இலங்கை மத்திய வங்கியின் ஏற்பாட்டில், மாவட்டச் செயலக உத்தியோகத்தர்களுக்கான டிஜிட்டல் கொடுப்பனவுகள் தொடர்பான விழிப்புணர்வு செயலமர்வு யாழ்ப்பாண மாவட்ட மேலதிக அரசாங்க அதிபர் க. சிவகரன் அவர்களின் தலைமையில் இன்று (07.08.2026) காலை 10.00 மணிக்கு யாழ்ப்பாண மாவட்டச் செயலக கேட்போர் கூடத்தில் நடைபெற்றது. இந் நிகழ்வில் இலங்கை மத்திய வங்கியின் கொடுப்பனவுகள் மற்றும் தீர்ப்பனவுகள் திணைக்களத்தின் (Payments and Settlements Department) சிரேஷ்ட உதவிப் பணிப்பாளர்களான ஜி. கே. மொஹொட்டி மற்றும் ஏ. எஸ். எம். பி. எம். பி. அகலவத்த ஆகியோருடன், பிராந்திய முகாமையாளர் எஸ். பகீரதி உள்ளிட்ட அதிகாரிகளும் கலந்துகொண்டனர். இச் செயலமர்வில், தலைமையுரையாற்றிய மேலதிக அரசாங்க அதிபர், இன்றைய காலகட்டத்தில் டிஜிட்டல் கொடுப்பனவு முறைமை நாட்டின் பொருளாதார வளர்ச்சிக்கும், திறன்மிக்க சேவை வழங்கலுக்கும் முக்கிய பங்காற்றுவதாகக் தெரிவித்தார். டிஜிட்டல் பரிவர்த்தனைகள் வேகமானவை, பாதுகாப்பானவை, வெளிப்படைத்தன்மை கொண்டவை என்பதுடன், பொதுமக்களுக்கும் அரச நிறுவனங்களுக்கும் இலகுவான கொடுக்கல் வாங்கல்களை மேற்கொள்ள வழிவகுப்பதாகவும் தெரிவித்தார்.
அரசின் கொள்கைகளில் டிஜிட்டல் மயமாக்கல், வறுமை ஒழிப்பு மற்றும் "கிளீன் ஸ்ரீலங்கா" ஆகியவை முக்கிய செயற்பாடுகளாக முன்னெடுக்கப்படுகின்றன என்றும், அனைத்து அரச திணைக்களங்களும் தங்களது கொடுப்பனவு மற்றும் வரவு செலவுத் தொடர்பான நடவடிக்கைகளை படிப்படியாக டிஜிட்டல் முறைக்கு மாற்றும் பணிகள் முன்னெடுக்கப்பட்டு வருவதாகவும் தெரிவித்தார். மேலும், அரசிற்கு செலுத்தப்படும் பல்வேறு கட்டணங்களையும் டிஜிட்டல் முறையில் செலுத்துவதற்கான வசதிகள் தற்போது உருவாக்கப்பட்டுள்ளன என்றும், பணத்தாள்கள் மற்றும் நாணயங்களின் பயன்பாட்டைக் குறைத்து, டிஜிட்டல் பரிவர்த்தனைகளை ஊக்குவிப்பதே காலத்தின் தேவையாகும் எனவும், இதற்காக அரச உத்தியோகத்தர்களும் பொதுமக்களும் விழிப்புணர்வுடன் செயற்பட வேண்டியது அவசியம் எனவும் குறிப்பிட்டார். இந் நிகழ்வில் மத்திய வங்கியின் உத்தியோகத்தரான மாலினி அச்சுதன் அவர்கள் டிஜிட்டல் கொடுப்பனவு முறைமைகள், அவற்றின் பாதுகாப்பு, பயன்பாட்டு முறைகள் மற்றும் பொதுமக்கள் பெறும் நன்மைகள் தொடர்பாக முன்வைப்பு மூலம் விரிவாக எடுத்துரைத்தார். அத்துடன், மாவட்டச் செயலக வளாகத்தில் வங்கிகள் மற்றும் நிதி நிறுவனங்கள் அமைத்திருந்த தகவல் நிலையங்கள் ஊடாக டிஜிட்டல் கொடுப்பனவு சேவைகள் தொடர்பான விளக்கங்களும், நடைமுறை வழிகாட்டல்களும் அரச உத்தியோகத்தர்களுக்கு வழங்கப்பட்டன.
 
 
1 2 3 4 5 6 7 8 9 10 11 12 13 14
 
இலங்கை மத்திய வங்கியின் ஏற்பாட்டில் "PayDigital Jaffna" விழிப்புணர்வு மற்றும் அறிமுக நிகழ்வு இன்று (07.08.2026) வெள்ளிக்கிழமை யாழ்ப்பாணம் கார்கில்ஸ் சதுக்க வளாகத்தில் சிறப்பாக ஆரம்பித்து வைக்கப்பட்டது.டிஜிட்டல் கொடுப்பனவுகளை ஊக்குவித்தல், டிஜிட்டல் நிதி அறிவை மேம்படுத்தல் மற்றும் வட மாகாண மக்களை பாதுகாப்பானதும் இலகுவானதுமான டிஜிட்டல் கொடுப்பனவு முறைகளைப் பயன்படுத்த ஊக்குவித்தல் ஆகிய நோக்கங்களுடன் இந் நிகழ்வு ஏற்பாடு செய்யப்பட்டுள்ளது. இந் நிகழ்வின் பிரதம விருந்தினராக வடக்கு மாகாண கௌரவ ஆளுநர் நா. வேதநாயகன் அவர்கள் கலந்து கொண்டு நிகழ்வை உத்தியோகபூர்வமாக ஆரம்பித்து வைத்தார். அத்துடன், தனது முதல் உத்தியோகபூர்வ டிஜிட்டல் பணப்பரிமாற்றத் தொடுகை பணப்பரிவர்த்தனையையும் மேற்கொண்டார். நிகழ்வில் இலங்கை மத்திய வங்கியின் கொடுப்பனவுகள் மற்றும் தீர்வுகள் திணைக்கள இயக்குநர் வசந்த அளுவிஸ், யாழ்ப்பாண மாவட்ட மேலதிக அரசாங்க அதிபர் எஸ். சிவகரன், இலங்கை மத்திய வங்கியின் கிளிநொச்சிப் பிராந்திய முகாமையாளர் திருமதி பகீரதி செந்தில்மாறன், யாழ்ப்பாண மாவட்ட பிரதிப் பொலிஸ்மா அதிபர் G.H. மாறப்பன மற்றும் Cargills Ceylon PLC நிறுவனத்தின் பிரதித் தலைவர் மற்றும் பிரதம நிறைவேற்று அதிகாரி திரு. ரஞ்சித் பேஜ் ஆகியோர் உள்ளிட்ட பலர் கலந்து கொண்டனர்.
தொடர்ந்து, நிகழ்வில் பங்கேற்றிருந்த அரச மற்றும் தனியார் வங்கிகள், நிதி நிறுவனங்களின் Lanka QR குறியீடுகள் வர்த்தகர்களிடம் அதிதிகளால் வழங்கப்பட்டன. இக் QR குறியீடுகள் மூலம் பாதுகாப்பாகவும் இலகுவாகவும் டிஜிட்டல் கொடுக்கல் வாங்கல்கள் மேற்கொள்ள முடியும் என தெரிவிக்கப்பட்டது. இந் நிகழ்வு இன்று மற்றும் நாளை (08.08.2026) யாழ்ப்பாணம் கார்கில்ஸ் சதுக்கத்தில் காலை 8.30 மணி முதல் மாலை 7.00 மணி வரை நடைபெறவுள்ளது. இதில் பங்கேற்கும் பொதுமக்கள், டிஜிட்டல் கொடுப்பனவு முறைகள் நாளாந்த பரிவர்த்தனைகளை எவ்வாறு எளிதாக்குகின்றன என்பது தொடர்பாக அரச மற்றும் தனியார் வங்கிகள், நிதி நிறுவனங்களின் பிரதிநிதிகளுடன் கலந்துரையாடி, நடைமுறை வழிகாட்டல்களையும் பெற்றுக்கொள்ள முடியும். இந் நிகழ்வில் Cargills Ceylon PLC நிறுவனத்தின் அதிகாரிகள், இலங்கை மத்திய வங்கியின் உயரதிகாரிகள், அரச மற்றும் தனியார் வங்கிகள், நிதி நிறுவனங்களின் பிரதிநிதிகள், வர்த்தக சமூகத்தினர் உள்ளிட்ட பல்வேறு தரப்பினரும் கலந்துகொண்டனர்.

1 2 3 4 5 6 7 8 9 12 13 14 15 16
யாழ்ப்பாண மாவட்டச் செயலகத்தின் அனர்த்த முகாமைத்துவ நிலையத்தின் பதில் உதவிப் பணிப்பாளராக நியமிக்கப்பட்டுள்ள திரு. ஏ.எம்.ஆர்.என்.கே. அழககோன் அவர்கள், இன்றைய தினம் (06.08.2026) காலை 9.00 மணியளவில் யாழ்ப்பாண மாவட்ட அரசாங்க அதிபர் முன்னிலையில் தமது கடமைகளை உத்தியோகபூர்வமாகப் பொறுப்பேற்றுக் கொண்டார். இதனைத் தொடர்ந்து, யாழ்ப்பாண மாவட்ட அரசாங்க அதிபர் தலைமையில் நடைபெற்ற கலந்துரையாடலின்போது, டித்வா புயல் அனர்த்தத்தின் போது சிறப்பாக கடமையாற்றிய மாவட்ட அனர்த்த முகாமைத்துவ நிலையத்தின் உதவிப் பணிப்பாளர், அனர்த்த முகாமைத்துவ நிலைய உத்தியோகத்தர்கள், மாவட்ட அனர்த்த நிவாரண சேவைகள் அலுவலர் மற்றும் அவர்களது உத்தியோகத்தர்கள் மற்றும் மாவட்டச் செயலக உத்தியோகத்தர்கள் அனைவருக்கும் அரசாங்க அதிபர் தனது மனமார்ந்த நன்றியினைத் தெரிவித்தார். அதேவேளை, புதிதாக யாழ்ப்பாண மாவட்ட அனர்த்த முகாமைத்துவ நிலையத்தின் உதவிப் பணிப்பாளராகப் பொறுப்பேற்றுள்ள திரு. ஏ.எம்.ஆர்.என்.கே. அழககோன் அவர்களை வரவேற்று, புதிய பொறுப்பில் சிறப்பாகப் பணியாற்ற வாழ்த்துக்களையும் தெரிவித்தார்.
மேலும், இதுவரை யாழ்ப்பாண மாவட்ட அனர்த்த முகாமைத்துவ நிலையத்தின் உதவிப் பணிப்பாளராகப் பணியாற்றிய திரு. ரி.என். சூரியராஜா அவர்கள், மன்னார் மாவட்ட அனர்த்த முகாமைத்துவ நிலையத்தில் உதவிப் பணிப்பாளராக கடமையேற்க்கவுள்ளார். இந் நிகழ்வில் மேலதிக அரசாங்க அதிபர், பிரதம கணக்காளர், திட்டமிடல் பணிப்பாளர், பிரதம பொறியியலாளர், பிரதம உள்ளகக் கணக்காய்வாளர் உள்ளிட்ட மாவட்டச் செயலகத்தின் பதவிநிலை உத்தியோகத்தர்கள், அனர்த்த முகாமைத்துவ நிலைய உத்தியோகத்தர்கள் மற்றும் அனர்த்த நிவாரண சேவைகள் உத்தியோகத்தர்கள் கலந்துகொண்டனர்.
 
1 2 3 4 5 6 8 8 9
யாழ்ப்பாண மாவட்ட செயலகம் மற்றும் பிரதேச செயலகங்கள், திணைக்களங்களில் பணி புரிகின்ற அரச உத்தியோகத்தர்களுக்கான இரண்டாம் மொழி சிங்கள கற்கைநெறிக்கான இறுதி நாள் நிகழ்வு இன்றைய தினம் (05.08.2026) யாழ்ப்பாண பிரதேச செயலக மாநாட்டு மண்டபத்தில் காலை 10.00 மணிக்கு ஆரம்பமாகி நடைபெற்றது. இந்நிகழ்வில் பிரதம விருந்தினராக யாழ் மாவட்ட மேலதிக அரசாங்க அதிபர் கை.சிவகரன் அவர்களும் சிறப்பு விருந்தினர்களாக யாழ்ப்பாண பிரதேச செயலாளர் திருமதி சிவகாமி உமாகாந்தன், கற்கை நெறியின் வளவாளர் P.G.D சுனில் ஆரியரட்ன, வேலனை ஆசிரியர் வள நிலைய முகாமையாளர் எம்.அலெஸரீன், அரசகரும மொழிகள் திணைக்களத்தின் வடமாகாண இணைப்பாளர் N.உமாகாந் ஆகியோர் கலந்து சிறப்பித்தனர். இதன்போது கலந்துகொண்டிருந்த அதிதிகள் வரவேற்கப்பட்டதைத் தொடர்ந்து, 150 மணித்தியால கற்கை நெறியினை பூர்த்தி செய்த உத்தியோகத்தர்களின் கற்கை வெளிப்பாடுகளை வெளிப்படுத்தும் வகையில் கலாசார பண்பாட்டு நிகழ்வுகள் இடம்பெற்றது.
இந் நிகழ்வில் உரையாற்றிய மேலதிக அரசாங்க அதிபர் அவர்கள், இரண்டாம் மொழித்திறனானது தொழில் முன்னேற்றத்திற்கும் அரச சேவையின் செயற்திறனுக்கும் இன்றியமையாதது. ஏனெனில் இரண்டாம் மொழியான சிங்கள மொழியை சிறந்த முறையில் கற்றுக்கொள்வது அரச அலுவலக பணிகளை இலகுவாக மேற்கொள்ளவும், பதவி உயர்வு உள்ளிட்ட தொழில்முறை முன்னேற்றங்களுக்கும் பெரிதும் உதவும் எனத் தெரிவித்தார். மேலும், 150 மணித்தியால மொழிப் பயிற்சியுடன் கற்றலை நிறுத்திவிடாமல், NVQ உள்ளிட்ட மேற்படிப்புகள் மற்றும் சான்றிதழ் பயிற்சிகளின் ஊடாக மொழித்திறனை தொடர்ச்சியாக மேம்படுத்திக்கொள்ள வேண்டும் எனவும், முன்னைய காலங்களில் சுய கற்றல் ஊடாகவே பெருமளவானவர்கள் மொழி அறிவை மேம்படுத்திக் கொண்டனர். மேலும், Google Translate போன்ற மொழிபெயர்ப்பு செயலிகளை முழுமையாகச் சார்ந்திருக்காமல், முதலில் சிங்கள ஆவணங்களை வாசித்து புரிந்துகொள்ள முயற்சிப்பதன் மூலம் மொழியறிவும் கற்றலின் ஆர்வமும் அதிகரிக்கும் என அவர் குறிப்பிட்டார்.
குறித்த மொழிப் பயிற்சியில் பங்கேற்ற பயிலுநர்கள் சிங்கள மொழித் திறனுடன், பாடல், நடனம் உள்ளிட்ட பல்வேறு தனித்திறமைகளையும் சிறப்பாக வெளிப்படுத்தியிருந்ததை பாராட்டிய மேலதிக அரசாங்க அதிபர், நிகழ்வை ஒழுங்குபடுத்திய ஆசிரியருக்கும் உத்தியோகத்தர்களுக்கும் தனது வாழ்த்துகளையும் பாராட்டுக்களையும் தெரிவித்தார். நாடளாவிய ரீதியில் தேசிய மொழிகள் திணைக்களத்தினால் நடாத்தப்படுகின்ற இக் கற்கை நெறியில், யாழ்ப்பாண மாவட்டத்தின் பல்வேறு திணைக்களங்களில் கடமையாற்றும் 64 அரச உத்தியோகத்தர்கள் கலந்துகொண்டனர். அரச உத்தியோகத்தர்களின் ஆளுமை மற்றும் மொழிவாண்மையை மேம்படுத்துவதற்கும் அவர்களின் அலுவலக கடமையின் போது இரண்டாம் மொழி தொடர்பாடலை மேம்படுத்துவதற்காகவும் இக்கற்கை நெறி அரச உத்தியோத்தர்களுக்காக ஏற்பாடு செய்யப்பட்டுள்ளமை குறிப்பிடத்தக்கது.
1 2 3 4 5 6 7 8 9 11 1012 13 14 15 16 1719 20 21
மானிப்பாய் மருதடி முன்பள்ளியின் "விளையாடுவோம் மகிழ்வோம்" விளையாட்டு விழா மானிப்பாய் மருதடி வித்தியாசகர் ஆலய தர்மகர்த்தா சபையின் கல்விக்குழு பொறுப்பாளர் திரு. T. பிரதீபன் அவர்கள் தலைமையில் 05.08.2026 அன்று மானிப்பாய் மருதடி முன்பள்ளிக்கு அருகிலுள்ள கோயில் வீதி அமைந்துள்ள கல்லூரி விளையாட்டு மைதானத்தில் நடைபெறுகிறது. இந்நிகழ்விற்கு பிரதம விருந்தினராக யாழ் மாவட்ட அரசாங்க அதிபர் திரு. மருதலிங்கம் பிரதீபன் அவர்கள் கலந்துகொண்டார். மேலும், செல்வகுமாரி சுப்பிரமணியம் (முன்னாள் ஆசிரிய ஆலோசகர், வலிகாமம் வலயம்), திரு. சிறில் பேஸ்ரட்‌ணம் (ஆசிரிய வளவாளர், முன்பள்ளி வலிகாமம் வலயம்) ஆகியோர் சிறப்பு விருந்தினர்களாகவும், திரு. T. தர்மாகரன் (தலைவர், மாணிப்பாய் மருதடி வித்தியாசகர் ஆலய தர்மகர்த்தா சபை) கௌரவ விருந்தினராகவும் கலந்து கலந்து கொண்டார்கள்.
இந்நிகழ்விற்கு பிரதம விருந்தினராக யாழ் மாவட்ட அரசாங்க அதிபர் கருத்து தெரிவிக்கையில், மனித வாழ்க்கைப் பருவங்களில் முன்பள்ளிப் பருவம் மிகவும் முக்கியத்துவம் வாய்ந்ததாகும். ஒரு குழந்தை குடும்பச் சூழலிலிருந்து முதன்முறையாக வெளி உலகுடன் தொடர்பு கொண்டு சமூகத்துடன் இணையும் இடம் முன்பள்ளியாகும் எனவும், முன்பள்ளிகளில் வழங்கப்படும் கல்வி, அறிவு வளர்ச்சி மற்றும் சமூகமயமாக்கல் செயற்பாடுகள் குழந்தையின் ஆளுமை வளர்ச்சியில் முக்கிய பங்காற்றுகின்றன எனத் தெரிவித்தார். மேலும், ஒரு குழந்தை குடும்பச் சூழலிலிருந்து சமூகச் சூழலுடன் முதன்முறையாக கலக்கும் இடம் முன்பள்ளி என்பதால், அங்குப் பெறும் அனுபவங்களும் கற்றல்களும் அதன் எதிர்கால வாழ்க்கையை நேர்மறையாக வடிவமைக்கின்றன எனவும், நாட்டின் பல பகுதிகளில் முன்பள்ளிகள் சிறப்பாக இயங்கி வருகின்றன எனவும் தெரிவித்தார். அவற்றில் பணியாற்றும் முன்பள்ளி ஆசிரியர்கள் மிகவும் குறைந்த ஊதியத்தில் அர்ப்பணிப்புடன் சேவையாற்றி வருகின்றனர். அவர்களின் அர்ப்பணிப்பு மிக்க பணிக்காக இந்தச் சந்தர்ப்பத்தில் பாராட்டுகளைத் தெரிவித்துக் கொள்வதாக குறிப்பிட்டார்.
மேலும், முன்பள்ளியே ஒரு குழந்தையின் எதிர்காலத்தை நிர்ணயிக்கும் முதல் கல்விப் படியாகும். அந்த வகையில் மானிப்பாய் மருதடி விநாயகர் ஆலய முன்பள்ளி நிர்வாகத்தின் கீழ் இயங்கும் இம்முன்பள்ளி, குழந்தைகளுக்கு கல்வியுடன் சமூகப் பண்புகள், குடும்ப விழுமியங்கள், ஆன்மிக நெறிமுறைகள் மற்றும் நல்லொழுக்கங்களைப் போதிக்கும் சிறந்த சூழலை வழங்கி வருகிறது எனவும் தெரிவித்தார். இன்று இம்முன்பள்ளி மாணவர்களுக்காக விளையாட்டுப் போட்டிகள் ஏற்பாடு செய்யப்பட்டுள்ளமை பாராட்டத்தக்க விடயமாகும். இவ்வாறான போட்டிகள் குழந்தைகளின் உடலாரோக்கியத்தை மேம்படுத்துவதோடு, வெற்றி தோல்விகளை சமமாக ஏற்றுக்கொள்ளும் மனப்பாங்கையும் வளர்க்கின்றன எனவும், முன்பள்ளியில் கற்றுக் கொள்ளும் ஒழுக்கம், சமூகப் பழக்கவழக்கங்கள் மற்றும் வாழ்க்கைத் திறன்கள் குழந்தைகள் வளர்ந்து முழுமையான ஆளுமையுடன் சமூகத்தில் திகழும் காலத்திலும் அவர்களுக்கு பெரும் பயனை அளிக்கும். எனவும் தெரிவித்தார். ஆரோக்கியமானதும் பொறுப்புணர்வுமிக்கதுமான எதிர்காலச் சமூகத்தை உருவாக்குவதில் முன்பள்ளிகள் மிகப் பெரிய பங்காற்றுகின்றன என அரசாங்க அதிபர் தெரிவித்தார். இந் நிகழ்வில் மாணவர்களின் விளையாட்டுத் திறமைகளை வெளிப்படுத்தும் பல்வேறு போட்டிகள் மற்றும் கலைநிகழ்ச்சிகள் இடம்பெற்றன. பெற்றோர்கள், பழைய மாணவர்கள் மற்றும் பொதுமக்கள் கலந்துகொண்டு கொண்டார்கள்.
 
1 2 3 4 5 6 7