ஆட்கடத்தலுக்கு எதிரான தேசிய செயலணியின்(NAHTTF) ஏற்பாட்டில், மனிதக் கடத்தல் தொடர்பான விழிப்புணர்வை ஏற்படுத்தும் நோக்கில் கருத்தரங்கு இன்று (11.08.2026) செவ்வாய்க்கிழமை காலை 9.30 மணியளவில் யாழ்ப்பாணத்தில் உள்ள தனியார் விருந்தினர் விடுதியில் நடைபெற்றது. ஆட்கடத்தலுக்கு எதிரான தேசிய செயலணியின்(NAHTTF) பணிக்குழுவின் செயலாளரும், பாதுகாப்பு அமைச்சின் மேலதிக செயலாளருமான சட்டத்தரணி திருமதி பிரியங்கனி ஹேவரத்ன, யாழ்ப்பாண மாவட்ட அரசாங்க அதிபர் மருதலிங்கம் பிரதீபன் மற்றும் ஐக்கிய நாடுகளின் போதைப்பொருள் மற்றும் குற்றங்கள் தொடர்பான அலுவலகத்தின்(UNODC) தேசிய திட்ட ஒருங்கிணைப்பாளர் திருமதி அனோஜா முனசிங்க ஆகியோரின் பங்கேற்புடன் இக்கருத்தரங்கு நடைபெற்றது. யாழ்ப்பாண மாவட்டத்தில் ஆட்கடத்தலுக்கு எதிரான தேசிய செயலணியின் செயற்பாடுகளை வலுப்படுத்துவதுடன், மனிதக் கடத்தல் தொடர்பான விழிப்புணர்வை மாவட்ட மட்டத்தில் ஏற்படுத்தும் நோக்கில் இப்பயிற்சிப் பட்டறை ஏற்பாடு செய்யப்பட்டது.
இவ் விழிப்புணர்வின் ஆரம்ப நிகழ்வில் கருத்து தெரிவித்த அரசாங்க அதிபர் அவர்கள், மனித வியாபாரம் மற்றும் மனிதக் கடத்தலைத் தடுப்பதற்காக தேசிய ரீதியில் முன்னெடுக்கப்பட்டு வரும் நடவடிக்கைகளை மாவட்ட மற்றும் பிரதேச செயலக மட்டங்களுக்கும் கொண்டு சென்று, பொதுமக்களுக்கு விரிவான விழிப்புணர்வை ஏற்படுத்துவது அவசியம் என யாழ்ப்பாண மாவட்ட அரசாங்க அதிபர் தெரிவித்துள்ளார். மனிதக் கடத்தல் (Human Smuggling) மற்றும் மனித வியாபாரம் (Human Trafficking) ஆகிய இரண்டிற்கும் இடையிலான வேறுபாடுகளை பொதுமக்கள் மற்றும் அரச உத்தியோகத்தர்கள் தெளிவாகப் புரிந்துகொள்ள வேண்டியதன் அவசியத்தையும் தெரிவித்தார். ஒருவரை சட்டவிரோதமான முறையில் ஒரு நாட்டிலிருந்து மற்றொரு நாட்டிற்கு அழைத்துச் செல்வது மனிதக் கடத்தலாகக் கருதப்படலாம். அதேவேளை, ஒருவரை ஏமாற்றுதல், தவறான வாக்குறுதிகளை வழங்குதல் அல்லது பொருளாதாரத் தேவைகளைப் பயன்படுத்திக் கொண்டு அழைத்துச் சென்று சுரண்டுவது மனித வியாபாரத்தின் முக்கிய வடிவங்களில் ஒன்றாகும் எனத் தெரிவித்தார். பெண்களுக்கு வெளிநாட்டு வேலைவாய்ப்பைப் பெற்றுத் தருவதாகக் கூறி அழைத்துச் சென்று தவறாக பயன்படுத்துதல், உரிய ஊதியம் வழங்காமல் சுரண்டுதல், குறைந்த ஊதியத்தில் பணியாற்றச் செய்தல், சிறுவர்களை வேலைவாய்ப்பில் ஈடுபடுத்துதல் உள்ளிட்ட பல்வேறு செயற்பாடுகள் மனித வியாபாரத்தின் கீழ் இடம்பெறக்கூடியவையாகும் எனவும் அவர் தெரிவித்தார். யாழ்ப்பாண மாவட்டத்தில் வறுமைக் கோட்டிற்கு உட்பட்ட மக்கள் இவ்வாறான சுரண்டல்களுக்கு அதிகளவில் ஆளாகக்கூடிய நிலை காணப்படுவதாகவும், கல்வியறிவு பெற்றவர்களும் வெளிநாட்டு மோகத்தால் வேலைவாய்ப்பு தொடர்பான பல்வேறு மோசடிகளுக்கும் சுரண்டல்களுக்கும் உள்ளாகி முறைப்பாடுகளைப் பதிவு செய்துள்ளதாகவும் தெரிவித்தார். இதனால், வெளிநாட்டு வேலைவாய்ப்பை எதிர்பார்க்கும் மக்களுக்கு உரிய வழிகாட்டல்களையும் தேவையான விழிப்புணர்வையும் வழங்குவதில் பிரதேச செயலாளர்கள், உதவிப் பிரதேச செயலாளர்கள், நிர்வாக கிராம அலுவலர்கள் உள்ளிட்ட அரச உத்தியோகத்தர்களுக்கு முக்கிய பொறுப்பு உள்ளதாகவும் தெரிவித்தார்.
யாழ்ப்பாண மாவட்டத்தில் உள்ள 15 பிரதேச செயலகங்களின் ஊடாக பொதுமக்களுடன் நேரடியாகப் பணியாற்றும் உத்தியோகத்தர்களை பயன்படுத்தி, மனித வியாபாரம் தொடர்பான விழிப்புணர்வை சமூகத்தின் கீழ்மட்டம் வரை கொண்டு செல்ல வேண்டும் எனவும் அவர் வலியுறுத்தினார். குறிப்பாக, வெளிநாட்டு வேலைவாய்ப்பு உத்தியோகத்தர்கள், மனிதவள அபிவிருத்தி உத்தியோகத்தர்கள், திறன் அபிவிருத்தி உத்தியோகத்தர்கள் மற்றும் உளவளத்துணை ஆலோசனை உத்தியோகத்தர்கள் ஆகியோரின் ஊடாக ஆபத்துக்குள்ளாகக்கூடிய குடும்பங்கள் மற்றும் தனிநபர்களை அடையாளம் கண்டு, அவர்களுக்கு உரிய வழிகாட்டுதல்களையும் ஆதரவையும் வழங்க வேண்டும் எனவும் அரசாங்க அதிபர் தெரிவித்தார். வறுமைக் கோட்டிற்கு உட்பட்ட மக்களை முதலில் அடையாளம் கண்டு, அவர்களின் பொருளாதார மற்றும் சமூகத் தேவைகளுக்கு ஏற்ற திட்டங்களை பிரதேச செயலாளர் மட்டத்தில் முன்னெடுப்பதன் மூலம் மனித வியாபாரம் மற்றும் பல்வேறு சுரண்டல்களுக்கு அவர்கள் ஆளாகும் நிலையை குறைக்க முடியும் எனவும் தெரிவித்தார்.
இந் நிகழ்வில் கலந்துகொண்ட பாதுகாப்பு அமைச்சின் மேலதிக செயலாளர் திருமதி பிரியங்கினி மற்றும் திருமதி அனோஜா முனசிங்க ஆகியோருக்கு நன்றி தெரிவித்த அரசாங்க அதிபர், யாழ்ப்பாண மாவட்டத்தில் மனித வியாபாரத்தைத் தடுப்பதற்கான செயற்பாடுகளை மேலும் வலுப்படுத்த அனைவரினதும் முழுமையான ஒத்துழைப்பை எதிர்பார்ப்பதாகவும் அரசாங்க அதிபர் தெரிவித்தார். இதன்போது, மனிதக் கடத்தல் தொடர்பான அறிமுகம், சர்வதேச மற்றும் தேசிய சட்ட ஏற்பாடுகள், மனிதக் கடத்தலுக்கும் புலம்பெயர்வோர் கடத்தலுக்கும் இடையிலான வேறுபாடுகள், மனிதக் கடத்தலால் பாதிக்கப்பட்டவர்களை அடையாளம் காணும் முறைகள், முறைப்பாடு மற்றும் அறிக்கையிடல் பொறிமுறைகள், மனிதக் கடத்தல் குற்றங்கள் தொடர்பான சட்ட நடைமுறைகள், ஆட்கடத்தலுக்கு எதிரான தேசிய செயலணி(NAHTTF) பணிக்குழுவின் பொறுப்புகள் மற்றும் செயற்பாடுகள் ஆகியன தொடர்பில் விரிவாகக் கலந்துரையாடப்பட்டன. இப்பயிற்சிப் பட்டறையில் மேலதிக அரசாங்க அதிபர், மேலதிக அரசாங்க அதிபர்(காணி), பிரதேச செயலாளர்கள், உதவி மாவட்டச் செயலாளர், உதவி பிரதேச செயலாளர்கள் மற்றும் பிரதேச செயலகங்களின் நிர்வாக கிராம அலுவலர்கள் உள்ளிட்டோர் கலந்துகொண்டனர்.

வடக்கு மாகாணத்தின் ஏற்றுமதி மற்றும் சரக்குப் போக்குவரத்துத் துறையை வலுப்படுத்தும் நோக்கில்ஸ்மார்ட் மரைன் லங்கா (Smart Marine Lanka) நிறுவனத்தின் யாழ்ப்பாணக் கிளை அலுவலகம் இன்று (10.08.2026) திங்கட்கிழமை யாழ்ப்பாணம் – கண்டி வீதியில் அமைந்துள்ள தேசிய வீடமைப்பு அபிவிருத்தி அதிகாரசபை அலுவலகக் கட்டடத்தின் முதலாம் மாடியில் உத்தியோகபூர்வமாகத் திறந்து வைக்கப்பட்டுள்ளது. இந் நிகழ்வில் பிரதம விருந்தினராக வடக்கு மாகாண ஆளுநர் திரு. நாகலிங்கம் வேதநாயகன் அவர்களும், சிறப்பு விருந்தினராக யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களும் கலந்து சிறப்பித்தனர். வடக்கின் ஏற்றுமதி மற்றும் வர்த்தகத் துறைக்கு புதிய வாய்ப்பு வடக்கு ஏற்றுமதியாளர் சம்மேளனத்தின் ஒத்துழைப்புடன் புதிய கிளை அலுவலகம் ஆரம்பிக்கப்பட்டுள்ளதுடன், இதன் மூலம் வடக்கு மாகாணத்தில் ஏற்றுமதி மற்றும் இறக்குமதி சார்ந்த சேவைகளை விரிவுபடுத்துவதற்கு நடவடிக்கை எடுக்கப்பட்டுள்ளது. கப்பல் முகவர் சேவைகள், கடல் மற்றும் விமான வழி சரக்குப் போக்குவரத்து, பெருமளவிலான சரக்குகளைக் கையாளுதல், கொள்கலன் குத்தகை, சுங்கத் தரகு மற்றும் அனுமதிச் சேவைகள் உள்ளிட்ட பல்வேறு சேவைகள் இக்கிளை ஊடாக வழங்கப்படவுள்ளன.
மேலும், இலங்கை, இந்தியா, ஐக்கிய அரபு அமீரகம், சிங்கப்பூர் மற்றும் மலேசியா உள்ளிட்ட நாடுகளில் நிறுவனத்துக்குள்ள வலையமைப்பின் ஊடாக வடக்கு மாகாணத்தின் சர்வதேச வர்த்தகத் தொடர்புகளை விரிவுபடுத்துவதற்கும், ஏற்றுமதி மற்றும் இறக்குமதி நடவடிக்கைகளுக்கான புதிய வாய்ப்புகளை உருவாக்குவதற்கும் எதிர்பார்க்கப்படுகிறது. இக்கிளையின் செயற்பாடுகள் மூலம் வடக்கு மாகாணத்தின் வர்த்தக மற்றும் ஏற்றுமதித் துறைக்கு வலுசேர்ப்பதுடன், பிராந்தியத்தின் பொருளாதார வளர்ச்சிக்கும் பங்களிப்பு வழங்கும் என எதிர்பார்க்கப்படுகிறது. இந் நிகழ்வில் வடக்கு ஏற்றுமதியாளர் சம்மேளனத்தின் தலைவர் மற்றும் நிர்வாகிகள், ஸ்மார்ட் மரைன் லங்கா நிறுவனத்தின் முகாமைத்துவப் பணிப்பாளர் உள்ளிட்ட நிறுவன அதிகாரிகள், வர்த்தக மற்றும் தொழில்துறை பிரதிநிதிகள், ஏற்றுமதியாளர்கள் மற்றும் தொழில்முனைவோர் உள்ளிட்ட பலர் கலந்துகொண்டனர்.

அரசாங்க உத்தியோகத்தர்களுக்காக முன்னெடுக்கப்பட்ட 150 மணித்தியால இரண்டாம் மொழியான சிங்கள மொழிக் கற்கைநெறியின் இறுதிநாள் நிகழ்வு இன்று (08.08.2026) யாழ்ப்பாண மாவட்ட செயலக கேட்போர் கூடத்தில் நடைபெற்றது. இந் நிகழ்வில் பிரதம விருந்தினராக அரசாங்க அதிபர் திரு. மருதலிங்கம் பிரதீபன் அவர்களும், சிறப்பு விருந்தினராக யாழ்ப்பாண மாவட்ட உதவி மாவட்ட செயலாளர் செல்வி உ. தர்சினி அவர்களும், கௌரவ விருந்தினர்களாக அரசகரும மொழிகள் திணைக்களத்தின் வடமாகாண இணைப்பாளர் திரு. N. உமாநாத் மற்றும் வளவாளர் திரு. அ. சிறிரஞ்சன் ஆகியோரும் கலந்துகொண்டனர். அதிதிகளின் வரவேற்பைத் தொடர்ந்து, 150 மணித்தியால கற்கைநெறியை நிறைவுசெய்த உத்தியோகத்தர்கள் தாம் கற்றுக்கொண்ட சிங்கள மொழித் திறனையும் பெற்றுக்கொண்ட அறிவையும் வெளிப்படுத்தும் வகையில் பாடல்கள், நாடகங்கள் மற்றும் பல்வேறு கலை நிகழ்வுகளை சிங்கள மொழியில் சிறப்பாக வழங்கினர். இந்நிகழ்வில் உரையாற்றிய அரசாங்க அதிபர், இக்கற்கைநெறியில் பங்குபற்றிய உத்தியோகத்தர்கள் தாம் பெற்றுக்கொண்ட மொழித் திறனை தொடர்ந்து நடைமுறையில் பயன்படுத்துவதற்கான வாய்ப்புகளை உருவாக்கிக்கொள்ள வேண்டும் எனத் தெரிவித்தார்.
பல அரச திணைக்களங்கள் மற்றும் பிரதேச செயலகங்களில் கடமையாற்றும் உத்தியோகத்தர்களை உள்ளடக்கியதாக சுமார் மூன்று மாதங்களாக இப்பயிற்சி முன்னெடுக்கப்பட்டதாகவும், 150 மணித்தியாலங்கள் என்பது ஒரு மொழியில் முழுமையான தேர்ச்சியைப் பெறுவதற்குப் போதுமான காலப்பகுதி அல்ல என்றபோதிலும், உத்தியோகத்தர்கள் தமது இயலுமைக்கு ஏற்ப சிறப்பாகப் பயிற்சியை நிறைவுசெய்துள்ளதாகவும் அரசாங்க அதிபர் குறிப்பிட்டார். மொழியைக் கற்றுக்கொள்வதுடன் அதனை நிறுத்திவிடாமல், நடைமுறை வாழ்க்கையிலும் அலுவலகச் சூழலிலும் தொடர்ந்து பயன்படுத்துவதன் மூலமே மொழித் திறனை மேலும் மேம்படுத்திக்கொள்ள முடியும் எனத் தெரிவித்தார். மேலும், அரச அலுவலகங்களில் சிங்கள மொழியைப் பயன்படுத்துவதற்கான சந்தர்ப்பங்களை உத்தியோகத்தர்கள் அதிகரித்துக்கொள்ள வேண்டும் என்றும் கேட்டுக்கொண்டார். அத்துடன், இதுவரை இப்பயிற்சியைப் பெறாத அரச உத்தியோகத்தர்களையும் இணைத்துக்கொண்டு புதிய பயிற்சி வகுப்புகளை நடத்துவதற்கான நடவடிக்கைகள் மேற்கொள்ளப்பட்டும் எனவும், ஏற்கனவே பயிற்சி பெற்ற உத்தியோகத்தர்கள் தமது அறிவையும் திறன்களையும் மீளாய்வு செய்து மேம்படுத்திக்கொள்ளும் வகையில் மீளாய்வு ஒன்றினை முன்னெடுக்க ஏற்பாடுகள் செய்யப்படவுள்ளதாகவும் தெரிவித்தார்.
யாழ்ப்பாண மாவட்டத்தில் இப் பயிற்சித் திட்டத்தை சிறப்பாக முன்னெடுப்பதற்கு பங்களிப்பு வழங்கிய அரசகரும மொழிகள் திணைக்களத்தின் வடமாகாண இணைப்பாளர், வளவாளர்கள் மற்றும் ஒருங்கிணைப்பாளர்கள் உள்ளிட்ட அனைவருக்கும் அரசாங்க அதிபர் தனது நன்றிகளையும் பாராட்டுக்களையும் அரசாங்க அதிபர் தெரிவித்தார். தேசிய அரசகரும மொழிகள் திணைக்களத்தினால் நாடளாவிய ரீதியில் முன்னெடுக்கப்படும் இக் கற்கைநெறியில், யாழ்ப்பாண மாவட்டத்திலுள்ள பல்வேறு அரச திணைக்களங்கள் மற்றும் பிரதேச செயலகங்களில் கடமையாற்றும் 102 உத்தியோகத்தர்கள் தடைதாண்டலில் பூர்த்தி செய்து இவ் நிகழ்வில் கலந்துகொண்டமை குறிப்பிடத்தக்கது.

“சிறுவர் உரிமைகள் மற்றும் தரமான கல்வியை சிறுவர்கள் பெறுவதை உறுதி செய்தல்” எனும் தொனிப்பொருளில், தீவக கல்வி வலயத்திற்குட்பட்ட பாடசாலை அதிபர்களுக்கான திறன் மேம்பாட்டு செயலமர்வின் ஆரம்ப நிகழ்வு இன்று (11.08.2026) காலை 8.30 மணிக்கு யாழ்ப்பாணத்திலுள்ள தனியார் விருந்தினர் விடுதியொன்றில் நடைபெற்றது. யாழ். சமூக செயற்பாட்டு மையம் (JSAC), தீவக வலயக் கல்விப் பணிமனையுடன் இணைந்து ஏற்பாடு செய்த இச் செயலமர்வின் ஆரம்ப நிகழ்வில், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் பிரதம விருந்தினராகக் கலந்துகொண்டு நிகழ்வை ஆரம்பித்து வைத்தார். இதன்போது உரையாற்றிய அரசாங்க அதிபர், யாழ்ப்பாண மாவட்டத்தில் வளங்கள் மற்றும் வசதிகள் குறைந்த கல்வி வலயங்களில் ஒன்றாக தீவக கல்வி வலயம் காணப்படுவதுடன், அங்குள்ள பல பாடசாலைகளின் கல்வி அடைவு மட்டமும் குறைந்த நிலையில் காணப்படுவதாகத் தெரிவித்தார். எனவே, மாணவர்களின் கல்வி அடைவு மட்டத்தை உயர்த்துவதற்கான திட்டமிட்ட நடவடிக்கைகள் தொடர்ச்சியாக முன்னெடுக்கப்பட வேண்டுமெனவும் வலியுறுத்தினார்.
யாழ்ப்பாண மாவட்டத்தில் 446 பாடசாலைகள் காணப்படுகின்ற நிலையில், மாணவர்களின் எண்ணிக்கை மற்றும் வளப்பங்கீட்டு அடிப்படையில் குறைந்தளவு வளங்களைப் பெறும் வலயங்களில் தீவக கல்வி வலயமும் ஒன்றாக விளங்குவதாக தெரிவித்தார். குறிப்பாக, குறைந்த மாணவர் எண்ணிக்கையைக் கொண்ட பல பாடசாலைகள் தீவகப் பிரதேசத்தில் காணப்படுவதாகவும் குறிப்பிட்டார். அத்துடன், தீவகப் பிரதேசத்தின் தனித்துவமான சமூகச் சூழல், போக்குவரத்து உள்ளிட்ட பல்வேறு சவால்களுக்கு மத்தியில் அதிபர்களும் ஆசிரியர்களும் தமது பணிகளை முன்னெடுக்க வேண்டிய நிலை காணப்படுவதாகவும், சில ஆசிரியர்கள் மற்றும் அதிபர்கள் கடல் கடந்து பாடசாலைகளுக்குச் சென்று பணியாற்ற வேண்டிய சூழ்நிலையும் இருப்பதாகவும் தெரிவித்தார். இத்தகைய சவால்களுக்கு மத்தியிலும் பாடசாலைகளை சிறந்த முறையில் நிர்வகித்து, ஆசிரியர்களை ஒருங்கிணைத்து, மாணவர்களின் கல்வி முன்னேற்றம், ஆளுமை வளர்ச்சி மற்றும் எதிர்காலத் திறன்களை மேம்படுத்துவது அதிபர்களின் முக்கிய பொறுப்பாகும் எனவும் அரசாங்க அதிபர் வலியுறுத்தினார்.
இதேவேளை, புங்குடுதீவு சுப்பிரமணியம் மகளிர் வித்தியாலயத்தில் அண்மையில் நடைபெற்ற நிகழ்வொன்றில் மாணவர்களை சாரணர் இயக்கத்தில் இணைத்து, அவர்களிடையே தலைமைத்துவப் பண்புகளை வளர்ப்பதற்காக முன்னெடுக்கப்பட்ட நடவடிக்கைகளையும் அரசாங்க அதிபர் பாராட்டினார். தொடர்ந்து அனைத்து பாடசாலைகளிலும் சாரணர் இயக்கத்தை வலுப்படுத்துவதற்கான நடவடிக்கைகள் முன்னெடுக்கப்பட்டு வருவதாகவும் அவர் குறிப்பிட்டார்.
பாடசாலை என்பது மாணவர்களுக்கு கல்வியை வழங்கும் இடம் மட்டுமன்றி, அவர்களின் ஆளுமை, தலைமைத்துவம் மற்றும் சமூகப் பொறுப்புணர்வை வளர்க்கும் முக்கியமான நிறுவனமாகும் எனக் குறிப்பிட்ட அரசாங்க அதிபர், எதிர்காலத்தில் பல்வேறு துறைகளில் தலைமைப் பொறுப்புகளை ஏற்கக்கூடியவர்களை உருவாக்குவதற்கான அடித்தளத்தை பாடசாலைகளே ஏற்படுத்துகின்றன எனவும் தெரிவித்தார். மேலும், தற்போது தீவகப் பிரதேசத்தில் கல்வி மற்றும் சமூக முன்னேற்றத்திற்கான சாதகமான மாற்றங்கள் ஏற்பட்டு வருவதாகவும், இம்மாற்றங்களை மேலும் வலுப்படுத்த அனைவரும் ஒன்றிணைந்து செயற்பட வேண்டும் எனவும் குறிப்பிட்டார். மேலும், தமக்கு தற்போது வழங்கப்பட்டுள்ள பணிக்காலத்தை சிறந்த முறையில் பயன்படுத்தி, பாடசாலை நிர்வாகத்திலும் மாணவர்களின் கல்வி முன்னேற்றத்திலும் ஆக்கபூர்வமான மாற்றங்களை ஏற்படுத்துவதற்கு அதிபர்கள் முனைப்புடன் செயற்பட வேண்டும் எனவும் அரசாங்க அதிபர் கேட்டுக்கொண்டார். இச் செயலமர்வை ஏற்பாடு செய்த யாழ். சமூக செயற்பாட்டு மையத்திற்கும் (JSAC) நன்றி தெரிவித்த அரசாங்க அதிபர், தீவக கல்வி வலயத்தின் எதிர்கால வளர்ச்சிக்காக பாடசாலை அதிபர்கள் மற்றும் ஆசிரியர்கள் மேற்கொள்ளும் அனைத்து முயற்சிகளுக்கும் தனது வாழ்த்துக்களையும் தெரிவித்தார்.
இந்நிகழ்வில் தீவக வலயக் கல்விப் பணிப்பாளர் திரு. து. லெனின் அறிவழகன், மனித உரிமைகள் ஆணைக்குழுவின் யாழ். பிராந்திய இணைப்பாளர் திரு. த. கனகராஜ், கல்வி அமைச்சின் நிபுணத்துவ ஆலோசகரும் யாழ். தேசிய கல்வியியல் கல்லூரியின் சிரேஷ்ட விரிவுரையாளருமான கலாநிதி பா. தனபாலன், யாழ். தேசிய கல்வியியல் கல்லூரியின் ஓய்வுநிலை சிரேஷ்ட விரிவுரையாளர் திரு. கு. கமலநாதன், தீவக வலய உடற்கல்வி மற்றும் தமிழ் பாட உதவிக் கல்விப் பணிப்பாளர்கள், யாழ். சமூக செயற்பாட்டு மையத்தின் உத்தியோகத்தர்கள் உள்ளிட்ட பல்வேறு தரப்பினரும் கலந்துகொண்டனர்.

தூய்மையான சுற்றுச்சூழலைப் பேணிப் பாதுகாப்பதையும், சமூகப் பொறுப்புணர்வை வலுப்படுத்துவதையும் நோக்கமாகக் கொண்டு, “கிளீன் ஸ்ரீலங்கா” திட்டத்தின் கீழ் “அத்தம” தேசிய தூய்மை தின நிகழ்ச்சித்திட்டம் நாடளாவிய ரீதியில் முன்னெடுக்கப்படுகிறது. “அழகான நாடு – புன்னகைக்கும் மக்கள்” என்ற இலக்குடன், அரசாங்கம், தனியார் துறை மற்றும் பொதுமக்களின் கூட்டுப் பங்களிப்பில் நாடளாவிய ரீதியில் இன்றைய தினம் (08.08.2026) உத்தியோகபூர்வமாக ஆரம்பிக்கப்பட்டது. இதனை முன்னிட்டு, யாழ்ப்பாண மாவட்டத்தின் இன்றைய நிகழ்வு யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களின் தலைமையில் காலை 8.00 மணிக்கு யாழ்ப்பாணக் கோட்டை வெளிப்புறப் பகுதியில் ஆரம்பமாகியது. “கிளீன் ஸ்ரீலங்கா” செயற்றிட்டத்தின் மாகாண இணைப்பாளர் திரு. எஸ். கபிலன், மாவட்ட இணைப்பாளர் திரு. P. கஜமுகன் ஆகியோரும் பங்குபற்றினார்கள். இதன்போது, யாழ்ப்பாண கோட்டையினைச் சுற்றிய தூய்மைப்பணிகள் மேற்கொள்ளப்பட்டன.
இன்றைய தூய்மைப் பணியில் யாழ்ப்பாண மாவட்டச் செயலக உத்தியோகத்தர்கள், யாழ்ப்பாண பிரதேச செயலக உத்தியோகத்தர்கள், யாழ்ப்பாண மாநகர சபையினர், பொலிஸ், இராணுவம், விமான படை, கடற்படை , யாழ்ப்பாண மாவட்ட சாரணர்கள், தொல்லியல் திணைக்கள உத்தியோகத்தர்கள் மற்றும் யாழ்ப்பாண பிரதேச செயலக J/81 கிராம அலுவலர் பிரிவு பொதுமக்கள் உள்ளிட்டவர்கள் பங்குபற்றியதுடன், Save a Life, Sevalanka Foundation, World Vision என்பன அனுசரணை வழங்கினார்கள். மேலும், இதே சம நேரத்தில் யாழ்ப்பாண மாவட்டத்தின் 15 பிரதேச செயலக ரீதியாகவும் ஒரு நிகழ்வும் மற்றும் மாவட்டத்தின் அனைத்து கிராம சேவக பிரிவுகளிலும் ஆரம்பிக்கப்பட்டுள்ளமை குறிப்பிடத்தக்கது.








