அரச சேவையிலிருந்து இளைப்பாறும் விவசாயப் பணிப்பாளர் திருமதி. பாலகெளரி பவலீஸ்வரன் அவர்களுக்கான சேவைநலன் பாராட்டு விழாவும் மற்றும் பிரியாவிடை நிகழ்வும் யாழ் மாவட்ட மேலதிக அரசாங்க அதிபர் க . சிவகரன் அவர்களின் தலைமையில் இன்றைய தினம் (28.04.2026) பி.ப 2.30 மணிக்கு யாழ் மாவட்டச் செயலக கேட்போா் கூடத்தில் நடைபெற்றது திருமதி. பாலகெளரி பவலீஸ்வரன் அவர்கள், 1996ஆம் ஆண்டு இலங்கை விவசாய சேவையில் ஆராய்ச்சி உத்தியோகத்தராக இணைந்ததுடன் அதன் தொடர்ச்சியாக யாழ்ப்பாணம் மாவட்ட செயலகத்தில் மாவட்ட விவசாயப் பணிப்பாளராக 2024.11.20 லிருந்து 2025.08.31 வரை மாவட்ட பதில் விவசாய பணிப்பாளராகவும், 2025.08.01 லிருந்து 2026.04.28 ஆம் திகதிவரை மாவட்ட விவசாய பணிப்பாளராகவும் கடமையாற்றிவந்தவர் என்பது குறிப்பிடத்தக்கது. இந் நிகழ்வில் வரவேற்புரையினை பிரதம கணக்காளர் திரு.எஸ் கிருபாகரன் அவர்களால் ஆற்றப்பட்டதுடன், தலைமையுரை மேலதிக அரசாங்க அதிபர் திரு கே. சிவகரன் அவர்களால் ஆற்றப்பட்டது.
இந் நிகழ்வில் வாழ்த்துரை வழங்கிய அரசாங்க அதிபர் அவர்கள், மாவட்டச் செயலக விவசாயத்துறை செயற்பாடுகளை அடையாளம் காண மிகவும் சிறப்பாக செயற்பட்டவர் என்பதுடன், சகல உத்தியோகத்தர்களுடன் சகஜமாகவும் அமைதியாகவும் பழகும் உத்தியோகத்தராகவும் விளங்கினார். மேலும், முதலில் மாவட்ட செயலத்தில் பதில்கடமை விவசாய பணிப்பாளராகவும் பின்னர் நிரந்தர விவசாய பணிப்பாளராகவும் பணியாற்றியதுடன் அமைதியாகவும் துறை சார்ந்த விடயங்களை துணிச்சலாக கையாளும் திறமை கொண்டவர் எனவும் தெரிவித்தார். மேலும், விவசாய குழு கூட்டத்திலே விவசாயிகள் கேட்கப்படும் கேள்விகளுக்கு துல்லியமாக விடை கூறக்கூடியவராகவும் அதற்கான அறிவு கொண்டவராகவும் செயற்பட்டதுடன், பொருளாதார மத்திய நிலையத்தை மீண்டும் திறப்பதற்கான செயற்பாடுகளை ஒத்துழைப்பு வழங்கியதுடன் அவருடைய விவசாயத் துறை உத்தியோகத்தர்களும் பக்க துணையாக இருந்து ஒருங்கிணைந்து செயற்பட்டதாகவும், விவசாயம் சார்ந்த விடயங்களை வெளியிடுவதற்கு சிறப்பாக கடமையாற்றியதாகவும் அவருடைய ஓய்வு நிலை சிறப்பாக அமைய, வாழ்த்துக்களையும் தெரிவித்தார்.
இந் நிகழ்வில் மாவட்ட திட்டமிடல் பணிப்பாளர் திரு.இ சுரேந்திரநாதன், புள்ளிவிபர பிரதிப் பணிப்பாளரும் நலன்புரிக் கழகத்தின் தலைவருமான திரு. எம். வித்தியானந்தநேசன், உதவி மாவட்டச் செயலாளர் செல்வி உ.தா்சினி, சமுர்த்தி பனிப்பாளர் திரு. போ ஸ்ரீ வர்ணன், சமுர்த்தி கணக்காளர் திரு. இ. முருகதாஸ், பிரதி பதிவாளர் நாயகம் திரு. பிரபாகர், உள்ளிட்ட பதவிநிலை உத்தியோகத்தர்களாலும், மாவட்டச் செயலக உத்தியோகத்தர்களாலும் வாழ்த்துரைகள் நிகழ்த்தப்பட்டது. அதனைத் தொடர்ந்து அரசாங்க அதிபர் அவர்களினால் திருமதி.பாலகெளரி பவலீஸ்வரன் அவர்களுக்கு பொன்னாடை அணிவித்து கௌரவிக்கப்பட்டதுடன், நினைவுச் சின்னமும் வழங்கப்பட்டது. மேலும் கிளைகள் ரீதியாக பதவிநிலை உத்தியோகத்தர்கள் மற்றும் உத்தியோகத்தர்களாலும் கெளரவிக்கப்பட்டார்கள். இறுதியாக விவசாய பணிப்பாளர் திருமதி.பாலகெளரி பவலீஸ்வரன் தமது ஏற்புரையில், இன்றைய பிரிவு உபசார விழாவிற்கு கௌரவித்தமைக்கு நன்றிகளை தெரிவித்துக் கொண்டதுடன் முதலில் கிளிநொச்சியில் கடுமையான போர்ச்சூழலில் மூன்று வருடங்கள் கடமையாற்றியதாகவும், பின்னர் திருநெல்வேலி விவசாய திணைக்களத்தில் பயிர் காப்பாளராக மாகாண மட்டத்திலே தனித்து நின்று முழு விவசாயிகளின் பிரச்சனைகளை கையாண்ட ஒருவராகவும் தான் செயற்பட்டதாகவும், மாவட்டச் செயலகத்திலே 17 மாதங்கள் மாவட்ட விவசாய பணிப்பாளராகவும் கடமையாக்கியதாகவும் தெரிவித்தார். மேலும் சகல வழிகளிலும் மாவட்ட பணிப்பாளராக கடமையாற்ற ஒத்துழைப்பு வழங்கிய அரசாங்க அதிபர் மற்றும் பதவிநிலை உத்தியோகத்தர்கள் விவசாயத்துறை உத்தியோகத்தர்கள் அனைவருக்கும் நன்றிகளை தெரிவித்துக் கொண்டார்.
மேலும், யாழ்ப்பாணம் மாவட்ட செயலகம் அரசாங்க அதிபரின் சிறந்த தலைமையின் கீழ் மக்களுக்கு வினைத்திறனாக சேவையை ஆற்றி வருவதாகவும், அச் சேவை மென் மேலும் மக்களுக்கு சிறப்பாக அமைய தனது வாழ்த்துக்களையும் தெரிவித்துக் கொண்டார். மேலும், இன்றைய நிகழ்விற்கு வாழ்த்துரைகள் வழங்கிய உத்தியோகத்தர்களுக்கும் நிகழ்வில் பங்குபற்றிய உத்தியோகத்தர்களுக்கும் தமது நன்றியினையும் விவசாய பணிப்பாளர் தெரிவித்தார். இந் நிகழ்வில் மாவட்டச் செயலக பதவிநிலை உத்தியோகத்தர்கள் மற்றும் உத்தியோகத்தர்கள் கலந்துகொண்டனர்.
 
 
1 2 3 4 5 6 78 9 10 11 12 13 14 15 16 17 18 19 20 21 22 24 25 26 27 28 29 30 31 32 33 34
தெல்லிப்பளை பிரதேச செயலர் பிரிவின் தையிட்டி தெற்கு பகுதியில் திஸ்ஸ விகாரை அமைந்துள்ள காணியின் 17 காணி உரிமையாளர்கள் தமது காணி உரிமையினை கோரியிருந்தனர். இது தொடர்பில் புத்த சாசன சமய மற்றும் கலாசார அலுவல்கள் அமைச்சில் மூன்று கலந்துரையாடல்கள் இடம்பெற்றிருத்தன. குறித்த கலந்துரையாடல்களின் பிரகாரம் காணி உரிமையாளர்களின் உறுதிகள் ஆவணங்கள் அங்கு சமர்ப்பிக்கப்பட்டு அவை செவ்வை பார்க்கப்பட்ட பின்னர் புத்த சாசன சமய மற்றும் கலாசார அலுவல்கள் அமைச்சின் செயலாளரின் கடிதத்தின் பிரகாரம் காணியினை அளவீடு செய்வதற்காக இன்றைய தினம்(28.04.2026) கௌரவ பாராளுமன்ற உறுப்பினர், வைத்தியர் எஸ். ஸ்ரீ பவானந்தராஜா, கொழும்பிலிருந்து வருகை தந்த புத்த சாசன சமய மற்றும் கலாசார அலுவல்கள் அமைச்சின் அதிகாரிகள், நிளஅவை திணைக்கள அதிகாரிகள், தேசிய ஒருமைப்பாடு மற்றும் நல்லிணக்கத்திற்கான அலுவலகத்தின் தலைவர், நில அளவையாளர்கள், தொல்லியல் திணைக்கள அதிகாரிகள் மற்றும் யாழ். மாவட்ட அரசாங்க அதிபர் திரு.மருதலிங்கம் பிரதீபன், மேலதிக அரசாங்க அதிபர்(காணி), திரு.பா.ஜெயகரன், தெல்லிப்பளை பிரதேச செயலாளர் திருமதி. சிவகங்கா, மாவட்ட சிரேஷ்ட நில அளவை அத்தியட்சகர் திரு என்.தர்மபாலா, நில அளவையாளர்கள் உள்ளிட்ட குழுவினர் காணிகளை அளக்கச் சென்றிருந்தனர்.
17 காணி உரிமையாளர்கள் சார்பில் 42 பேர் காணியை அளவீடு செய்வதற்காக பிரதேச செயலாளரிடம் கோரியிருந்தனர். காணி உரிமையாளர்கள் கொழும்பிலிருந்து வருகை தந்த சிங்கள நில அளவையாளர்கள் தமது காணிகளை அளக்கக்கூடாது என்ற கோரிக்கை முன்வைத்திருந்தனர். பின்னர் காணிகள் விடுவிக்கப்படுதல் தொடர்பாக உறுதிப்படுத்தல் கடிதங்களில் கையொப்பமிடுமாறு கோரிக்கையினை முன்வைத்தனர். அவர்களின் கோரிக்கையினை குறிப்பிட்டு தயாரிக்கப்பட்ட கடிதத்தில் அமைச்சினால் நியமிக்கப்பட்ட குழு உறுப்பினர்கள் கையொப்பமிட்டு, பிரதேச செயலாளரின் பதவி முத்திரையுடன் கையொப்பமிடப்பட்ட கடிதத்தை வழங்கிய போது தெல்லிப்பளை பிரதேச செயலக கடிதத் தலைப்பிலே இக் கடிதம் வழங்கப்பட வேண்டும் என்ற கோரிக்கையை முன் வைத்தனர். புத்தசாசன, சமய மற்றும் கலாசார அலுவல்கள் அமைச்சு உட்பட வெவ்வேறு திணைக்களங்களைச் சேர்ந்த அதிகாரிகள் தெல்லிப்பளை பிரதேச செயலக கடிதத் தலைப்பிலே கையொப்பமிடுவதென்பது பொருத்தமற்றதென காணி உரிமையாளர்களுக்கு தெரிவிக்கப்பட்டது. அவ்வாறு கடிதத் தலைப்பில் கையொப்பமிட்டு தராத பட்சத்தில் காணிகளை அளவீடு செய்ய தம்மால் ஒத்துழைக்க முடியாது என அவர்கள் தெரிவித்ததை அடுத்து காணி அளவீட்டு பணியானது மேற்கொள்ளப்படவில்லை. இன்றைய தினம் காலை 8.00மணிக்கு குறித்த பகுதிக்கு வருகை தந்திருந்த உத்தியோகத்தர்கள் பி.ப 3.00மணிவரை அங்கு தரித்திருந்து குறித்த காணிகளை அளவீடு செய்யமுடியாததால் அங்கிருந்து திரும்பினர்.
 
 
1 2 3 4 5 6 7 8 9 10 11 12 13 15 16
நடப்பாண்டுக்கான யாழ்ப்பாண மாவட்ட அரச அதிபர் வெற்றிக் கிண்ண சுற்றுப் போட்டிகள் இன்றைய தினம் (25.04.2026) சனிக்கிழமை காலை 8.30 மணிக்கு உத்தியோகபூர்வமாக ஆரம்பித்து வைக்கப்பட்டது. இன்றைய ஆரம்ப போட்டி நிகழ்வில் யாழ். மாவட்ட அரசாங்க அதிபரும் நலன்புரிச் சங்கத்தின் போசகருமான திரு.மருதலிங்கம் பிரதீபன் அவர்கள் கலந்து கொண்டு குறித்த போட்டித் தொடரினை உத்தியோகபூர்வமாக ஆரம்பித்து வைத்தார். இங்கு அரசாங்க அதிபர் கருத்துத் தெரிவிக்கையில், இவ்வாண்டு க்கான அரசாங்க அதிபர் வெற்றிக் கிண்ணமானது இன்றைய தினம் வேலனை பிரதேச செயலாளர் பிரிவின் வேலனை மத்திய கல்லூரி மைதானத்தில் ஆண்களுக்கான துடுப்பாட்ட போட்டியுடன் ஆரம்பமாகி தொடர்ந்து, ஊர்காவற்துறை பிரதேச செயலர் பிரிவில் சென். அன்ரனீஸ் மைதானத்தில் பெண்களுக்கான துடுப்பாட்ட போட்டியுடன் ஆரம்பமாகி நடைபெற்று வருகிறது எனவும், இப் போட்டி ஏற்படுகளில் சிறப்பான பங்காளிப்பினை ஆற்றிவருகின்ற பிரதேச செயலாளர்களுக்கு எனது மனமார்ந்த நன்றிகளைத் தெரிவித்துக் கொள்வதாகவும் தெரிவித்தார். மேலும், உண்மையில் உத்தியோகத்தர்களுக்கு இடையிலான பரஸ்பர நட்பினை வளர்த்தல், உடலியல் உளவியல் ரீதியான மாற்றத்தினை ஏற்படுத்துகின்ற வகையில் இப் போட்டித்தொடர் ஆரம்பமாகி சிறப்பாக இடம்பெற்று வருகின்றதை அவதானிக்க முடிகிறது எனவும், தொடர்ந்து ஏனைய போட்டித் தொடர்களும் பிரதேச செயலர் ரீதியாக இடம்பெறுவதற்கான அனைத்து ஏற்பாடுகளும் பூர்த்தி செய்யப்பட்டுள்ளன எனவும், உத்தியோகத்தர்கள் அனைவரும் ஆர்வத்துடன் இப்போட்டி தொடர்களில் பங்குபற்றிக் கொண்டிருக்கின்றனர் எனவும், அந்தவகையில் இப் போட்டித் தொடரில் கலந்து கொண்டிருக்கின்ற அனைவருக்கும் எனது வாழ்த்துக்களைத் தெரிவித்துக் கொள்வதுடன் இதனை ஆரம்பித்து வைப்பதில் மிகுந்த மகிழ்ச்சியடைவதாகவும் தெரிவித்தார்.
நடப்பாண்டுக்கான அரச அதிபர் வெற்றிக் கிண்ண தொடரானது ஆண் மற்றும் பெண்களுக்கான துடுப்பாட்ட போட்டியுடன் ஆரம்பமாகி நடைபெற்று வருகிறது. யாழ்ப்பான மாவட்ட செயலக ஊழியர் நலன்புரி சங்கத்தின் ஏற்பாட்டில் நடைபெறுகின்ற இவ் அரச அதிபர் வெற்றிக்கிண்ண சுற்றுப் போட்டியில் மாவட்ட செயலகம் மற்றும் பிரதேச செயலக அணிகள் கலந்து கொள்கின்றன. இப் போட்டித்தொடரின் ஊடாக உத்தியோகத்தர்களிடையே பரஸ்பர தொடர்புகளை உருவாக்குதல், அவர்களின் திறமைகளை இனங்காணல், உடல் உள ஆரோக்கியத்தை மேம்படுத்தல் போன்ற பல்வேறு நோக்கங்கள் எதிர்பார்க்கப்படுகிறன. இம் முறை சனி மற்றும் ஞாயிற்றுக்கிழமைகளில் ஒவ்வொரு போட்டித்தொடர்களும் பிரதேச செயலகங்களிற்கு உட்பட்ட வகையில் இடம்பெறுவதற்கான ஏற்பாடுகள் இடம்பெற்றுள்ளமை குறிப்பிடத்தக்கது. இந் நிகழ்வில் மேலதிக அரசாங்க அதிபர் திரு கே. சிவகரன், நலன்புரி கழகத்தின் தலைவரும், புள்ளிவிபர பிரதிப் பணிப்பாளருமான திரு. ம. வித்தியானந்தநேசன் பிரதேச செயலாளர்கள், உதவி மாவட்ட செயலாளர் உள்ளிட்ட மாவட்டச் செயலக மற்றும் பிரதேச செயலகங்களின் பதவிநிலை உத்தியோகத்தர்கள், விளையாட்டு பிரிவு உத்தியோகத்தர்கள், ஏற்பாட்டு குழு உறுப்பினர்கள் உத்தியோகத்தர்கள், போட்டியாளர்கள் என பல்வேறு தரப்பினரும் கலந்து கொண்டிருந்தனர்.
 
 
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26
தொழில்நுட்ப உத்தியோகத்தர்கள் மற்றும் தொழில்நுட்ப உதவியாளர்களுடனான கலந்துரையாடல் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (27.04.2026) காலை 9.00 மணிக்கு அரசாங்க அதிபர் அலுவலகத்தில் நடைபெற்றது. இக் கலந்துரையாடலில் கருத்து தெரிவித்த அரசாங்க அதிபர் அவர்கள், தொழில்நுட்ப ரீதியாக செயற்பாடுகளை மாவட்டச் செயலகம் மற்றும் பிரதேச செயலக ரீதியாக ஒழுங்குபடுத்த வேண்டிய தேவை காணப்படுவதாகவும், அதனை ஒழுங்குபடுத்தும் நோக்கில் இக் கலந்துரையாடல் ஒழுங்குபடுத்தப்பட்டுள்ளதாகவும் தெரிவித்து,
தொழில்நுட்ப உத்தியோகத்தர்கள் மற்றும் தொழில்நுட்ப உதவியாளர்களுக்கான பொறுப்புக்கள், உத்தியோகத்தர்களின் பதவியுயர்வு விடயங்கள், மற்றும் எதிர்நோக்கும் சவால்கள் தொடர்பாகவும் ஆராய்ந்தார். மேலும், மாவட்டச் செயலக ரீதியாக மேற்கொள்ள வேண்டிய தொழில்நுட்ப திருத்தங்கள் தொடர்பாகவும் கலந்துரையாடப்பட்டன. இக் கலந்துரையாடலில் மேலதிக அரசாங்க அதிபர் திரு. க.சிவகரன் பிரதம கணக்காளர் திரு. எஸ். கிருபாகரன், பிரதம பொறியியலாளர் திரு. கே.திருக்குமார் மாவட்ட உதவி அரசாங்க அதிபர் செல்வி உ.தர்ஷினி, கணக்காளர் திரு. எஸ்.சுபாசன் மற்றும் தொழில்நுட்ப உத்தியோகத்தர்கள், தொழில்நுட்ப உதவியாளர்கள், மாவட்டச் கிளைத் தலைவர்கள் உத்தியோகத்தர்கள் கலந்து கொண்டனர்.
 
 
1 2 3 4 5 6 7 8 9
யாழ்ப்பாண மாவட்டத்திற்கான அபிவிருத்தி தொடர்பான கலந்துரையாடல் தொழில் அமைச்சரும், நிதி, திட்டமிடல் பிரதி அமைச்சருமான கௌரவ போராசிரியர் (கலாநிதி) அனில் ஜெயந்த பெர்னாண்டோ அவர்களின் தலைமையில் இன்றைய தினம் (24.04.2026). மாலை 06.00 மணிக்கு மாவட்டச் செயலக கேட்போர் கூடத்தில் நடைபெற்றது. இக் கூட்டத்திற்கு வருகை தந்த கெளரவ அமைச்சர், கெளரவ பாராளுமன்ற உறுப்பினர்கள், நிதி அமைச்சின் அதிகாரிகள் திணைக்களத் தலைவர்கள் உள்ளிட்டவர்களை வரவேற்ற அரசாங்க அதிபர் திரு. மருதலிங்கம் பிரதீபன் அவர்கள், மாவட்டத்தின் புள்ளிவிபரங்கள் மற்றும் தேவைப்பாடுகளை முன்வைப்பின் (Presentation) ஊடாக முன்வைத்தார்.
மேலும், இக் கூட்டத்தில் கலந்து கொண்ட யாழ்ப்பாண மாவட்ட ஒருங்கிணைப்புக் குழுவின் இணைப்பாளரும் யாழ் மாநகர சபையின் உறுப்பினருமான கெளரவ எஸ். கபிலன் அவர்களால் யாழ்ப்பாணம் மாவட்டத்தில் 2027 - 2028 ஆண்டுக்களில் மேற்கொள்ள உத்தேசிக்கப்பட்ட பாரிய அபிவிருத்தி திட்டங்களின் முன்மொழிவுகள் முன்வைப்பின் ஊடாக முன்வைக்கப்பட்டது. இக் கூட்டத்தில் யாழ்ப்பாணத்திற்கான அபிவிருத்தி தொடர்பாக பல்வேறு விடயங்கள் கெளரவ அமைச்சரால் ஆராயப்பட்டது. இதன் போது முதலீடு மேற்கொள்வதற்கு - முதலீட்டுச் சபை மற்றும் ஏனைய திணைக்களங்களால் அனுமதிக்காக அனுப்பிவைக்கப்பட்ட விண்ணப்பங்களுக்கான அனுமதியினை விரைவாக வழங்க நடவடிக்கை எடுப்பதாகவும், 2027 மற்றும் 2028 ற்காக பாரிய திட்டங்களின் சாத்தியப்பாடான திட்டங்களை எதிர்வரும் ஆண்டுகளின் வரவு செலவுத் திட்டத்தில் உள்ளடக்க நடவடிக்கை எடுப்பதாகவும் கெளரவ அமைச்சரால் தெரிவிக்கப்பட்டது. மேலும், மின்மாற்றிக்கான இயலளவு போதுமானதாக இல்லாத காரணத்தினால் சூரிய கலன் பொருத்துவதற்கான அனுமதியினை வழங்க முடியாதிருப்பதாகவும், அதற்கு இரண்டு ஆண்டுகள் எடுக்கும் எனவும், எனினும் மாற்று ஒழங்குகளுக்கான நடவடிக்கை எடுத்துவருவதாகவும் அமைச்சரால் மேலும் தெரிவிக்கப்பட்டது. மேலும், யாழ்ப்பாணத்தில் ஒப்புரவான அபிவிருத்திக்கு (Balanced Development) ஏற்றவகையில் நிதி ஒதுக்கீடு செய்யப்படும் என கெளரவ அமைச்சரால் தெரிவிக்கப்பட்டதுடன், மாகாண மாவட்ட திட்ட முன்மொழிவுகளை ஒருங்கிணைந்த வகையில் அனுப்பி வைக்குமாறும் கேட்டுக் கொண்டார்.
இக் கூட்டத்தில் பாராளுமன்ற உறுப்பினர்களான கெளரவ சண்முகநாதன் சிறிபவானந்தராஜா, கெளரவ கருணநாதன் இளங்குமரன், கௌரவ ஜெயச்சந்திரமூர்த்தி ரஜீவன், திறைசேரியின் பணிப்பாளர் நாயகம், தேசிய திட்டமிடல் பணிப்பாளர் நாயகம், தேசிய அபிவிருத்தி பணிப்பாளர் நாயகம், மேலதிக பணிப்பாளர் நாயகம், மாகாண அமைச்சின் செயலாளர்கள், பிரதிப் பிரதம செயலாளர் (நிதி), மேலதிக அரசாங்க அதிபர், பிரதம கணக்காளர், பிராந்திய சுகாதார சேவைகள் பணிப்பாளர், திணைக்களங்களின் தலைவர்கள், நிதி அமைச்சின் அதிகாரிகள், பிரதேச செயலாளர்கள் உள்ளிட்டவர்கள் கலந்து கொண்டனர்.
 
 
1 2 3 4 5 6 7 9 9 10 11 12