யாழ்ப்பாண மாவட்டச் செயலகமும், அரசகரும மொழிகள் திணைக்களமும் இணைந்து, யாழ்ப்பாணம் பல்கலைக்கழகம் மற்றும் யாழ்ப்பாண தமிழ் சங்கம் ஆகியவற்றின் ஒத்துழைப்புடன் தமிழ்மொழித் தினமும் சுவாமி விபுலானந்தர் நினைவு தினமும் 2026 ஆம் ஆண்டுக்கான ஒரு தேசிய நிகழ்வாக, யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில், இன்றைய தினம் (24.07.2026) வெள்ளிக்கிழமை காலை 10.30 மணிக்கு யாழ்ப்பாணம் திருவள்ளுவர் பண்பாட்டு மண்டபத்தில் சிறப்பாக நடைபெற்றன. தமிழ்ப் பண்பாட்டு ஊர்வலத்தைத் தொடர்ந்து விருந்தினர்கள் வரவேற்பு, மங்கல விளக்கேற்றல், யாழ்ப்பாணப் பல்கலைக்கழக இசைத்துறையினரின் தமிழ்த்தாய் வாழ்த்து, மாவட்டச் செயலக உத்தியோகத்தர்களின் தமிழ் மொழி வாழ்த்து, லாஸ்யமதி நடன மன்ற மாணவிகளின் வரவேற்பு நடனம் ஆகிய நிகழ்வுகளுடன் விழா ஆரம்பமானது.
பிரதம விருந்தினராக கலந்துகொள்ளவிருந்த கடற்றொழில், நீரியல் மற்றும் கடல் வளங்கள் அமைச்சரும், யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள் தவிர்க்க முடியாத காரணத்தால் சமூகமளிக்க இயலாத நிலையில், அவரின் வாழ்த்துச் செய்தி ஒலிபரப்பப்பட்டது. இந்நிகழ்வில் வடக்கு மாகாண ஆளுநர் கௌரவ நாகலிங்கம் வேதநாயகன், யாழ்ப்பாணத்திற்கான இந்தியத் துணைத் தூதுவர் கௌரவ எஸ். சாய் முரளி, அரசகரும மொழிகள் திணைக்களத்தின் ஆணையாளர் நாயகம் திரு. திலக் நந்தன கெட்டியாராச்சி, கிழக்குப் பல்கலைக்கழக சுவாமி விபுலானந்தர் அழகியல் கற்கைகள் நிறுவனத்தின் பணிப்பாளர் பேராசிரியர் பாரதி கெனடி உள்ளிட்டோர் சிறப்பு அதிதிகளாக கலந்துகொண்டனர்.
தகைசார் தமிழ்ப் பேராசிரியர் அருணாசலம் சண்முகதாஸ் அவர்கள் வரவேற்புரையை நிகழ்த்தப்பட்டது. யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமையுரையாற்றினார். தொடர்ந்து வடக்கு மாகாண ஆளுநர், அரசகரும மொழிகள் திணைக்களத்தின் ஆணையாளர் நாயகம் மற்றும் சுவாமி விபுலானந்தர் அழகியல் கற்கைகள் நிறுவனத்தின் பணிப்பாளர் ஆகியோர் சிறப்புரைகளை வழங்கினர். அரசகரும மொழிகள் திணைக்களத்தினால் வெளியிடப்பட்ட "தமிழ் மொழி வளர்ச்சியில் இலங்கையர் பங்களிப்பு" என்ற நூலை வடக்கு மாகாண ஆளுநர் கௌரவ நாகலிங்கம் வேதநாயகன் அவர்கள் வெளியிட்டு, அதன் முதல் பிரதியை இந்தியத் துணைத் தூதுவர் கௌரவ எஸ். சாய் முரளி அவர்கள் பெற்றுக்கொண்டார். மேலும் சிறப்புப் பிரதிகள் சிறப்பு அதிதிகளுக்கும் வழங்கப்பட்டன. நூல் வெளியீட்டு உரையை யாழ்ப்பாணப் பல்கலைக்கழக மொழியியல் துறை சிரேஷ்ட விரிவுரையாளர் திரு. சுவாமிநாதன் விமல் அவர்கள் நிகழ்த்தினார். சுவாமி விபுலானந்தர் நினைவஞ்சலியும் ஞாபகார்த்த உரையும் சிவபூமி அறக்கட்டளையின் நிறுவுனர் செஞ்சொற்செல்வர் கலாநிதி ஆறு. திருமுருகன் அவர்களால் நிகழ்த்தப்பட்டது.
நிகழ்வின் கலை அம்சங்களாக யாழ்ப்பாண தமிழ் சங்கத்தின் நாட்டார் இசைமாலை, யாழ்ப்பாணப் பல்கலைக்கழக நடனத்துறையின் நாட்டிய நாடகம் மற்றும் திருநெல்வேலி அனுராகம் கவின்கலை நிலையத்தின் “பல்லியம்” கலைநிகழ்ச்சி என்பன அரங்கேறின. இறுதியாக மேலதிக அரசாங்க அதிபர் திரு. கே. சிவகரன் அவர்கள் நன்றியுரை வழங்கினார். இந் நிகழ்வில் அரசகரும மொழித் திணைக்கள ஆணையாளர்கள் உள்ளிட்ட அதிகாரிகள், ஏராளமான கலைஞர்கள், கலை ரசிகர்கள், மாநகர கெளரவ பிரதி முதல்வர், மாவட்டச் செயலக உத்தியோகத்தர்கள், பிரதேச செயலாளர்கள், பல்கலைக்கழக சமூகத்தினர் மற்றும் பொதுமக்கள் எனப் பலரும் கலந்துகொண்டு நிகழ்வை சிறப்பித்தனர்.

யாழ்ப்பாண மாவட்டத்திற்கு இன்றைய தினம் (23.07.2026) விஜயம் மேற்கொண்டுள்ள புத்தசாசன, சமய மற்றும் கலாசார அலுவல்கள் அமைச்சர் கௌரவ பேராசிரியர் ஹினிதும சுனில் செனவி அவர்கள், பழைய பூங்கா வளாகத்தில் அமைந்துள்ள பழைய மாவட்டச் செயலகக் கட்டடத்தை நேரில் சென்று பார்வையிட்டார். கெளரவ அமைச்சர் தலைமையிலான குழுவினர் குறித்த புராதனக் கட்டடத்தை பார்வையிட்டதுடன், அதன் வரலாற்று முக்கியத்துவம் மற்றும் கட்டடக்கலைப் பெறுமதிகளைப் பாதுகாக்கும் வகையில் மேற்கொள்ளப்பட வேண்டிய பராமரிப்பு நடவடிக்கைகள், புனரமைப்பு பணிகள் தொடர்பாக விரிவாக கலந்துரையாடினர்.
மேலும், குறித்த கட்டடத்தின் பாதுகாப்பு, புனரமைப்பு மற்றும் மேற்கொள்ள வேண்டிய நடவடிக்கைகள் குறித்து அமைச்சர் அவர்கள் உரிய அதிகாரிகளுடன் கலந்துரையாடி, ஆலோசனைகளையும் வழிகாட்டுதல்களையும் வழங்கினார். இக் களவிஜயத்தில் வடக்கு மாகாண ஆளுநர் கௌரவ நாகலிங்கம் வேதநாயகன், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன், யாழ்ப்பாண மாவட்ட ஒருங்கிணைப்புக் குழுவின் இணைப்பாளர் திரு. எஸ். கபிலன், தொல்பொருள் திணைக்களப் பணிப்பாளர் நாயகம், ஆளுநரின் செயலாளர், தொல்பொருள் திணைக்களத்தின் யாழ். மாவட்ட அதிகாரிகள் உள்ளிட்ட பலரும் கலந்துகொண்டனர்.

யாழ்ப்பாண மாவட்ட சுற்றாடல் குழுக் கூட்டம், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்றைய தினம் (23.07.2026) முற்பகல் 11.30 மணிக்கு மாவட்ட செயலக மாநாட்டு மண்டபத்தில் நடைபெற்றது. இக் கூட்டத்தில் தலைமையுரையாற்றிய மாவட்ட அரசாங்க அதிபர் அவர்கள், யாழ்ப்பாண மாவட்டத்தில் திண்மக் கழிவு அகற்றல் மற்றும் சுற்றாடல் பாதுகாப்பு தொடர்பான விடயங்கள் தொடர்ச்சியாக கலந்துரையாடப்பட்டு வருகின்ற போதிலும், அவை கலந்துரையாடல்களுடன் மட்டுப்படுத்தப்படாமல் நடைமுறைச் செயற்பாடுகளாக மாற்றப்பட வேண்டியது அவசியம் எனத் தெரிவித்தார்.
மேலும், சுற்றாடல் பாதுகாப்பு நடவடிக்கைகளில் அனைத்து தரப்பினரும் தமது பொறுப்புக்களை உணர்ந்து செயற்பட வேண்டும் எனவும் கேட்டுக் கொண்டார். மேலும், உள்ளூராட்சி நிறுவனங்கள் மற்றும் பிரதேச செயலாளர்கள் தமது அதிகார வரம்பிற்குட்பட்ட விடயங்களை மேலும் சிறப்பாக முன்னேடுத்தால் பொதுமக்கள் எவ்வித இடையூறுகளுமின்றி தமது செயற்பாடுகளை மேற்கொள்ள முடியும் எனவும் தெரிவித்தார். திண்மக் கழிவு அகற்றல், ஒலிபெருக்கி பாவனை உள்ளிட்ட சுற்றாடல் சார்ந்த விடயங்கள் தொடர்பில் பொதுமக்களுக்கு போதிய விழிப்புணர்வு காணப்படுகின்ற போதிலும், சிலர் விதிமுறைகளை மீறி இடையூறுகளை ஏற்படுத்தும் வகையில் செயற்படுவதாகவும் அரசாங்க அதிபர் சுட்டிக்காட்டினார். சுற்றாடல் பாதுகாப்பு நடவடிக்கைகளுக்கு உறுதுணையாக செயற்பட்டு வரும் உள்ளூராட்சி நிறுவனங்கள் மற்றும் பிரதேச செயலாளர்களுக்கும் அவர் தனது நன்றிகளைத் தெரிவித்தார்.
இக் கூட்டத்தில் பின்வரும் முக்கிய விடயங்கள் ஆராயப்பட்டு தீர்மானங்கள் மேற்கொள்ளப்பட்டன.
1.திண்மக் கழிவு முகாமைத்துவம் :
யாழ்ப்பாண மாவட்டத்திலுள்ள பிரதேச செயலாளர் பிரிவுகளில் திண்மக் கழிவுகளை அகற்றுவதற்கான காணித் தேவைகள் தொடர்பில் கலந்துரையாடப்பட்டது. இதற்குத் தீர்வாக, ஒவ்வொரு பிரதேச செயலாளர் பிரிவிலும் சேகரிக்கப்படும் கழிவுகளை அந்தந்த பிரதேசங்களிலேயே முறையாக முகாமைத்துவம் செய்வது பொருத்தமானது எனத் தீர்மானிக்கப்பட்டது.
2.சட்டவிரோத எரியூட்டல் நடவடிக்கைகள் :
வீடுகள், வீதிகள் மற்றும் திறந்த வெளிகளில் கழிவுகளை எரியூட்டும் நடவடிக்கைகள் இடம்பெற்றால், பொலிஸாரினால் சட்ட நடவடிக்கைகள் மேற்கொள்ளப்படும் எனத் தெரிவிக்கப்பட்டது.
3.ஒலிபெருக்கி பாவனை தொடர்பான கட்டுப்பாடுகள் :
ஒலிபெருக்கி பாவனையினால் பொதுமக்களுக்கு அதிக இடையூறுகள் ஏற்படுமாயின், கிராம உத்தியோகத்தர்கள் ஊடாக பிரதேச செயலாளருக்கு தகவல் வழங்கப்பட்டு, பொலிஸ் அதிகாரிகளின் உதவியுடன் உரிய நடவடிக்கைகள் மேற்கொள்ளப்படும் எனத் தீர்மானிக்கப்பட்டது. மேலும், க.பொ.த உயர்தரப் பரீட்சை நிறைவடையும் வரை ஒலிபெருக்கி பாவனைக்கான அனுமதிகள் வழங்கப்படமாட்டாது என நீதிமன்ற உத்தரவு பிறப்பிக்கப்பட்டுள்ளதாகவும் கூட்டத்தில் தெரிவிக்கப்பட்டது.
4.மரணச் சடங்குகளில் வெடிகொழுத்தல் :
மரணச் சடங்குகளின் போது வெடிகொழுத்தல் மேற்கொள்வதால் ஏற்படும் பாதிப்புகள் தொடர்பில் பொதுமக்களுக்கு விழிப்புணர்வு ஏற்படுத்த நடவடிக்கை எடுக்குமாறு அறிவுறுத்தப்பட்டது.
5.டெங்கு கட்டுப்பாடு மற்றும் சுகாதார நடவடிக்கைகள் :
டெங்கு நோய்த் தாக்கம் தொடர்பில் ஜூன் மாதத்தில் 79 பேரும், ஜூலை மாதத்தில் 162 பேரும் பாதிக்கப்பட்டுள்ளதாகத் தெரிவிக்கப்பட்டது. மூன்று நாள் விசேட விழிப்புணர்வு நடவடிக்கைகளின் மூலம் தற்போது நிலைமை கட்டுப்பாட்டுக்குள் கொண்டுவரப்பட்டுள்ளதாகவும் தெரிவிக்கப்பட்டது. இதற்கு ஒத்துழைப்பு வழங்கிய பிரதேச செயலாளர்கள், உள்ளூராட்சி நிறுவன உத்தியோகத்தர்கள், கிராம உத்தியோகத்தர்கள் உள்ளிட்ட அனைத்து தரப்பினருக்கும் நன்றிகள் தெரிவிக்கப்பட்டதுடன், தொடர்ச்சியான கண்காணிப்புகளை சம்பந்தப்பட்ட திணைக்களங்கள் மேற்கொள்ள வேண்டும் எனவும் வலியுறுத்தப்பட்டது.
உள்ளூராட்சி நிறுவனங்கள் திண்மக் கழிவுகளை அகற்றும் போது, கழிவு சேகரிப்பு கொள்கலன்களை முறையாக அமைப்பதற்கு முன்னுரிமை வழங்க வேண்டும் எனவும் அறிவுறுத்தப்பட்டது. மேலும், பிரதேச செயலாளர்கள் வழிபாட்டுத் தலங்களின் நிர்வாக சபைகளுடன் கலந்துரையாடி, பொதுச் சுகாதார பரிசோதகர்களின் உதவியுடன் திண்மக் கழிவு முகாமைத்துவம், டெங்கு கட்டுப்பாடு மற்றும் ஒலிபெருக்கி பாவனை தொடர்பான விழிப்புணர்வுகளை வழங்குமாறு பிராந்திய சுகாதார சேவைகள் பணிப்பாளர் தெரிவித்தார்.
6.மணல் அகழ்வு தொடர்பான விடயம் :
மணல் அகழ்வு தொடர்பில் மன்னார் மாவட்டத்தில் இருந்து கோரிக்கை கிடைக்கப்பெற்றுள்ளதாகவும், வீட்டுத் திட்டங்களுக்கான மணலைப் பெற்றுக்கொள்வதற்கான அனுமதிகளை யாழ்ப்பாண மாவட்ட செயலகத்தின் ஊடாக பெற்றுக்கொள்ள முடியும் எனவும் தெரிவிக்கப்பட்டது.
இக் கலந்துரையாடலில் பிரதேச சபை தவிசாளர்கள், செயலாளர்கள், மேலதிக அரசாங்க அதிபர், மேலதிக அரசாங்க அதிபர் (காணி), பிராந்திய சுகாதார சேவைகள் பணிப்பாளர், பிரதி திட்டமிடல் பணிப்பாளர், யாழ்ப்பாண பொலிஸ் பொறுப்பதிகாரி, பிரதேச செயலாளர்கள், உதவி மாவட்டச் செயலாளர், புவிச்சரிதவியல் அளவை சுரங்கங்கள் பணியக அகழ்வுப் பொறியியலாளர், கரையோர பாதுகாப்பு திணைக்கள அதிகாரி உள்ளிட்ட பல்வேறு துறைசார் உத்தியோகத்தர்கள் கலந்து கொண்டனர்.

தமிழ்மொழித் தினமும் சுவாமி விபுலானந்தர் நினைவு தினமும் முன்னிட்டு ஏற்பாடு செய்யப்பட்ட பண்பாட்டு ஊர்வலம் இன்றைய தினம் (24.07.2026) காலை 9.00 மணிக்கு யாழ்ப்பாணம் வைத்தீஸ்வராக் கல்லூரி முன்றலில், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் நடைபெற்ற ஆரம்ப நிகழ்வுடன் ஆரம்பமானது.
அதனைத் தொடர்ந்து, வைத்தீஸ்வராக் கல்லூரியிலிருந்து புறப்பட்ட ஊர்வலம் காங்கேசன்துறை வீதி, சத்திரச் சந்தி, வைத்தியசாலை வீதி, கார்கில்ஸ் சந்தி மற்றும் மணிக்கூட்டுக் கோபுரம் வழியாகச் சென்று காலை 10.30 மணியளவில் திருவள்ளுவர் பண்பாட்டு மண்டபத்தை வந்தடைந்தது. இவ்வூர்வலத்தில் இயல், இசை, நாடகம் ஆகிய முத்தமிழ் கலை நிகழ்வுகளுடன் புரவி நடனம், பொய்க்கால் குதிரை, கும்மி, மயில் நடனம், கோலாட்டம், காவடி நடனம், செம்பு நடனம், சிலம்பாட்டம், கரகாட்டம், ஒயிலாட்டம், உடுக்கு, இன்னியம், தவில்–நாதஸ்வர இசை உள்ளிட்ட பாரம்பரிய கலை நிகழ்ச்சிகள் இடம்பெற்றது. மேலும், தமிழ் மொழி மற்றும் கலாசாரப் பாரம்பரியத்தைப் பிரதிபலிக்கும் அலங்கார கலாசார ஊர்திப் பவனியும் ஊர்வலத்திற்கு தனிச்சிறப்பைச் சேர்த்தது.

யாழ்ப்பாண மாவட்ட உணவுப் பாதுகாப்புக் குழுக் கூட்டம் மாவட்ட அரசாங்க அதிபர் மருதலிங்கம் பிரதீபன் அவர்களின் தலைமையில் இன்று (23.07.2025) மாவட்டச் செயலக மாநாட்டு மண்டபத்தில் நடைபெற்றது. இதன்போது கருத்துத் தெரிவித்த மாவட்ட அரசாங்க அதிபர், யாழ்ப்பாண மாவட்டத்தில் உணவு உற்பத்தியை மேலும் அதிகரிக்க வேண்டிய அவசியம் இருப்பதாகக் குறிப்பிட்டார். மாவட்டத்தின் வளங்களைச் சிறப்பாகப் பயன்படுத்தி, போசாக்கும் ஆரோக்கியமும் நிறைந்த உணவுப் பொருட்களை உற்பத்தி செய்வதற்கான நடவடிக்கைகள் முன்னெடுக்கப்பட்டு வருவதாகவும் தெரிவித்தார். மேலும், விவசாயத் திணைக்களமும் பிரதேச செயலாளர்களும் இணைந்து உணவு உற்பத்தி தொடர்பான பல்வேறு திட்டங்களை நடைமுறைப்படுத்துவதோடு, அவற்றுக்கான முன்மொழிவுகளுக்கு முன்னுரிமை வழங்கப்படும் என்றும் அரசாங்க அதிபர் தெரிவித்தார். விவசாயத்திற்கு பயன்படுத்தப்படாமல் காணப்படும் காணிகளை பிரதேச செயலாளர்கள் ஊடாக அடையாளம் கண்டு, அவற்றை பயிர்ச் செய்கைக்காக குத்தகை அடிப்படையில் பயன்பாட்டுக்குக் கொண்டு வர நடவடிக்கை எடுக்குமாறும் அறிவுறுத்தப்பட்டது. முதற்கட்டமாக கோப்பாய், உடுவில் மற்றும் தெல்லிப்பழை பிரதேச செயலாளர் பிரிவுகளில் இந்தத் திட்டம் பரீட்சார்த்தமாக அமுல்படுத்தப்படவுள்ளது. கால்நடை உற்பத்தி மற்றும் சுகாதாரத் திணைக்களத்தால் மாவட்டத்திற்கான மூன்று ஆண்டுகால உணவுப் பாதுகாப்புத் திட்டம் தயாரிக்கப்பட்டுள்ளதுடன், அது மாவட்ட ஒருங்கிணைப்புக் குழுக் கூட்டத்தில் சமர்ப்பிக்கப்படவுள்ளதாக தெரிவிக்கப்பட்டது. மேலும், கட்டாக்காலி கால்நடைகளைக் கட்டுப்படுத்துவதற்காக உள்ளூராட்சி அமைப்புகளும் பிரதேச சபைகளும் கடுமையான சட்ட நடவடிக்கைகளை நடைமுறைப்படுத்த வேண்டும் என வலியுறுத்தப்பட்டது. இதனுடன், பிரதேச செயலக மட்ட விவசாயக் குழுக் கூட்டங்களில் கலந்துரையாடப்பட்ட விடயங்கள், எதிர்வரும் எல்-நினோ காலநிலையை முன்னிட்டு விவசாயிகளுக்கு வழங்கப்பட வேண்டிய ஆலோசனைகள், வீட்டு தோட்டங்களை ஊக்குவிக்கும் திட்டங்கள் மற்றும் நெல் உற்பத்தியை அதிகரிக்கும் தரமான விதைநெல் உற்பத்தித் திட்டங்கள் தொடர்பாகவும் விரிவாக ஆராயப்பட்டது. இக்கூட்டத்தில் மாவட்ட மேலதிக அரசாங்க அதிபர் (காணி) பா. ஜெயகரன், மாவட்ட பிரதி திட்டமிடல் பணிப்பாளர் எஸ். சிவகுமாரன், மாவட்ட புள்ளிவிபரத் திணைக்கள பிரதிப் பணிப்பாளர் எம். வித்தியானந்தநேசன், பிரதி மாகாண விவசாயப் பணிப்பாளர், பிரதேச செயலாளர்கள், விவசாயம், மீன்பிடி, கால்நடை உற்பத்தி உள்ளிட்ட துறைகளின் தலைவர்கள் மற்றும் மாவட்ட, பிரதேச செயலக உத்தியோகத்தர்கள் உள்ளிட்ட பலர் கலந்துகொண்டனர்.








