ஜனாதிபதி சாரணர் விருது வழங்கும் நிகழ்வு மாவட்ட சாரண ஆணையாளர் அவர்களின் தலைமையில் 23.02.2022 அன்றைய தினம் பிற்பகல் 2.30 மணிக்கு மாவட்டச் செயலக கேட்போர் கூடத்தில் நடைபெற்றது.
இந் நிகழ்வில் பிரதம விருந்தினராக யாழ்.மாவட்ட மேலதிக அரசாங்க அதிபர் மருதலிங்கம் பிரதீபன் அவர்கள் கலந்துகொண்டதுடன், கொழும்புத் தலைமைக் காரியாலய சாரண ஆணையாளர்கள் திரு.அப்துல் முகஜித், திரு. அசோக்குமார் மற்றும் மாவட்ட சாரணர் ஆணையாளர்கள் மற்றும் உதவி மாவட்ட சாரணர் ஆணையாளர்கள், அதிபர்கள், பெற்றோர்கள், மாவட்டச் செயலக உத்தியோகத்தர்கள், விருதுபெறும் சாரண மாணவர்கள் ஆகியோரும் கலந்து கொண்டிருந்தனர்.
மேலும், ஜனாதிபதி சாரணர் விருது வழங்கும் நிகழ்வை அதிமேதகு ஜனாதிபதி கோட்டாபய ராஜபக்ச அவர்கள் ஜனாதிபதி செயலகத்திலிருந்து இணையவழி நிகழ்நிலையில் நேரலை ஊடாக சம்பிரதாய பூர்வமாக ஆரம்பித்துவைத்தார்.
World Vision நிறுனத்தினால் சங்கானை மற்றும் சாவகச்சேரி பிரதேச செயலாளர் பிரிவுகளில் நடைமுறைப்படுத்தப்படவுள்ள "சமூக ஒருங்கிணைப்பை மீளமைத்தல் செயற்திட்டம்" தொடர்பான கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் நேற்றையதினம் (22) மாவட்டச் செயலகத்தில் நடைபெற்றது.
இச் செயற்திட்டத்தில் பதினெட்டு சிறுவர் கழகங்கள் தெரிவு செய்யப்பட்டு சிறுவர்களை இனங்காணல், சிறுவர்களின் திறமைகளை வலுப்படுத்தல், தொழிற் பயிற்சிகளை வழங்குதல், சமூக மட்ட பிரச்சினைகளை இனங்கண்டு அவற்றிற்கு பொருத்தமான தீர்வுகளை உருவாக்க வழிகாட்டுதல் ஆகியன மேற்கொள்ளப்படவுள்ளது.
2022 ஆம் ஆண்டுக்கான வாக்காளர் தின மாவட்ட நிகழ்வுகள் மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் 2022.02.22 அன்று தென்மராட்சி கலாசார மண்டபத்தில் நடைபெற்றது.
இந் நிகழ்வில், விழிப்புணர்வு துவிச்சக்கரவண்டி பேரணியும், அதன் பின்னர் தேர்தல் விழிப்புணர்வு மற்றும் வாக்குரிமை அளித்தல், வாக்காளராக பதிவு செய்வது தொடர்பாக விழிப்புணர்வு நாடகம், கவிதை ஆகியனவும் இடம்பெற்றது. அத்தோடு வினாடி வினாப் போட்டியில் வெற்றி பெற்றவர்களுக்கான பரிசில்கள் வழங்கப்பட்டு மாவட்ட அரசாங்க அதிபர் க.மகேசன் அவர்களால் வழங்கி கௌரவிக்கப்பட்டார்கள்.
புத்தசாசன, சமய அலுவல்கள் மற்றும் கலாசார அலுவல்கள் அமைச்சின் நிதி அனுசரணையில் சண்டிலிப்பாய், மருதங்கேணி பிரதேசங்களில் நிர்மாணிக்கப்பட்ட "கலாசார மத்திய நிலையங்களின் திறப்புவிழா" தொடர்பான முன்னாயத்தக் கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் 21.02.2022 அன்று யாழ்.மாவட்டச் செயலகத்தில் நடைபெற்றது.
இக் கலந்துரையாடலில் புத்தசாசன, சமய மற்றும் கலாசார அலுவல்கள் அமைச்சின் மேலதிக செயலாளர் திலக் ஹெட்டியாராச்சி, புத்தசாசன, சமய மற்றும் கலாசார அலுவல்கள் அமைச்சின் மேம்பாட்டுப் பிரிவின் பணிப்பாளர் பிரசாத், மேலதிக அரசாங்க அதிபர் ( காணி) எஸ்.முரளிதரன் மற்றும் சண்டிலிப்பாய் பிரதேச செயலாளர், மருதங்கேணி உதவிப் பிரதேச செயலாளர், மாவட்ட கலாசார உத்தியோகத்தர், கலாசார மத்திய நிலைய உத்தியோகத்தர்கள், கலாசார அபிவிருத்தி உத்தியோகத்தர்கள் கலந்துகொண்டிருந்தார்கள்.
வட மாகாண முன்பள்ளி ஆசிரியர் சங்கத்தினரால் 2022.02.21 அன்று யாழ்.மாவட்ட அரசாங்க அதிபர் கணபதிப்பிள்ளை மகேசன் அவர்களிடம் தமது நிரந்தர நியமனம் உள்ளிட்ட பல கோரிக்கைகளை கொண்ட மகஜர் ஒன்றினை கையளித்துள்ளார்கள். இதில் மேலதிக அரசாங்க அதிபர்(காணி), மாவட்டச் செயலக உள்ளகக் கணக்காய்வாளர் மற்றும் பொலிஸ் திணைக்கள பொறுப்பதிகாரி, வட மாகாண முன்பள்ளி ஆசிரியர் சங்கத்தின் பிரதிநிதிகள் ஆகியோரும் கலந்து கொண்டிருந்தனர்.







