அமரர் வயலின் வித்துவான் பேராசிரியர் வி. லக்ஷ்மிநாராயணா அவர்களின் நினைவாக, அவரின் பெயரில் வீதிக்கு பெயர் சூட்டும் நிகழ்வும் நினைவுரை நிகழ்வும் இன்று (23.07.2026) வியாழக்கிழமை காலை 09.30 மணிக்கு, சுன்னாகம் மருதனார்மடத்தில் அமைந்துள்ள வட இலங்கை சங்கீத சபைக்கு முன்பாக சிறப்பாக நடைபெற்றது. இந் நிகழ்வில் பிரதம விருந்தினராக புத்தசாசன, சமய மற்றும் கலாசார அலுவல்கள் அமைச்சர் கௌரவ பேராசிரியர் ஹினிதும சுனில் செனவி அவர்கள் கலந்துகொண்டார். சிறப்பு அதிதிகளாக வடக்கு மாகாண ஆளுநர் கௌரவ நாகலிங்கம் வேதநாயகன், யாழ்ப்பாணத்திலுள்ள இந்தியத் துணைத்தூதுவர் கௌரவ ஸ்ரீ சாய் முரளி, யாழ்ப்பாண மாவட்ட அரசாங்க அதிபர் மருதலிங்கம் பிரதீபன், வலிகாமம் தெற்கு பிரதேச சபையின் உப தவிசாளர் உள்ளிட்டோர் பங்கேற்றனர்.
வயலின் வித்துவான் லக்ஷ்மிநாராயணா வீதி எனப் பெயரிடப்பட்ட பெயர் பலகை திறந்து வைக்கப்பட்டதனைத் தொடர்ந்து வட இலங்கை சங்கீத சபை மண்டபத்திற்கு புதிதாக பெயரிடப்பட்ட வீதியிலிருந்து அதிதிகள் இன்னிசை அணிவகுப்புடன் விழா மண்டபத்திற்கு அழைத்து வரப்பட்டனர். மங்கல விளக்கேற்றலுடன் ஆரம்பமான நிகழ்வில், யாழ்ப்பாணம் இராமநாதன் கல்லூரி மாணவர்களின் வரவேற்பு நடனம் இடம் பெற்றது. தொடர்ந்து வடக்கு மாகாண பண்பாட்டுத் திணைக்களத்தின் பிரதிப் பணிப்பாளர் திருமதி தர்சினி வரவேற்புரையையும், உடுவில் பிரதேச செயலாளர் திருமதி பொ. பிறேமினி அறிமுக உரையையும் நிகழ்த்தினர். நிகழ்வின் சிறப்பாக இராமநாதன் நுண்கலைப்பீட மாணவிகளின் கலைநிகழ்ச்சிகளும் இடம்பெற்றன.
அதனைத் தொடர்ந்து, கௌரவ அமைச்சர் மற்றும் சிறப்பு அதிதிகள் உரையாற்றி, பேராசிரியர் வி. லக்ஷ்மிநாராயணா அவர்களின் இசைப் பங்களிப்புகளையும் பண்பாட்டு மரபிற்கான சேவையையும் பாராட்டினர். இந் நிகழ்வின் நிறைவாக, அன்னாரின் புதல்வரும் உலகப் புகழ்பெற்ற வயலின் வித்துவான் டாக்டர் ல. சுப்பிரமணியம் அவர்கள் ஏற்புரையாற்றினார். இந் நிகழ்வில் மதத் தலைவர்கள் வடக்கு மாகாண அமைச்சுகளின் செயலாளர்கள், அரச அதிகாரிகள், கலைஞர்கள், இசை ஆர்வலர்கள் மற்றும் பொதுமக்கள் எனப் பல்வேறு தரப்பினரும் கலந்துகொண்டனர்.
“பனை வளம் – நிலையான வாழ்வின் பலம்” என்ற தொனிப்பொருளில் பனைசார் உற்பத்திப் பொருட்களின் கண்காட்சியும் விற்பனையும் வடக்கு மாகாண கூட்டுறவு அபிவிருத்தி ஆணையாளர் செ. அகல்யா அவர்களின் தலைமையில் இன்று (22.07.2026) காலை 9.30 மணிக்கு யாழ்ப்பாணம், நல்லூர், முத்திரைச்சந்தியில் அமைந்துள்ள சங்கிலியன் பூங்காவில் கோலாகலமாக ஆரம்பமானது. இந் நிகழ்வில் பிரதம விருந்தினராக வடக்கு மாகாண பிரதம செயலாளர் திருமதி தனுஜா முருகேசு அவர்களும் சிறப்பு விருந்தினர்களாக இந்திய துணைத் தூதுவர் கௌரவ சாய் முரளி, யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் உள்ளிட்டோர் சிறப்பு விருந்தினர்களாகக் கலந்துகொண்டனர். ஜூலை 22 முதல் 26 வரை நடைபெறும் இக்கண்காட்சியில், தினமும் காலை 9.00 மணி முதல் இரவு 8.00 மணி வரை பொதுமக்கள் பார்வையிடவும், பொருட்களை கொள்வனவு செய்யவும் வாய்ப்பு ஏற்படுத்தப்பட்டுள்ளது. வடக்கு மாகாணத்தின் ஐந்து மாவட்டங்களைச் சேர்ந்த உற்பத்தியாளர்கள் பனை மரத்திலிருந்து தயாரிக்கப்படும் பல்வேறு தரமான உணவுப் பொருட்கள், கைவினைப் பொருட்கள் மற்றும் மதிப்புக் கூட்டப்பட்ட உற்பத்திகளை இக் கண்காட்சியில் காட்சிப்படுத்தியுள்ளனர்.
நிகழ்வின் ஆரம்பத்தில் பிரதம மற்றும் சிறப்பு விருந்தினர்களினால் நாடா வெட்டி கண்காட்சிக் கூடம் திறந்து வைக்கப்பட்டதுடன் மங்கல விளக்கேற்றலும் இடம்பெற்றது. பின்னர் அவர்கள் கண்காட்சி அரங்குகளைப் பார்வையிட்டதுடன், வரவேற்பு நடனம், கும்மி நடனம் மற்றும் சிறப்பு விருந்தினர்களின் உரைகளும் இடம்பெற்றன. வடக்கு மாகாண கூட்டுறவு அபிவிருத்தித் திணைக்களத்தின் ஏற்பாட்டில் ஆண்டுதோறும் ஜூலை 22 முதல் 28 வரை "பனை வாரம்" அனுசரிக்கப்படுகிறது. பனை வளத்தைப் பாதுகாத்து மேம்படுத்துதல், பனைசார் உற்பத்திப் பொருட்களின் பயன்பாட்டை விரிவுபடுத்துதல் மற்றும் அவற்றின் சந்தைப்படுத்தலை வலுப்படுத்துதல் ஆகிய நோக்கங்களுடன் பனை விதை நடுதல், பனைசார் உற்பத்திப் போட்டிகள், பாடசாலை மாணவர்களுக்கான ஓவியப் போட்டிகள், "தாலம்" சஞ்சிகை வெளியீடு, கலைநிகழ்ச்சிகள் உள்ளிட்ட பல்வேறு நிகழ்வுகள் வடக்கு மாகாண பனை மற்றும் தென்னை வள அபிவிருத்திக் கூட்டுறவுச் சங்கங்களின் ஒத்துழைப்புடன் முன்னெடுக்கப்பட்டு வருகின்றமை குறிப்பிடத்தக்கது. இந் நிகழ்வில் கூட்டுறவுச் சங்கங்களின் தலைவர்கள், சம்மேளனப் பிரதிநிதிகள், அரச அதிகாரிகள், உத்தியோகத்தர்கள், உற்பத்தியாளர்கள் மற்றும் பொதுமக்கள் எனப் ஏராளமானோர் கலந்துகொண்டனர்.

புனர்வாழ்வு பணியகத்தின் ஏற்பாட்டில் போதைப்பொருள் தடுப்பு விழிப்புணர்வு செயலமர்வு - புனர்வாழ்வு பணியகத்தின் பணிப்பாளர் நாயகம் பிரிகேடியர் எம். எஸ். அமித் அவர்களின் தலைமையில் இன்று (21.07.2026) காலை 9.00 மணிக்கு யாழ்ப்பாண மாவட்டச் செயலக கேட்போர் கூடத்தில் நடைபெற்றது. இந் நிகழ்வில் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் பிரதம விருந்தினராகக் கலந்துகொண்டு செயலமர்வை ஆரம்பித்து வைத்தார். போதைப்பொருளுக்கு அடிமையானவர்களை அதிலிருந்து மீட்டு, மீண்டும் ஆரோக்கியமான சமூக வாழ்வில் இணைத்திடுவது அனைவரின் கூட்டுப்பொறுப்பாகும் என்பதை வலியுறுத்திய இச் செயலமர்வில், போதைப்பொருள் பாவனையால் பாதிக்கப்பட்டவர்களுக்கு புனர்வாழ்வு வழங்குதல், தொழிற்பயிற்சிகள் மூலம் தன்னம்பிக்கையை வளர்த்தல் மற்றும் சமூகத்தில் முழுமையான மனிதர்களாக மீள இணைத்தல் ஆகியவை புனர்வாழ்வு பணியகத்தின் முக்கிய நோக்கங்களாக காணொளி மூலமும் விளக்கப்பட்டன.
இலட்சக்கணக்கான இளைஞர்களின் உயிர்களையும் எதிர்காலத்தையும் சீரழிக்கும் போதைப்பொருள் பேராபத்தை ஒழிப்பதற்காக நாடளாவிய விழிப்புணர்வு இயக்கம் அவசியம் என்பதையும், போதைப்பொருள் பாவனையிலும் விற்பனையிலும் ஈடுபடுவோர் அதிலிருந்து விலக வேண்டும் என்பதையும், இதற்காக முழு சமூகமும் ஒன்றிணைந்து செயற்பட வேண்டியதன் அவசியத்தையும் வலியுறுத்தும் நோக்கில் இச்செயலமர்வு ஏற்பாடு செய்யப்பட்டிருந்தது. இச்செயலமர்வில் பாடசாலை உளவளத் துணை ஆசிரியர்கள், தொடர்புடைய ஆசிரியர்கள், பிரதேச செயலக உளவளத் துணை உத்தியோகத்தர்கள் உள்ளிட்டோருக்கு போதைப்பொருள் தடுப்பு மற்றும் உளவள ஆதரவு தொடர்பான விரிவான விழிப்புணர்வு வழங்கப்பட்டது. 200-க்கும் மேற்பட்டோர் இதில் கலந்துகொண்டனர்.
செயலமர்வின் வளவாளர்களாக பொலிஸ் போதைவஸ்து பணியகத்தின் பிரதிநிதி திரு. ஐ. பிரவீன் மற்றும் சாவகச்சேரி அரசினர் வைத்தியசாலையின் வைத்திய கலாநிதி திருமதி வினோதா அச்சுதன் ஆகியோர் பங்கேற்று விரிவுரைகளை வழங்கினர். ஆரம்ப நிகழ்வில் வட மாகாண கல்வி அமைச்சின் செயலாளர் திரு. பற்றிக் நிரஞ்சன், யாழ்ப்பாண மாவட்ட மேலதிக அரசாங்க அதிபர் திரு. க. சிவகரன், புனர்வாழ்வு பணியகத்தின் மேலதிக பணிப்பாளர் பிரிகேடியர் பியலால், மாவட்டச் செயலக புனர்வாழ்வு ஒருங்கிணைப்பு அலுவலக புனர்வாழ்வு உத்தியோகத்தர் மேஜர் S. A. R. N. பெரேரா, சிறைச்சாலை அத்தியட்சகர், வலயக் கல்விப் பணிப்பாளர்கள், அருட்சகோதரிகள், பொலிஸ் உத்தியோகத்தர்கள், பிரதேச செயலக உத்தியோகத்தர்கள், கல்வித்துறை அதிகாரிகள், புனர்வாழ்வு பணியக அதிகாரிகள் மற்றும் ஊடகவியலாளர்கள் உள்ளிட்ட பலர் கலந்துகொண்டனர்.

தேசிய ஏற்றுமதியாளர்கள் சம்மேளனமும் வட மாகாண கைத்தொழில் அபிவிருத்தி சபையும் இணைந்து ஏற்பாடு செய்த சந்தை தொடர்புகளை ஏற்படுத்தும் நிகழ்ச்சி திட்டம் (B2B Forum) இன்று (22.07.2026) யாழ்ப்பாண மாவட்டச் செயலக கேட்போர் கூடத்தில் தேசிய ஏற்றுமதியாளர்கள் சம்மேளனத்தின் தலைவர் இந்திர கௌஷிக் ராஜபக்ஷ அவர்களின் தலைமையில் நடைபெற்றது. இந்நிகழ்வில் பிரதம விருந்தினராக வட மாகாண ஆளுநர் நாகலிங்கம் வேதநாயகன் அவர்களும், சிறப்பு விருந்தினராக யாழ்ப்பாண மாவட்ட அரசாங்க அதிபர் மருதலிங்கம் பிரதீபன் அவர்களும் கலந்து கொண்டு சிறப்பித்தனர். வட மாகாண உற்பத்தியாளர்களுக்கு புதிய சந்தை வாய்ப்புகளை உருவாக்கி, அவர்களின் உற்பத்திப் பொருட்களை தேசிய மற்றும் சர்வதேச சந்தைகளுக்கு கொண்டு செல்வதற்கான தொடர்புகளை ஏற்படுத்துவதுடன், உற்பத்தியாளர்களையும் ஏற்றுமதியாளர்களையும் நேரடியாக இணைக்கும் நோக்கில் இக்கருத்தரங்கு ஏற்பாடு செய்யப்பட்டிருந்தது.
இந் நிகழ்வில் கருத்துரையாற்றிய வட மாகாண ஆளுநர், வட மாகாண உற்பத்தியாளர்களின் பொருட்களை ஏற்றுமதியாளர்கள் நேரடியாக கொள்வனவு செய்யும் வகையில் சந்தைப்படுத்தல் தொடர்புகளை உருவாக்கும் தேசிய ஏற்றுமதியாளர்கள் சம்மேளனத்தின் முயற்சியை பாராட்டினார். மேலும், வட மாகாணத்தின் விவசாயம் மற்றும் கடல்வளம் போன்ற வளங்கள் முழுமையாகப் பயன்படுத்தப்படவில்லை என்றும், விவசாய உற்பத்திகளை சேமித்து வைப்பதற்கான வசதிகள் இன்னும் போதிய அளவில் இல்லை என்றும் குறிப்பிட்டார். உற்பத்தியாளர்கள் எதிர்கொள்ளும் சந்தைப்படுத்தல் சவால்களுக்கு இத்தகைய B2B சந்திப்புகள் சிறந்த தீர்வாக அமையும் என்றும், தொழில் முயற்சியாளர்கள் உற்பத்தியாளர்களாக மட்டுமன்றி எதிர்காலத்தில் ஏற்றுமதியாளர்களாகவும் வளர வேண்டும் என்றும், அதற்குத் தேவையான ஒத்துழைப்புகளை வழங்க வட மாகாண நிர்வாகம் தயாராக இருப்பதாகவும் அவர் தெரிவித்தார்.
யாழ்ப்பாண மாவட்ட அரசாங்க அதிபர் மருதலிங்கம் பிரதீபன் கருத்து தெரிவிக்கையில், தேசிய ஏற்றுமதியாளர்கள் சம்மேளனம் வட மாகாணத்தில் உள்ளூர் உற்பத்தியாளர்களையும் ஏற்றுமதியாளர்களையும் ஊக்குவிக்கும் பல்வேறு செயற்பாடுகளை தொடர்ச்சியாக முன்னெடுத்து வருவதாக பாராட்டினார். யாழ்ப்பாண மாவட்டம் தொழில் முயற்சிகளில் முன்னேற்றம் கண்டு வருவதாகவும், உற்பத்தியாளர்களுக்கான ஏற்றுமதி வாய்ப்புகளை உருவாக்குவதும் தொழில் தொடர்புகளை ஏற்படுத்துவதும் அனைவரின் கூட்டுப்பொறுப்பாகும் என்றும் குறிப்பிட்டார். மேலும், இந்நிகழ்வு உற்பத்தியாளர்களுக்கும் ஏற்றுமதியாளர்களுக்கும் இடையிலான ஒருங்கிணைப்பை வலுப்படுத்தும் சிறந்த தளமாக அமைந்துள்ளதாகவும், மாவட்டத்தின் உற்பத்தியாளர்கள் இந்த வாய்ப்பை முழுமையாகப் பயன்படுத்திக் கொள்ள வேண்டும் என்றும் அரசாங்க அதிபர் கேட்டுக் கொண்டார்.
இந் நிகழ்வின் போது தேசிய ஏற்றுமதியாளர்கள் சம்மேளனத்தினால் உற்பத்தியாளர்களுக்காக "ஏற்றுமதியாளர்கள் இதழ்" வெளியிடப்பட்டது. இந் நிகழ்வில் 50-க்கும் மேற்பட்ட உற்பத்தியாளர்களும் ஏற்றுமதியாளர்களும் கலந்து கொண்டனர். மேலும், தேசிய ஏற்றுமதியாளர்கள் சம்மேளனத்தின் பொதுச் செயலாளரும் நிறைவேற்று அதிகாரியுமான திரு. ஷிகாம் மரிக்கார், இந்திய துணைத் தூதரகத்தின் பிரதிநிதி திரு. சங்கரன் ராஜகோபாலன், வட மாகாண கைத்தொழில் அபிவிருத்தி சபையின் மாகாணப் பணிப்பாளர் திரு. எஸ். சிவகெங்காதரன், செலான் வங்கியின் உதவி பொது முகாமையாளர், அரச திணைக்களங்களின் அதிகாரிகள், வர்த்தக சங்கப் பிரதிநிதிகள், கைத்தொழில் அபிவிருத்தி சபை உத்தியோகத்தர்கள், ஏற்றுமதியாளர்கள் மற்றும் உற்பத்தியாளர்கள் உள்ளிட்ட பலர் கலந்து கொண்டனர்.

இலங்கை தேசிய இளைஞர் சேவைகள் மன்றத்தின் 36ஆவது தேசிய விளையாட்டுப் போட்டித் தொடரின் ஓர் அங்கமாக நடைபெறவுள்ள உதைபந்தாட்டப் போட்டிகள் எதிர்வரும் ஜூலை 25 மற்றும் 26ஆம் திகதிகளில் யாழ்ப்பாண மாவட்டத்தில் நடைபெறவுள்ளன. இந்நிலையில், குறித்த போட்டித் தொடரை வெற்றிகரமாக நடத்துவதற்கான முன்னேற்பாடுகள் தொடர்பாக தேசிய இளைஞர் சேவைகள் மன்றத்தின் வட மாகாணப் பணிப்பாளர் திரு. K.D.C. காமினி அவர்கள், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களை இன்று (20.07.2026) பிற்பகல் 3.00 மணியளவில் அரசாங்க அதிபர் அலுவலகத்தில் சந்தித்து கலந்துரையாடினார். 25 மாவட்டங்களைச் சேர்ந்த அணிகள் பங்கேற்கும் இப்போட்டித் தொடரில், பெண்களுக்கான போட்டிகள் பாசையூர் சென் அன்ரனீஸ் விளையாட்டு மைதானத்திலும், ஆண்களுக்கான போட்டிகள் யாழ். துரையப்பா விளையாட்டு மைதானம் மற்றும் யாழ்ப்பாணப் பல்கலைக்கழக விளையாட்டு மைதானத்திலும் நடைபெறவுள்ளன.
இக் கலந்துரையாடலில் கருத்துத் தெரிவித்த அரசாங்க அதிபர், தேசிய இளைஞர் சேவைகள் மன்றத்தின் தேசிய மட்ட விளையாட்டுப் போட்டித் தொடரின் உதைபந்தாட்டப் போட்டிகள் யாழ்ப்பாணத்தில் நடைபெறுவது மாவட்டத்திற்கு பெருமை சேர்க்கும் விடயமாகும் எனத் தெரிவித்தார். மேலும், இவ்வருட தேசிய கபடி போட்டியில் யாழ்ப்பாண மாவட்ட பெண்கள் அணி முதலாம் இடத்தையும், கடந்த ஆண்டு நடைபெற்ற தேசிய உதைபந்தாட்டப் போட்டியில் பெண்கள் அணி முதலாம் இடத்தையும், ஆண்கள் அணி மூன்றாம் இடத்தையும் பெற்றிருந்தமையை நினைவுகூர்ந்த அவர், சொந்த மாவட்டத்தில் நடைபெறும் இப்போட்டி வீரர், வீராங்கனைகளுக்கு கூடுதல் உற்சாகத்தையும் சாதகமான சூழலையும் ஏற்படுத்தும் எனத் தெரிவித்தார்.
யாழ்ப்பாணம் உதைபந்தாட்டத்திற்கு புகழ்பெற்ற மாவட்டம் என்பதால் பெருமளவிலான பார்வையாளர்களின் ஆதரவு கிடைக்கும் என்றும், சுமார் 1,200 பேர் பங்கேற்கவுள்ள இப்போட்டித் தொடரின் மூலம் மாவட்டத்தின் பொருளாதார மற்றும் சேவைத் துறைகளுக்கும் பயன் ஏற்படும் என்றும் குறிப்பிட்டார். அத்துடன், பிரதேச செயலாளர்கள், விளையாட்டுக் கழகங்கள் மற்றும் தொடர்புடைய அனைத்து தரப்பினரின் ஒத்துழைப்புடன் இப்போட்டியை சிறப்பாக நடத்துவதற்கு மாவட்ட நிர்வாகத்தின் முழுமையான ஆதரவும் ஒத்துழைப்பும் வழங்கப்படும் என உறுதியளித்த அவர், யாழ்ப்பாண மாவட்ட அணியினருக்கும் தனது மனமார்ந்த வாழ்த்துகளை அரசாங்க அதிபர் தெரிவித்தார். இக்கலந்துரையாடலில் மேலதிக அரசாங்க அதிபர் திரு. கே. சிவகரன், உதவி மாவட்டச் செயலாளர் செல்வி உ. தர்சினி, தேசிய இளைஞர் சேவைகள் மன்றத்தின் மாவட்ட உதவிப் பணிப்பாளர் திருமதி வினோதினி சிறிமேனன், விளையாட்டுப் பிரிவின் பொறுப்பதிகாரி திரு. H.W. சுஜிவ் உதயகுமார, தேசிய இளைஞர் சேவைகள் மன்றத்தின் விளையாட்டுப் பிரிவு உத்தியோகத்தர்கள் உள்ளிட்ட பலர் கலந்துகொண்டனர்.







