பாதுகாப்பான தொழிலாளர் ஆட்சேர்ப்பு மற்றும் இலங்கை வெளிநாட்டு வேலைவாய்ப்பு பணியகத்தின் சேவைகள் தொடர்பாக வடக்கு மற்றும் கிழக்கு மாகாணங்களில் வசிக்கும் வெளிநாட்டு வேலைவாய்ப்பை தேடுபவர்களுக்கான தெளிவூட்டல் நிகழ்ச்சித் திட்டம் யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களின் தலைமையில் 2024.07.08 அன்று யாழ் மாவட்ட செயலக கேட்போர் கூடத்தில் நடைபெற்றது.
இதன்போது கருத்து தெரிவித்த யாழ்ப்பாண மாவட்ட பதில் அரசாங்க அதிபர் அவர்கள் யாழ்ப்பாண மாவட்டத்தில் புலம் பெயர் மக்களின் அனுசரணையில் உதவித்திட்டங்கள் மற்றும் வாழ்வாதார உதவிகள் முன்னெடுக்கப்பட்டுள்ளதாக குறிப்பிட்டார்.
மேலும் வெளிநாட்டு பயணம் தற்போது இறுக்கமான சட்ட விதிமுறைகளுக்கு உட்பட்டதாகவும் இலத்திரனியல் மயப்படுத்தப்பட்டதாகவும் மாறியுள்ளமையால் அரச சட்ட விதிமுறைகளுக்கு அமைவாக வெளிநாட்டு பயணம் மேற்கொள்வதை உறுதிப்படுத்திக்கொள்ள வேண்டும் எனவும் , இது தொடர்பான தகவல்களைப் பெறுவதற்கு இலங்கை வேலைவாய்ப்பு பணியகம், பதிவு செய்யப்பட்ட முகவர் நிறுவனங்கள் மற்றும் பிரதேச செயலக பிரிவுகளில் தொழில் மற்றும் இலங்கை வேலைவாய்ப்பு அமைச்சின் உத்தியோகத்தர்கள் நியமிக்கப்பட்டுள்ளதாகவும் தெரிவித்தார்.
இந் நிகழ்வில் தொழில் மற்றும் இலங்கை வேலைவாய்ப்பு அமைச்சின் சிரேஷ்ட உதவிச் செயலாளர் வளவாளராக கலந்துகொண்டு தெளிவூட்டல்களை வழங்கியதுடன் உதவி மாவட்ட செயலாளர், மாவட்ட செயலக வெளிநாட்டு வேலைவாய்ப்பு திணைக்களத்தின் அபிவிருத்தி உத்தியோகத்தர் மற்றும் யாழ்ப்பாண மாவட்ட பிரதேச செயலக பிரிவுகளுக்குட்பட்ட இளைஞர் யுவதிகள் கலந்து கொண்டிருந்தனர்.

சங்கானை பிரதேச செயலாளர் பிரிவிற்குட்பட்ட பிறப்பு இறப்பு விவாகப் பதிவாளர் நியமனம் மற்றும் கரவெட்டி பிரதேச செயலாளர் பிரிவிற்குட்பட்ட கரவெட்டி பிரிவுக்கான மேலதிக விவாகப்பதிவாளர் ஆகிய நியமனங்கள் 2024.07.08 அன்று யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களினால் வழங்கி வைக்கப்பட்டது.
இதில் பிரதிப்பதிவாளர் நாயகம், உதவிப் பதிவாளர் நாயகம்,காணி மாவட்ட பதிவாளர் மற்றும் உதவி மாவட்ட செயலாளர் ஆகியோர் கலந்துகொண்டிருந்தனர்.

அமைச்சரவை அனுமதியுடன் யாழ்ப்பாண மாவட்டத்தின் முழுநேர பதில் அரசாங்க அதிபராக நியமிக்கப்பட்ட திரு.மருதலிங்கம் பிரதீபன் அவர்கள் உத்தியோக பூர்வமாக இன்றைய தினம் (2024.07.04) தனது கடமைகளை பொறுப்பேற்றுக் கொண்டார்.
பதில் அரசாங்க அதிபருக்கான வரவேற்பு நிகழ்வு மேலதிக அரசாங்க அதிபர் (காணி) அவர்களுடைய தலைமையில் மாவட்டச் செயலக பதவிநிலை உத்தியோகத்தர்கள், பிரதேச செயலாளர்கள் மற்றும் மாவட்டச் செயலக உத்தியோகத்தர்களால் இன்றைய தினம் காலை மாவட்ட செயலகத்தில் நடாத்தப்பட்டது.

உலக உணவுத் திட்டத்தின் இலங்கைக்கான பணிப்பாளர் வதிவிட பிரதிநிதி திரு.அப்துள் ரகீம் சித்திக் அவர்கள் உத்தியோகபூர்வ விஜயமாக யாழ்ப்பாண மாவட்டத்திற்கு விஜயம் செய்துள்ளார். இந்த விஜயத்தின் போது யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களை இன்றைய தினம் (04.07.2024) யாழ் மாவட்ட அரசாங்க அதிபர் அலுவலகத்தில் சந்தித்து கலந்துரையாடினார்.
அதனைத் தொடர்ந்து உலக உணவுத் திட்டத்தின் "Food for Assets" செயற்றிட்டத்தின் விடயங்கள் தொடர்பான கலந்துரையாடல் இடம்பெற்றது.
இக் கலந்துரையாடலில் யாழ்ப்பாண மாவட்டத்தில் தெரிவு செய்யப்பட்ட 7 பிரதேச செயலாளர் பிரிவுகளில்(நெடுந்தீவு, வேலணை, ஊர்காவற்றுறை, காரைநகர், உடுவில், சங்கானை, சண்டிலிப்பாய்) " Food for Assets" செயற்றிட்டத்தினூடாக நடைமுறைப்படுத்தப்படும் திட்டங்களை செயற்படுத்தல் குறிப்பாக குளங்கள் கால்வாய்களை புனரமைத்தல் தொடர்பாகவும் செயற்றிட்டத்தின் முன்னேற்றங்கள் மற்றும் எதிர்காலத்தில் மேற்கொள்ளப்படவேண்டிய செயற்பாடுகள் தொடர்பாகவும் கலந்துரையாடப்பட்டது.
மேற்படி கலந்துரையாடலில் உலக உணவு திட்ட அரசாங்க பங்குடமை அதிகாரி திரு.முஸ்தபா நிஹ்மத், உலக உணவுத்திட்ட பொறியியலாளர் திரு.று.யு.சந்திரதிலக்க வீரசிங்க , மாவட்ட திட்டமிடல் பணிப்பாளர் திரு.இ.சுரேந்திரநாதன் மற்றும் மாவட்ட செயலக உத்தியோகத்தர்கள் உள்ளிட்டோர் கலந்துகொண்டனர்.

விளையாட்டுத்துறை அமைச்சு மற்றும் விளையாட்டு அபிவிருத்தி திணைக்களம் என்பன இணைந்து நடாத்திய 48 வது தேசிய விளையாட்டுப் போட்டி ஜூன் மாதம் 27 ஆம் திகதி தொடக்கம் 30 ஆம் திகதி வரை யாழ்ப்பாண மாவட்டத்தில் நடைபெற்றது. இத்தேசிய உதைபந்தாட்ட விளையாட்டு விழாவின் இறுதி நாள் நிகழ்வு துரையப்பா விளையாட்டு அரங்கில் 30.06.2024 அன்று நடைபெற்றது.
இந் நிகழ்வின் பிரதம விருந்தினராக தற்போதைய விளையாட்டுத்துறை அமைச்சின் செயலாளரும் யாழ்ப்பாண மாவட்ட முன்னாள் அரசாங்க அதிபருமான திரு.க.மகேசன் அவர்கள் கலந்து சிறப்பித்தார்.
இவ் 48 ஆவது தேசிய விளையாட்டு விழாவில் மாகாணங்களுக்கு இடையில் நடைபெற்ற உதைபந்தாட்ட தொடரின் இறுதிப் போட்டியில் வடக்கு மாகாண அணியை எதிர்த்து மத்திய மாகாண அணி மோதிக்கொண்டது. இப்போட்டியில் வடக்கு மாகாண அணி வெற்றியை பெற்றுக்கொண்டது.
மேலும் இந்நிகழ்வில் விளையாட்டு அபிவிருத்தி திணைக்கள பணிப்பாளர் நாயகம், வடக்கு மாகாண பிரதம செயலாளர், யாழ் மாவட்ட பதில் அரசாங்க அதிபர், மன்னார் மாவட்ட அரசாங்க அதிபர், வட மாகாண கல்வி, பண்பாட்டலுவல்கள்; விளையாட்டுத்துறை மற்றும் இளைஞர் விவகார அமைச்சின் செயலாளர், வட மாகாண விளையாட்டுத்துறை பணிப்பாளர், விளையாட்டுத்துறை அமைச்சு மற்றும் விளையாட்டு அபிவிருத்தி திணைக்கள அதிகாரிகள், விளையாட்டு பிரிவு உத்தியோகத்தர்கள், பயிற்றுவிப்பாளர்கள் மற்றும் பெருமளவான பார்வையாளர்கள் உள்ளிட்ட பலர் கலந்து கொண்டனர்.









