யாழ்ப்பாண மாவட்டச் செயலகமும் இலங்கை செவிப்புலன் வலுவற்றோர் சம்மேளனமும் இணைந்து நடாத்தும் சைகைமொழி பயிற்சி நெறியானது மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் இன்றையதினம்(14) காலை ஒன்பது மணிதொடக்கம் மாலை நான்கு மணிவரை மாவட்டச்செயலக கேட்போர்கூடத்தில் நடைபெற்றது.
இப் பயிற்சிநெறியின் ஆரம்ப நிகழ்வில் கலந்துகொண்டு மாவட்ட அரசாங்க அதிபர் கருத்துத் தெரிவிக்கும் "சமூகத்தில் செவிப்புலனற்றோர் அதிகளவில் காணப்படுவதோடு, இவர்களின் தொடர்பாடல், கல்வி, தொழில் செயற்பாடுகள் அனைத்தும் சைகைமொழி ஊடாக நிகழ்கின்றது. இச் சைகைமொழியானது சமூகம் மற்றும் நாடுகளுக்கிடையில் வேறுபடுகிறது. இந்தியாவில் 14 சைகைமொழிகள் காணப்படுகிறது.
எமது நாட்டில் தமிழ், சிங்கள, ஆங்கில சைகைமொழிகள் காணப்படுகிறது. இச் சைகைமொழியின் வேறுபாடுகளால் செவிப்புலனற்றோர் பல்வேறு பாதிப்பிற்குட்படுகிறார்கள். எனவே இச் சைகைமொழியில் காணப்படுகின்ற குறைபாடுகளை இனங்கண்டு நிவர்த்தி செய்வதன் மூலம் அவர்களுடைய நாளாந்த வாழ்வு, கல்வி, தொழில் மற்றும் ஏனைய விடயங்களில் நிலவும் குறைபாடுகளையும் இழிவளவாக்கமுடியும்" எனவும் தெரிவித்துள்ளார்.

யாழ் மாவட்ட மனிதவலு வேலைவாய்ப்புத் திணைக்களமும் மாவட்ட செயலகமும் இணைந்து நடாத்திய காலாண்டுக்கான தொழிற்சந்தை நிகழ்வு யாழ் மாவட்ட மேலதிக அரசாங்க அதிபர் மருதலிங்கம் பிரதீபன்அவர்களின் தலைமையில் இன்று (10.03.2022) காலை யாழ் மாவட்ட செயலக கேட்போர் கூடத்தில் இடம்பெற்றது.
இச்தொழிற்சந்தை நிகழ்வில் 12 தொழில் தருநர்கள் தங்களிடமிருந்த 175 வேலைவாய்ப்புக்களுடன் பங்குபற்றியிருந்ததோடு தொழிலொன்றை பெற்றுக்கொள்ளும் நோக்குடன் 212 தொழில் தேடுவோரும் பங்குபற்றியிருந்தனர்.
இந நிகழ்வில் பிரதம அதிதியாக கலந்துகொண்டு கருத்து தெரிவித்த யாழ் மாவட்ட அரசாங்க அதிபர் கணபதிப்பிள்ளை மகேசன் அவர்கள்,யாழ்ப்பாண மாவட்டத்தில் தொழில் அற்றவர்களுடைய வீதம் சராசரியாக ஏனைய மாவட்டங்களோடு ஒப்பிடும்போது சற்று அதிகமாக காணப்படுகின்றது.

மத்தியஸ்த திறமைகள் மற்றும் உபாய மார்க்கங்களுக்கான பயிற்சி ஆரம்ப நிகழ்வு இன்றைய தினம்(09.03.2022) மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் மாவட்ட செயலக கேட்போர் கூடத்தில் காலை 9மணிக்கு இடம்பெற்றது.
குறித்த பயிற்சி நெறியில் மத்தியஸ்த சபையில் எதிர் நோக்கும் சவால்கள் தொடர்பாக கேட்டறிந்து கொண்ட மாவட்ட அரசாங்க அதிபர் அவர்கள் கருத்து தெரிவிக்கையில் பிணக்குகளை தவிர்க்க அல்லது குறைக்கும் நோக்கில் இப்பாரிய பொறுப்பை மேற்கொண்டுவரும் மத்தியஸ்த சபை உறுப்பினர்கள் இருதரப்பு நியாயங்களையும் சீர்தூக்கி நடுநிலை வகித்து கடமையாற்றுவதற்காக இப்பயிற்சி ஏற்பாடு செய்யப்பட்டுள்ளதுடன் எல்லோரும் இணைந்த வகையில் சமூகத்திற்கு சேவையாற்ற வேண்டுமென தெரிவித்தார்.
மேலும் மத்தியஸ்த சபை உறுப்பினர்களின் கோரிக்கைக்கு அமைய காணி மத்தியஸ்த சபைக்குரிய பொதுவான இடம் ஒன்றை ஏற்பாடு செய்வதற்கான நடவடிக்கைகள் மேற்கொள்ளப்பட்டு வருவதாகவும் தெரிவித்தார்.

மாவட்ட மட்டத்தில் நடைபெற்று முடிந்த கிராம அலுவலர் சேவை ஊடாக நிறைவேற்ற எதிர்பார்க்கும் மக்கள் சேவைகளை சிறந்த முறையில் முறையில் ஆற்றுவதற்கும் மற்றும் கிராம அலுவலகங்களின் தரத்தினை மேம்படுத்துவதனையும் இலக்காகக் கொண்டு மேற்கொள்ளப்பட்ட மாவட்ட மட்ட உத்தியோகத்தர் அலுவலக முகாமைத்துவ போட்டியில் பங்குபற்றி வெற்றி பெற்ற உத்தியோகத்தர்களுக்கான மாவட்ட மட்ட விருது வழங்கும் நிகழ்வு மாவட்ட மேலதிக அரசாங்க அதிபர் மருதலிங்கம் பிரதீபன் அவர்களின் தலைமையில் இன்று (09.03.2022 )பிற்பகல் 2.30 மணிக்கு மாவட்ட செயலக கேட்போா் கூடத்தில் நடைபெற்றது.
இந் நிகழ்வில் பிரதம விருந்தினராக கலந்துகொண்டு கருத்து தெரிவித்த மாவட்ட அரசாங்க அதிபர் கணபதிப்பிள்ளை மகேசன் அவர்கள் பொது மக்களின் பணத்தில் சம்பளம் பெறும் நாம் பொதுமக்களுக்காக சரியான முறையில் செயற்பட்டு, மக்களுடைய தேவைகளை பூர்த்தி செய்ய அவர்களுக்கு வழங்குகின்ற சேவைகளை உரிய வகையில் வழங்கி மக்களை திருப்திப்படுத்தி செயற்படுவதுடன் இலக்கினை தவறாது பொதுமக்களுடன் இசைந்து கடமையாற்ற வேண்டும் எனத் தெரிவித்தார்.மேலும்,அலுவலகங்களை சரியான முறையில் பேணுவதுடன் பொதுமக்கள் மற்றும் சக உத்தியோகத்தர்களுடனும் இடையேயான உறவு முறையை சரியாக பேணி திறமைகளை நாளாந்தம் வளப்படுத்தி கொள்ள வேண்டும் என தெரிவித்தார்.

யாழ்ப்பாணம், கிளிநொச்சி மாவட்டங்களில் வனஜீவராசிகள் மற்றும் வனப்பாதுகாப்பு திணைக்களங்களின் கட்டுப்பாட்டிலுள்ள காணிகளில் மக்களின் வாழ்வாதார தேவைக்குரிய காணிகளை விடுவிப்பது தொடர்பான விசேட கலந்துரையாடல் யாழ். மாவட்ட செயலக கேட்போர் கூடத்தில் இடம்பெற்றது.
மணற்காடு சவுக்கு மரக்காட்டினை மக்கள் பயன்பாட்டுக்குரிய மக்கள் மயப்படுத்தப்பட்ட சவுக்கு மரக்காடாக மாற்றுவதற்குரிய நடவடிக்கைகள் எடுக்கப்படுமென தெரிவிக்கப்பட்டதுடன், மக்களினால் அமைக்கப்பட்ட குறித்த மணற்காடு சவுக்கு மரக்காட்டினை மக்கள் மயப்படுத்தப்பட்ட வனவள கிராமமாக பிரகடனம் செய்வதன் மூலம், சவுக்கு மரக்காட்டினை மக்கள் பராமரிக்கமுடிவதுடன் மக்கள் தமது வாழ்வாதார செயற்பாடுகளையும் மேற்கொள்ள கூடியதாக அமையும் என தெரிவிக்கப்பட்டது. மேலும்,மணல் அகழ்வு இடம்பெறாத வகையில் மக்கள் இக்காட்டினை பராமரிக்க வேண்டியதும் பாதுகாக்க வேண்டியதும் அவசியம் என தெரிவிக்கப்பட்டமை குறிப்பிடத்தக்கது.