப்படுத்தி, தொழில்நுட்ப மற்றும் நிறுவன ரீதியான வழிகாட்டல்களை வழங்கி, தேசிய மட்டத்திற்குக் கொண்டு செல்வதுடன், சமூகத்திற்கும் பொருளாதாரத்திற்கும் பயனளிக்கும் உற்பத்திகளாகவும் சேவைகளாகவும் மாற்றுவதற்கான பொறிமுறையொன்றை உருவாக்க வேண்டியது அவசியம் என வலியுறுத்தினார். இதன் ஒரு பகுதியாக, யாழ்ப்பாண மாவட்டத்தில் புத்தாக்கச் செயற்பாடுகளில் ஈடுபட்டு வருகின்ற சமூக ஆர்வலர்கள், பாடசாலை மாணவர்கள், இளைஞர்கள், புத்தாக்குநர்கள், தொழில்முனைவோர் மற்றும் பல்வேறு அமைப்புகளின் தகவல்களை பிரதேச செயலாளர்கள் ஊடாக Google Form மூலம் சேகரிக்கும் நடவடிக்கை முன்னெடுக்கப்பட்டு வருவதாகவும் அரசாங்க அதிபர் தெரிவித்தார்.
சேகரிக்கப்படும் தகவல்களின் அடிப்படையில் மாவட்டத்தில் காணப்படும் புத்தாக்க ஆற்றல்களை அடையாளம் கண்டு, அவற்றை உரிய நிறுவனங்கள் மற்றும் ஆதரவு அமைப்புகளுடன் இணைப்பதுடன், தேசிய புத்தாக்க முகவராண்மையின் தொழில்நுட்ப வழிகாட்டல், பயிற்சி மற்றும் ஆதரவு வாய்ப்புகளைப் பெற்றுக்கொடுப்பதற்கும் தொடர்ச்சியாக நடவடிக்கை எடுக்கப்படும் என அரசாங்க அதிபர் குறிப்பிட்டார். மேலும், புத்தாக்கங்களை விருத்தி செய்தல், வணிகமயமாக்கல், மதிப்புக்கூட்டல், வர்த்தகப் பெயராக்கம் மற்றும் முதலீட்டு வாய்ப்புகளைப் பெற்றுக்கொள்ளுதல் போன்ற துறைகளில் உரிய வழிகாட்டல்களை வழங்குவதன் மூலம், இளைஞர்களின் படைப்பாற்றலை புதிய தொழில் மற்றும் பொருளாதார வாய்ப்புகளாக மாற்ற முடியும் எனவும் அரசாங்க அதிபர் தெரிவித்தார். குறிப்பாக, பாடசாலை மாணவர்கள் மற்றும் இளைஞர்களிடம் காணப்படும் திறமைகளை ஆரம்ப நிலையிலேயே அடையாளம் கண்டு வளர்த்தெடுத்து, அவர்களின் கண்டுபிடிப்புகளை ஆய்வு, தொழில்நுட்பம், உற்பத்தி மற்றும் கைத்தொழில் துறைகளுடன் இணைப்பதன் மூலம், பிராந்தியத்தின் பொருளாதார வளர்ச்சிக்கு புதிய பங்களிப்புகளை உருவாக்க முடியும் என தெரிவித்தார்.
எதிர்காலத்தில் புத்தாக்க ஆர்வலர்கள், வல்லுநர்கள், மாணவர்கள், தொழில்முனைவோர் மற்றும் தொடர்புடைய அரச நிறுவனங்களை ஒருங்கிணைத்து தொடர்ச்சியான கலந்துரையாடல்கள், விழிப்புணர்வு நிகழ்வுகள் மற்றும் வழிகாட்டல் செயலமர்வுகளை நடத்துவதன் மூலம், யாழ்ப்பாணம் மற்றும் வடக்கு மாகாணத்தின் புத்தாக்க ஆற்றல்களை தேசிய மட்டத்தில் வெளிக்கொணர நடவடிக்கை எடுக்கப்படும் எனவும் அரசாங்க அதிபர் தெரிவித்தார். இக் கலந்துரையாடலில் தேசிய புத்தாக்க முகவராண்மையின் தலைமை அதிகாரி கலாநிதி முதித டி. செனரத் யாவா, சிரேஷ்ட உத்தியோகத்தர்களான திடாசி தஹாநாயக்க, நவோடி விக்ரமசிங்ஹ மற்றும் புத்தாக்க உத்தியோகத்தர் லயந்தினி சோமசுந்தரம் ஆகியோர் கலந்து கொண்டு தேசிய புத்தாக்க முகவராண்மையின் சேவைகள், திட்டங்கள் மற்றும் ஆதரவு வாய்ப்புகள் தொடர்பில் விளக்கங்களை வழங்கினர்.
யாழ்ப்பாண மாவட்டத்தில் தற்போது முன்னெடுக்கப்பட்டு வருகின்ற புத்தாக்கச் செயற்பாடுகளை தேசிய மட்டத்திலான புத்தாக்க முயற்சிகளுடன் இணைத்து, அவற்றை அடுத்த கட்டத்திற்கு முன்னெடுப்பதற்கான வாய்ப்புகள் மற்றும் நடைமுறைகள் தொடர்பில் விரிவாகக் கலந்துரையாடப்பட்டது. குறிப்பாக, யாழ்ப்பாணம் மற்றும் வடக்கு பிராந்தியத்தில் காணப்படும் புத்தாக்கச் சிந்தனைகள், ஆய்வுகள், புதிய தொழில்நுட்ப முயற்சிகள், உள்ளூர் தயாரிப்புகள் மற்றும் தொழில்முனைவுகளை முறையாக அடையாளம் கண்டு, அவற்றின் வளர்ச்சிக்குத் தேவையான வழிகாட்டல், தொழில்நுட்ப மற்றும் நிதி ஆதரவு, சந்தை வாய்ப்புகள் உள்ளிட்ட வசதிகளைப் பெற்றுக்கொடுப்பதுடன், அவற்றை உரிய அரச நிறுவனங்கள், தேசிய மட்டத்திலான புத்தாக்க அமைப்புகள் மற்றும் ஏனைய ஆதரவு நிறுவனங்களுடன் இணைத்து தேசிய மட்டத்திற்கு உயர்த்துவது தொடர்பிலும் விரிவாக ஆராயப்பட்டது. மேலும், இக்கலந்துரையாடலின் முதலாவது அமர்வாக, இன்று காலை 9.30 மணிக்கு யாழ்ப்பாண மாவட்ட உத்தியோகத்தர்களுக்கான புத்தாக்கம் தொடர்பான விழிப்புணர்வு செயலமர்வு மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் நடைபெற்றது என்பதும் குறிப்பிடத்தக்கது.
யாழ்ப்பாணம் மற்றும் வடக்கு மாகாணத்தில் காணப்படும் புத்தாக்க ஆற்றல்களை ஒருங்கிணைத்து, தேசிய புத்தாக்கச் சூழலமைப்புடன் இணைப்பதற்கான முக்கியமான ஆரம்பகட்ட நடவடிக்கையாக இக் கலந்துரையாடல் அமைந்துள்ளது. இன்றைய கலந்துரையாடலில், யாழ்ப்பாண மாவட்டத்தில் புத்தாக்கச் செயற்பாடுகளில் ஈடுபட்டு வருகின்ற சமூக ஆர்வலர்கள், பாடசாலை மாணவர்கள், இளைஞர்கள் மற்றும் பல்வேறு அமைப்புகளின் பிரதிநிதிகளுடன், பிரதேச செயலாளர்கள், உதவி மாவட்ட செயலாளர், உதவிப் பிரதேச செயலாளர்கள், புள்ளிவிபரத் திணைக்களத்தின் மாவட்டப் பிரதிப் பணிப்பாளர், விதாதா வள நிலைய மாவட்ட உத்தியோகத்தர், தேசிய தொழில் முயற்சி அதிகார சபையின் உத்தியோகத்தர், உற்பத்தித்திறன் அபிவிருத்தி உத்தியோகத்தர், சிறு தொழில் முயற்சி அபிவிருத்தி உத்தியோகத்தர், தொழில்துறைத் திணைக்களத்தின் மாவட்ட உத்தியோகத்தர் உள்ளிட்ட பல்வேறு துறைகளைச் சேர்ந்த உத்தியோகத்தர்களும் கலந்துகொண்டனர்.
 
1 2 3 4 5 6 7 8 10 12 15 16