இலங்கை தேசிய இளைஞர் சேவைகள் மன்றத்தின் 36 ஆவது போட்டி மாத்தறையில் இம் மாதம் 11 ஆம் மற்றும் 12 ஆம் திகதிகளில் நடைபெற்றதற்கு அமைவாக, இவ் போட்டித் தொடரின் கபடி போட்டியில் யாழ்ப்பாண மாவட்ட பெண்கள் அணியினர் தேசிய ரீதியில் முதலாம் இடத்தினை பெற்றமைக்காக அரசாங்க அதிபர் திரு.மருதலிங்கம் பிரதீபன் அவர்களால் இன்றைய தினம் (15.07.2026) கெளரவிக்கப்பட்டார்கள்.
இதன் போது அரசாங்க அதிபர் கருத்துத் தெரிவிக்கையில், தேசிய இளைஞர் மன்றத்தினால் தேசிய ரீதியாக நடைபெற்ற 36 ஆவது தேசிய போட்டித்தொடரின் கபடி போட்டியில் யாழ்ப்பாண மாவட்டம் முதலாவது இடத்தினை பெற்றமை மகிழ்வான விடயம் எனவும், அதிலும் கொழுப்பு மாவட்டத்தில் இரு அணிகள் உள்ளடங்களாக ஒவ்வொரு மாவட்டத்திலுமிருந்து ஒவ்வொரு அணி என்ற ரீதியில் 26 அணிகள் பங்குபற்றி முதலிடம் பெற்றுள்ளமை பாராட்ட வேண்டிய விடயம் எனவும், மேலும் கபடி இறுதிப் போட்டியில் வட மாகாணத்திலிருந்து யாழ்ப்பாணம் மற்றும் கிளிநொச்சி மாவட்ட மகளிர் அணியினர் பங்குபற்றி இருந்தார்களெனவும், அந்த வகையில் முதலாம் இடத்தினை யாழ்ப்பாண மாவட்டமும் இரண்டாவது இடத்தினை கிளிநொச்சி மாவட்டமும் பெற்றுள்ளமைக்கு இவ் விரண்டு மாவட்ட அணி வீராங்கனைகளுக்கும் தமது வாழ்த்துக்களைத் தெரிவித்துக் கொண்டார். மேலும் இப்போட்டிக்கு உறுதுணையாகவிருந்த தேசிய இளைஞர் சேவைகள் மன்றத்தின் யாழ்ப்பாண மாவட்ட உதவிப் பணிப்பாளர் திருமதி வினோதினி அவர்களுக்கும் பயிற்றுநர்களுக்கும் ஏனைய உத்தியோகத்தர்களுக்கும் அரசாங்க அதிபர் பாராட்டுகளைத் தெரிவித்துக் கொண்டார். மேலும் தேசிய இளைஞர் சேவைகள் மன்றமானது இளைஞர் யுவதிகள் வழிப்படுத்தி ஆற்றுப்படுத்தி இளைஞர்களுக்கு உறுதுணையாக இருந்து வருவதாகவும் குறிப்பிட்டதுடன், கபடி போட்டிக்கு நீண்ட காலப் பயிற்சி அவசியம் எனவும், அந்த வகையில் எமது மாணவர்கள் இப்பயிற்சியின் சிறந்த பெறுபேற்றை பெறுவதற்கு பெற்றோர்களும் தமது பங்களிப்பினை வழங்கி உள்ளார்கள் எனவும், ஆதலால் மாணவர்கள் கல்வி நிலையிலும் உயர்வு அடைய வேண்டும் எனவும் அரசாங்க அதிபர் குறிப்பிட்டதுடன், தேசிய போட்டிகளிலும் சர்வதேச போட்டிகளிலும் எமது மாணவிகள் பங்குபற்றி சாதனைகள் நிலைநாட்ட வேண்டும் எனவும் தமது வாழ்த்துக்களை தெரிவித்துக் கொண்டார்.
யாழ்ப்பாண மாவட்ட அணியில் உள்ள செல்வி வி. டிலக்சஷா மற்றும் செல்வி ஆர். பிரியவர்ணா ஆகியோர் இலங்கை தேசிய கபடி மகளிர் அணியில் இடம் பெற்றுள்ளார்கள் என்பது குறிப்பிடத்தக்கது. இந் நிகழ்வில் குறித்த போட்டியில் வெற்றி பெற்ற வீராங்கனைகள் மற்றும் தேசிய இளைஞர் சேவைகள் மன்றத்தின் உதவிப் பணிப்பாளர் திருமதி வினோதினி சிறிமேனன், பயிற்றுனர்கள் யாழ். மாவட்ட செயலக பிரதான நுழைவாயிலில் இருந்து மாலை அணிவித்து வரவேற்கப்பட்டனர். தொடர்ந்து வெற்றி ஈட்டிய வீராங்கனைகள் அவர்தம் பயிற்றுனர்கள் அரசாங்க அதிபர் மற்றும் பதவிநிலை உத்தியோகத்தர்களால் பதக்கம் அணிவித்து கௌரவிக்கப்பட்டனர். இந் நிகழ்வில் மேலதிக அரசாங்க அதிபர், மேலதிக அரசாங்க அதிபர் (காணி) உள்ளிட்ட பதவிநிலை உத்தியோகத்தர்கள், மாவட்ட விளையாட்டு அபிவிருத்தி உத்தியோகத்தர், தேசிய இளைஞர் சேவைகள் மன்றத்தின் உத்தியோகத்தர்கள் என பலரும் பங்குபற்றினார்கள்.

யாழ். மாவட்டச் செயலக உத்தியோகத்தர்களுக்கான டெங்கு தொடர்பான விழிப்புணர்வு நிகழ்வு யாழ்ப்பாண மாவட்ட மேலதிக அரசாங்க அதிபர் திரு. க.சிவகரன் அவர்களின் தலைமையில் இன்றைய தினம்(15.07.2026) காலை 11:00 மணிக்கு மாவட்ட செயலக மாநாட்டு மண்டபத்தில் நடைபெற்றது. இவ் விழிப்புணர்வு நிகழ்வில் வட மாகாண சுகாதார சேவைகள் பணிமனையின் வைத்தியர் திரு.என்.பரமேஸ்வரன் அவர்கள் கலந்து கொண்டு டெங்கு நோய்க்காரணி, டெங்கு நோய்க்கான அறிகுறிகள், டெங்கு நோகள், டெங்கு பரவும் இடங்கள் அதற்கான நோய்ய் ஏற்பட்டால் மேற்கொள்ளும் நடவடிக்கை தடுப்பு நடவடிக்கைகள், நுளம்பு பெருகும் இடங்களை அழிப்பது, டெங்கு நோய்க்கான வைத்திய ஆலோசனைகள் என்பன தொடர்பில் கருத்துரைகளை வழங்கினார். இவ் விழிப்புணர்வு நிகழ்வில் நல்லூர் பொதுச் சுகாதார பரிசோதகர் திரு. யோ. சுகிர்தன் மற்றும் அரியாலை பொதுச் சுகாதார பரிசோதகர் திரு. பி. சதீஷ்குமார், ஆகியோரும் கலந்து கொண்டனர்

யாழ்ப்பாண மாவட்டத்தில் 2025 ஆம் ஆண்டு மேற்கொள்ளப்பட்ட அபிவிருத்தித் திட்டங்கள், அதிமேதகு சனாதிபதி மற்றும் கெளரவ அமைச்சர்கள் தலைமையில் நடைபெற்ற கூட்டங்கள் மற்றும் நிகழ்வுகளை உள்ளடக்கி தொகுக்கப்பட்ட "யாழ்ப்பாண மாவட்டச் செயலக மடல்" - இன்றைய தினம் (09.07.2026) அரசாங்க அதிபர் திரு. மருதலிங்கம் பிரதீபன் அவர்களால் பொது நிர்வாக உள்நாட்டலுவல்கள், மாகாண சபைகள், மற்றும் உள்ளூராட்சி அமைச்சர் கௌரவ பேராசிரியர் ஏ. எச். எம். எச். அபயரட்ண அவர்களிடம் அமைச்சில் வைத்து கையளித்து வெளியிடப்பட்டது. மேலும், பொது நிர்வாக உள்நாட்டலுவல்கள் பிரதி அமைச்சர் கெளரவ பி. ருவன் சேனாரத் மற்றும் அமைச்சின் செயலாளர் திரு. எஸ். ஆலோக பண்டார ஆகியோரிடமும் யாழ்ப்பாண மாவட்டச் செயலக மடல் அரசாங்க அதிபரால் கையளிக்கப்பட்டது.

இலங்கை பொதுபயன்பாடுகள் ஆணைக்குழுவின் ஏற்பாட்டிலும் யாழ்ப்பாணத்தில் உள்ள மின்னியலாளர்களுக்கு தேசிய தொழில் தகைமை (NVQ 3) சான்றிதழ் வழங்கும் நிகழ்வு இலங்கை பொதுப் பயன்பாடுகள் ஆணைக்குழுவின் பணிப்பாளர் திரு.ஜெயநாத் கேரத் அவர்களின் தலைமையில் இன்றைய தினம் (14.07.2026) காலை 09.30 மணிக்கு மாவட்டச் செயலக செயலமர்வு மண்டபத்தில் நடைபெற்றது. இந் நிகழ்வில் பிரதம விருந்தினராக யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் கலந்து கொண்டார்.
இவ் நிகழ்வில் உரையாற்றிய அரசாங்க அதிபர் அவர்கள், பல்வேறுபட்ட சந்தர்ப்பங்களில் மின்னியலாளர்கள் பயிற்சியை பெற்றிருந்தாலும் தேசிய தொழில்தகைமை சான்றிதழ் என்பது சர்வதேச ரீதியாக வலுப்பெற்ற சான்றிதழ் எனவும், இப் பயிற்சியை பெற்றவர்களுக்கு இது ஒரு சமூக அங்கீகாரமாக காணப்படுவதாகவும் தெரிவித்தார். ஒவ்வொருவரதும் தகுதிகள் பரிசீலிக்கப்பட்டதன் அடிப்படையிலேயே இந்த மின்னியலாளர்களுக்கான பயிற்சிநெறி வழங்கப்பட்டதாகவும், யாழ்ப்பாண மாவட்டத்திற்கு வெளிமாவட்டத்திலிருந்து தொழிலாளர்கள் வேலைக்கு அமர்த்தப்படுவதாகவும், அதனை ஆராயும் போது இங்குள்ள தொழிலாளர்களில் குறிப்பிடப்பட்டவர்களின் சேவை வாடிக்கையாளர்களுக்கு திருப்திகரமானதாக இன்மையால் வெளிமாவட்டங்களிலிருந்து பெற்றுக்கொள்ள வேண்டிய நிலையுள்ளதாக அறியப்படுவதாகவும் தெரிவித்தார். இதனை எமது தொழிலாளர்கள் கவனம் எடுக்க வேண்டும் எனவும் தெரிவித்ததுடன், குறுகிய காலத்தில் பெற்றுக்கொண்ட இந்த தேசிய தொழில் தகைமை சான்றிதழ் மூலமாக வாடிக்கையாளருக்கு திருப்திகரமான சேவையை வழங்க கூடிய மனப்பாங்கை அனைவரும் வளர்க்க வேண்டுமென கேட்டுக்கொண்டார். இவ்வாறு சிறந்த வாடிக்கையாளர் சேவையை வழங்குதல் மூலமாக நிச்சயமாக வருமான மட்டம் உயர்வடையும் எனவும் அரசாங்க அதிபர் தெரிவித்து, மின்னியலாளர்கள் இத்துறை சார்ந்து பூரண அறிவோடு இருப்பதாகவும் மனப்பாங்கை வளர்த்துக் கொண்டால் சமுதாயத்தில் உயரிய வாழ்வு கிடைக்கும் எனவும் சமுதாயத்தின் திருப்தி உங்களின் கைகளில் காணப்படுவதாகவும் நவீன உலகில் அறிவு, திறன், மனப்பாங்கு ஆகிய திறன்களை வளர்த்துக்கொண்டு இவ்வுலகிலே தொழில் விற்பனராக மிளிர வேண்டும் எனவும் தெரிவித்து, தமது வாழ்த்துக்களையும் தெரிவித்தார்.
இந் நிகழ்வில் தேசிய பயிலுநர் கைத்தொழிற் பயிற்சி அதிகார சபை ஊடாக பயிற்சி பெற்ற யாழ்ப்பாண மாவட்டத்தில் 60 மின்னியலாளர்களுக்கான சான்றிதழ் அரசாங்க அதிபர் அவர்களால் வழங்கப்பட்டது. மேலும், இலங்கை பொதுபயன்பாடுகள் ஆணைக்குழுவின் அங்கீகாரம் பெறப்பட்ட அடையாள அட்டை வழங்கப்படவுள்ளமை குறிப்பிடத்தக்கது. இந் நிகழ்வில் மேலதிக அரசாங்க அதிபர் க. சிவகரன், இலங்கை பொதுபயன்பாடுகள் ஆணைக்குழுவின் உதவிப் பணிப்பாளர் (தொடர்பாடல்) திரு. ஏ. ஜெயசூரியன், உதவி மாவட்டச் செயலாளர் செல்வி உ.தா்சினி, தேசிய தொழிற் பயிற்சி அதிகார சபையின் யாழ் மாவட்ட முகாமையாளர் திரு.ஆர். திருமுருகன், மனித வலு வேலைவாய்ப்புத் திணைக்களத்தின் மாவட்ட இணைப்பாளர் திரு. கே. கருணாகரன், மாவட்ட திறன் விருத்தி மாவட்ட இணைப்பாளர் திரு.நீலாம்பரன், பயிற்சியை நிறைவு செய்த மின்னியலாளர்கள், ஆகியோர் கலந்து கொண்டனர்.
யாழ்ப்பாண மாவட்டத்தில் டெங்கு நோயை கட்டுப்படுத்தல் தொடர்பான கலந்துரையாடல் யாழ்ப்பாண மாவட்ட மேலதிக அரசாங்க அதிபர் க. சிவகரன் அவர்களின் தலைமையில் இன்றைய தினம் (08.072026) பிற்பகல் 2.30 மணிக்கு மாவட்டசெயலக கேட்போர் கூடத்தில் இடம்பெற்றது. இக் கலந்துரையாடலில் தலைமையுரையாற்றிய மேலதிக அரசாங்க அதிபர் அவர்கள், யாழ்ப்பாணம் மாவட்டத்தில் டெங்கு கட்டுப்பாடு தொடர்பாக துரிதமாக எடுக்க வேண்டிய நடவடிக்கைகள் கலந்து கலந்துரையாடுவதற்காக இக்கூட்டம் ஒழுங்கு செய்யப்பட்டுள்ளதாகவும், கடந்த ஆறு மாதங்களில் டெங்கு தாக்கம் 60 பேர் பாதிக்கப்பட்டுள்ளதாகவும் கடந்த முதலாம் திகதியில் இருந்து 7ஆம் திகதி வரை 65 ஆக அது உயர்ந்துள்ளதாகவும் அறிக்கை சமர்ப்பிக்கப்பட்டுள்ளதாகவும் தெரிவித்தார். அந்த வகையில் தொடர்ச்சியாக இதனை கட்டுப்பாட்டுகள் வைத்திருக்க வேண்டிய தேவைப்பாடு காணப்படுவதாகவும் அதற்காக இந்த அவசர கூட்டம் ஒழுங்கு செய்யப்பட்டுள்ளதாகவும், கடந்த வாரத்திற்கு முதல் வாரம் ஜனாதிபதி செயலகத்தினால் கிளீன் ஸ்ரீலங்கா வேலை திட்டத்தின் கீழ் மூன்று நாள் டெங்கு கட்டுப்பாட்டு வாரம் பிரகடனப்படுத்தப்பட்டு யாழ்ப்பாண மாவட்டத்தில் உள்ள பிரதேச செயலகங்கள் கிராம அலுவலகங்களிலும் டெங்கு கட்டுப்பாட்டுவாரம் நடைமுறைப்படுத்தப்பட்டு அதனை கட்டுப்படுத்த நடவடிக்கைகள் எடுக்கப்பட்டுள்ளதாகவும் தெரிவித்தார். மேலும் அதனை கட்டுப்படுத்துவதற்கும் அதனை கண்காணிப்பதற்கும் இக் கலந்துரையாடல் ஒழுங்கு செய்யப்பட்டுள்ளதாக தெரிவித்தார்.
மேலும் இக் கூட்டத்தில் பின்வரும் தீர்மானங்கள் எடுக்கப்பட்டன.
01. பிரதேச செயலாளர் தலைமையில் செயலக டெங்கு கட்டுப்பாட்டுக் கூட்டத்தை இந்த வாரம் / அடுத்த வாரத்துக்குள் நடாத்துமாறும் கிராம மட்ட டெங்கு கட்டுப்பாட்டு செயலணிக் கூட்டத்தை கிராம அலுவலர் தலைமையில் உடனடியாக நடாத்தப்பட்டு சிரமதானப்பணிகள் சுத்திகரிப்பு பணிகள் மேற்கொள்ளப்பட வேண்டும்.
02. யாழ்ப்பாண மாவட்டத்தில் சிறப்பு டெங்கு கட்டுப்பாட்டு வாரமாக இம் மாதம் - ஜூலை 13 ஆம் திகதி தொடக்கம் 15 ஆம் திகதி வரை பிரகடனப்படுத்தி வீடுகள், பாடசாலைகள், தனியார், உயர்கல்வி நிறுவனங்கள், வர்த்தக நிலையங்கள், வணக்கஸ்தலங்கள் ஆகிய அனைத்து இடங்களிலும் முழுமையாக சிரமதானப்பணி இடம்பெற வேண்டும் எனவும் அதற்கு அனைவரும் ஒத்துழைப்பு வழங்க வேண்டும்.
03. டெங்குக்கட்டுப்பாட்டுக்குழு ஜூலை 13ஆம் திகதி தொடக்கம் 15 ஆம் திகதிக்குள் அதிக டெங்கு நோயாளர்கள் அடையாளம் காணப்பட்ட பகுதிகளுக்கு திடீர் களப்பணி மேற்கொண்டு கண்காணிப்பு மேற்கொள்ளப்படும்.
04. விழிப்புணர்வு வாரத்தினை இம் மாதம் - ஜூலை 13ஆம் திகதி தொடக்கம் 15ஆம் திகதி வரை நடாத்துவது எனவும், அந்தவகையில் ஜூலை 13ஆம் திகதி சகல வணக்கஸ்தலங்களிலும், 14ஆம் திகதி அரசாங்க அலுவலகங்களிலும், 15 ஆம் திகதி பாடசாலைகளிலும் தனியார், உயர்கல்வி நிறுவனங்களிலும் தீர்மானிக்கப்பட்டது.
இக் கலந்துரையாடலில் மாகாண சுகாதார சேவைகள் பணிப்பாளர் வைத்திய கலாநிதி. வி.பி.எஸ்.டி.பத்திரண, யாழ். பிராந்திய சுகாதார சேவைகள் பணிப்பாளர் வைத்தியர் திரு.கேதீஸ்வரன், கௌரவ தவிசாளர்கள், மாவட்ட திட்டமிடல் பணிப்பாளர் இ.சுரேந்திரநாதன், பிரதேச செயலாளர்கள், உதவி மாவட்ட செயலாளர், சுகாதார வைத்திய அதிகாரிகள், வலயக்கல்விப் பணிப்பாளர்கள், சிரேஷ்ட பொது சுகாதார பரிசோதகர்கள், பிரதேச சபை செயலாளர்கள், கடற்படை மற்றும் இராணுவ அதிகாரிகள் மற்றும் தொடர்புடைய உத்தியோகத்தர்கள் உள்ளிட்ட பலர் கலந்துகொண்டனர்.









