யாழ்ப்பாண மக்களுக்கான எரிபொருள் விநியோகம் மற்றும் அத்தியாவசிய பொருட்களின் விலை நிர்ணயம் தொடர்பான விசேட கலந்துரையாடல் யாழ். மாவட்ட பாராளுமன்ற உறுப்பினர் கௌரவ அங்கஜன் இராமநாதன் அவர்களின் தலைமையில் (20.06.2022) காலை 10.30மணிக்கு மாவட்ட செயலக கேட்போா் கூடத்தில் இடம்பெற்றது.
இக் கலந்துரையாடலில் யாழ்ப்பாண மாவட்ட எரிபொருள் விநியோகத்துக்காக பங்கீட்டு அட்டை முறை அறிமுகப்படுத்தப்படவுள்ளது எனவும் மக்கள் தமக்கான பதிவுகளை பிரதேச செயலகங்களில் மேற்கொண்டு எரிபொருள் அட்டையை பெற முடியும் எனவும் அரச பணியாளர்கள் தமது திணைக்கள தலைவர் ஊடாக மாத்திரமே தமது பதிவுகளை மேற்கொள்ள முடியும் எனவும் அத்தியாவசிய சேவைக்காக ஒவ்வொரு பிரதேச செயலக பிரிவுகளிலும் உள்ள ஒரு ப.நோ.கூ.ச (MPCS) நிரப்பு நிலையம் செயற்படுத்தப்படும் எனவும் தீர்மானங்கள் எடுக்கப்பட்டது.
எரிபொருளுக்கான தற்போதைய தட்டுப்பாட்டு நிலைமை காரணமாக யாழ்ப்பாண மாவட்ட த்தில் பங்கீட்டு அடிப்படையில் எரிபொருள் விநியோக நடவடிக்கைகளை முன்னெடுக்க எரிபொருள் பங்கீட்டு அட்டை முறைமையை பிரதேச செயலகங்கள் மூலமாக வழங்க மாவட்ட அரசாங்க அதிபர் கணபதிப்பிள்ளை மகேசன் அவர்கள் நடவடிக்கை மேற்கொண்டுள்ளார்.
அதற்கமைய பொதுமக்கள் தத்தமது தேவைக்குரிய எரிபொருள் பங்கீட்டு அட்டைகளை வதிவிடத்திற்குரிய பிரதேச செயலகங்கள் மூலமாகவும், அத்தியாவசிய உத்தியோகத்தர்கள்/ அரசாங்க உத்தியோகத்தர்கள் தமது எரிபொருள் பங்கீட்டு விநியோக அட்டையை கடமையாற்றும் திணைக்கள தலைவரின் சிபார்சுடன் குறித்த உத்தியோகத்தர் வசிக்கும் பிரதேச செயலகங்கள் ஊடாகவும் வழங்குவதற்கு ஏற்பாடுகள் மேற்கொள்ளப்பட்டுள்ளதாக மாவட்ட அரசாங்க அதிபர் அறிவித்துள்ளார்.
இந்திய அரசின் இலங்கை மக்களுக்கான இரண்டாம் கட்ட உணவுப்பொருட்களை கொண்ட புகையிரதம் யாழ்ப்பாணத்தை வந்தடைந்தது.
இந்திய அரசின் இலங்கை மக்களுக்காக இரண்டாம் கட்டமாக வழங்கப்பட்ட அரிசிப்பொதிகள் உணவு ஆணையாளர் திணைக்களம் மூலமாக அனுப்பி வைக்கப்பட்டு 09.06.2022 காலை யாழ்ப்பாண புகையிரத நிலையத்தில் கிடைக்கப்பெற்றது. டைக்கப்பெற்ற 540,000 கிலோகிராம் அரிசி 11 பிரதேசசெயலக பிரிவுகளைச் சேர்ந்த குடும்பங்களுக்கு பகிந்தளிப்பதற்காக குறித்த பிரதேச செயலாளர்களிடம் கையளிக்கப்பட்டது.
நயினாதீவு ஸ்ரீ நாகபூசணி ஆலய உயர் திருவிழா நடைபெறுவதற்கான சிறப்பான சேவையினை வழங்கும் பொருட்டான முன்னாயத்த கலந்துரையாடல் மாவட்ட அரசாங்க அதிபர் திரு.கணபதிப்பிள்ளை மகேசன் அவர்களின் தலைமையில் 10.06.2022 காலை 10.00 மணிக்கு மாவட்ட செயலக மாநாட்டு மண்டபத்தில் நடைபெற்றது.
இக்கலந்தரையாடலில் பாதுகாப்பு பொலிஸ் உத்தியோகத்தர்கள் தேவை, அம்புலன்ஸ சேவை, கடற்போக்குவரத்து சேவை , படகுகள் அனுமதி , அரச மற்றும் தனியார் வீதிப்போக்குவரத்து சேவை, அவற்றுக்கான எரிபொருள் ஏற்பாடுகள், சுகாதாரம், மற்றும் குடிநீர் தேவை, மின்சாரத்தேவை, புனரமைக்கவேண்டிய வீதிகள், அமுதசுரபி அன்னதான ஒழுங்குகள், மற்றும் ஊடகங்களுக்கான அனுமதி உள்ளிட்ட விடயங்கள் விரிவாக கலந்துரையாடப்பட்டது.
யாழ்ப்பாண மாவட்ட பனை அபிவிருத்தி தொடர்பான செயலமர்வு மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் 07.06.2022 காலை 09.30 மணிக்கு மாவட்டச்செயலக மாநாட்டு மண்டபத்தில் நடைபெற்றது.
இச் செயலமர்வில் கருத்துதெரிவித்த மாவட்ட அரசாங்க அதிபர் கணபதிப்பிள்ளை மகேசன் அவர்கள் பனை அபிவிருத்தி நடவடிக்கைகளை ஊக்குவித்தல், அதன் விரிவாக்கல் நடவடிக்கைகள் மற்றும் பெறுமதிசேர் வளங்களை பயன்படுத்தி அத்துறையில் வருமானம் ஈட்டும் வழிகள் மற்றும் அவற்றிற்குரிய சந்தைவாய்ப்பு தொடர்பாக கருத்து தெரிவித்தார். மேலும், பனைசார் உற்பத்தி பொருட்களின் கேள்விக்கேற்ப நிரம்பல் போதாதுள்ளதாக சுட்டிக்காட்டியதோடு பனை சார் உற்பத்திகளை ஊக்குவிக்குமாறும் ஆலோசனை வழங்கப்பட்டது.
இச்செயலமர்வில் மேலதிக அரசாங்க அதிபர் மருதலிங்கம் பிரதீபன் அவர்கள் கருத்து தெரிவிக்கையில் பிரதேச பனைசார் அபிவிருத்தி தொடர்பாக பல்வேறு நடவடிக்கைகள் எடுக்க வேண்டியுள்ளதாகவும் எமது பிரதேசத்தில் அபிவிருத்தி நடவடிக்கைகளின் பொருட்டு பனை வளங்கள் அழிக்கப்படுவதாகவும் இதனால் பனை உற்பத்தி சார் பொருட்கள் பார்வைக்குரிய காட்சிப்பொருளாக மாறி பனைசார் உற்பத்தி பொருட்களை பயன்படுத்தும் தன்மை நலிவடைந்து மக்கள் நவீனத்துவம் நோக்கி செல்வதாகவும் தெரிவித்தார்.எனவே பனைசார் உற்பத்திகளை ஊக்குவிக்கும் செயற்பாடுகளை துறைசார் தரப்பினர் இனங்கண்டு முன்னெடுக்குமாறும் ஆலோசனை வழங்கப்பட்டமை குறிப்பிடத்தக்கது.







