பதவியுயர்வுடன் இடமாற்றம் பெறும் வட மாகாண கடற்படைத் தளபதி ரியர் அட்மிரல் புடிக்ஹ லியனகமகே அவர்கள், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களை இன்றைய தினம் (20.07.2026) காலை 9.30 மணியளவில் யாழ்ப்பாண மாவட்டச் செயலகத்தில் மரியாதை நிமித்தமாகச் சந்தித்து கலந்துரையாடினார். இதன்போது, வட மாகாணத்தில் தனது பணிக்காலத்தில் மாவட்ட நிர்வாகத்துடன் இணைந்து பணியாற்றிய அனுபவங்களைப் பகிர்ந்துகொண்ட அவர், வழங்கப்பட்ட ஒத்துழைப்பிற்காக அரசாங்க அதிபர் உள்ளிட்ட மாவட்ட நிர்வாகத்திற்கு தனது நன்றியைத் தெரிவித்தார். அதனைத் தொடர்ந்து, ரியர் அட்மிரல் புடிக்ஹ லியனகமகே அவர்களின் சேவையைப் பாராட்டிய அரசாங்க அதிபர், அவரின் புதிய பொறுப்புகள் சிறப்புற அமைய மனமார்ந்த வாழ்த்துகளையும் நன்றிகளையும் தெரிவித்தார்.
ரியர் அட்மிரல் புடிக்ஹ லியனகமகே அவர்கள், கொழும்பு கடற்படை தலைமையகத்தின் மூன்றாம் நிலையிலுள்ள பிரதி பிரதானியாகப் பொறுப்பேற்கவுள்ளதுடன், கிழக்கு மாகாண கடற்படைத் தளபதியாக மேலதிக கடமைகளையும் பொறுப்பேற்கவுள்ளார். வட மாகாணத்தில் பணியாற்றிய காலப்பகுதியில், புனித கச்சதீவு அந்தோனியார் திருவிழா, நயினாதீவு ஸ்ரீ நாகபூசணி அம்மன் ஆலய மகோற்சவம் உள்ளிட்ட முக்கிய மத நிகழ்வுகளுக்கான கடல் வழிப் போக்குவரத்து ஏற்பாடுகளை திறம்பட ஒருங்கிணைத்ததுடன், நெடுந்தீவு, நயினாதீவு உள்ளிட்ட தீவுகளுக்கான பயணிகள் கடற்போக்குவரத்து தடையின்றி நடைபெறுவதற்கும் முழுமையான ஒத்துழைப்பை வழங்கியிருந்தார் என்பது குறிப்பிடத்தக்கது. இச்சந்திப்பில் மேலதிக அரசாங்க அதிபர் திரு. கே. சிவகரன், மேலதிக அரசாங்க அதிபர் (காணி) திரு. பா. ஜெயகரன், பிரதம கணக்காளர் திரு. எஸ். கிருபாகரன் மற்றும் உதவி மாவட்டச் செயலாளர் செல்வி உ. தர்சினி ஆகியோரும் கலந்துகொண்டனர்.
 
 
1 2 3 4 5
 
மூளாயில் அமைந்துள்ள கலைவாணி முன்பள்ளியின் பொன்விழாவும், கலைவாணி சனசமூக நிலையத்தின் 74 ஆவது ஆண்டுவிழாவும், வருடாந்த விளையாட்டுவிழாவும் கலைவாணி சனசமூக நிலையத் தலைமையில் திரு. து. சுஜிந்தன் J.P. அவர்கள் தலைமை 2026 ஜூலை 19 ஆம் திகதி பிற்பகல் 2.30 மணியளவில் கலைவாணி சனசமூக நிலைய முன்றலில் சிறப்பாக நடைபெற்றது. பிரதம விருந்தினராக யாழ்ப்பாண மாவட்ட அரச அதிபரும் மாவட்ட செயலருமான திரு. மருதலிங்கம் பிரதீபன் அவர்கள் கலந்துகொண்டு நிகழ்வைச் சிறப்பித்தார். இந் நிகழ்வில் கலந்து கொண்டு உரையாற்றிய அரசாங்க அதிபர் அவர்கள், எழுபத்து நான்கு ஆண்டுகளுக்கு முன்னர் “கலைவாணி சனசமூக நிலையம்” என்ற பெயரில் ஒரு சனசமூக நிலையம் ஆரம்பிக்கப்பட்டுள்ளது எனவும்,
அந்த எழுபத்து நான்கு ஆண்டுகளுக்கு முன்னர் நிலவிய கல்வி, பொருளாதார மற்றும் சமூகச் சூழலில், இந்தச் சனசமூக நிலையங்களின் தேவை மிகவும் முக்கியமானதாக இருந்தது எனவும் தெரிவித்தார். மேலும் , அந்தக் காலத்தில் வாழ்ந்தவர்கள் அதன் தேவையை உணர்ந்து இதனை ஆரம்பித்தது பாராட்டத்தக்க விடயமாகும். அதேபோல், இந்த முன்பள்ளி ஐம்பது ஆண்டுகளாகத் தொடர்ந்து இயங்கி வருவதுடன், இந்தக் கிராமத்தைச் சேர்ந்த பலரும் இம்முன்பள்ளியில் கல்வி கற்றுள்ளனர். ஆகவே, இந்தக் கிராமத்தினதும், தொல்புரம் கிராமத்தின் கல்வி வளர்ச்சியில் இம் முன்பள்ளி நீண்டகாலமாகப் பங்களித்து வருகிறது. அதன் வளர்ச்சியையும் உயர்ச்சியையும், இப்பிள்ளைகளின் கல்வி நிலைமையிலிருந்து காண முடிகிறது. ஆகவே, இந்தப் பிள்ளைகள் தங்களுடைய கல்வியை முன்பள்ளியுடன் மட்டும் நிறுத்திவிடாமல், அதற்கு மேலான கல்வியையும் தொடர்ந்து கற்க, இந்தச் சனசமூக நிலையம் தனது முழுமையான ஒத்துழைப்பை வழங்க வேண்டும் என்று கேட்டுக்கொண்டார்.
மேலும், கிராமத்து மக்களின் ஒற்றுமையையும் நல்லிணக்கத்தையும் இந்நிகழ்வு வெளிப்படுத்துகிறது எனவும், நிகழ்வு சிறிய இடத்தில் ஒழுங்குபடுத்தப்பட்டிருந்தாலும், பெருமளவான மக்கள் ஒன்றுகூடியிருப்பது அந்த ஒற்றுமையின் அடையாளமாகும். ஆகவே, கல்வி சார்ந்த செயற்பாடுகளிலும், சமூக அபிவிருத்தி தொடர்பான செயற்பாடுகளிலும் அனைவரும் ஒற்றுமையாகச் செயல்பட வேண்டும் என்றும் கேட்டுக் கொண்டார். மேலும், சிறப்பு விருந்தினர்களாக யா/மூளாய் சைவப்பிரகாச வித்தியாலய அதிபர் திரு. பாலசிங்கம் பாலசுப்பிரமணியம், யா/மூளாய் அ.மி.த.க. பாடசாலை அதிபர் திருமதி சகுந்தலா கேசவன், கிராம சேவையாளர் திருமதி தீசன் கோபிகா, முன்பள்ளி இணைப்பாளர் திருமதி ரகுநாதன் சத்தியரூபி, பொது சுகாதாரப் பரிசோதகர் திரு. ஜெயராஜசிங்கம் கோபிராஜ் உள்ளிட்ட பலர் கலந்துகொண்டனர் என்பது குறிப்பிடத்தக்கது.
விருந்தினர்களின் வருகையைத் தொடர்ந்து மங்கல விளக்கேற்றல், மும் மொழிகளில் முன்பள்ளி மாணவர்களின் வரவேற்புரை, ஆசியுரை, விளையாட்டுப் போட்டிகள் என்பன இடம்பெற்றன. இதனைத் தொடர்ந்து மாணவர்களின் இசை, நடன நிகழ்ச்சிகள், வினோத உடைப் போட்டி, வரவேற்பு நடனம் உள்ளிட்ட கலைநிகழ்ச்சிகள் பார்வையாளர்களை வெகுவாகக் கவர்ந்தன. மேலும், நினைவு வெளியீடு வெளியிடப்பட்டது டன், இசையமைப்பாளர்கள், சேவையாளர்கள் ஆகியோர் கௌரவிக்கப்பட்டார்கள்.
 
 
1 2 3 4 5 6 7 9 8 10 11 12
யாழ்ப்பாணம் மாவட்டக் கூட்டுறவுச்சபை நடாத்திய 104வது சர்வதேச கூட்டுறவு தின விழா கூட்டுறவுச் சபையின் தலைவர் திரு.ப.கேசவதாசன் அவர்களின் தலைமையில் இன்றைய தினம் (18.07.2026) சனிக்கிழமை காலை 10.00 மணிக்கு வீரசிங்கம் மண்டபத்தில் "அனைத்துலக அமைதிக்காக கூட்டுறவுகள்" எனும் தொனிப்பொருளில் சிறப்புற நடைபெற்றது. இந் நிகழ்வில், பிரதம விருந்தினராக யாழ். மாவட்ட அரசாங்க அதிபர் திரு.மருதலிங்கம் பிரதீபன் அவர்கள் கலந்து சிறப்பித்தார். மேலும் சிறப்பு விருந்தினராக கூட்டுறவு அபிவிருத்தி திணைக்களத்தின் உதவி ஆணையார் திரு.கி.சந்திரசேகரன் அவர்களும், கௌரவ விருந்தினராக இலங்கை பெற்றோலிய கூட்டுத்தாபனத்தின் வடக்கு பிராந்திய முகாமையாளர் திரு.எஸ்.சிவதரன் அவர்களும் கலந்து சிறப்பித்தனர். இந் நிகழ்வில் அதிகள் வரவேற்கப்பட்டதைத் தொடர்ந்து மங்கல விளக்கேற்றபட்டு மௌன இறைவணக்கம் இடம்பெற்றதுடன் கூட்டுறவுக் கீதம், வரவேற்பு நடனம், வரவேற்புரை, ஆகிய நிகழ்வுகள் இடம்பெற்றன.
தொடர்ந்து சர்வதேச கூட்டுறவு தின விழாவை முன்னிட்டான பேச்சுப் போட்டிகளில் முதலிடம் பெற்றவர்களின் பேச்சு, சபையின் அங்கத்துவ சங்கங்களின் கலை நிகழ்வுகள், அதிதிகளின் உரைகள், 104வது சர்வதேச கூட்டுறவு தின விழா போட்டிகளில் வெற்றியீட்டிய பாடசாலை மாணவர்கள், பணியாளர்கள், அங்கத்தவர்கள், கூட்டுறவுக் கல்லூரி மாணவர்களுக்கான பரிசளிப்பு நிகழ்வு, அங்கத்தவர் இணைப்பு செயற்திட்டத்திற்கான பரிசில்கள் வழங்கும் நிகழ்வுகள் அரங்கை அலங்கரித்தன. இதனை விட வடமராட்சி இந்து மகளிர் கல்லூரி ஆசிரியர் திரு.ரதீஸ் அவர்களின் சிறப்புரை மற்றும் கூட்டுறவுப் பணியாளர்கள் கௌரவிப்பு முதலான நிகழ்வுகளும் நடைபெற்றன. இந் நிகழ்வில் பல்வேறு கூட்டுறவு சங்கங்களின் சமாசங்களின் அங்கத்தவர்கள், வங்கி அதிகாரிகள், பாடசாலை மாணவர்கள், பணியாளர்கள், பொதுமக்கள் உள்ளிட்ட பல்வேறு தரப்பினரும் கலந்து கொண்டிருந்தனர்.
 
 
1 2 3 4 5 6 7 8 9 11 12 13
மறைந்த சிவரத்தினம் இரத்தினகுமார் அவர்களின் 30ஆம் ஆண்டு நினைவு நாளை முன்னிட்டு, சாவல்கட்டு சன்மார்க்கம் விளையாட்டுக் கழகம் ஏற்பாடு செய்த வெற்றிக்கிண்ண உதைப்பந்தாட்ட இறுதிச் சுற்றுப்போட்டி 2026.07.18 அன்று சாவல்கட்டு மகாத்மா விளையாட்டு மைதானத்தில் சிறப்பாக நடைபெற்றது. இந்நிகழ்வில் பிரதம விருந்தினராக கடற்றொழில், நீரியல் மற்றும் கடல் வளங்கள் அமைச்சரும், யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள் கலந்து கொண்டு நிகழ்வை சிறப்பித்தார். சிறப்பு விருந்தினராக யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் கலந்து கொண்டு நிகழ்வை சிறப்பித்தார். மேலும், பிரதேச செயலாளர், பொலிஸ் அதிகாரி, கடற்றொழில் திணைக்களத்தின் உதவிப் பணிப்பாளர் உள்ளிட்ட பல்வேறு அரச அதிகாரிகள், விளையாட்டுக் கழக உறுப்பினர்கள் மற்றும் பொதுமக்கள் எனப் பலர் கலந்துகொண்டனர். இளைஞர்களிடையே விளையாட்டு உணர்வை ஊக்குவிப்பதுடன், சமூக ஒற்றுமையையும் மறைந்தோரின் நினைவைப் போற்றும் பண்பாட்டையும் வலுப்படுத்தும் நோக்கில் இந்நிகழ்வு சிறப்பாக ஏற்பாடு செய்யப்பட்டிருந்தது. போட்டியில் பல அணிகள் உற்சாகமாகப் பங்கேற்று, விளையாட்டுத் திறமையையும் ஒற்றுமை உணர்வையும் வெளிப்படுத்தின.
 
 
2 3 4 5 6 7 8 9 10 12
யாழ்ப்பாண மாவட்ட செயலகத்தின் ஏற்பாட்டில் கவிதை பயிலரங்கம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (18.07.2026) காலை 9.00மணிக்கு மாவட்டச் செயலக செயலமர்வு மண்டபத்தில் நடைபெற்றது. இச் செயலமர்வில் தலைமையுரையாற்றிய யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள், எமது பண்பாட்டுக் கலைகளைப் பாதுகாத்து வளர்க்கும் நோக்கில் மாவட்டச் செயலகம் தொடர்ச்சியாக கலைத்துறை சார்ந்த மூத்த கலைஞர்களின் பங்களிப்புடன் இளம் கலைஞர்களின் படைப்பாற்றலை ஊக்குவிக்கும் வகையில் பயிலரங்குகளை நடாத்த தீர்மானிக்கப்பட்டுள்ளதாகத் தெரிவித்தார். இத் தீர்மானம் கலாசார உத்தியோகத்தர்களுடனான மாதாந்தக் கலந்துரையாடலின் போது எடுக்கப்பட்டதாகவும் குறிப்பிட்டார். அரச பணிகளில் ஈடுபட்டிருக்கும் நாம், கலைத்துறை வளர்ச்சிக்கு அர்த்தமுள்ள பங்களிப்பை வழங்க வேண்டும் என்ற எண்ணத்தின் வெளிப்பாடாகவே இப் பயிலரங்கு ஏற்பாடு செய்யப்பட்டுள்ளதாகவும் தெரிவித்தார்.
மேலும், இந் நிகழ்வில் கவிஞர் சோ. பத்மநாதன் அவர்களும், கவிஞர் இ.த. ஜெயசீலன் அவர்களும் வளவாளர்களாகப் பங்கேற்றமை மகிழ்ச்சியளிப்பதாகக் குறிப்பிட்டார். அதேவேளை, கலைத்துறையில் ஆர்வமுள்ள மூத்தோர், இளைஞர்கள், யுவதிகள், அரச உத்தியோகத்தர்கள் மற்றும் பல்வேறு தரப்பினரும் ஆர்வமுடன் கலந்து கொண்டிருப்பது இந் நிகழ்வின் சிறப்பை மேலும் உயர்த்தியுள்ளதாகவும் அரசாங்க அதிபர் தெரிவித்தார். இவ்வாறான பயிலரங்குகள் தொடர்ச்சியாக நடத்தப்படுவதுடன், எதிர்காலத்தில் மேலும் பல்வேறு தரப்பினரின் பங்களிப்பும் உறுதிப்படுத்தப்பட வேண்டும் என்றும், அதற்கான ஒத்துழைப்பை அனைவரிடமும் அரசாங்க அதிபர் வேண்டிக் கொண்டார். இப் பயிலரங்கை சிறப்பாக நடத்துவதற்கு அனுசரணை வழங்கிய வன்னி மண் நற்பணி மன்றத்திற்கும், நிகழ்வை ஒழுங்குபடுத்துவதில் சிறப்பாகப் பணியாற்றிய மாவட்டச் செயலக மற்றும் பிரதேச செயலகங்களின் கலாசார உத்தியோகத்தர்களுக்கும் மனமார்ந்த நன்றிகளை அரசாங்க அதிபர் அவர்கள் தெரிவித்துக் கொண்டார்.
கவிஞர்களையும் படைப்பாக்கத் திறன்களையும் ஊக்குவிக்கும் நோக்கில் நடைபெற்ற இக் கவிதைப் பயிலரங்கில் இளம் கலைஞர்கள், கவிதை ஆர்வலர்கள், அரச உத்தியோகத்தர்கள் மற்றும் மாணவர்கள் உள்ளிட்ட 60 பேர் ஆர்வத்துடன் கலந்து கொண்டனர். இப் பயிற்சிப்பட்டறையின் வளவாளர்களாக கவிஞர் சோ. பத்மநாதன் மற்றும் கவிஞர் இ.த. ஜெயசீலன் ஆகியோர் பங்கேற்று, மரபுக் கவிதை மற்றும் நவீனக் கவிதை தொடர்பான தெளிவான விளக்கங்களுடன் பயிற்சிகளை வழங்கினர். மேலும், கவிதை எழுதும் நுட்பங்கள், கவிதை வாசிக்கும் முறைகள், படைப்பாக்கத் திறனை மேம்படுத்தும் வழிமுறைகள் உள்ளிட்ட பல்வேறு அம்சங்கள் குறித்து கலந்துரையாடல்களும் செயன்முறைப் பயிற்சிகளும் இடம்பெற்றன. பொருத்தமான எடுத்துக்காட்டுகளுடன் வளவாளர்கள் பயிலரங்கை உயிரோட்டமிக்க வகையில் முன்னெடுத்துச் சென்றமை குறிப்பிடத்தக்கதாகும். இச் செயலமர்வின் ஆரம்ப நிகழ்வில் மேலதிக அரசாங்க அதிபர் திரு கே.சிவகரன், உதவி மாவட்டச் செயலாளர் செல்வி உ.தா்சினி, மாவட்ட சிரேஷ்ட கலாசார உத்தியோகத்தர் திருமதி கி. மாலினி அனுசரணை வழங்கிய வன்னி மண் நற்பணி மன்றத்தின் உத்தியோகத்தர், கலாசார உத்தியோகத்தர்கள் கலந்து கொண்டனர்.
 
1 2 3 4 5 6 7 8