வெகுஜன ஊடகப் பிரதி அமைச்சர் கௌரவ (கலாநிதி) கௌஷல்யா ஆரியரத்தன அவர்கள் பிரதம விருந்தினராக கலந்துகொண்ட, ஊடகவியலாளர்களை ஊக்கமூட்டும் நிகழ்ச்சி இன்றைய தினம்(31.07.2026) காலை 10.00 மணிக்கு யாழ்ப்பாண மாவட்டச் செயலக கேட்போர் கூடத்தில் நடைபெற்றது. இந் நிகழ்வில் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமை வகித்தார். இந் நிகழ்வில், அரசாங்க தகவல் திணைக்களத்தின் பணிப்பாளர் நாயகம் திரு.எச்.எஸ்.ஜே. பண்டார, யாழ்ப்பாண மாவட்ட மேலதிக அரசாங்க அதிபர் திரு. க.சிவகரன், கிளிநொச்சி மாவட்ட மேலதிக அரசாங்க அதிபர் திருமதி நளாயினி இன்பராஜ், அரசாங்க தகவல் திணைக்களத்தின் உதவிப் பணிப்பாளர் (தொடர்பாடல்) திரு. எல்.பி.திலகரட்ண உள்ளிட்டோர் கலந்து கொண்டனர்.
இந் நிகழ்வில் வரவேற்புரையுடன் தலமையுரையாற்றிய யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள், யாழ்ப்பாணம் மற்றும் கிளிநொச்சி மாவட்டங்களைச் சேர்ந்த ஊடகவியலாளர்களுக்கான தெளிவூட்டல் மற்றும் ஊக்கமூட்டல் கலந்துரையாடல் நிகழ்ச்சி அரசாங்க தகவல் திணைக்களத்தின் ஏற்பாட்டில் நடைபெறுவதாக தெரிவித்தார். மேலும், வட மாகாணத்தில் வெகுஜன ஊடக அமைச்சின் ஏற்பாட்டில் நடைபெறும் இவ்வாண்டுக்கான தெளிவூட்டல் மற்றும் திறன் மேம்பாட்டு நிகழ்வாக இது அமைந்துள்ளதாகவும், ஊடகவியலாளர்களின் தொழில்முறை மேம்பாடு மற்றும் ஊடகத்துறையுடன் தொடர்புடைய பல்வேறு விடயங்கள் குறித்து கலந்துரையாடல்கள் இடம்பெறவுள்ளதாகவும் தெரிவித்தார்.
மேலும், நிகழ்வு ஆரம்பிப்பதற்கு முன்னர், யாழ்ப்பாண மாவட்டச் செயலகத்தின் முன்பாக ஊடகவியலாளர்களுக்கு எதிராக இழைக்கப்பட்ட அநீதிகள் உள்ளிட்ட பல்வேறு கோரிக்கைகளை முன்வைத்து ஊடகவியலாளர்கள் கவனயீர்ப்பு நடவடிக்கையில் ஈடுபட்டிருந்ததாகவும், அரசாங்க தகவல் திணைக்களத்தின் பணிப்பாளர் நாயகத்துடன் இணைந்து அவர்களை நேரில் சென்று சந்தித்து கலந்துரையாடிதாகவும், பயிற்சி நிகழ்வினை நிறுத்தி இந் நிகழ்வினை ஊடகவியலாளர்களின் பிரச்சனைகளை கோரிக்கைகளை கலந்துரையாடுவதற்கான நிகழ்வாக இதனை மேற்கொள்ளவுள்ளதாகவும், இதில் கலந்துகொள்ளுமாறு ஊடகவியலாளர்களிடம் கோரிக்கையினை முன்வைத்ததாக அரசாங்க அதிபர் தெரிவித்தார். இது தொடர்பான விடயங்கள் கௌரவ பிரதி அமைச்சர் அவர்களின் கவனத்திற்கு கொண்டு செல்லப்படும் எனவும், மேலும், ஊடகவியலாளர்கள் முன்வைத்துள்ள கோரிக்கைகள் தொடர்பில் அரசாங்கம் உரிய கவனம் செலுத்தும் என்ற நம்பிக்கையுடன் இக் கலந்துரையாடல் முன்னெடுக்கப்படுவதாகவும், யாழ்ப்பாணம் மற்றும் கிளிநொச்சி மாவட்ட ஊடகவியலாளர்களின் தொழில் முறைத் திறன்களை மேம்படுத்துவதில் இந் நிகழ்வு முக்கிய பங்காற்றும் எனவும் அரசாங்க அதிபர் தெரிவித்தார்.
மேலும் ஊடகத்துறை சார்ந்த பிரதி அமைச்சர் ஒருவர் எமது மாவட்டத்திற்கு நேரடியாக வருகை தந்துள்ளதுடன் ஊடகவியலாளர்களின் பிரச்சினைகளை, கோரிக்கைகளை, தேவைப்பாடுகளை முன்வைக்கின்ற சந்தர்ப்பம் ஏற்பட்டுள்ளது. இச் சந்தர்ப்பத்திற்கு கௌரவ பிரதி அமைச்சர் அவர்களுக்கு நன்றிகளை தெரிவித்துக் கொள்கிறேன். இந்நிகழ்வு அரசாங்கத்தின் பிரதி அமைச்சருடன் ஊடகவியலாளர்கள் தங்களுடைய தேவைப்பாடுகள் மற்றும் பிரச்சனைகளை கலந்துரையாடுவதற்கான நல்ல வாய்ப்பாகும் என தெரிவித்தார். தொடர்ந்து, அரசாங்க தகவல் திணைக்களத்தின் பணிப்பாளர் நாயகம் திரு. எச்.எஸ்.ஜே. பண்டார அவர்கள், அரசாங்க தகவல் திணைக்களத்தின் பணிகள் மற்றும் ஊடகங்களுடனான ஒருங்கிணைப்பு பணிகள் தொடர்பாக விளக்கவுரையாற்றினார்.
தொடர்ந்து, வெகுஜன ஊடகப் பிரதி அமைச்சர் கௌரவ (கலாநிதி) கௌஷல்யா ஆரியரத்ன அவர்கள் உரையாற்றினார். இந்நிகழ்வில் யாழ்ப்பாணம் மற்றும் கிளிநொச்சி மாவட்டங்களைச் சேர்ந்த பல ஊடகவியலாளர்கள் கலந்துகொண்டு தங்களது கருத்துகளையும், கோரிக்கைகளையும் முன்வைத்தனர். அதற்கு பிரதி அமைச்சர் உரிய விளக்கங்களையும் பதில்களையும் வழங்கினார். மேலும், யாழ்ப்பாண மாவட்டச் செயலகத்தினால் 2025 ஆம் ஆண்டில் முன்னெடுக்கப்பட்ட அபிவிருத்தித் திட்டங்கள் மற்றும் முக்கிய நிகழ்வுகளை உள்ளடக்கிய "செயலக மடல்" யாழ்ப்பாண மாவட்ட அரசாங்க அதிபர் அவர்களால் கௌரவ பிரதி அமைச்சர் அவர்களிடம் வழங்கி வைத்தார். இந் நிகழ்வில் யாழ்ப்பாண மாவட்டச் செயலகத்தின் பதவி நிலை உத்தியோகத்தர்கள், அரசாங்க தகவல் திணைக்களத்தின் தலைமைப் பீட உத்தியோகத்தர்கள், மாவட்டச் செயலக ஊடகப் பிரிவு உத்தியோகத்தர்கள் மற்றும் யாழ்ப்பாணம், கிளிநொச்சி மாவட்டங்களைச் சேர்ந்த ஊடகவியலாளர்கள் எனப் பலர் கலந்து கொண்டனர்.


"நேர்மையான கலாசாரம் – தூய்மையான இலங்கை" தேசிய செயற்பாட்டின் ஒரு பகுதியாக, யாழ்ப்பாண மாவட்டச் செயலகத்தில் டெங்கு ஒழிப்பு சிரமதானப் பணி இன்றைய தினம் (31.07.2026) முன்னெடுக்கப்பட்டது. இந்நிகழ்வில் யாழ்ப்பாண மாவட்ட அரசாங்க அதிபர் அவர்களின் தலைமையிலும் பங்குபற்றலுடனும் மாவட்டச் செயலக உத்தியோகத்தர்கள் இணைந்து சிரமதானப் பணிகளில் ஈடுபட்டனர்.


இலங்கை சமூக பாதுகாப்பு சபையின் ஏற்பாட்டில் மாணவர்களுக்கான புலமைப் பரிசில் வழங்கும் நிகழ்வு யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (28.07.2026) பிற்பகல் 2.30 மணிக்கு யாழ்ப்பாண மாவட்டச் செயலக கேட்போர் கூடத்தில், நடைபெற்றது. இந்நிகழ்வில் கடற்றொழில், நீரியல் மற்றும் கடல்வளங்கள் அமைச்சரும், யாழ்ப்பாண மாவட்ட ஒருங்கிணைப்புக் குழுத் தலைவருமான கௌரவ இராமலிங்கம் சந்திரசேகர் அவர்கள் பிரதம விருந்தினராகக் கலந்து கொண்டு நிகழ்வைச் சிறப்பித்தார். மேலும், வடமாகாண கல்வித் திணைக்கள மாகாணப் பிரதிப் பணிப்பாளர் திரு. சுபாகரன் அவர்கள் சிறப்பு விருந்தினராகக் கலந்து கொண்டார்.
அத்துடன், யாழ் பிராந்திய லயன் கழகத்தின் லயன். செ. சிவலிங்கம், யாழ்ப்பாணம் லயன் கழகத்தின் லயன். க. கபிலேந்திரன், கற்றலிஸ்ற் லயன் கழகத்தின் லயன். அனிற்றா ரவிசங்கர் மற்றும் பிரதம பதிப்பாசிரியர் லயன் கழகங்களின் லயன். சி. பூபதி அம்மாள் ஆகியோர் கௌரவ விருந்தினர்களாகக் கலந்து கொண்டனர். மங்கல விளக்கேற்றலுடன் ஆரம்பமான நிகழ்வில், மேலதிக அரசாங்க அதிபர் திரு. கே. சிவகரன் அவர்கள் வரவேற்புரையாற்றினார். இந்நிகழ்வில் தலைமையுரையாற்றிய யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள், பாதுகாப்பு சபையின் புலமைப்பரிசில் பெற்ற மாணவர்களைக் கௌரவிக்கும் இந் நிகழ்வில் பிரதம விருந்தினராகக் கலந்துகொண்ட அமைச்சரும், யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் உள்ளிட்டவர்களை வரவேற்றார். மேலும், இலங்கை சமூக பாதுகாப்பு சபை தொடர்ச்சியாக மாணவர்களுக்கான புலமைப்பரிசில் வழங்கும் நிகழ்வுகளை முன்னெடுத்து வருவதுடன், அதற்கு அப்பாற்பட்டு சிறுவர்களைச் சேமிப்புப் பழக்கத்திற்கு ஊக்குவித்து, அவர்களுக்கான ஓய்வூதியத் திட்டத்தையும் நடைமுறைப்படுத்தி வருவதாகக் குறிப்பிட்டார்.
இத்திட்டங்களை மக்களிடம் கொண்டு சேர்ப்பதற்காக பிரதேச செயலகங்கள், கிராம உத்தியோகத்தர்கள், அபிவிருத்தி உத்தியோகத்தர்கள், சமூக பாதுகாப்பு சபையின் இணைப்பாளர், உத்தியோகத்தர்கள் மற்றும் பல்வேறு துறைசார் உத்தியோகத்தர்கள் இணைந்து தொடர்ந்து அர்ப்பணிப்புடன் பணியாற்றி வருவதாகவும் தெரிவித்தார். மேலும், தேசிய மற்றும் மாவட்ட மட்டங்களில் அதிகளவில் சேமிப்பை ஊக்குவிக்கும் பிரதேச செயலகங்களையும் மாவட்டங்களையும் கௌரவிக்கும் செயற்பாட்டை இலங்கை சமூக பாதுகாப்பு நாடாத்திவருவதாகவும், தொடர்ச்சியாக 11 ஆண்டுகளாக யாழ்ப்பாணம் மாவட்டம் தேசிய ரீதியாக முதலிடம் பெற்றுவருவதனை பெருமையுடன் தெரிவித்தார்.
மேலும், குறைந்த வயதிலேயே பிள்ளைகளை இத்திட்டத்தில் இணைப்பதன் மூலம் அவர்கள் அறுபது வயதை அடையும் போது இயல்பாகவே ஓய்வூதியப் பயனைப் பெறக்கூடிய வாய்ப்பு உருவாகின்றது என்றார். அரச சேவையில் பலர் விரும்பும் முக்கிய அம்சங்களில் தொழில் பாதுகாப்பும் ஓய்வூதிய வசதியும் அடங்கும். ஆனால், அரச சேவையில் இணைந்திருக்காவிட்டாலும், இத்திட்டத்தின் மூலம் பிள்ளைகள் எதிர்காலத்தில் ஓய்வூதியப் பாதுகாப்பைப் பெற முடியும் என்பதால், இது மிகவும் பயனுள்ள திட்டமாக அமைந்துள்ளது என்றும் தெரிவித்தார். மேலும், பெற்றோர்கள் தங்களது எதிர்கால பிள்ளைகள் நலனைக் கருத்தில் கொண்டு இத்திட்டத்தில் இணைத்திருப்பது அவர்களின் அன்பையும் தொலைநோக்குப் பார்வையையும் வெளிப்படுத்துவதாகும் தெரிவித்தார். எனவே, மாணவர்கள் கல்விக் காலத்தை முழுமையாகப் பயன்படுத்தி அறிவை வளர்த்துக் கொண்டு, உயர்ந்த பொறுப்புகளையும் பதவிகளையும் அடைய முயற்சிக்க வேண்டும் என்றும், தங்களது பெற்றோரின் தியாகத்தையும் பெருந்தன்மையையும் என்றும் மதித்து வாழ வேண்டும் என்றும் அரசாங்க அதிபர் வலியுறுத்தினார்.
தொடர்ந்து, வடமாகாண சமூக பாதுகாப்புச் சபையின் சிரேஷ்ட இணைப்பதிகாரி திரு. பா. பிரதீபன் அவர்கள் ஓய்வூதியத் திட்டம் தொடர்பான விளக்கவுரையை நிகழ்த்தினார். இதனைத் தொடர்ந்து, யாழ்ப்பாணம் மாவட்ட ஒருங்கிணைப்புக் குழு இணைப்பாளர் திரு. எஸ். கபிலன் அவர்கள் சிறப்புரையாற்றினார். அதனைத் தொடர்ந்து, கௌரவ விருந்தினர்கள், சிறப்பு விருந்தினர் மற்றும் பிரதம விருந்தினர் ஆகியோரின் உரைகள் இடம்பெற்றன. இந் நிகழ்வின் முக்கிய அம்சமாக, தகுதி பெற்ற 221 மாணவர்களுக்கு புலமைப் பரிசில்கள் வழங்கப்பட்டன. இதில் 8 மாணவர்களுக்கு ரூபா 50000.00 வீதமும், 15 மாணவர்களுக்கு ரூபா 25000.00 வீதமும், உள்ளடங்கலாக இலங்கை சமூக பாதுகாப்பு சபையின் புலமைப் புலமைப் பரிசில்கள் வழ ங்கப்பட்டமை குறிப்பிடத்தக்கது. இறுதியாக, அபிவிருத்தி உத்தியோகத்தர் செல்வி. ஜே. விவேகா அவர்கள் நன்றியுரையாற்றியதுடன் நிகழ்வு நிறைவுற்றது. இந் நிகழ்வில் திட்மிடல் பணிப்பாளர், உதவி மாவட்டச் செயலாளர், பிரதேச செயலாளர் கள், யாழ்ப்பாண மாவட்ட ஒருங்கிணைப்புக் குழுவின் இணைப்பாளர், மாணவர்கள், பெற்றோர்கள் என பெருமளவில் கலந்துகொண்டார் கள்.


பதிவாளர் நாயகம் திணைக்களத்தின் வடக்கு வலய பதிவறை (Northern Zonal Record Room) இன்று (30.07.2026) காலை 08.30 மணிக்கு வவுனியா மாவட்டம் A 9 வீதி கனகராயன்குளம் – மன்னகுளம் பகுதியில் பொது நிர்வாக, மாகாண சபைகள் மற்றும் உள்ளூராட்சி அமைச்சர் கௌரவ (பேராசிரியர்) ஏ.எச்.எம்.எச். அபயரத்ன அவர்களால் உத்தியோகபூர்வமாக திறந்து வைக்கப்பட்டது. வடக்கு மாகாண மக்களின் நீண்டகால தேவையை நிறைவேற்றும் வகையில் நிறுவப்பட்டுள்ள இந்தப் பதிவறையின் மூலம், பிறப்பு, இறப்பு மற்றும் திருமணப் பதிவுகள் சேதமடைந்திருந்தால், அவற்றின் பிரதிகளை இதுவரை கொழும்பு மாளிகாவத்தையில் அமைந்துள்ள பதிவாளர் நாயகம் திணைக்களத்தின் தலைமையகத்தில் மட்டுமே பெற்றுக்கொள்ள வேண்டியிருந்த நிலைமை மாற்றமடைந்துள்ளது.
இனிமேல் குறித்த ஆவணங்களை வவுனியாவில் அமைந்துள்ள வடக்கு வலய பதிவறையிலேயே பெற்றுக்கொள்ள முடியும். மேலும், இன்றுமுதல் உடனடியாக பிறப்புச் சான்றிதழ்களை வழங்கும் சேவை ஆரம்பிக்கப்பட்டுள்ளதுடன், எதிர்வரும் காலங்களில் திருமணச் சான்றிதழ் மற்றும் இறப்புச் சான்றிதழ்களை இவ்வலுவலகத்தின் ஊடாக பெற்றுக்கொள்ளும் வசதிகள் ஏற்படுத்தப்படவுள்ளன.
இந் நிகழ்வில் வன்னி மாவட்ட பாராளுமன்ற உறுப்பினர்களான கௌரவ டாக்டர் செல்வத்தம்பி திலகநாதன், கௌரவ மயில்வாகனம் ஜெகதீஸ்வரன், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன், முல்லைத்தீவு மாவட்ட அரசாங்க அதிபர் திரு. ஏ. உமாமகேஸ்வரன், பதிவாளர் நாயகம் திருமதி சசிதேவி ஜலதீபன், பதிவாளர் நாயகம் திணைக்களத்தின் அதிகாரிகள் மற்றும் உத்தியோகத்தர்கள் உள்ளிட்ட பலர் கலந்துகொண்டனர்.
யாழ்ப்பாண மாவட்ட போக்குவரத்து உப ஒருங்கிணைப்புக் குழுக் கூட்டம், பாராளுமன்ற உறுப்பினரும் யாழ்ப்பாண மாவட்ட போக்குவரத்து ஒருங்கிணைப்புக் குழுவின் தலைவருமான கௌரவ கருணநாதன் இளங்குமரன் அவர்களின் தலைமையில், கடற்றொழில், நீரியல் மற்றும் கடல் வளங்கள் அமைச்சரும் மாவட்ட ஒருங்கிணைப்புக் குழுவின் தலைவருமான பாராளுமன்ற உறுப்பினர் கௌரவ இராமலிங்கம் சந்திரசேகர் அவர்களின் பங்குபற்றுதலுடன், இன்றைய தினம் (28.07.2026) யாழ்ப்பாண மாவட்டச் செயலக கேட்போர் கூடத்தில் நடைபெற்றது.
இக் கூட்டத்தில் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன், போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் பணிப்பாளர் (சிறப்புத் திட்டங்கள்) திரு. எஸ். எஸ். கொடகண்டா ஆராய்ச்சிகே, போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் மேலதிக செயலாளர் (சிறப்புத் திட்டங்கள்) திரு. எச். கே. எஸ். எஸ். குணசேகர, வீதி அபிவிருத்தி அதிகார சபையின் மாகாண பணிப்பாளர் திருமதி பிரசாந்தி சங்கர், போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் யாழ்ப்பாண மாவட்ட இணைப்பாளர் திரு. எஸ். சிறிவாகீசன் ஆகியோர் கலந்து கொண்டனர்.
இக் கூட்டத்தில் வரவேற்புரையாற்றிய அரசாங்க அதிபர் அவர்கள், கூட்டத்திற்கு வருகை தந்த கௌரவ அமைச்சர், கௌரவ பாராளுமன்ற உறுப்பினர் உள்ளிட்ட அனைவரையும் வரவேற்றதுடன், மாவட்டத்தின் போக்குவரத்து தொடர்பான முன்னேற்றங்களை அமுல்படுத்துவதற்கும், போக்குவரத்து தொடர்பான விடயங்களை ஒருங்கிணைத்து கையாள்வதற்குமான போக்குவரத்து ஒருங்கிணைப்புக் குழுக் கூட்டம் இன்று ஏற்பாடு செய்யப்பட்டுள்ளதாகவும் தெரிவித்தார். இதன் தலைவராக கௌரவ பாராளுமன்ற உறுப்பினர் கருணநாதன் இளங்குமரன் அவர்கள் நியமிக்கப்பட்டிருப்பதாகவும் குறிப்பிட்டார்.
மேலும், இக் கூட்டத்தில் கௌரவ கடற்றொழில் அமைச்சர் அவர்கள் கலந்துகொள்வது தமக்கு மகிழ்ச்சி அளிப்பதாகவும் தெரிவித்தார். யாழ்ப்பாண மாவட்டத்தின் அபிவிருத்தி சார்ந்த செயற்பாடுகளில் அனைவரும் ஒருங்கிணைந்து எவ்வாறு செயல்படலாம், மாவட்டத்தில் போக்குவரத்துத் துறை சார்ந்த நடவடிக்கைகளை எவ்வாறு முன்னெடுக்கலாம், அதேபோன்று வீதி அபிவிருத்தி தொடர்பான விடயங்களில் எவ்வாறு கூடுதல் அக்கறை செலுத்தி, மாவட்டத்தை போக்குவரத்துத் துறையில் சிறந்ததும் ஆரோக்கியமானதுமான மாவட்டமாக மாற்ற முடியும் என்பதற்காக அனைவரின் ஒத்துழைப்பையும் வழங்குமாறும் அரசாங்க அதிபர் கேட்டுக்கொண்டார்.
இக் கூட்டத்தில் யாழ்ப்பாண போக்குவரத்து உபகுழுக் கூட்டத்தின் தலைவரும் பாராளுமன்ற உறுப்பினருமான கௌரவ கருணநாதன் இளங்குமரன் அவர்கள் கருத்துத் தெரிவிக்கையில், யாழ்ப்பாண மாவட்டத்தின் வீதி அபிவிருத்தி தொடர்பான வேலைத்திட்டங்களின் முன்னேற்ற அறிக்கைகளையும், மத்திய அரசாங்கத்தின் வீதிகளுக்கான நிதி ஒதுக்கீடுகள் தொடர்பாகவும் ஆராய்வதற்காக இக் கூட்டம் ஒழுங்கமைக்கப்பட்டுள்ளதாகத் தெரிவித்தார். தற்போது சர்வதேச சூழ்நிலைகளின் காரணமாக வெளிநாடுகளில் இருந்து வீதிகளுக்குத் தேவையான தார் கொள்வனவு குறைவடைந்துள்ளதாகவும், அதனால் வீதி வேலைத்திட்டங்களை முன்னெடுப்பதில் சிரமங்களை எதிர்நோக்க வேண்டியுள்ளதாகவும் தெரிவித்தார். எனினும், மாவட்டத்திற்கு ஒதுக்கப்படும் நிதி மீண்டும் நிதி அமைச்சிற்கு திரும்பிச் செல்லாமல், மக்களின் பயன்பாட்டிற்கு முழுமையாக பயன்படுத்தப்பட வேண்டிய பொறுப்பு அனைவருக்கும் இருப்பதாகவும் குறிப்பிட்டார். மேலும், நாட்டின் வீதி தேவைகளை அடிப்படையாகக் கொண்டு முன்னுரிமை வழங்கி திட்டங்களை நடைமுறைப்படுத்தும்போது, ஒதுக்கப்பட்ட நிதியை முழுமையாகப் பயன்படுத்த முடியும் எனவும் தெரிவித்தார். வீதி அபிவிருத்தி தொடர்பான தேவைகளை பிரதேச செயலாளர்கள் ஊடாக முன்மொழியுமாறும் கேட்டுக்கொண்டார்.
மேலும், ஆரம்ப காலங்களில் முன்னெடுக்கப்பட்ட வீதி அபிவிருத்தித் திட்டங்களை துரிதப்படுத்துவதற்கான நடவடிக்கைகள் அமைச்சின் ஊடாக மேற்கொள்ளப்பட்டு வருவதாகவும், அரசாங்கத்தின் கொள்கைகளுக்கு அமைய அனைத்து வீதிகளும் தரமான வீதிகளாக அமைக்கப்பட வேண்டும் எனவும் தெரிவித்தார். 2027 ஆம் ஆண்டில் அபிவிருத்தி மேற்கொள்ளப்பட வேண்டிய வீதிகள் தொடர்பாக பிரதேச செயலாளர்களுடன் கலந்துரையாடி, முன்னுரிமை அடிப்படையில் வீதிகளின் விபரங்கள் அனுப்பி வைக்கப்படும் எனவும் கெளரவ பாராளுமன்ற உறுப்பினர் தெரிவித்தார். மேலும், பாடசாலை போக்குவரத்து சேவைகள் தொடர்பான விபரங்களை கல்வித் திணைக்களங்கள் ஊடாக சமர்ப்பிக்குமாறும் தெரிவிக்கப்பட்டது. விசேட தினங்களில் நயினாதீவு கடற்போக்குவரத்து படகுச் சேவையை அதிகரிக்க வேண்டுமென்றும் அறிவுறுத்தப்பட்டது.
கௌரவ அமைச்சரும் மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள் கருத்துத் தெரிவிக்கையில், இது மிகவும் முக்கியத்துவம் வாய்ந்த கூட்டம் எனக் குறிப்பிட்டார். தற்போது வீதிப் பணிகளுக்காக கூடுதல் நிதி ஒதுக்கப்பட்டுள்ள போதிலும், வீதிகளை புனரமைப்பதற்குத் தேவையான உபகரணங்களில் பற்றாக்குறை ஏற்பட்டுள்ளதாகவும் தெரிவித்தார். இந்த நெருக்கடியான சூழ்நிலையிலும் வீதிப் பணிகளை எவ்வாறு தொடர்ந்து முன்னெடுக்கலாம் என்பது குறித்து ஆராய வேண்டிய அவசியம் இருப்பதாகவும், வீதி அபிவிருத்தி அதிகார சபை (RDA) முன்னர் மிகவும் சிறப்பாக செயல்பட்டதாகவும் குறிப்பிட்டார். முன்னைய காலகட்டங்களில் மேற்கொள்ளப்பட்ட வீதி அபிவிருத்திப் பணிகளை முன்மாதிரியாகக் கொண்டு அடுத்த கட்ட நடவடிக்கைகளை திட்டமிட வேண்டும் என்றும் கெளரவ அமைச்சர் கேட்டுக் கொண்டார். பிரதேச செயலக ஒருங்கிணைப்புக் குழுக் கூட்டங்களில் எடுக்கப்பட்ட தீர்மானங்கள், 2025 மற்றும் 2026 ஆம் ஆண்டுக்கான வீதி அபிவிருத்தி, டித்வா புயலால் பாதிக்கப்பட்ட வீதிகளின் புனரமைப்பு, வீதி அபிவிருத்தி அதிகார சபையின் ஆளுகைக்குட்பட்ட வீதிகள், இரண்டாவது ஒருங்கிணைந்த வீதி அபிவிருத்தி முதலீட்டுத் திட்டத்தின் கீழ் நிறைவு பெறாத வீதிகளின் மதிப்பீடு, வீதி அபிவிருத்தித் திணைக்களத்தின் கீழ் 2026 ஆம் ஆண்டு நடைமுறைப்படுத்தப்பட்ட திட்டங்கள், புகையிரதத் திணைக்களத்தின் சேவைகள், இலங்கை போக்குவரத்து சபையின் சேவைகள், ஆளணி, கிராமிய வீதி அபிவிருத்தித் திட்டங்கள் உள்ளிட்ட பல்வேறு விடயங்கள் விரிவாக ஆராயப்பட்டு ஆக்கபூர்வமான தீர்மானங்கள் எடுக்கப்பட்டன.
அபிவிருத்தி மேற்கொள்ளப்பட வேண்டிய வீதிகள் முன்னுரிமை அடிப்படையில் பரிசீலிக்கப்பட்டு இக் கூட்டத்தில் அனுமதி வழங்கப்பட்டதுடன், அவற்றிற்கு மாவட்ட ஒருங்கிணைப்புக் குழுக் கூட்டத்தின் இறுதி அனுமதி பெறவும் தீர்மானிக்கப்பட்டது. இக் கூட்டத்தில் மேலதிக அரசாங்க அதிபர் (காணி) திரு. பா. ஜெயகரன், திட்டமிடல் பணிப்பாளர் இ. சுரேந்திரநாதன், பிரதம கணக்காளர் எஸ். கிருபாகரன், மாவட்ட பிரதித் திட்டமிடல் பணிப்பாளர் திரு. எஸ். சிவகுமாரன், பிரதேச செயலாளர்கள், வீதி அபிவிருத்தி அதிகார சபையின் பிரதம பொறியியலாளர், வீதி அபிவிருத்தித் திணைக்களத்தின் பொறியியலாளர்கள், அரச மற்றும் தனியார் போக்குவரத்து நிறுவனங்களின் முகாமையாளர்கள், துறைசார் திணைக்களங்களின் தலைவர்கள் உள்ளிட்ட பலர் பங்குபற்றினர்.









