"முறையான விழிப்புணர்வுடன் விழிப்பாக இருப்பதன் மூலம் அனர்த்த அபாயத்தை குறைத்துக் கொள்வோம்" எனும் தொனிப்பொருளில் யாழ். மாவட்ட செயலகத்தில் அரசாங்க அதிபர் நா. வேதநாயகன் தலைமையில் "தேசிய பாதுகாப்பு தினம்" இன்று (2019.12.26) காலை 9.15 க்கு மாவட்ட செயலக கேட்போர்கூடத்தில் அனுஷ்டிக்கப்பட்டது.

தேசிய பாதுகாப்பு தினத்தை முன்னிட்டு சுனாமியால் 2004.12.26 ஆம் திகதி உயிரிழந்த மக்களிற்காக பிரார்த்தனை செய்யப்பட்டது. இப் பிரார்த்தனையில் மதகுருமார்கள், அரசாங்க அதிபர், மேலதிக அரசாங்க அதிபர், மேலதிக அரசாங்க அதிபர்( காணி),பதவிநிலை உத்தியோகத்தர்கள் மற்றும் உத்தியோகத்தர்கள் கலந்து கொண்டார்கள்.

மனிதவலு வேலைவாய்ப்புத் திணைக்களத்தினால் நடாத்தப்படுகின்ற லக் ரெக்கிய ஹரசர தேசிய நிகழ்ச்சித் திட்டத்தின் கீழ் திணைக்களத்தின் பிரதான இலக்கான மனிதவளத்தினை வினைத்திறன் வாய்ந்ததாக முதலிடும் வகையில் செயலாற்றிய 25 மாவட்டங்களிற்குமான தொழில் நிலையங்களிற்கான தரப்படுத்தலில் யாழ்ப்பாண மாவட்ட தொழில் நிலையம் முதலாம் இடத்தினைப் பெற்று தங்கவிருதினை வென்றுள்ளது.

தேசிய ரீதியில், மாவட்ட ரீதியாக கடமையாற்றும் அனைத்து மனிதவள அபிவிருத்தி உத்தியோகத்தர்களினதும் கடமைகளின் அளவு, பொறுப்புக்கள், ஆளிடைத்தொடர்புகள், தலைமைத்துவம் உட்பட தொழில்களின் செயலாற்றல்கள் மற்றும் அவற்றின் பலன்களாகிய சேவைகளின் அளவுகள் போன்றவற்றின் மதிப்பீட்டின் அடிப்படையிலேயே இவ்விருதிற்கான மாவட்டங்கள் தெரிவு செய்யப்பட்டிருந்தன.

அந்தவகையில் 23.12.2019 ஆம் திகதி சுகுருபாய பத்தரமுல்லையில் நடைபெற்ற விருது வழங்கும் நிகழ்வில் திறன்கள் அபிவிருத்தி வேலைவாய்ப்பு மற்றும் தொழில் உறவுகள் அமைச்சர் கௌரவ டினேஸ் குணவர்தன அவர்களால் விருதுகள் வழங்கிக் கௌரவிக்கப்பட்டது. 

இந்நிகழ்வில் தங்க விருதினை யாழ்ப்பாண மாவட்டமும் வெள்ளி விருதினை குருணாகல் மாவட்டமும் வெண்கல விருதினை மட்டக்களப்பு மாவட்டமும் பெற்ற அதேவேளை சுயதொழில் முயற்சியாளர்களிற்கான விருதுகளும் அதிகளவான வேலைவாய்பினை வழங்கிய நிறுவனங்களிற்கான விருதுகளும் வழங்கி கௌரவிக்கப்பட்டன.