யாழ்ப்பாண மாவட்டம் பல்வேறு விருதுகளைப் பெற்றுத் தனது சாதனையைப் பதிவு செய்தது.வட மாகாணத்தில் இயங்கிவரும் கிராம அபிவிருத்திச் சங்கங்கள் மற்றும் மாதர் கிராம அபிவிருத்திச் சங்கங்களின் செயற்பாடுகளை மதிப்பீடு செய்து, அவற்றின் வினைத்திறன் மற்றும் வினைவிளைதிறனை மேம்படுத்தும் நோக்கில் ஏற்பாடு செய்யப்பட்ட 2026ஆம் ஆண்டுக்கான கிராம அபிவிருத்திச் சங்கங்களின் தரப்படுத்தல் விருது வழங்கும் விழா இன்று (04.11.2026) புதன்கிழமை யாழ்ப்பாணம் திருவள்ளுவர் கலாசார மண்டபத்தில் சிறப்பாக நடைபெற்றது. வட மாகாண கிராம அபிவிருத்தித் திணைக்களத்தின் மாகாணப் பணிப்பாளர் திருமதி பி. கஜனி தலைமையில் நடைபெற்ற இந்நிகழ்வில், வட மாகாண பிரதம செயலாளர் திருமதி தனுஜா முருகேசன் மற்றும் யாழ்ப்பாணத்திலுள்ள இந்தியத் துணைத் தூதரகத்தின் துணைத் தூதுவர் மாண்புமிகு ஸ்ரீ சாய் முரளி ஆகியோர் பிரதம விருந்தினர்களாகக் கலந்துகொண்டனர். மேலும், உள்ளூராட்சி அமைச்சின் செயலாளர் திரு. ஏ. சோதிநாதன் கௌரவ விருந்தினராகவும், யாழ்ப்பாண மாவட்டச் செயலாளர் ம. பிரதீபன் மற்றும் மன்னார் மாவட்டச் செயலாளர் கே. கனகேஸ்வரன் ஆகியோர் சிறப்பு விருந்தினர்களாகவும் கலந்துகொண்டனர்.
நோக்கம் :
வட மாகாண கிராம அபிவிருத்தித் திணைக்களத்தினால் ஏற்பாடு செய்யப்பட்ட இந்நிகழ்வின் பிரதான நோக்கம், கிராம அபிவிருத்திச் சங்கங்களின் செயற்பாடுகளை முறையாக மதிப்பீடு செய்து, அவற்றின் நிர்வாகக் கட்டமைப்பு, செயற்பாட்டுத் திறன் மற்றும் சமூகப் பங்களிப்பை மேலும் வலுப்படுத்துவதாகும். குறிப்பாக, வட மாகாணத்தில் பதிவு செய்யப்பட்டு இயங்கிவரும் கிராம அபிவிருத்திச் சங்கங்கள் மற்றும் மாதர் கிராம அபிவிருத்திச் சங்கங்களின் செயற்பாடுகளைத் தரப்படுத்துவதன் மூலம் அவற்றின் முன்னேற்றத்திற்கான வாய்ப்புகளை அடையாளம் காண்பதுடன், சிறந்த முறையில் செயற்படும் சங்கங்களை ஊக்குவித்து, ஏனைய சங்கங்களுக்கும் முன்னுதாரணமாக விளங்கச் செய்வதும் இத்திட்டத்தின் முக்கிய நோக்கங்களாகும். சங்கங்களின் செயற்பாடுகள் நிர்வாகம், கணக்குப் பராமரிப்பு, ஒழுங்கமைப்பு, அபிவிருத்தி, சுகாதாரம், சமூக நலன், கல்வி, சமய, பண்பாட்டு, கலை, விளையாட்டு மற்றும் வாழ்வாதார மேம்பாடு உள்ளிட்ட பல்வேறு அளவுகோல்களின் அடிப்படையில் மதிப்பீடு செய்யப்படுகின்றன. இதன் அடிப்படையில் சங்கங்கள் A, B, C, D என நான்கு தரங்களாக வகைப்படுத்தப்பட்டு, அவற்றின் செயற்பாட்டுத் திறனுக்கேற்ப அங்கீகாரமும் ஊக்குவிப்பும் வழங்கப்படுகின்றன.
வட மாகாணத்தில் 47 விருதுகள் – யாழ்ப்பாண மாவட்டத்திற்கு 11 விருதுகள்
வட மாகாணம் மொத்தமாக 47 விருதுகளைப் பெற்றுள்ளது. அவற்றில் யாழ்ப்பாண மாவட்டம் 11 விருதுகளைப் பெற்றுள்ளது.
யாழ்ப்பாண மாவட்ட மட்டத்தில் பெற்ற விருதுகள் :
கிராம அபிவிருத்திச் சங்கங்கள் :
* முதலாம் இடம் – புதிய சோனகத்தெரு கிராம அபிவிருத்திச் சங்கம் (யாழ்ப்பாணம்).
* இரண்டாம் இடம் – அல்வாய் தெற்கு கிராம அபிவிருத்திச் சங்கம் (கரவெட்டி).
* மூன்றாம் இடம் – வித்தகபுரம் கிராம அபிவிருத்திச் சங்கம் (தெல்லிப்பழை).
மாதர் கிராம அபிவிருத்திச் சங்கங்கள் :
* முதலாம் இடம் – கொழும்புத்துறை கிழக்கு மாதர் கிராம அபிவிருத்திச் சங்கம் (யாழ்ப்பாணம்).
* இரண்டாம் இடம் – இமையாணன் மத்தி மாதர் கிராம அபிவிருத்திச் சங்கம் (கரவெட்டி).
* மூன்றாம் இடம் – ஈச்சமோட்டை மாதர் கிராம அபிவிருத்திச் சங்கம் (யாழ்ப்பாணம்).
மாகாண மட்டத்தில் பெற்ற விருதுகள்
* முதலாம் இடம் – கொழும்புத்துறை கிழக்கு மாதர் கிராம அபிவிருத்திச் சங்கம் (யாழ்ப்பாணம்).
* மூன்றாம் இடம் – புதிய சோனகத்தெரு கிராம அபிவிருத்திச் சங்கம் (யாழ்ப்பாணம்).
கிராம அலுவலருக்கான விசேட விருது :
மாகாண மட்டத்தில் கிராம மற்றும் மாதர் கிராம அபிவிருத்திச் சங்கங்களுக்கான தரப்படுத்தல் செயற்பாட்டில், சங்கங்களுக்கு மிகச் சிறந்த முறையில் ஒத்துழைப்பும் ஆதரவும் வழங்கிய கிராம அலுவலருக்கான விருது, கொழும்புத்துறை கிழக்கு கிராம அலுவலர் (J-62) அவர்களுக்கு வழங்கப்பட்டுள்ளது.
மாகாண மட்ட விருதுகளில் யாழ்ப்பாண மாவட்டத்திற்கு இரண்டு இரண்டாம் இடங்கள்!
சிறந்த கிராம அபிவிருத்தி உத்தியோகத்தருக்கான விருது :
மாகாண மட்டத்தில் இரண்டாம் இடம் : யாழ்ப்பாண மாவட்ட கிராம அபிவிருத்தி உத்தியோகத்தர்.
கிராம அபிவிருத்திச் சங்கங்களை மிகச் சிறந்த முறையில் வழிப்படுத்திய பிரதேச செயலாளருக்கான விருது :
மாகாண மட்டத்தில் இரண்டாம் இடம்: யாழ்ப்பாணப் பிரதேச செயலாளர். யாழ்ப்பாண மாவட்டத்தின் இந்தச் சாதனையானது, கிராமிய அமைப்புகளின் அர்ப்பணிப்பான செயற்பாடுகளையும், அவற்றுக்கு ஆதரவாகச் செயற்படும் கிராம அலுவலர்களின் பங்களிப்பையும் வெளிப்படுத்துவதாக அமைந்துள்ளது. இந் நிகழ்வில், வட மாகாண கிராம அபிவிருத்தித் திணைக்களத்தின் உத்தியோகத்தர்கள், மாவட்ட மற்றும் பிரதேச மட்ட கிராம அபிவிருத்தி உத்தியோகத்தர்கள் உள்ளிட்ட பலரும் இந் நிகழ்வில் கலந்துகொண்டனர்.

யாழ்ப்பாணம் மற்றும் கிளிநொச்சி மாவட்ட பாடசாலைகளில் கைத்தொழில் முயற்சியாண்மை வட்டங்களை வலுப்படுத்தும் நோக்கில், ஆசிரியர்களுக்கான விழிப்புணர்வு செயலமர்வு கைத்தொழில் அபிவிருத்திச் சபையின் பிரதிப் பணிப்பாளர் திரு. கா. சசிகரன் தலைமையில் இன்றைய தினம் (04.11.2026) காலை 09.00 மணிக்கு யாழ்ப்பாணம் இந்துக் கல்லூரியின் சபாலிங்கம் அரங்கில் நடைபெற்றது. இச் செயலமர்வில் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் அதிதியாகக் கலந்துகொண்டு செயலமர்வை உத்தியோகபூர்வமாக ஆரம்பித்து வைத்தார். இச் செயலமர்வில் கைத்தொழில் அபிவிருத்தி சபை தலைவர் திரு. யசாஸ் கெவகே, பிரதிப்பணிப்பாளர் திரு. ஜெயந்த பிறேமகுமார, கிளிநொச்சி உதவிப்பணிப்பாளர் திரு. சி.சடாட்சரன் மற்றும் மாகாண கல்வித் திணைக்கள பிரதிப்பணிப்பாளர் திரு,அ,சுபாகரன் ஆகியோரும் கலந்துகொண்டனர்.
அரசாங்க அதிபர் உரை :
பாடசாலைப் பருவத்திலேயே தொழில் முயற்சியாண்மைச் சிந்தனையை மாணவர்களிடம் விதைக்க வேண்டும் – அரசாங்க அதிபர் பாடசாலை மாணவர்கள் அனைவரும் மருத்துவர், பொறியியலாளர் அல்லது பட்டதாரி என்ற ஒரே இலக்கை நோக்கிப் பயணிக்காமல், அவர்களது ஆர்வம், திறமை மற்றும் ஆற்றலுக்கு ஏற்ப பல்வேறு தொழில்துறைகளை அடையாளம் கண்டு, எதிர்காலத்தில் சிறந்த தொழில் முயற்சியாளர்களாக உருவாகும் வகையில் வழிப்படுத்த வேண்டும் என யாழ்ப்பாண மாவட்ட அரசாங்க அதிபர் மருதலிங்கம் பிரதீபன் தெரிவித்தார்.
தொழில் வாய்ப்புகளுக்கும் வேலையற்றோரும் :
எமது மாவட்டத்தில் பல தொழில் முயற்சியாளர்கள் தமது நிறுவனங்களுக்குத் தேவையான தொழிலாளர்களைப் பெற்றுக்கொள்வதில் சிரமங்களை எதிர்கொள்கின்றனர். அதேவேளை, வேலையற்றவர்களின் எண்ணிக்கையும் அதிகமாகக் காணப்படுகின்றது. தொழில் வாய்ப்புகள் இருந்தும் அவற்றைப் பயன்படுத்திக்கொள்ளும் மனப்பாங்கு இளைஞர்களிடம் போதியளவில் வளர்ச்சியடையவில்லை. இது சமூகத்தில் காணப்படும் முக்கியமான முரண்பாடாகும். அரச உத்தியோகத்தை மட்டுமே எதிர்பார்த்துக் காத்திருக்காமல், இளைஞர்கள் தங்களுக்கான தொழில் வாய்ப்புகளைத் தாங்களே உருவாக்கிக்கொள்ள வேண்டும். அதற்கான சிந்தனையும் தன்னம்பிக்கையும் பாடசாலைப் பருவத்திலிருந்தே வளர்க்கப்பட வேண்டும்.
கல்விக் கொள்கையிலும் பெற்றோர் மனப்பாங்கிலும் மாற்றம் அவசியம் :
ஒரு தொழில் முயற்சியை ஆரம்பிப்பதில் தொழிலாளர்களைப் பெற்றுக்கொள்வது, வங்கிக் கடன்களைப் பெறுவது, வணிகப் பதிவுகளை மேற்கொள்வது உள்ளிட்ட பல்வேறு சவால்கள் காணப்படுகின்றன. இத்தகைய சவால்களை எதிர்கொண்டு முயற்சிகளில் ஈடுபடுபவர்களை ஊக்குவிக்கும் மனப்பாங்கு சமூகத்தில் வளர வேண்டும். வெளிநாடுகளில் எட்டாம், ஒன்பதாம் வகுப்புகளிலேயே மாணவர்களின் ஆர்வத்திற்கேற்ப மோட்டார் வாகனத் தொழில்நுட்பம், கட்டட நிர்மாணம், விளையாட்டு உள்ளிட்ட பல்வேறு துறைகளில் திறமைகளை வளர்த்துக்கொள்ள வாய்ப்புகள் வழங்கப்படுகின்றன. எமது கல்வி முறையிலும் இத்தகைய சிந்தனை மாற்றம் ஏற்பட வேண்டும். எமது சமூகத்தில் பெற்றோர்கள் பிள்ளைகள் பல்கலைக்கழகத்திற்குச் சென்று மருத்துவர், பொறியியலாளர் அல்லது பட்டதாரிகளாக வேண்டும் என்பதையே பெரும்பாலும் எதிர்பார்க்கின்றனர். ஆனால், பல்கலைக்கழகக் கல்வியைப் பெறாத பலரும் வெற்றிகரமான தொழில் முயற்சியாளர்களாக உருவாகியுள்ளனர். எனவே, மாணவர்களுக்கு மட்டுமன்றி பெற்றோர்களுக்கும் தொழில் முயற்சியாண்மை தொடர்பான விழிப்புணர்வை ஏற்படுத்த வேண்டும்.
தொழில் முயற்சியாண்மை வட்டங்கள் செயற்பாட்டு மையங்களாக அமைய வேண்டும் :
ஒவ்வொரு பாடசாலையிலும் உருவாக்கப்படவுள்ள தொழில் முயற்சியாண்மை வட்டங்களில் சுமார் 30 மாணவர்களை இணைத்து, அவர்களுக்குத் தொடர்ச்சியான வழிகாட்டல்களை வழங்க வேண்டும். இவ்வட்டங்கள் பெயரளவிலான அமைப்புகளாக இல்லாமல், மாணவர்களின் படைப்பாற்றல், புதிய கண்டுபிடிப்புகள் மற்றும் தொழில் முயற்சித் திறன்களை வளர்க்கும் செயற்பாட்டு மையங்களாக அமைய வேண்டும் எனத் தெரிவித்தார். இதற்காக உள்ளூர் வெற்றிகரமான தொழில் முயற்சியாளர்களையும் இணைத்துக்கொள்ள வேண்டும். பல்வேறு சவால்களைக் கடந்து தமது விடாமுயற்சி, அனுபவம் மற்றும் புதுமையான சிந்தனையால் வெற்றிபெற்றுள்ள அவர்களது வாழ்க்கைப் பயணம் மாணவர்களுக்கு சிறந்த முன்னுதாரணமாக அமையும் என அரசாங்க அதிபர் தெரிவித்தார்.
புதுமையான உற்பத்திகளுக்கும் ஏற்றுமதிக்கும் முன்னுரிமை :
தொழில் முயற்சிகளில் அனைவரும் ஒரே துறையைப் பின்பற்றும் மனப்பாங்கிலிருந்து விடுபட வேண்டும். ஒரு காலத்தில் யாழ்ப்பாணத்தில் மிக்சர் உற்பத்தி பிரபலமடைந்தபோது பலரும் அதே தொழிலில் ஈடுபட முன்வந்தனர். எதிர்காலத்தில் ஒரே உற்பத்தியைப் பின்பற்றாமல், உள்ளூர் வளங்களை அடிப்படையாகக் கொண்ட புதிய உற்பத்திகள், நவீன தொழில்நுட்பங்கள் மற்றும் சர்வதேசச் சந்தைக்குப் பொருத்தமான ஏற்றுமதிப் பொருட்களை உருவாக்கும் சிந்தனை இளைஞர்களிடம் வளர்க்கப்பட வேண்டும். இன்றைய மாணவர்களிடம் காணப்படும் தகவல் தொழில்நுட்ப மற்றும் டிஜிட்டல் திறன்களைப் பயன்படுத்தி புதிய தொழில் முயற்சிகளை உருவாக்குவதற்கும் உலகளாவிய சந்தை வாய்ப்புகளை அடையாளம் காண்பதற்கும் வழிகாட்ட வேண்டும். தொழில் முயற்சியாண்மை என்பது பொருட்களை உற்பத்தி செய்வது அல்லது வியாபார நிலையங்களை ஆரம்பிப்பது மட்டுமல்ல, புதிய தேவைகளைக் கண்டறிந்து அவற்றுக்கான புதுமையான தீர்வுகளை உருவாக்குவதுமாகும்.
மாணவர்களின் எதிர்காலத்தை வடிவமைப்பதில் ஆசிரியர்களின் பங்கு முக்கியம் :
மாணவர்களின் எதிர்காலத்தை வடிவமைப்பதில் ஆசிரியர்களுக்கு மிக முக்கியமான பொறுப்பு உள்ளது. ஒரு மாணவனின் சிந்தனையிலும் வாழ்க்கை இலக்கிலும் மாற்றத்தை ஏற்படுத்தக்கூடிய ஆற்றல் ஆசிரியர்களுக்கு உண்டு. எனவே, இச்செயலமர்வில் பெற்றுக்கொள்ளும் அறிவையும் அனுபவங்களையும் பயன்படுத்தி மாணவர்களிடம் தொழில் முயற்சியாண்மை தொடர்பான நேர்மறையான சிந்தனையை வளர்க்க வேண்டும். ஒவ்வொரு பாடசாலையிலும் தெரிவுசெய்யப்படும் 30 மாணவர்களில் குறைந்தபட்சம் 15 மாணவர்களையாவது எதிர்காலத்தில் சிறந்த தொழில் முயற்சியாளர்களாக உருவாக்க வழிப்படுத்த முடிந்தால், அது அவர்களது குடும்பத்திற்கும் சமூகத்திற்கும் மாவட்டத்திற்கும் பெரும் பங்களிப்பாக அமையும்.
2030 ஆம் ஆண்டில் இளம் தொழில் முயற்சியாளர்களை உருவாக்க இலக்கு :
2026 ஆம் ஆண்டு ஆரம்பிக்கப்படும் இத்திட்டத்தின் மூலம் 2030, 2031, 2032 ஆம் ஆண்டுகளில் அறிவு, திறன், தன்னம்பிக்கை மற்றும் புதுமையான சிந்தனை கொண்ட இளம் தொழில் முயற்சியாளர்களை உருவாக்க முடியும். அந்த மாற்றத்தை ஏற்படுத்துவதில் ஆசிரியர்களின் பங்களிப்பு மிகவும் முக்கியமானதாகும் எனத் தெரிவித்தார். பாடசாலை மாணவர்களிடையே தொழில் முயற்சியாண்மை ஆளுமையை வளர்க்கும் இத்தகைய சிறப்பான செயற்றிட்டத்தை முன்னெடுத்துள்ள கைத்தொழில் அபிவிருத்திச் சபைக்கு யாழ்ப்பாண மாவட்டச் செயலகத்தின் சார்பில் நன்றிகளைத் தெரிவித்துக்கொள்வதாகவும் அரசாங்க அதிபர் மேலும் தெரிவித்தார்.
யாழ்ப்பாணம் மற்றும் கிளிநொச்சி மாவட்ட ஆசிரியர்கள் பங்கேற்பு :
இச் செயலமர்வில் யாழ்ப்பாண மாவட்டத்திலிருந்து 110 ஆசிரியர்களும், கிளிநொச்சி மாவட்டத்திலிருந்து 60 ஆசிரியர்களுமாக மொத்தம் 170 ஆசிரியர்கள் பங்கேற்றனர்.
செயலமர்வின் நோக்கம் :
பாடசாலை மாணவர்கள் மத்தியில் கைத்தொழில் முயற்சியாண்மைச் சிந்தனையை வளர்த்தல், புதிய தொழில் முயற்சிகள் தொடர்பான ஆர்வத்தை ஏற்படுத்துதல் மற்றும் எதிர்காலத் தொழில் முயற்சியாளர்களை உருவாக்குவதில் ஆசிரியர்களின் பங்களிப்பை வலுப்படுத்துதல் ஆகிய நோக்கங்களுடன் இச்செயலமர்வு ஏற்பாடு செய்யப்பட்டது. இதன் மூலம் மாணவர்களின் அறிவு, மனப்பாங்கு, படைப்பாற்றல், புத்தாக்கச் சிந்தனை மற்றும் தொழில் முயற்சித் திறன்களைப் பாடசாலை மட்டத்திலேயே மேம்படுத்துவதற்கான வழிகாட்டல்களும் விழிப்புணர்வும் ஆசிரியர்களுக்கு வழங்கப்பட்டன.
வளவாளர்கள் :
வளவாளர்களாக திரு. யசாஸ் ஹேவகே, திரு. அ. சுபாகரன் மற்றும் திரு. தி. தனம் ஆகியோர் கலந்துகொண்டு கருத்துரைகளை வழங்கினர்.

யாழ்ப்பாண மாவட்டத்தில் சிறுதானியங்களை உற்பத்தி செய்வதற்கும், அவற்றை அடிப்படையாகக் கொண்டு ஆரோக்கியமான பெறுமதி சேர் உற்பத்திப் பொருட்களைத் தயாரிப்பதற்குமான முதலீட்டு வாய்ப்புகள் தொடர்பாக இந்தியாவிலிருந்து வருகை தந்த இந்திய முதலீட்டாளரான தத்தோ திரு. எஸ். சுந்தர் அவர்கள், மாவட்ட அரசாங்க அதிபர் திரு. மருதலிங்கம் பிரதீபன் அவர்களை இன்றைய தினம் (02.11.2026) அரசாங்க அதிபர் அலுவலகத்தில் சந்தித்து, யாழ்ப்பாண மாவட்டத்தில் சிறுதானிய உற்பத்தியை மேம்படுத்துவதற்கான சாத்தியக்கூறுகள் தொடர்பில் விரிவாகக் கலந்துரையாடினார். இதன்போது, இலங்கையில் சிறுதானியங்களை உற்பத்தி செய்து, அவற்றின் மூலம் பல்வேறு ஆரோக்கியமான உணவுப் பொருட்களைத் தயாரிப்பதற்கான வாய்ப்புகள் காணப்படுவதாக அவர் தெரிவித்தார். இவ்வாறான உற்பத்திகளை ஊக்குவிப்பதன் மூலம் மக்களின் ஆரோக்கியமான வாழ்வியலுக்கு பங்களிப்பு வழங்குவதுடன், உள்நாட்டு மற்றும் வெளிநாட்டு சந்தைகளுக்கான ஏற்றுமதி வாய்ப்புகளையும் உருவாக்க முடியும் எனக் குறிப்பிட்டார். சிறுதானியங்களுக்குத் தேவையான தரமான விதைகளை இந்தியாவிலிருந்து பெற்றுக்கொண்டு, சிறுபோக காலங்களில் அவற்றைப் பயிரிடுவதற்கான சாத்தியக்கூறுகள் குறித்தும் கலந்துரையாடப்பட்டது. குறிப்பாக, பயிரிடப்படாமல் காணப்படும் மற்றும் வறட்சி அதிகம் நிலவும் பகுதிகளிலும் சில வகையான சிறுதானியங்களைப் பயிரிடுவதற்கான வாய்ப்புகள் இருப்பதாகத் தெரிவிக்கப்பட்டது.
மேலும், யாழ்ப்பாண மாவட்டத்தில் சிறுதானியங்களை அடிப்படையாகக் கொண்ட பெறுமதி சேர் உற்பத்திப் பொருட்களைத் தயாரிப்பதற்கான தொழிற்சாலையொன்றை நிறுவுவதன் மூலம், மாவட்ட ரீதியில் புதிய தொழில் வாய்ப்புகளை உருவாக்க முடியும் எனவும் தெரிவிக்கப்பட்டது. இதன் ஊடாக கம்பு, கேழ்வரகு, தினை, சாமை, வரகு, குதிரைவாலி மற்றும் பனிவரகு உள்ளிட்ட சிறுதானியங்களைப் பயன்படுத்தி பல்வேறு ஆரோக்கியமான உற்பத்திப் பொருட்களைத் தயாரித்து, அவற்றை வெளிநாடுகளுக்கும் ஏற்றுமதி செய்வதற்கான சந்தர்ப்பங்கள் உருவாகும் என எதிர்பார்க்கப்படுகிறது. சிறுதானியங்கள் நார்ச்சத்து, புரதம், வைட்டமின்கள் மற்றும் பல்வேறு தாதுச்சத்துக்கள் நிறைந்த பாரம்பரிய உணவுகளாகக் காணப்படுகின்றன. அவை சமச்சீர் உணவுமுறையின் ஒரு பகுதியாகச் சேர்க்கப்படும்போது, செரிமான ஆரோக்கியம், உடல் எடை மேலாண்மை மற்றும் பொதுவான ஊட்டச்சத்து தேவைகளை ஆதரிக்கக்கூடியவை என்பதும் இதன்போது சுட்டிக்காட்டப்பட்டது. இம்முயற்சியின் ஊடாக உள்ளூர் விவசாயிகள், தொழில் முயற்சியாளர்கள் மற்றும் முதலீட்டாளர்களுக்கான புதிய வாழ்வாதார மற்றும் பொருளாதார வாய்ப்புகளை உருவாக்குவதற்கும் நடவடிக்கை எடுக்க முடியும் என எதிர்பார்க்கப்படுகிறது. இதற்குத் தேவையான ஆலோசனைகள் மற்றும் வழிகாட்டல்களை வழங்கத் தயாராக இருப்பதாக இந்திய முதலீட்டாளர் தெரிவித்தார். இதன்போது கருத்துத் தெரிவித்த மாவட்ட அரசாங்க அதிபர், யாழ்ப்பாண மாவட்டத்தின் பொருளாதார வளர்ச்சிக்கும், தொழில் வாய்ப்புகளை உருவாக்குவதற்கும் பங்களிப்பு வழங்கக்கூடிய பயன்தரக்கூடிய முதலீட்டுத் திட்டங்களை முன்னெடுப்பதற்கு மாவட்ட நிர்வாகத்தின் சார்பில் வழங்கக்கூடிய ஒத்துழைப்புகள் தொடர்பில் ஆராய்ந்து தேவையான உதவிகளை வழங்கத் தயாராக இருப்பதாகத் தெரிவித்தார். இக் கலந்துரையாடலில் மேலதிக அரசாங்க அதிபர் கே.சிவகரன், திட்டமிடல் பணிப்பாளர் இ.சுரேந்திரநாதன், Biz Net நிறுவன இயக்குநர் F. சியான் மற்றும் பிரதிநிதிகள் கலந்து கொண்டனர்.

எதிர்வரும் 2027ஆம் ஆண்டு ஜனவரி 20 மற்றும் 21ஆம் திகதிகளில் யாழ்ப்பாண மாவட்டத்தில் நடைபெறவுள்ள வடக்கு ஏற்றுமதி மன்றம் (Northern Export Forum 2027) நிகழ்வை முன்னிட்டு, வடமாகாண ஏற்றுமதி ஊக்குவிப்புச் செயலமர்வு இன்று (03.11.2026) காலை 9.00 மணிக்கு யாழ்ப்பாண மாவட்டச் செயலக செயலமர்வு மண்டபத்தில் மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் நடைபெற்றது. வடமாகாணத்தின் ஐந்து மாவட்டங்களான யாழ்ப்பாணம், கிளிநொச்சி, மன்னார், முல்லைத்தீவு மற்றும் வவுனியா ஆகிய மாவட்டங்களைச் சேர்ந்த தொழில் முயற்சியாளர்கள் மற்றும் சிறு வணிகர்களின் ஏற்றுமதித் திறனை மேம்படுத்தும் நோக்கில், இரண்டு நாட்களாக நிகழ்நிலைத் தொழில்நுட்பத்தின் ஊடாக இச் செயலமர்வு முன்னெடுக்கப்பட்டு வருகின்றது.
அரசாங்க அதிபர் அவர்களின் தலைமையுரை :
யாழ்ப்பாண மாவட்டத்தில் பல்வேறு தொழில் முயற்சியாளர்கள் உள்ளூர் உற்பத்திகளை முன்னெடுத்து வருகின்றபோதிலும், அவற்றை நேரடியாக ஏற்றுமதி செய்வதற்கான வாய்ப்புகளும் அடிப்படை வசதிகளும் போதியளவில் இல்லை எனத் தெரிவித்தார். குறிப்பாக, மீன் மற்றும் கடலுணவுகள் உள்ளிட்ட உற்பத்திகள் யாழ்ப்பாணத்திலிருந்து ஏனைய பகுதிகளுக்குக் கொண்டு செல்லப்பட்டு, அங்கு வகைப்படுத்தப்பட்டு தரப்படுத்தப்பட்ட பின்னரே ஏற்றுமதி செய்யப்படுகின்றன. இதனால் ஏற்றுமதியின் மூலம் கிடைக்கக்கூடிய பொருளாதாரப் பயன்களை எமது மாவட்டம் முழுமையாகப் பெற்றுக்கொள்ள முடியாத நிலை காணப்படுகின்றது எனக் குறிப்பிட்டார். மேலும், ஒரே வகையான உற்பத்திகளில் பலரும் ஈடுபடுவதற்குப் பதிலாக, புதிய தொழில்துறைகளையும் மாற்று உற்பத்தி வாய்ப்புகளையும் அடையாளம் காண வேண்டும் என வலியுறுத்தினார். தொழில் முயற்சியாளர்கள் தமது உற்பத்திகளின் தரம், பொதியிடல் முறைமை மற்றும் சந்தைத் தேவைகள் ஆகியவற்றுக்கு முக்கியத்துவம் வழங்க வேண்டும் என்றும் தெரிவித்தார். உற்பத்திப் பொருட்களை உள்ளூர் சந்தை, இலங்கையின் ஏனைய மாவட்டங்களின் சந்தை மற்றும் சர்வதேசச் சந்தை என மூன்று நிலைகளில் சந்தைப்படுத்துவதற்கான வாய்ப்புகள் உள்ளதாகவும், அதற்கேற்ப உற்பத்திகளைத் தரமுயர்த்தி ஏற்றுமதிக்குத் தயார்ப்படுத்த வேண்டும் என்றும் குறிப்பிட்டார். மேலும், எதிர்வரும் 2027 ஆம் ஆண்டு ஜனவரி மாதம் யாழ்ப்பாணத்தில் நடைபெறவுள்ள ஏற்றுமதியாளர்கள் மன்றத்தை வெற்றிகரமாக முன்னெடுப்பதில் மாவட்டத்தின் தொழில் முயற்சியாளர்கள், பல்கலைக்கழக மாணவர்கள் மற்றும் ஏனைய தொடர்புடைய தரப்பினரின் பங்களிப்பு அவசியமானது எனத் தெரிவித்தார். இதற்கான அடுத்தகட்டமாக விரிவான கலந்துரையாடல்களை முன்னெடுத்து, ஏற்பாட்டுக் குழுவொன்றை அமைத்து செயற்பாடுகளைத் திட்டமிட்ட வகையில் முன்னெடுக்க எதிர்பார்ப்பதாகவும் அரசாங்க அதிபர் மேலும் தெரிவித்தார்.
நோக்கங்கள் :
வடமாகாணத்தில் உற்பத்தி செய்யப்படும் உள்ளூர் பொருட்களை சர்வதேசச் சந்தைகளுக்கு அறிமுகப்படுத்துதல், ஏற்றுமதி வாய்ப்புகளை அடையாளம் காணுதல், தொழில் முயற்சியாளர்களுக்கு ஏற்றுமதி தொடர்பான அறிவையும் நடைமுறை வழிகாட்டல்களையும் வழங்குதல் ஆகிய நோக்கங்களை அடிப்படையாகக் கொண்டு இச் செயலமர்வு ஏற்பாடு செய்யப்பட்டுள்ளது. வடமாகாணத்தின் உற்பத்திப் பொருட்களுக்கு சர்வதேசச் சந்தையில் புதிய வாய்ப்புகளை உருவாக்கி, ஏற்றுமதி சார்ந்த பொருளாதார வளர்ச்சியை ஊக்குவிப்பதற்கான முன்னோடி நடவடிக்கையாக இச்செயலமர்வு அமைந்துள்ளது.
நிகழ்நிலைத் தொழில்நுட்பத்தின் ஊடாகக் கருத்துரைகளை வழங்கியவர்கள் :
இச் செயலமர்வில் இந்தியத் துணைத் தூதுவர் கௌரவ ஸ்ரீ சாய் முரளி, தேசிய ஏற்றுமதியாளர்கள் சபையின் தலைவர் மங்கள விஜயசிங்க, தேசிய தொழில் முயற்சியாளர் மேம்பாட்டு அதிகாரசபையின் தலைவர் லக்ஷ்மன் அபயசேகர, முகாமைத்துவ மன்றத்தின் நிர்வாக அதிகாரியும் 2027 வடமாகாணச் செயற்திட்டத்தின் இணைப்பாளருமான இந்திகா கௌசல் ராஜபக்ஷ, இலங்கை ஏற்றுமதி அபிவிருத்திச் சபையின் நிறைவேற்றுப் பணிப்பாளர் சியான் மரிக்கான் மற்றும் யாழ்ப்பாணப் பல்கலைக்கழக சந்தைப்படுத்தல் முகாமைத்துவத் துறையின் சிரேஷ்ட விரிவுரையாளர் திரு. சிவனேந்திரா ஆகியோர் நிகழ்நிலைத் தொழில்நுட்பத்தின் ஊடாகக் கலந்துகொண்டு கருத்துரைகளை வழங்கினர். இதன்போது, வடமாகாணத்தின் சிறு வணிக முயற்சிகளை ஏற்றுமதிக்குத் தயார்ப்படுத்தி வழிநடத்துதல் தொடர்பாக திருமதி சாந்தி பகீரதன் அவர்களும், தொழில் முயற்சியாளர்களை ஊக்குவிக்கும் வகையில் யாழ்ப்பாணப் பல்கலைக்கழகத்தின் சிறு வணிகத் தமிழ் சான்றிதழ் கற்கைநெறி ஒருங்கிணைப்பாளர் திரு. சசிஹரன் அவர்களும் உரையாற்றினர். மேலும், ஏற்றுமதிக்கான ஆவணங்கள், தளவாடங்கள், சரக்குப் போக்குவரத்து மற்றும் சுங்க நடைமுறைகள் தொடர்பாக இலங்கைச் சுங்கத் திணைக்களத்தின் முன்னாள் பணிப்பாளர் திரு. M. ரவீந்திரகுமார், தொடர்பாக விளக்கமளித்தனர். ஏற்றுமதி விலை நிர்ணயம், கட்டண விதிமுறைகள், அந்நியச் செலாவணி மற்றும் வாடிக்கையாளர் கடன் இடர் முகாமைத்துவம் தொடர்பாக வங்கி நிபுணர் திரு. S. P. கோகுலசங்கர் அவர்களும், சர்வதேச விற்பனை மற்றும் விநியோகச் செயற்பாடுகள் தொடர்பாக நோர்வேயின் Global Basket Supermarket நிறுவனத்தின் நிறுவனர் திரு. கலாரூபன் தெய்வேந்திரன் அவர்களும் வளவாளர்களாகக் கலந்துகொண்டு விளக்கமளித்தனர்.
இந்நிகழ்வில் வடமாகாணச் செயற்திட்டத்தின் தலைவர் திரு. சந்திரகுமார், உப தலைவர் திருமதி சாந்தி பகீரதன், திட்டமிடல் பணிப்பாளர் இ. சுரேந்திரநாதன், பிரதித் திட்டமிடல் பணிப்பாளர் வி. தர்ஷினி, மாவட்டக் கைத்தொழில் அபிவிருத்திச் சபையின் பிரதிப் பணிப்பாளர் திரு. கா. சசிகரன், தொழில் முயற்சி அபிவிருத்தி அதிகாரசபையின் மாவட்ட இணைப்பாளர், ஏற்றுமதி அபிவிருத்திச் சபை உத்தியோகத்தர்கள் மற்றும் பல்வேறு தொழில் முயற்சியாளர்கள் உள்ளிட்டோர் கலந்துகொண்டனர்.

அகில இலங்கை கம்பன் கழகத்தினால் நடாத்தப்பட்ட கம்பன் விழாவின் மூன்றாம் நாள் இறுதி நிகழ்வுகள் நேற்றைய தினம் (01.11.2026) மாலை 04.00 மணிக்கு நல்லூர் ஸ்ரீ துர்கா தேவி மணிமண்டபத்தில் சிறப்பாக நடைபெற்றன.
தலைமை :
இந் நிகழ்வுக்கு யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமை தாங்கினார்.
மங்கல இசை :
திரு. கே. கே. நாகதீபன் குழுவினர், திரு. பஞ்சமூர்த்தி குமரன் குழுவினர் மற்றும் திரு. தட்சணாமூர்த்தி உதயசங்கர் குழுவினர் மங்கள இசை நிகழ்வுகளை வழங்கினர்.
மங்கல விளக்கேற்றல் :
‘உதயன்’ பத்திரிகையின் நிர்வாக இயக்குநரான திரு. ஈ. சரவணபவன் அவர்களும் அவரது துணைவியாரும் மங்கள விளக்கேற்றி நிகழ்வை ஆரம்பித்து வைத்தனர்.
கடவுள் வாழ்த்து :
திரு. ஜெ. மதுஷிகன் அவர்களின் கடவுள் வாழ்த்து இடம்பெற்றது.
தொடக்கவுரை :
யாழ்ப்பாணத்திலுள்ள இந்தியத் துணைத்தூதரகத்தின் கௌரவ துணைத்தூதுவர் ஸ்ரீமான் சாய் முரளி அவர்கள் தொடக்கவுரையாற்றினார்.
வழக்காடு மன்றம் மற்றும் நாடக அரங்கு :
கம்பவாரிதி ’ இ. ஜெயராஜ் அவர்கள் நீதியரசராகத் தலைமையேற்று “இடித்துரைக்கத் தவறி அழிவுப்பட்டவர்கள் குற்றவாளிகள்!” என்ற தலைப்பிலான வழக்காடு மன்றமும், வாழ்நாள் பேராசிரியர் எஸ். சிவலிங்கராஜா இணைப்பாளராகப் பங்கேற்ற ‘நீயா? நானா?’ என்ற பொருளில் நாடக அரங்கும் சிறப்பாக இடம்பெற்றன.








