யாழ் மாவட்ட மகளிர் விவகாரக் குழுக்களின் சம்மேளனத்தினால் 15 வயதுக்குட்பட்ட பெண்களுக்கான உதைப்பதாட்டப் போட்டியில் தேசிய ரீதியில் முதலாமிடம் பெற்ற தெல்லிப்பளை யூனியன் கல்லூரி மாணவிகளை கௌரவிக்கும் நிகழ்வு யாழ்ப்பாண மாவட்ட மகளிர் விவகாரக் குழுக்களின் சம்மேளனத்தின் தலைவி திருமதி. மதனரூபி நிரோஷானந் அவர்களின் தலைமையில் இன்றைய தினம் (14.05.2026) வியாழக்கிழமை பி.ப. 02.00 மணிக்கு யாழ். தெல்லிப்பளை யூனியன் கல்லூரி மண்டபத்தில் நடைபெற்றது. இந் நிகழ்வில் பிரதம விருந்தினராக யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் கலந்து சிறப்பித்தார். மேலும் சிறப்பு விருந்தினராக யா/ தெல்லிப்பளை யூனியன் கல்லூரி அதிபர் திரு. தில்லையம்பலம் வரதன் அவர்களும், கௌரவ விருந்தினர்களாக யாழ்ப்பாண மாவட்டச் செயலக பெண்கள் அபிவிருத்தி பிரிவின் மாவட்ட இணைப்பாளர் திருமதி தயாபரி கிரிதரன், தெல்லிப்பளை பிரதேச செயலக பெண்கள் அபிவிருத்தி உத்தியோகத்தர் திருமதி சத்தியப்பிரியா கிருஸ்ணகுமார், AVR. அறக்கட்டளையின் தலைவர் திரு. பொன்னுத்துரை சிவகுமார் ஆகியோர் கலந்து சிறப்பித்தனர்.
இந் நிகழ்வில் அரசாங்க அதிபர் அவர்கள் பிரதம விருந்தினர் உரையாற்றுகையில், தெல்லிப்பளை பிரதேசத்துக்கு ஒரு மகிழ்வான நாளாக இன்றைய நாள் அமைந்திருப்பதாகவும், இக் கல்லூரியில் இருந்து இரண்டு உதைபந்தாட்ட பெண்கள் அணிகளும் இறுதிப் போட்டி வரை பங்குபற்றியதன் மூலம் மண்ணினுடைய பெருமையை உலகறிய செய்யும் நிகழ்வினை பாடசாலை அதிபர் அவர்கள் ஆற்றிய உரையிலிருந்து அறிய முடிகிறது என்பதை குறிப்பிட்டதுடன், தேசிய ரீதியாக நடைபெற்ற உதைப்பந்தாட்ட பெண்கள் பிரிவில் 32 போட்டிகளில் யூனியன் கல்லூரி 15 வயதுக்குட்பட்ட மாணவிகள் பங்கு பற்றி தேசிய ரீதியில் முதலாமிடம் பெறுவது என்பது மிகவும் கடினமான விடயம் எனவும், இதற்கு அவர்களின் மன உறுதியே வெற்றியை பெற வைத்துள்ளது எனவும், தேசிய விளையாட்டு நிகழ்வுகளுக்கு பிள்ளைகளை அனுப்பும் போது அவர்கள் கல்வியில் நாட்டம் இல்லாமல் இருக்கின்றார்கள் என ஐயப்படும் நிலையே இன்றைய சூழலில் காணப்படுகின்ற நிலையில், அவர்கள் வெற்றியை தாங்கி நிற்கும் போது பெற்றோர்களின் மகிழ்ச்சி என்பது உண்மையில் அளவிட முடியாததொன்றாக உள்ளதாகவும் தெரிவித்தார். மேலும் யாழ்ப்பாண மாவட்ட மகளிர் விவகார குழுக்களின் சம்மேளனம் மாவட்ட ரீதியாக தங்களுடைய செயற்பாடுகளை முன்னெடுத்து வந்துள்ள நிலையில் இன்று பிரதேச செயலக ரீதியாக அவர்களுடைய பணியை ஆரம்பித்துள்ளார்கள் எனவும், மகளிர் விவகார குழுக்களின் சம்மேளனம் பெண்களை கௌரவிக்கின்ற நிகழ்வினை பிரதேச செயலக ரீதியாக அங்குரார்ப்பணம் செய்கின்ற நிகழ்வாக இந் நிகழ்வு பார்க்கப்படுகின்றது எனவும். தெரிவித்தார். மேலும் பிள்ளைகளுடைய உதை பந்தாட்ட அணியில் பயிற்றுவிப்பாளராக பொலீஸ் உத்தியோகத்தரும் பயிற்சி வழங்கியிருப்பது பாராட்ட வேண்டிய ஒன்றாக காணப்படுகிறது. மேலும், விளையாட்டில் மட்டுமின்றி கல்வி மட்டத்திலும் இம் மாணவர்கள் உயர்ந்த பெறுபேறுகளைப் பெற வேண்டியவர்களாக இருப்பதாகவும் ஏனென்றால் பாடசாலை கல்வியை பூர்த்தி செய்து சிறந்த பெறுபேறுகளை பெறவேண்டும் என்பதே பெற்றோர்களின் பெரும் அவாவாகவும் இருப்பதாகவும் தெரிவித்தார். மேலும், விளையாட்டுடன் கூடிய வெற்றியை குடும்பத்துடன் கொண்டாட கல்வியிலும் சாதனைகளை படைக்க வேண்டும் எனவும் அதற்கு அவர்களுக்கு இறைவன் துணை புரிய வேண்டும் எனவும், மேலும் தேசிய ரீதியாக பல்வேறுபட்ட போட்டிகளில் எவ்வித வசதிகளும் இன்றி பங்கு பற்றி வெற்றியை பெற்றுக் கொள்கின்றார்கள் எனத் தெரிவித்தார். தேசிய ரீதியான போட்டிகளில் பங்கு பற்றி வெற்றி பெறுவதென்பது பாடசாலைக்கு மட்டுமல்ல மாவட்டத்திற்கும் பெருமை சேர்ப்பதாக உள்ளது எனவும், பிள்ளைகள் எதிர்கால வளர்ச்சியில் அக்கறை காட்டுவதோடு இத்தகைய உதைப்பந்தாட்ட போட்டிகளில் செயற்பட்டு தொடர்ச்சியாக முன்னேற்றம் காண்பதன் ஊடாக மாவட்ட , மாகாண, தேசிய ரீதியில் அணிகளில் இணைந்து கொள்ளக்கூடிய வாய்ப்புகள் உள்ளதாகவும் தெரிவித்தார். மேலும், பல்வேறுபட்ட வீராங்கனைகள் இம் மண்ணிலே உருவாகி தேசிய ரீதியாகவும் விளையாட்டுக்களில் பங்குபற்றும் வாய்ப்பு உள்ளதாகவும் தேசிய உதைப்பந்தாட்ட அணிகளில் அங்கத்தவர்களாக பங்குபெறக் கூடிய வாய்ப்புகள் காணப்படுவதாகவும், 15 வயதுக்குட்பட்ட மாணவிகளின் அணி அடைந்த வெற்றிக்கு யூனியன் கல்லூரி அதிபருக்கு வாழ்த்துக்களை தெரிவித்துக் கொண்டதுடன், யூனியன் கல்லூரி வலிகாமம் வடக்கு பிரதேச செயலகம் யாழ்ப்பாண மாவட்டம் பெருமைப்படுகின்ற நிகழ்வாக இந் நிகழ்வு அமைந்திருக்கின்றது எனவும் சாதனைப் பயணங்கள் மென்மேலும் வெற்றிபெற தனது வாழ்த்துக்களை தெரிவித்துக்கொண்டார்.
இந் நிகழ்வில் யாழ். தெல்லிப்பளை யூனியன் கல்லூரி மாணவர்களின் இன்னியம் அணிவகுப்புடன் விருந்தினர்கள் வரவேற்கப்பட்டதைத் தொடர்ந்து மங்கள விளக்கேற்றல், வரவேற்புரை, வரவேற்பு நடனம், தலைமையுரை ஆகிய நிகழ்வுகள் நடைபெற்றன. தொடர்ந்து நடைபெற்ற சாதனையாளர் கௌரவிப்பு நிகழ்வில் பிரதம விருந்தினராக கலந்து கொண்டிருந்த யாழ். மாவட்ட அரசாங்க அதிபர் திரு. மருதலிங்கம் பிரதீபன் அவர்களால் வீராங்கனைகளுக்கு பொன்னாடை மற்றும் பதக்கங்கள் அணிவித்து கௌரவிக்கப்பட்டனர். மேலும் சம நேரத்தில் அவர்களுடைய தாய்மாரும் வுருந்தினர்களால் மாலை அணிவிக்கப்பட்டு கௌரவிக்கப்பட்டனர். இந் நிகழ்வில் யாழ் மாவட்ட மகளிர் விவகாரக் குழுக்களின் சம்மேளன அங்கத்தவர்கள், பாடசாலை பிரதி உப அதிபர்கள் ஆசிரியர்கள், பழைய மாணவர் சங்கத்தினர் மற்றும் மாணவர்கள் கலந்து கொண்டிருந்தனர்.
 
1 2 700354582_.jpg 3 4 5 6 7 8 9 10 13 14 15 111
 
இக் கலந்துரையாடல் இன்றைய தினம் (14.05.2026) வியாழக்கிழமை பி.ப 01.00 மணிக்கு மாவட்ட அரசாங்க அதிபர் மருதலிங்கம் பிரதீபன் அவர்களின் தலைமையில் மாவட்டச் செயலக மாநாட்டு மண்டபத்தில் நடைபெற்றது. இக் கலந்துரையாடலில் தலைமையுரையாற்றிய அரசாங்க அதிபர் அவர்கள், 2021 ஆம் ஆண்டு 11 தீவகப் பாடசாலைகள் உட்பட 28 பாடசாலைகளில் நீர் சுத்திகரிப்பு இயந்திரங்கள் ( RO Plant) நிறுவப்பட்டுள்ள நிலையில், அதில் 12 இயந்திரங்கள் இயங்காத நிலையில் இருப்பதாகவும், குறிப்பாக தீவுப்பகுதியில் உள்ள பாடசாலைகளில் இயங்காத நிலை அதிகமாகவுள்ளதாகவும், தமது கவனத்திற்கு தேசிய நீர் வழங்கல் வடிகாலமைப்புச் சபையினரால் கொண்டுவரப்பட்டதற்கு அமைய, இதன் தற்போதைய நிலைமைகள் தொடர்பில் ஆராயும் நோக்கில் இக் கலந்துரையாடலில் ஒழுங்கு செய்யப்பட்டுள்ளதாகவும், சில பாடசாலைகளில் இயங்காத நிலையிலுள்ளதற்கான காரணத்தினை தெளிவுபடுத்துமாறும் கேட்டுக்கொண்டார்.
இதற்கு அமைய ஒவ்வொரு பாடசாலை அதிபர்களும் தற்போதைய நிலமைகளை தெளிவுபடுத்தினார்கள். இக் கலந்துரையாடலில் கருத்து தெரிவித்த தேசிய நீர் வழங்கல் வடிகாலமைப்புச் சபையின் மாவட்ட பொறியியலாளர் அவர்கள், தாளையடியிலிருந்து சுத்திகரிக்கப்பட்ட நீரானது பாடசாலைக்கு அருகாமையில் குழாய் காணப்படுமிடத்து அப் பாடசாலையிலுள்ள மாணவர்கள், ஆசிரியர்கள் மற்றும் அலுவலர்களின் எண்ணிக்கை அடிப்படையில் மாதமொன்றுக்கு 20 நாட்களுக்கு ஒருவருக்கு 20 லீற்றர் வீதம் இலவசமாக குடிநீர் வழங்கப்படும் எனவும் தெரிவித்ததுடன், பாடசாலைக்கு ஏற்கனவே வழங்கப்பட்ட 28 நீர் சுத்திகரிப்பு இயந்திரத்தினை பராமரிப்பதற்காக இவ்வாண்டு ரூபா 7.50 மில்லியன் ஒதுக்கப்பட்டுள்ளதாகவும் தெரிவித்தார். இக் கலந்துரையாடலில் திட்டமிடல் பணிப்பாளர் திரு.இ சுரேந்திரநாதன், பிரதித் திட்டமிடல் பணிப்பாளர் திரு எஸ். சிவகுமாரன், தேசிய நீர்வழங்கல் வடிகாலமைப்பு சபையின் மாவட்டப் பொறியியலாளர், வலய பிரதிக் கல்விப் பணிப்பாளர்கள், பாடசாலை அதிபர்கள் மற்றும் ஒப்பந்தகாரர் கலந்து கொண்டனர்.
 
 
1.1 2.1 2 4 5
யாழ்ப்பாண மாவட்டச் செயலகத்தில் உள்ள சிறிய மாநாட்டு மண்டபமானது கூட்டங்கள் மற்றும் செயலமர்வுகள் நடாத்தும் வகையில் ஒலி அமைப்புக்கள் மற்றும் தளபாட வசதிகளையும் உள்ளடக்கிய வகையில் புனரமைக்கப்பட்டு இன்றைய தினம் (14.05.2026) மு.ப 11.30 மணிக்கு அரசாங்க அதிபர் திரு. மருதலிங்கம் பிரதீபன் அவர்களினால் திறந்து வைக்கப்பட்டது. அதனைத் தொடர்ந்து அரசாங்க அதிபர் தலைமையில் மாவட்டச் செயலக பதவிநிலை உத்தியோகத்தர்கள், பிரதேச செயலாளர்கள் மற்றும் கணக்காளர்களுக்கான நிர்வாகக் கடமைகள் மற்றும் மக்களுக்கான சேவைகளை மேன்மேலும் வினைத்திறனாகவும் விரைவாகவும் வழங்குதல் தொடர்பாக கலந்துரையாடப்பட்டு, அரசாங்க அதிபரினால் உரிய அறிவுறுத்தல்களும் வழங்கப்பட்டன.
 
 
1 2 3 4 5 6 7 8 9 10 11 12 13 14 15 16 17 18
யாழ். மாவட்டச் செயலகத்தில் நிதி நிலைசார் நிகழ்நிலை மென்பொருள் (Computerized Integrated District Secretariat Accounting System) அரசாங்க அதிபர் திரு.மருதலிங்கம் பிரதீபன் அவர்களினால் இன்றைய தினம் (14.05.2026) உத்தியோகபூர்வமாக ஆரம்பித்து வைக்கப்பட்டது. இவ் மென் பொருளானது அரசாங்க அதிபரின் ஆலோசனைக்கு அமைவாக, பிரதம கணக்காளர் திரு.எஸ். கிருபாகரன் அவர்களின் வழிகாட்டுதலில் முகாமைத்துவ சேவைகள் உத்தியோகத்தர்களான திரு.செல்வரத்தினம் சிவச்செல்வன் மற்றும் திரு. செல்வராஜா அமல்ராஜ் ஆகியோரால் அரச நிதி விதிமுறைகள் மற்றும் கணக்கீட்டு முறைகளுக்கு ஏற்ப வடிவமைக்கப்பட்டுள்ளது.
இதன் போது கருத்து தெரிவித்த அரசாங்க அதிபர் அவர்கள், இவ் மென்பொருளின் நோக்கமானது காலத்துக்கு காலம் ஏற்படும் தொழில்நுட்ப மாற்றங்களுக்கு ஏற்ப வினைத்திறன் மிக்கதாக மேற்கொள்வதற்கும், சிறந்த உள்ளக கட்டுப்பாடுகளை நடைமுறைப்படுத்துவதற்கும், காலத்துக்கு காலம் கிடைக்கப்பெறும் நிதிசார் நடவடிக்கைகள் தொடர்பான மாற்றங்களை இற்றைப்படுத்துவதற்காகவும், மாவட்ட செயலகத்துடன் பிரதேச செயலகங்களை நிகழ்நிலையில் ஒருங்கிணைத்து எவ்விடத்திலிருந்தும், எந்நேரமும் துல்லியமான கணக்கீடுகளை மேற்கொண்டு காலதாமதமற்ற வெளிப்படையான மற்றும் உன்னதமான அரச சேவையை உறுதி செய்வதாகும் எனவும் தெரிவித்தார். மேலும், இதன் தனித்துவமான நன்மைகளாக மாத இறுதி கணக்கறிக்கைகளை விரைவாக தயார் செய்யலாம் என்பதுடன், நிதி கொடுக்கல் வாங்கல்களில் முழுமையான நம்பகத்தன்மையை ஏற்படுத்துவதாகும் எனவும் தெரிவித்து, இவ் மென்பொருள் உருவாக்க உறுதுணையாகவிருந்த பிரதம கணக்காளர் மற்றும் முகாமைத்துவ உத்தியோகத்தர்களுக்கு தமது நன்றியினைத் தெரிவித்ததுடன், இவ் மென்பொருளினை தனியார் நிறுவனத்தின் மூலம் தயாரிப்பது எனின் அதிக செலவுகள் ஏற்படும் எனவும், எமது உத்தியோகத்தர்கள் மூலம் வடிவமைக்கப்பட்டதால் எமக்கு எதுவித செலவும் இல்லாமல் வினைத்திறனான கடமைக்கு உறுதுணையாக அமைந்துள்ளதாகவும் தெரிவித்தார். மேலும், இவ்வாறான வினைத்திறனாக செயற்பாடுகளுக்கு அனைவரினதும் ஒத்துழைப்புக்களை வழங்குமாறும் கேட்டுக் கொண்டார்.
இந் நிகழ்வில் இவ் மென்பொருளினை வடிவமைத்த உத்தியோகத்தர்களுக்கு அரசாங்க அதிபரால் மெச்சுரை வழங்கி கெளரவிக்கப்பட்டனர். தொடர்ந்து இவ் மென்பொருள் தொடர்பான பயனர் கையேடு (User Guide) அரசாங்க அதிபரினால் சகல பிரதேச செயலாளர்களுக்கு வழங்கப்பட்டது. இந் நிகழ்வில் மேலதிக அரசாங்க அதிபர் திரு கே.சிவகரன், மேலதிக அரசாங்க அதிபர் (காணி) திரு.பா.ஜெயகரன் உள்ளிட்ட பதவிநிலை உத்தியோகத்தர்கள், பிரதேச செயலாளர்கள் மற்றும் மாவட்டச் செயலக மற்றும் பிரதேச செயலக கணக்காளர்கள் கலந்து கொண்டனர்.
 
1 2 3 4 5 6 7 8 9 10 11 12
 
 
 
அரசகாணி வேலை திட்டம் தொடர்பான முன்னேற்ற மீளாய்வு கூட்டம் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில், வட மாகாண காணி ஆணையாளர் திரு. ஆர்.குருபரன் அவர்களின் பங்குபற்றுதலுடன் இன்றைய தினம் (14.05.2026) காலை 10.00 மணிக்கு மாவட்டச் செயலக கேட்போர் கூடத்தில் நடைபெற்றது. இக் கூட்டத்தில் யாழ்ப்பாண மாவட்டத்தில் காணி ஆணையாளர் திணைக்களத்தின் ஊடாக மேற்கொள்ள வேண்டிய காணிச் செயற்பாடுகள், காணி அபிவிருத்தி கட்டளை சட்டத்தின் கீழ் காணிக் கச்சேரி மூலம் ஆவணங்கள் வழங்கப்பட வேண்டிய காணிகள், அரச காணியினை வர்த்தக நோக்குடன் கூடிய விவசாய நடவடிக்கைகளுக்காக நீண்ட கால குத்தகைக்கு வழங்கும் காணிகள், பிரதேச சபைக்கு ஆளுகைக்கு உட்பட்ட இதுவரை கையளிக்கப்படாத காணிகள் தொடர்பாகவும் ஆராயப்பட்டன. இக் கூட்டத்தில் தலைமையுரையாற்றிய அரசாங்க அதிபர் மருதலிங்கம் பிரதீபன் அவர்கள், யாழ்ப்பாண மாவட்டத்தை பொறுத்தவரை ஏனைய மாவட்டங்களுடன் ஒப்பிடுகையில் அரச காணிகள் குறைவாக காணப்படுவதால் காணி தொடர்பான பிரச்சினைகள் குறைவாக காணப்படுகின்றதாகவும் தெரிவித்தார். மேலும், மாகாண காணி திணைக்களத்தின் கீழ் பிரதேச செயலங்களில் கடமையாற்றும்
ஆளணியை ஒழுங்குபடுத்த வேண்டிய தேவை காணப்படுவதாகவும், அதனை மீள் ஒழுங்கு செய்யுமாறு மாகாண காணி ஆணையாளர் அவர்களை கேட்டுக்கொண்டார். மேலும், தற்போது ஹிமிகம திட்டத்தின் மூலம் காணி ஆவணங்களை வழங்குவதனை விரைவுபடுத்துமாறும், பிரதேச ரீதியாக காணி தொடர்பான பிரச்சினைகள் ஏற்படும் போது அதற்கான இறுதியான தீர்மானத்தை பிரதேச செயலாளர்கள் எடுக்க வேண்டுமெனவும் கேட்டுக்கொண்டார். மேலும், மக்களின் தேவைகளை சரியான வகையில் காணி உத்தியோகத்தர்கள் அடையாளம் கண்டு பிரதேச செயலாளர்களுக்கு தெரியப்படுத்தி சரியான தீர்மானங்கள் எடுப்பதற்கு வழியை ஏற்படுத்துமாறும் தெரிவித்ததுடன், வினைத்திறனாக செயற்பட்டு மாவட்ட காணி தொடர்பான பிரச்சினைகளை தீர்ப்பதற்கு ஒத்துழைப்பு நல்குமாறு கேட்டுக்கொண்டார். மேலும் பின்வரும் அறிவுறுத்தல்களும் அரசாங்க அதிபரால் வழங்கப்பட்டது.
01.ஜூன் இறுதி வாரத்திற்குள் ஒவ்வொரு பிரதேச செயலாளர் பிரிவுகளிலும் தீர்வு காணப்பட வேண்டிய காணி தொடர்பான பிரச்சினைகளை சம்பந்தப்பட்ட பிரதேச செயலாளர்கள், உதவிப் பிரதேச செயலாளர்கள் மற்றும் காணி சம்பந்தப்பட்ட அனைத்து உத்தியோகத்தர்களும் இணைந்து கலந்துரையாடி தீர்வு காண வேண்டும்.
02.ஜூன் 25 ஆம் திகதி மாவட்ட காணி பயன்பாட்டுக்குழு கூட்டம் நடைபெற உள்ளதால் அதற்கு முன்னதாக பிரதேச காணி பயன்பாட்டுக்குழு கூட்டத்தை நடாத்தி எடுக்கப்பட்ட தீர்மானங்களை மாவட்டச் செயலகத்திற்கு அனுப்பி வைக்குமாறும் தெரிவித்தார்.
03.டிசம்பர் மாதத்துக்கு முன்னதாக யாழ்ப்பாண மாவட்டத்தின் காணி தொடர்பான நடமாடும் சேவை ஒன்றினை மருதங்கேணி பிரதேச செயலகத்தில் நடாத்த ஒழுங்குகளை மேற்கொள்ளுமாறும் கேட்டுக் கொண்டார்.
04.பிரதேச செயலகங்களில் காணி அளவீடுகளை மேற்கொள்ள நில அளவைத் திணைக்களத்திடம் முனவைக்கும் போது முன்னுரிமை அடிப்படையில் நில அளவைத் திணைக்களம் காணி அளவீடுகளை மேற்கொள்ளுமாறும் கேட்டுக் கொண்டார்.
இக் கலந்துரையாடலில் மேலதிக அரசாங்க அதிபர் திரு கே. சிவகரன், மேலதிக அரசாங்க அதிபர் (காணி) திரு. பா.ஜெயகரன், நில அளவைகள் திணைக்கள அத்தியட்சகர் திரு.பிறேமதாஸ், வட மாகாண உதவி காணி ஆணையாளர் செல்வி. ரி.விதுஷா, பிரதேச செயலாளரகள், மாகாண காணி ஆணையாளர் திணைக்கள உத்தியோகத்தர்கள், பிரதேச செயலக காணி உத்தியோகத்தர்கள், மாவட்ட செயலக காணி உத்தியோகத்தர்கள் கலந்து கொண்டனர்.
 
 
1 2 3 4 5 6 7 8