யாழ்ப்பாண மாவட்ட பண்பாட்டுப் பேரவையும் மாவட்டச் செயலகமும் இணைந்து, வடக்கு மாகாண பண்பாட்டலுவல்கள் அலகின் அனுசரணையுடன் நடாத்தும் யாழ்ப்பாண மாவட்ட பண்பாட்டுப் பெருவிழா இன்றைய தினம் (23.10.2026 ) வெள்ளிக்கிழமை பி.ப 1.00 மணிக்கு மாவட்டச் செயலக நுழைவாயிலிருந்து தமிழ்ப் பண்பாட்டு ஊர்வலத்துடன் ஆரம்பமாகி கேட்போர் கூடத்தை வந்ததடைந்தது. யாழ்ப்பாண மாவட்ட அரசாங்க அதிபரும், யாழ்ப்பாண மாவட்ட பண்பாட்டு பேரவைத் தலைவருமான திரு. மருதலிங்கம் பிரதீபன் அவர்களின் தலைமையில் நடைபெற்றது. இந் நிகழ்வில், பிரதம விருந்தினராக யாழ்ப்பாண மாவட்ட ஓய்வுநிலை அரசாங்க அதிபர் சுந்தரம் அருமைநாயகம் அவர்கள் கலந்து சிறப்பித்தார். மேலும், கடற்றொழில், நீரியல் மற்றும் கடல்வளங்கள் அமைச்சரும், யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள், ஏற்பாட்டாளர்களின் அழைப்பினை ஏற்று விழாவிற்கு வருகைதந்து விழாவை சிறப்பித்திருந்தார். சிறப்பு விருந்தினர்களாக யாழ்ப்பாணப் பல்கலைக்கழக கலைப்பீடாதிபதி பேராசிரியர் நாகமுத்து பிரதீபராஜா அவர்களும், வடக்கு மாகாண பண்பாட்டலுவல்கள் அலகின் பிரதிப் பணிப்பாளர் திருமதி. தர்சினி நிதர்சன் ஆகியோரும் கலந்து சிறப்பித்தார்கள். கௌரவ விருந்தினர்களாக பலாலி ஆசிரியர் கலாசாலை ஓய்வுநிலை அதிபரும் சாகித்திய ரத்னா கவிஞர் திரு.சோ.பத்மநாதன் அவர்களும், யாழ்ப்பாண மாவட்ட ஓய்வுநிலை சிரேஷ்ட கலாசார உத்தியோகத்தர் திருமதி. சுகுணலினி விஜயரத்தினம் ஆகியோர் கலந்து கொண்டனர்.
நிகழ்வுகள் :
பண்பாட்டு ஊர்வலத்தில் பாரம்பரியக் கலை நிகழ்வுகள் :
பண்பாட்டு ஊர்வலத்தில் பாரம்பரியக் கலை நிகழ்வுகள்
பண்பாட்டு ஊர்வலத்தில் தமிழர் பாரம்பரியத்தையும் கலை மரபுகளையும் பறைசாற்றும் வகையில் பல்வேறு கலை நிகழ்வுகள் இடம்பெற்றன. இதன்போது, மங்கல வாத்தியம், புனித மிக்கேல் திருமுறைக் கலைக்குழுவினரின் ஒயிலாட்டம், யாழ்ப்பாணம் இந்துக் கல்லூரி மாணவர்களின் இன்னியம், றபான் மற்றும் கோலாட்டம் ஆகிய கலை நிகழ்வுகள் ஊர்வலத்தைச் சிறப்பித்தன. அத்துடன், மாவை பொதுச்சேவைக் கழகத்தின் கோலாட்டம், கரபி கலை மன்றத்தின் சுளகு நடனம், இணையைய தமிழ்ச்சங்கத்தின் காவடி ஆட்டம் ஆகியனவும் இடம்பெற்றன. மேலும், பொம்மலாட்டம், செப்பு நடனம் உள்ளிட்ட பாரம்பரியக் கலை நிகழ்வுகளும் ஊர்வலத்தில் இடம்பெற்று, தமிழர் பண்பாட்டு விழுமியங்களையும் கலை மரபுகளையும் வெளிப்படுத்தின.
அரங்கு :
நாடகச் சக்கரவர்த்தி பரஞ்சோதி பரராஜசிங்கம் (பாப்பா) அவர்களின் கலைப்பணிகளை நினைவுறுத்தி அமைக்கப்பட்டுள்ள அரங்கில்
அரங்க நிகழ்வுகள் நடைபெற்றன.
தமிழ்த் தாய் வாழ்த்து:
யாழ்ப்பாண மாவட்டச் செயலக உத்தியோகத்தர்களால் முறையாகப் பாடப்பட்டு நிகழ்வு ஆரம்பமானது.
வரவேற்பு நடனம் :
யாழ்ப்பாணப் பல்கலைக்கழகத்தின் சேர் பொன் இராமநாதன் காண்மிய ஆற்றுகைக் கலைப்பீட மாணவர்கள் வழங்கிய வரவேற்பு நடனம் இடம்பெற்றது.
வரவேற்புரை :
மேலதிக அரசாங்க அதிபர் கே.சிவகரன் அவர்களால் நிகழ்த்தப்பட்டது. அரங்கத்திறப்புரை : (நாடகச் சக்கரவர்த்தி பரஞ்சோதி பரராஜசிங்கம் - பாப்பா)
பருத்தித்துறை பிரதேச செயலக கலாசார உத்தியோகத்தர் திரு.சி.முகுந்தன் அவர்களால் நிகழ்த்தப்பட்டது.
கோலாட்டம்:
நல்லூர் ஹிமாலயா நடனப் பயிலக மாணவர்களின் பாரம்பரிய கோலாட்ட நிகழ்வு இடம்பெற்றது.
தலைமையுரை :
அரசாங்க அதிபர் அவர்களினால் தலைமையுரை நிகழ்த்தப்பட்டது.
காலிங்க நர்த்தனம்:
தென்மராட்சி, கைதடிப் பகுதியைச் சேர்ந்த இயல் சேஷ்த்திரா கலைமன்றக் கலைஞர்களின் நர்த்தனம் அரங்கேறியது.
கெளரவிப்பு :
பலாலி ஆசிரியர் கலாசாலை ஓய்வுநிலை அதிபரும் சாகித்திய ரத்னா கவிஞர் திரு.சோ.பத்மநாதன் (சோ. ப) அவர்களுக்கான கெளரவிப்பு நிகழ்த்தப்பட்டது.
சிறப்பு விருந்தினர் உரை, பிரதம விருந்தினர் உரை நிகழ்த்தப்பட்டதுடன், பிரதம விருந்தினர் கெளரவிக்கப்பட்டார்.
நூல் வெளியீடும் ஆய்வுரையும் :
யாழ்ப்பாணத்தின் நாட்டார் வழக்காறுகளையும் சமூக அறிவியல் நோக்கிலான ஆய்வுகளையும் உள்ளடக்கிய “யாழ்ப்பாணம் 05 – நாட்டார் வழக்காறுகளும் சமூக அறிவியலும்” எனும் நூல் வெளியீட்டு நிகழ்வு இடம்பெற்றது. இந்நூலின் உள்ளடக்கம் மற்றும் ஆய்வுப் பெறுமதிகள் தொடர்பான ஆய்வுரையை முன்னாள் யாழ்ப்பாணப் பல்கலைக்கழகத் துணைவேந்தர் பேராசிரியர் என். சண்முகலிங்கம் அவர்கள் நிகழ்த்தினார்.
பாரம்பரிய கூத்திசைப் பாடல்கள்:
ஊர்காவற்றுறையினைச் சேர்ந்த பாரம்பரியக் கலைஞர்கள் ஒன்றிணைந்து இப் பாடல்களைப் பாடினர்.
சிறப்புரை :
கௌரவ அமைச்சர் இராமலிங்கம் சந்திரசேகர் அவர்கள் சிறப்புரையை நிகழ்த்தினார்.
வீரம் குழுநடனம்:
பருத்தித்துறை பரத சிவாலக் கலை மன்றத்தினரால் இந்த வீர நடனம் உணர்வுப்பூர்வமாக வழங்கப்பட்டது.
கலைஞர்கள் கெளரவிப்பு :
பிரதேச செயலக ரீதியாக மூத்த கலைஞர்களுக்கு "யாழ்முத்து" மற்றும் இளைஞர்களுக்கு "இளங்கலைஞர்" விருதுகள் வழங்கி வழங்கப்பட்டன.
கரகாட்டம் :
இணுவவில் திருநெறிய தமிழ் மறைக் கலாமன்றக் கலைஞர்களின் கண்கவர் கரகாட்டத்துடன் நிகழ்வுகள் நிறைவுற்றன.
மாவட்ட மட்டப் போட்டிகளில் வெற்றிபெற்ற கலை மன்றங்களுக்குச் சான்றிதழ்கள் :
வடக்கு மாகாண பண்பாட்டலுவல்கள் திணைக்களத்தின் கீழ் பதிவுசெய்யப்பட்ட கலை மன்றங்களுக்கிடையில் நடைபெற்ற மாவட்ட மட்டப் போட்டிகளில் கிராமியப்பாடல், இசை நாடகம், கும்மி நடனம், விழிப்புணர்வு வீதி நாடகம் மற்றும் கையெழுத்துச் சஞ்சிகை ஆகிய பிரிவுகளில் வெற்றிபெற்ற கலை மன்றங்களுக்கு சான்றிதழ் வழங்கி கெளரவிக்கப்பட்டன.
அரங்க வடிவமைப்பு :
இயற்கையின் அழகையும் தமிழர் பாரம்பரியக் கலை மரபையும் ஒருங்கே பிரதிபலிக்கும் வகையில், தென்னோலை, மூங்கில், பனை ஓலை உள்ளிட்ட இயற்கைப் பொருட்களைப் பயன்படுத்தி இன்றைய அரங்கத்தை இயற்கையோடு ஒன்றிணைந்த அழகிய சூழலில் வடிவமைத்த மாவட்டச் செயலக அபிவிருத்தி உத்தியோகத்தர் திரு. செல்வரட்ணம் சபேசன் அவர்கள், அவரது கலைநயத்தையும் இயற்கை மீதான பற்றையும் பாராட்டி விருந்தினர்களால் கௌரவிக்கப்பட்டார்.
நிகழ்ச்சி தொகுப்பாளர்கள் கெளரவிப்பு :
இன்றைய நிகழ்வினைச் சிறப்பாகவும் நேர்த்தியாகவும் தொகுத்து வழங்கிய சிரேஷ்ட முகாமைத்துவ உதவியாளர் திரு. பரா. ரமேஷ் அவர்களும், வேலணை பிரதேச செயலக அபிவிருத்தி உத்தியோகத்தர் திருமதி மாதுரி சிவதர்சன் அவர்களும் விருந்தினர்களால் பாராட்டிக் கௌரவிக்கப்பட்டனர்.
நன்றியுரை :
இறுதியாக, நன்றியுரை மாவட்ட ச் செயலக சிரேஷ்ட கலாசார உத்தியோகத்தர் திருமதி மாலினி கிருஷ்ணானந்தன் அவர்களால் நிகழ்த்தப்பட்டது. இந் நிகழ்வில் கலைஞர்கள், கலா ரசிகர்கள், யாழ்ப்பாண மாவட்ட ஒருங்கிணைப்புக் குழுவின் இணைப்பாளர், மாவட்டச் செயலக அனைத்துத் தர உத்தியோகத்தர்கள், பிரதேச செயலாளர்கள், பொதுமக்கள் மற்றும் ஊடகவியலாளர்கள் எனப் பலர் கலந்துகொண்டனர்.
 
 1 2 4 5 6 7 8 9 11 13 14 15 16 17 19 20 21 23 24 25 27 29 30 33 34 36 38 3940 41 42 43 44 46 47 48 49 50 53 55 56
யாழ்ப்பாண மாவட்டச் செயலகம் மற்றும் பிரதேச செயலகங்களில் பணியாற்றும் உத்தியோகத்தர்களின் தொழில்சார் திறன்களை மேம்படுத்தும் நோக்கில், செயற்கை நுண்ணறிவுத் தொழில்நுட்பப் பயன்பாடு, செயற்றிட்ட முகாமைத்துவம் தொடர்பான விழிப்புணர்வூட்டும் திறன் விருத்திப் பயிற்சிப் பட்டறை, யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (23.10.2026) யாழ்ப்பாண மாவட்டச் செயலகத்தின் செயலமர்வு மண்டபத்தில் நடைபெற்றது.
அரசாங்க அதிபரின் தலைமை உரை :
இப் பயிற்சிகளின் மூலம் பெற்றுக்கொள்ளும் அறிவையும் திறன்களையும் தமது பணிகளில் நடைமுறைப்படுத்துவதிலேயே அவற்றின் உண்மையான பயன் தங்கியுள்ளது எனத் தெரிவித்தார். செயற்கை நுண்ணறிவுத் தொழில்நுட்பம் வேகமாக வளர்ச்சியடைந்து வருகின்ற இன்றைய சூழலில், அதன் நன்மைகளைப் பயன்படுத்திக்கொள்வதுடன், அதனால் ஏற்படக்கூடிய பாதகமான விளைவுகள் குறித்தும் விழிப்புணர்வுடன் செயற்படுவது அவசியம் என வலியுறுத்தினார். குறிப்பாக, பெண்கள் மற்றும் சிறுவர்கள் தொடர்பான முறைப்பாடுகளைக் கையாளும் உத்தியோகத்தர்கள், செயற்கை நுண்ணறிவின் மூலம் உருவாக்கப்படும் போலியான படங்கள், குரல் பதிவுகள் மற்றும் தகவல்களுக்கும் உண்மையான தகவல்களுக்கும் இடையிலான வேறுபாட்டை அடையாளம் காணக்கூடிய திறன்களை வளர்த்துக்கொள்ள வேண்டும் எனக் குறிப்பிட்டார். குடும்ப வன்முறை, சிறுவர் துஷ்பிரயோகம் உள்ளிட்ட சமூகப் பிரச்சினைகள் தொடர்பாகக் கிடைக்கும் முறைப்பாடுகளை ஆராயும்போது, அவற்றின் உண்மைத்தன்மையை உறுதிப்படுத்துவது முக்கியமானதாகும். செயற்கை நுண்ணறிவைப் பயன்படுத்தி உருவாக்கப்படும் போலியான குரல் பதிவுகள் மற்றும் தகவல்கள் சமூகத்தில் தவறான புரிதல்களையும் பாதிப்புகளையும் ஏற்படுத்தக்கூடும் என்பதால், அவற்றைச் சரியாக அடையாளம் கண்டு கையாள்வதற்கான அறிவும் திறனும் உத்தியோகத்தர்களுக்கு அவசியம் என அவர் தெரிவித்தார். அதேவேளை, உத்தியோகத்தர்கள் தமது அன்றாடப் பணிகளை வினைத்திறனுடன் முன்னெடுப்பதற்கும், தகவல்களைத் திரட்டுவதற்கும், பணிசார் திறன்களை மேம்படுத்துவதற்கும் செயற்கை நுண்ணறிவுத் தொழில்நுட்பத்தைப் பொறுப்புடன் பயன்படுத்திக்கொள்ள வேண்டும் எனக் கேட்டுக்கொண்டார். மேலும், உளவளத்துணைச் சேவைகளை வழங்கும் உத்தியோகத்தர்கள் தமது தொழில்சார் அனுபவங்களையும் திறன்களையும் தொடர்ச்சியாக மேம்படுத்திக்கொள்வதுடன், தமக்குக் கிடைக்கும் பயிற்சி வாய்ப்புகளை முழுமையாகப் பயன்படுத்தி, மக்களுக்குத் தரமான சேவைகளை வழங்க முன்வர வேண்டும் எனவும் வலியுறுத்தினார்.
செயற்கை நுண்ணறிவு மற்றும் செயற்றிட்ட முகாமைத்துவம் தொடர்பான பயிற்சிகள் :
செயற்கை நுண்ணறிவுத் தொழில்நுட்பத்தின் பயன்பாடுகள் தொடர்பாக Curveup Foundation நிறுவனத்தின் AI பயிற்றுவிப்பாளர் திரு. பூபாலசிங்கம் சாமுவேல் அவர்கள் வளவாளராகக் கலந்து கொண்டு விளக்கமளித்தார். அத்துடன், செயற்றிட்ட முகாமைத்துவம், உளச்சோர்வுக்கு உள்ளாகாமல் வினைத்திறனுடன் பணியாற்றுதல் மற்றும் சக உத்தியோகத்தர்களுடன் சிறந்த முறையில் இணைந்து பணியாற்றுவதற்கான நுட்பங்கள் தொடர்பாக வலிகாமம் வலயக் கல்விப் பணிமனையின் சிரேஷ்ட தொழில் வழிகாட்டல் மற்றும் ஆலோசனை உத்தியோகத்தர் திரு. எஸ். இக்னேசியஸ் அவர்கள் வளவாளராகக் கலந்து கொண்டு கருத்துரைகளை :வழங்கினார். இச் செயலமர்வின் ஆரம்ப நிகழ்வில் மேலதிக அரசாங்க அதிபர் கை. சிவகரன், உதவி மாவட்டச் செயலாளர் உ. தர்ஷினி, மாவட்ட மற்றும் பிரதேச செயலகங்களின் மகளிர் அபிவிருத்தி உத்தியோகத்தர்கள் மற்றும் உளவளத் துணை உத்தியோகத்தர்கள் உள்ளிட்டோர் கலந்து கொண்டனர்.
 
1 2 3 5 6 7 855833534 1645124393679474 745772078637546126 n
 
யாழ்ப்பாண மாவட்ட பண்பாட்டுப் பெருவிழா-2026
இடம் : மாவட்டச் செயலகம், யாழ்ப்பாணம்
காலம் : 23.10.2026 வெள்ளிக்கிழமை
நேரம் : பி.ப 1.00 மணி - தமிழ்ப் பண்பாட்டு ஊர்வலம்
(மருதடிப் பிள்ளையார் ஆலயம், றக்கா வீதி)
பி.ப 1.30 மணி - அரங்க நிகழ்வு
அனைவரையும் அன்புடன் அழைக்கின்றோம்
 
1 2 3
 
நவம்பர் முதல் பெப்ரவரி வரை விசேட கவனம் செலுத்துமாறு அரசாங்க அதிபர் அறிவுறுத்தல் யாழ்ப்பாண மாவட்டத்தில் டெங்கு நோயைக் கட்டுப்படுத்துவதற்கான நடவடிக்கைகளைத் தீவிரப்படுத்துவது தொடர்பான கலந்துரையாடல், மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (22.10.2026) பிற்பகல் 2.30 மணிக்கு மாவட்டச் செயலக மாநாட்டு மண்டபத்தில் நடைபெற்றது.
அரசாங்க அதிபர் தலைமையுரை :
யாழ்ப்பாண மாவட்டத்தில் டெங்கு நோயைக் கட்டுப்படுத்துவதற்கான நடவடிக்கைகளை மேலும் வலுப்படுத்தி, சம்பந்தப்பட்ட அனைத்து அரச நிறுவனங்களும் ஒருங்கிணைந்து செயற்பட வேண்டியதன் அவசியத்தை அரசாங்க அதிபர் வலியுறுத்தினார். மாவட்டத்தில் கடந்த காலங்களில் முன்னெடுக்கப்பட்ட டெங்கு கட்டுப்பாட்டு நடவடிக்கைகள் மூலம் சாதகமான நிலைமையை உருவாக்க முடிந்துள்ளதாகக் குறிப்பிட்ட அவர், பிரதேச சபைகள், பிரதேச செயலாளர்கள், சுகாதார வைத்திய அதிகாரிகள் மற்றும் பொதுச் சுகாதாரப் பரிசோதகர்கள் உள்ளிட்ட அனைத்துத் தரப்பினரினதும் ஒருங்கிணைந்த பங்களிப்புக்கு நன்றியையும் தெரிவித்தார்.
பருவமழைக் காலத்தில் அதிக அவதானம் :
ஒக்டோபர் முதல் பெப்ரவரி வரையான காலப்பகுதியில் டெங்கு நோயின் தாக்கம் அதிகரிக்கும் சாத்தியம் காணப்படுவதால், பருவமழையைக் கருத்திற்கொண்டு முன்னெச்சரிக்கை நடவடிக்கைகளைத் தீவிரப்படுத்த வேண்டும் என அவர் சுட்டிக்காட்டினார். மழைநீர் தேங்கக்கூடிய இடங்கள் மற்றும் நுளம்புகள் பெருகுவதற்கான சூழல்களை அடையாளம் கண்டு அகற்றுவதுடன், பொதுமக்களிடையே தொடர்ச்சியான விழிப்புணர்வை ஏற்படுத்துவதும் அவசியம் எனத் தெரிவித்தார்.
கழிவகற்றலை முறையாக முன்னெடுத்தால் :
வீடுகள் மற்றும் பொது இடங்களில் தேவையற்ற கழிவுகளை முறையற்ற வகையில் வீசுவதால் டெங்கு நுளம்புகள் பெருகுவதற்கான அபாயம் அதிகரிப்பதாகக் குறிப்பிட்ட அரசாங்க அதிபர், கழிவகற்றல் தொடர்பான விழிப்புணர்வை மேலும் வலுப்படுத்த வேண்டும் என்றார். உள்ளூராட்சி மன்றங்கள் தமது பகுதிகளுக்கான கழிவகற்றல் அட்டவணைகளைத் தயாரித்து, அவற்றை பிரதேச செயலாளர்கள் ஊடாக கிராம மட்டங்களுக்கு அறிவிப்பதுடன், கழிவுகளை உரிய முறையில் சேகரிப்பதற்கான நடவடிக்கைகளையும் முறையாக முன்னெடுக்க வேண்டும் என வலியுறுத்தினார்.
அனைத்துத் தரப்பினரும் இணைந்து செயற்பட வேண்டும் :
யாழ்ப்பாண மாவட்டத்தின் 15 பிரதேச செயலாளர் பிரிவுகளில், நெடுந்தீவு, வேலணை, ஊர்காவற்றுறை மற்றும் மருதங்கேணி ஆகிய நான்கு பிரதேச செயலாளர் பிரிவுகளைத் தவிர்ந்த ஏனைய 11 பிரதேச செயலாளர் பிரிவுகளும் டெங்கு நோய்த் தாக்கம் அதிகமாகக் காணப்படும் பகுதிகளாக அடையாளம் காணப்பட்டுள்ளதாக அவர் தெரிவித்தார். எனவே, பிரதேச செயலாளர்கள், உள்ளூராட்சி மன்றங்களின் தவிசாளர்கள் மற்றும் செயலாளர்கள், சுகாதார வைத்திய அதிகாரிகள், பொதுச் சுகாதாரப் பரிசோதகர்கள், பொலிஸார், விமானப்படையினர் மற்றும் ஏனைய தொடர்புடைய நிறுவனங்கள் இணைந்து கள ஆய்வுகள், சுத்திகரிப்பு நடவடிக்கைகள் மற்றும் விழிப்புணர்வுச் செயற்பாடுகளைத் தீவிரப்படுத்த வேண்டும் எனக் கேட்டுக்கொண்டார். மேலும், டெங்கு நோயாளர்களுக்குச் சிகிச்சையளிக்கும் போதனா வைத்தியசாலை உள்ளிட்ட வைத்தியசாலைகளின் பணிப்பாளர்கள், வைத்தியர்கள் மற்றும் சுகாதாரப் பணியாளர்களுக்கும் நன்றியைத் தெரிவித்த அவர், அனைத்து நிறுவனங்களினதும் தொடர்ச்சியான ஒத்துழைப்புடன் டெங்கு நோயாளர்களின் எண்ணிக்கையையும் உயிரிழப்புக்களையும் குறைத்து, யாழ்ப்பாண மாவட்டத்தை ஆரோக்கியமான மாவட்டமாக மாற்றுவதற்கு அனைவரும் அர்ப்பணிப்புடன் செயற்பட வேண்டும் எனத் தெரிவித்தார்.
டெங்கு நோயாளர்களின் எண்ணிக்கையில் வீழ்ச்சி :
கூட்டத்தில் கருத்துத் தெரிவித்த பிராந்திய சுகாதார சேவைகள் பணிப்பாளர் டாக்டர் ஆ. கேதீஸ்வரன், கடந்த இரண்டு ஆண்டுகளுடன் ஒப்பிடுகையில் யாழ்ப்பாண மாவட்டத்தில் டெங்கு நோயைக் கட்டுப்படுத்துவதில் முன்னேற்றம் ஏற்பட்டுள்ளதாகத் தெரிவித்தார் அதன்படி, 2025ஆம் ஆண்டில் 1,591 டெங்கு நோயாளர்களும், 2026ஆம் ஆண்டில் இதுவரையான காலப்பகுதியில் 1,206 நோயாளர்களும் பதிவாகியுள்ளனர். மேலும், ஜூலை மற்றும் ஆகஸ்ட் மாதங்களில் தலா 93 நோயாளர்களும், செப்டெம்பர் மாதத்தில் 69 நோயாளர்களும் பதிவாகியுள்ளதாகக் குறிப்பிட்டார். பிரதேச மற்றும் கிராம மட்டங்களில் டெங்கு கட்டுப்பாட்டுக் குழுக் கூட்டங்களை நடத்தி, பொதுமக்களுக்கு விழிப்புணர்வை ஏற்படுத்த வேண்டியதன் அவசியத்தையும் அவர் வலியுறுத்தினார். வணக்கஸ்தலங்கள், அரச நிறுவனங்கள் மற்றும் பாடசாலைகளில் துப்புரவுப் பணிகள் முன்னெடுக்கப்பட்டுள்ளதுடன், எதிர்வரும் மாதங்களில் டெங்கு நுளம்பின் பெருக்கம் அதிகரிக்கக்கூடிய சாத்தியக்கூறுகள் காணப்படுவதால், வெற்றுக் கொள்கலன்களை அகற்றுதல், மழைநீர் தேங்கும் வடிகால்களைச் சீரமைத்தல் மற்றும் வீடுவீடாகச் சென்று நுளம்புக் கட்டுப்பாட்டுப் பரிசோதனைகளை மேற்கொள்ளுதல் போன்ற நடவடிக்கைகளைத் தீவிரப்படுத்த வேண்டுமெனத் தெரிவித்தார்.
டெங்கு ஒழிப்பில் உள்ளூராட்சி நிறுவனங்களின் பங்களிப்பு :
இதன்போது கருத்துத் தெரிவித்த மாவட்ட அரசாங்க அதிபர், நவம்பர், டிசம்பர், ஜனவரி மற்றும் பெப்ரவரி மாதங்களில் டெங்கு நுளம்பின் பெருக்கம் அதிகரிக்கக்கூடிய வாய்ப்புகள் உள்ளதால், பிரதேச சபைத் தவிசாளர்கள் மற்றும் பொது சுகாதாரப் பரிசோதகர்கள் இணைந்து வெற்றுக் கொள்கலன்களைச் சேகரிப்பதற்கான நடவடிக்கைகளை முன்னெடுக்க வேண்டுமென அறிவுறுத்தினார் கிராம மற்றும் பிரதேச மட்ட டெங்கு கட்டுப்பாட்டுக் குழுக் கூட்டங்கள் ஊடாக மக்களுக்கு முறையான விழிப்புணர்வை ஏற்படுத்துவதுடன், துப்புரவுப் பணிகளை உரிய திட்டமிடலுடன் முன்னெடுக்க வேண்டும் எனவும் வலியுறுத்தினார். உள்ளூராட்சி அதிகார சபைகளுடன் இணைந்து செயற்படுவதன் மூலமும், கிராம மட்டங்களில் டெங்கு விழிப்புணர்வு நிகழ்வுகளைத் தொடர்ச்சியாக நடத்துவதன் மூலமும் டெங்கு நோயைக் கட்டுப்பாட்டுக்குள் கொண்டுவர முடியும் எனப் பிரதேச செயலாளர்களுக்கு அறிவுறுத்தினார்.
கழிவு முகாமைத்துவத்தில் பொதுமக்களின் பொறுப்பு :
பொதுமக்கள் மத்தியில் கழிவு முகாமைத்துவம் தொடர்பான விழிப்புணர்வு காணப்பட்டாலும், சிலர் கழிவுகளை முறையாக அகற்றாமல் வீதிகளில் வீசுவதால் பல்வேறு சிரமங்கள் ஏற்படுவதாக அரசாங்க அதிபர் சுட்டிக்காட்டினார். எனவே, பொதுமக்கள் உள்ளூராட்சி அதிகார சபைகளுடன் இணைந்து முறையான கழிவு முகாமைத்துவ நடைமுறைகளைப் பின்பற்ற வேண்டும் எனவும் வலியுறுத்தினார்.
வெற்றுக் கொள்கலன்களைக் கொள்வனவு செய்ய நடவடிக்கை :
பிரதேச செயலகங்கள் ஊடாகச் சேகரிக்கப்படும் வெற்றுக் கொள்கலன்களை ஒரு கிலோ கிராமுக்கு 30 ரூபா வீதம் கொள்வனவு செய்வதற்கு Offer Ceylon நிறுவனம் தயாராக இருப்பதாகவும், இதற்கான ஏற்பாடுகளைப் பிரதேச செயலாளர்கள் முன்னெடுக்க வேண்டும் எனவும் அரசாங்க அதிபர் தெரிவித்தார். இக்கலந்துரையாடலில் மேலதிக அரசாங்க அதிபர், பிரதேச சபைகளின் தவிசாளர்கள், உதவிப் பிரதேச செயலாளர்கள், சுகாதார வைத்திய அதிகாரிகள், வலயக் கல்விப் பணிப்பாளர்கள், சிரேஷ்ட பொது சுகாதாரப் பரிசோதகர்கள், பிரதேச சபைச் செயலாளர்கள், முப்படையினர், பொலிஸ் உத்தியோகத்தர்கள் மற்றும் தொடர்புடைய துறைசார் உத்தியோகத்தர்கள் உள்ளிட்ட பலர் கலந்துகொண்டனர்.
 
1 2 3 4 5
யாழ்ப்பாண மாவட்டத்தின் சிறுவர், பெண்கள் மற்றும் உளவளத்துணை அபிவிருத்தி தொடர்பான 2026 ஆம் ஆண்டின் மூன்றாம் காலாண்டுக் கூட்டம், மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (22.10.2026) முற்பகல் 9.30 மணிக்கு மாவட்டச் செயலகக் கேட்போர் கூடத்தில் நடைபெற்றது.
அரசாங்க அதிபரின் தலைமையுரை :
மாவட்டத்தில் சிறுவர்கள் மற்றும் பெண்கள் எதிர்கொள்ளும் பிரச்சினைகள் தொடர்பாகப் பிரதேச மட்டத்தில் மேற்கொள்ளப்படும் நடவடிக்கைகளை மீளாய்வு செய்வதுடன், அவற்றுக்கான தீர்வுகளை ஒருங்கிணைந்த முறையில் முன்னெடுப்பதே இக்கூட்டத்தின் முக்கிய நோக்கமாகும் என குறிப்பிட்டார். சிறுவர்கள் மற்றும் பெண்களுக்கு எதிரான வன்முறைகள் தொடர்பில் கிடைக்கப்பெறும் முறைப்பாடுகளின் அடிப்படையிலேயே உத்தியோகபூர்வ புள்ளிவிபரங்கள் தயாரிக்கப்படுவதால், அறிக்கையிடப்படாத சம்பவங்கள் முழுமையாகப் புள்ளிவிபரங்களில் பிரதிபலிப்பதில்லை எனச் சுட்டிக்காட்டிய அவர், முறைப்பாடுகள் கிடைக்கப்பெற்ற பின்னர் அவற்றுக்கான தீர்வுகள் உரிய முறையில் வழங்கப்படுவதையும், சம்பந்தப்பட்ட குடும்பங்கள் தேவையான உதவிகளைப் பெற்றுக்கொள்வதையும் உறுதிப்படுத்த வேண்டியதன் அவசியத்தையும் வலியுறுத்தினார். மேலும், சம்பவ மாநாடுகளை நடத்தித் தீர்மானங்களை எடுப்பதுடன் மட்டும் நின்றுவிடாமல், பாதிக்கப்பட்ட குடும்பங்களின் அடிப்படைப் பிரச்சினைகளையும் கண்டறிந்து தீர்வுகளை வழங்க வேண்டும் எனத் தெரிவித்தார். குறிப்பாக, குடும்பங்களின் பொருளாதார நெருக்கடிகள், வாழ்வாதாரப் பிரச்சினைகள் மற்றும் கல்வி சார்ந்த சவால்கள் சிறுவர் மற்றும் பெண்கள் தொடர்பான பிரச்சினைகளுக்குக் காரணமாக அமையக்கூடும் என்பதால், பிரதேச செயலாளர்கள் ஏனைய துறைசார் உத்தியோகத்தர்களுடன் இணைந்து தேவையான நடவடிக்கைகளை முன்னெடுக்க வேண்டும் எனக் கேட்டுக்கொண்டார். வாழ்வாதார உதவிகள் தேவைப்படும் குடும்பங்களுக்கு மாவட்ட மட்டத்தில் உரிய ஒருங்கிணைப்பின் ஊடாக உதவிகளை வழங்குவதுடன், கல்வி சார்ந்த பிரச்சினைகளுக்குத் தீர்வுகாண வலயக் கல்விப் பணிப்பாளர்களின் ஒத்துழைப்பையும், உளவளத்துணை தேவைப்படுவோருக்கு உரிய நிபுணத்துவ உதவிகளையும் பெற்றுக்கொடுக்க வேண்டும் என வலியுறுத்தினார்.
மேலும், மாவட்டத்தில் தற்கொலைச் சம்பவங்கள் அதிகரித்துவருவது கவலைக்குரிய விடயமாக உள்ளதாகக் குறிப்பிட்ட அரசாங்க அதிபர் அவர்கள், இவ்வாறான சம்பவங்களைத் தடுப்பதற்கும், ஆபத்தான நிலைமைகளில் உள்ளவர்களை முன்கூட்டியே அடையாளம் கண்டு உரிய உளவளத்துணை மற்றும் மருத்துவ உதவிகளை வழங்குவதற்கும் துறைசார் நிபுணர்களின் ஆலோசனைகள் அவசியம் எனத் தெரிவித்தார். சிறுவர் மற்றும் பெண்களுக்கு எதிரான வன்முறைகளை முழுமையாக ஒழிப்பது சவாலானதாக இருந்தாலும், அனைத்துத் துறைசார் உத்தியோகத்தர்களும் ஒருங்கிணைந்து செயற்படுவதன் மூலம் இத்தகைய சம்பவங்களைக் குறைக்க முடியும் எனவும் அவர் நம்பிக்கை வெளியிட்டார். எனவே, சிறுவர்கள் மற்றும் பெண்களின் பாதுகாப்பை உறுதிப்படுத்தவும், அவர்களின் நலனை மேம்படுத்தவும், தற்கொலைகளைத் தடுப்பதற்கான முன்னெச்சரிக்கை நடவடிக்கைகளை வலுப்படுத்தவும் அனைத்து அதிகாரிகளும் தத்தமது பொறுப்புகளை உணர்ந்து அர்ப்பணிப்புடன் செயற்பட வேண்டும் எனக் கேட்டுக்கொண்டார்.இதன்போது, மாவட்ட மட்டத்திலான சிறுவர் அபிவிருத்தி, பெண்கள் அபிவிருத்தி, உளவளத்துணை வேலைத்திட்டங்கள் மற்றும் ஏனைய தொடர்புடைய விடயங்கள் குறித்து விரிவாகக் கலந்துரையாடப்பட்டன.
அரசாங்க அதிபரால் வழங்கப்பட்ட அறிவுறுத்தல்கள் :
சிறுவர் இல்லங்களிலிருந்து சமூகத்துடன் மீள இணைக்கப்பட்டவர்களுக்காக நடைமுறைப்படுத்தப்படும் வலிமையான வாழ்க்கை - “திவியட்ட சவியக்” வீட்டுத்திட்டத்தின் கீழ் இரண்டு மில்லியன் ரூபா பெறுமதியான வீடுகள் வழங்கப்பட்டு வருவதாகக் குறிப்பிட்டார். இத்திட்டம் மத்திய மற்றும் மாகாண அமைச்சுக்கள் ஊடாகத் தொடர்ச்சியாக நடைமுறைப்படுத்தப்படவுள்ளதால், பிரதேச செயலாளர்கள் தகுதியான பயனாளிகளின் துல்லியமான பட்டியலைத் தயாரித்து வைத்திருக்க வேண்டும் என வலியுறுத்தினார். மேலும், நெடுந்தீவு பிரதேச செயலகத்தில் சிறுவர் விவகாரங்களைக் கையாள்வதற்கான உத்தியோகத்தர்கள் இல்லாத நிலையை நிவர்த்தி செய்யும் வகையில், 2027 ஆம் ஆண்டு ஜனவரி மாதம் முதல் சிறுவர் உரிமை மேம்பாட்டு உத்தியோகத்தர் உள்ளிட்ட உரிய உத்தியோகத்தர்களை நியமிப்பதற்கோ அல்லது சுழற்சி முறையில் பணியமர்த்துவதற்கோ நடவடிக்கை எடுக்குமாறு சம்பந்தப்பட்ட மகளிர் மற்றும் சிறுவர் அலுவல்கள் அமைச்சுக்கு கடிதம் அனுப்பி வைக்குமாறு அறிவுறுத்தினார். அனைத்துப் பிரதேச செயலாளர் பிரிவுகளிலும் சிறுவர், பெண்கள் மற்றும் உளவளத்துணை தொடர்பாகக் கிடைக்கப்பெறும் முறைப்பாடுகள் குறித்து ஆராய்வதற்காக ஒவ்வொரு மாதமும் இரண்டாவது புதன்கிழமை பிற்பகல் 2.30 மணிக்கு வழக்குக் கலந்துரையாடல்களை (Case Discussions) நடத்தி, பிரச்சினைகளுக்குத் தீர்வு காணுமாறும் தெரிவிக்கப்பட்டது. மாகாண சிறுவர் நன்னடத்தை ஆணையாளரின் கோரிக்கைக்கு அமைவாக, நல்லூர் பிரதேச செயலாளர் பிரிவிலுள்ள ஐந்து சிறுவர் பாதுகாப்பு இல்லங்களில் வசிக்கும் சிறுவர்களுக்கு உளஆற்றுப்படுத்தல் மற்றும் வழிகாட்டல் சேவைகளை வழங்குவது தொடர்பிலும் கலந்துரையாடப்பட்டது. இதற்கமைய, சிறுவர் அபிவிருத்தி நிலையங்களில் உள்ள சிறுவர்களின் ஆளுமை மற்றும் திறன்களை மேம்படுத்தும் நோக்கில், உளவளத்துணை உத்தியோகத்தர், மாவட்ட திறன் விருத்தி உத்தியோகத்தர் மற்றும் மனிதவள மேம்பாட்டு உத்தியோகத்தர் ஆகியோர் இணைந்து மாதத்திற்கு இருமுறை செயலமர்வுகளை நடத்துவதற்கான ஏற்பாடுகளை மேற்கொள்ளலாம் என மாவட்ட அரசாங்க அதிபர் தெரிவித்தார். பெண்களுக்கு எதிரான முறைப்பாடுகள் தொடர்பில், 2025 ஆம் ஆண்டுடன் ஒப்பிடுகையில் 2026 ஆம் ஆண்டில் முறைப்பாடுகளின் எண்ணிக்கை சிறிதளவு அதிகரித்துள்ளதாகவும் கூட்டத்தில் சுட்டிக்காட்டப்பட்டது. இதற்கான நடவடிக்கைகளை உடனுக்குடன் எடுக்குமாறு அறிவுறுத்தப்பட்டது. அத்துடன், வலயக் கல்வி அலுவலகங்களின் கல்விசாரா உத்தியோகத்தர்களுக்கு கல்விச் சட்டங்கள் மற்றும் நடைமுறைகள் தொடர்பில் நன்னடத்தை உத்தியோகத்தரின் ஊடாகச் செயலமர்வொன்றை ஏற்பாடு செய்து நடத்துமாறும் அறிவுறுத்தப்பட்டது.
விழிப்புணர்வு :
அதிகரித்து வரும் தற்கொலைச் சம்பவங்கள், அவற்றுக்கான முக்கிய காரணிகள் மற்றும் அவற்றைத் தடுப்பதற்கான வழிமுறைகள் தொடர்பில் யாழ்ப்பாணம் போதனா வைத்தியசாலையின் வைத்திய கலாநிதி எஸ். சிவதாஸ் அவர்கள் சிறப்பு விழிப்புணர்வு கருத்துரை வழங்கப்பட்டது.
பங்குபற்றியவர்கள் :
இக்கூட்டத்தில் மேலதிக அரசாங்க அதிபர் க. சிவகரன், மேலதிக அரசாங்க அதிபர் (காணி) பா. ஜெயகரன், மாகாண சிறுவர் நன்னடத்தை ஆணையாளர் திருமதி எஸ்.சி.என். கமலராஜன், உதவி மாவட்டச் செயலாளர் உ. தர்சினி, பிரதேச செயலாளர்கள், உதவிப் பிரதேச செயலாளர்கள், வலயக் கல்விப் பணிப்பாளர்கள், பொலிஸ் உத்தியோகத்தர்கள் மற்றும் மாவட்டச் செயலக, பிரதேச செயலக மட்டங்களில் பணியாற்றும் சிறுவர் உரிமை மேம்பாட்டு உத்தியோகத்தர்கள், சிறுவர் பாதுகாப்பு உத்தியோகத்தர்கள், பெண்கள் அபிவிருத்தி உத்தியோகத்தர்கள், நன்னடத்தை உத்தியோகத்தர்கள், உளவளத்துணை உத்தியோகத்தர்கள் உள்ளிட்ட துறைசார் அதிகாரிகள் கலந்துகொண்டனர்.
 
1 2 3 4 6 7 9 10 11 58