தேசிய உற்பத்தி திறன் செயலகத்தால் நடாத்தப்பட்ட "மக்கள் மைய நிர்வாகம்" Citizen Mirror : Divisional Productivity Index - 1.0 போட்டியில் நல்லூர் பிரதேச செயலகம் அகில இலங்கை ரீதியில் 340 பிரதேச செயலகங்கள் பங்குபற்றிய போட்டியில் முதலிடம் பெற்று அதற்கான சான்றிதழினை நேற்றைய தினம் (16.06.2026) கொழும்பில் நடைபெற்ற நிகழ்வில் பிரதேச செயலாளர் திருமதி. யசோதா உதயகுமார் அவர்களும், அபிவிருத்தி உத்தியோகத்தர் திருமதி சஞ்சீவ் சுதாசினி அவர்களும், நல்லூர் பிரதேச செயலகத்தின் சார்பில் பெற்றுக்கொண்டனர். இதனையொட்டி யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்கள் இன்றைய தினம் (17.06.2026) நல்லூர் பிரதேச செயலகத்திற்கு விஜயம் செய்து பிரதேச செயலாளர் மற்றும் உத்தியோகத்தர்கள் அனைவரையும் வாழ்த்தி பாராட்டியதுடன், உத்தியோகத்தர்களுடன் மாநாட்டு மண்டபத்தில் கலந்துரையாடலிலும் ஈடுபட்டார்.
இது அரச பொறிமுறையில் முன்னணி வகிக்கும் சேவை வழங்கல் வலையமைப்பு, பிரதேச செயலகங்களின் உற்பத்தித்திறனை அளவீடு செய்வதற்கும் , மதிப்பீடு செய்வதற்கும் "மக்கள் மைய நிர்வாகம்" (Citizen Mirror) பிரதேச உற்பத்தி்த்திறன் சுட்டெண் 1.0 தேசிய உற்பத்தித்திறன் செயலகத்தால் கடந்த வருடம் அறிமுகப்படுத்தப்பட்டதன் பிரகாரம் நிர்வாகப் பிரிவு, கணக்குப் பிரிவு, திட்டமிடல் பிரிவு, காணிப் பிரிவு, பதிவாளர் பிரிவு, வெளிக்களப் பிரிவு மற்றும் விசேட செயற்றிட்டம் எனும் ஏழு பிரிவு ரீதியான தரவுகளை உள்ளிட்டு அகில இலங்கை ரீதியில் 96.23% புள்ளிகளைப் பெற்று தேசிய ரீதியில் முதலாவது நிலைக்கு நல்லூர் பிரதேச செயலகம் தரப்படுத்தப்பட்டுள்ளது என்பது குறிப்பிடத்தக்கது.

கல்விப் பொதுத் தராதர உயர்தர மற்றும் தொழிற் கல்வி மாணவர்களுக்கான வெளிநாட்டு உயர்கல்வி கற்கை நெறிகளை பயில்வதற்கான விழிப்புணர்வு நிகழ்ச்சித் திட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (17.06.2026) பி.ப 3.00 மணிக்கு மாவட்ட அரசாங்க அதிபர் அலுவலகத்தில் நடைபெற்றது இந் நிகழ்வில் மாவட்ட அரசாங்க அதிபர் அவர்கள் கருத்து தெரிவிக்கையில், Synergy Concultant நிறுவனமானது வெளிநாட்டில் உயர்கல்வியை தொடர விரும்பும் மாணவர்களை ஊக்கப்படுத்தும் நோக்கிலும் அவர்களின் எதிர்கால நலன் கருதியும் "SYNERGY EDU FIESTA "விழிப்புணர்வு நிகழ்ச்சி திட்டத்தை நடாத்துவதற்கான அனுமதியை கோரி இருந்ததாகவும், அதற்கான உயர்கல்வி நிறுவனங்களின் ஆலோசனைகளை பெற்றுக் கொள்வதற்காகவும் , அது தொடர்பான அடுத்த கட்ட கலந்துரையாடலுக்காக Synergy Concultant நிறுவனம் போன்று செயற்படும் நிறுவனங்களையும் அழைத்து அவற்றின் செயற்பாடுகள், நோக்கம் குறித்தும் கலந்துரையாடி மாணவர்களை வெளிநாட்டு கற்கை நெறிகளை தொடர்வதற்கான வாய்ப்புகளை வழங்குவதற்காகவும் இக் கலந்துரையாடல் ஏற்பாடு செய்யப்பட்டுள்ளதாகவும் தெரிவித்தார்.
வெளிநாட்டில் மாணவர்களுக்கான உயர் கல்விக்கான வாய்ப்புகளும் விசா வசதிகளும் வழங்கல், மாணவர்களுக்கான விசா விண்ணப்ப செயல்முறை, வெளிநாட்டு பல்கலைக்கழகங்களில் கற்கும் மாணவர்களுக்கு இடையிலான தொடர்புகளை ஏற்படுத்தல், புலமைப்பரிசில் வாய்ப்புகள் மற்றும் மாணவர்களுக்கான admission process education pathway தகவல்களை வழங்குதல் போன்றன தொடர்பாக Synergy Concultant நிறுவனத்தின் பணிப்பாளர் திரு.சுலோஜன் விபுல் அவர்களால் விளக்கமளிக்கப்பட்டது. இக் கலந்துரையாடலில் யாழ்ப்பாண மாவட்ட மேலதிக அரசாங்க அதிபர், பிரதம கணக்காளர், உதவி மாவட்ட செயலாளர், பிராந்திய சமுத்திரப்ப பல்கலைக்கழகத்தின் உதவி பணிப்பாளர், தொழில்நுட்பக் கல்லூரி பணிப்பாளர், யாழ்ப்பாண பல்கலைக்கழக கல்லூரி பணிப்பாளர், தேசிய பயலுனர் கைத்தொழில் பயிற்சி அதிகார சபையின் (NAITA) முகாமையாளர், SOS சிறுவர் கிராமத்தின் பணிப்பாளர், இலங்கை ஜேர்மன் தொழிற்கல்வி நிர்வாகத்தின் பணிப்பாளர், மருத்துவ விஞ்ஞான நிர்வாகத்தின் பணிப்பாளர், சுகநல பணிமனையின் பணிப்பாளர், கிராமிய அபிவிருத்தி திணைக்களத்தின் பணிப்பாளர், யாழ்ப்பாணம், தீவகம், தென்மராட்சி, வடமராட்சி, வலிகாமம் வலயக்கல்விப் பணிப்பாளர்கள் மற்றும் விடைய உத்தியோகத்தர்கள் உள்ளிட்டவர்கள் கலந்து கொண்டனர்.

2026 ஆம் ஆண்டுக்கான வீட்டுத்திட்ட பயனாளிகளுக்கு காசோலை வழங்கும் நிகழ்வும் 2025 ஆம் ஆண்டு வீடமைப்பு வழங்கப்பட்டவர்களுக்கான ஆவணம் வழங்கும் நிகழ்வும் யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களின் தலைமையில் இன்றைய தினம் (16.06.2026) பி. ப. 03.30 மணிக்கு மாவட்டச் செயலக கேட்போர் கூடத்தில் நடைபெற்றது. இவ் நிகழ்வில் பிரதம விருந்தினராக வீடமைப்பு நிர்மாணிப்பு மற்றும் நீர் வழங்கல் பிரதி அமைச்சர் கௌரவ டீ.பி சரத் அவர்களும், சிறப்பு விருந்தினர்களாக பாராளுமன்ற உறுப்பினர்களான கெளரவ கருணநாதன் இளங்குமரன், கெளரவ ஜெயசந்திரமூர்த்தி றஜீவன், கெளரவ சண்முகநாதன் சிறிபவானந்தராஜா அவர்களும் பங்குபற்றினார்கள். இந் நிகழ்வில் அரசாங்க அதிபரின் தலையுரையினைத் தொடர்ந்து, பாராளுமன்ற உறுப்பினர் கெளரவ கருணநாதன் இளங்குமரன் அவர்களினால் கருத்துரை வழங்கப்பட்டது. அதனைத் தொடர்ந்து வீடமைப்பு நிர்மாணிப்பு மற்றும் நீர் வழங்கல் பிரதி அமைச்சர் கௌரவ டீ.பி சரத் அவர்களினால் சிறப்புரையாற்றப்பட்டது.
அதனைத் தொடர்ந்து யாழ்ப்பாண மாவட்டத்தில் தலா ரூபா 02.00 மில்லியனில் நடைமுறைப்படுத்தப்படும் 827 வீடுகளில் இன்றைய தினம் 125 பயனாளிகளுக்கு முதற்கட்டமாக ரூபா 400,000.00 வீதம் காசோலை வழங்கப்பட்டதுடன், 2025 ஆம் ஆண்டு பூர்த்தி செய்யப்பட்ட வீடுகளில் முதற்கட்டமாக 180 பயனாளிகளுக்கு வீடமைப்புத் திட்டத்திற்கான ஆவணங்கள் கையளிக்கப்பட்டன. இந் நிகழ்வில் யாழ்ப்பாண மாவட்ட ஒருங்கிணைப்புக் குழுவின் இணைப்பாளரும் யாழ் மாநகர சபையின் உறுப்பினருமான கெளரவ எஸ். கபிலன், மேலதிக அரசாங்க அதிபர் திரு. கே. சிவகரன், மேலதிக அரசாங்க அதிபர் (காணி) திரு பா. ஜெயகரன் உள்ளிட்ட பதவிநிலை உத்தியோகத்தர்கள், பிரதேச செயலாளர்கள், அமைச்சின் அதிகாரிகள் மற்றும் ஊடகவியலாளர்கள் உள்ளிட்டவர்கள் கலந்து கொண்டனர்.

யாழ் மாவட்ட செயலக மற்றும் பிரதேச செயலகங்களின் கலாசார உத்தியோகத்தர்களுக்கான முன்னேற்ற மீளாய்வுக் கலந்துரையாடல் அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம்(17.06.2026) மாவட்டச் செயலக மாநாட்டு மண்டபத்தில் நடைபெற்றது. இக் கலந்துரையாடலில் கருத்துத் தெரிவித்த அரசாங்க அதிபர் அவர்கள், எமது மாவட்டத்தின் கலைகளை வளர்க்க வேண்டியது அனைவரின் பொறுப்பாகும் எனவும், கலைஞர்களை ஊக்கப்படுத்த வேண்டும் எனவும், கலைகளை வளர்ப்பதற்கு கலைஞர்களுக்கு களமும் அமைத்துக்கொடுக்கப்படல் வேண்டும் எனத் தெரிவித்து பின்வரும் அறிவுறுத்தல்களை வழங்கினார்.
01.கலைஞர்களை பிரதேச செயலக ரீதியாக ஒன்றுதிரட்டி "கலைச் சங்கமம்" நடாத்த நடவடிக்கை மேற்கொள்ளுமாறு அறிவுறுத்தல் வழங்கினார்.
02. இளம் கலைஞர்களுக்கான கலை பயிலரங்கத்தினை மாவட்டச் செயலகத்தில் - யூலை, செப்டம்பர் மற்றும் நவம்பர் மாதங்களில் நடாத்தவும், அதில் குறைந்தது 75 கலைஞர்கள் பங்குபற்ற ஒழுங்கு செய்யுமாறும் அறிவுறுத்தல் வழங்கப்பட்டது.
03.மாவட்டச் செயலக நலன்புரிக் கழகத்தின் ஒருங்கிணைப்பில் மாவட்டச் செயலகம் மற்றும் பிரதேச செயலகங்களுக்கிடையிலான உத்தியோகத்தர்களுக்கான கவிதை, சிறுகதை, பேச்சு, அறிவிப்பாளர், தனி நடிப்பு, ஓவியம், நடனம் உள்ளிட்ட 16 வகையான கலைப் போட்டிகளை யூலை மாதத்திலிருந்து நடாத்துமாறு அறிவுறுத்தல் வழங்கப்பட்டது.
இக் கலந்துரையாடலில் மேலதிக அரசாங்க அதிபர் திரு கே.சிவகரன், உதவி மாவட்டச் செயலாளர் செல்வி உ.தா்சினி, புள்ளிவிபர பிரதிப் பணிப்பாளரும் மாவட்டச் செயலக நலன்புரிக் கழகத்தின் தலைவருமான திரு.எம்.வித்தியானந்தநேசன், மாவட்ட சிரேஷ்ட கலாசார உத்தியோகத்தர் திருமதி கி. மாலினி, அரச சார்பற்ற நிறுவனங்களின் இணைப்பாளர் திரு ந.தயாபரன் மற்றும் கலாசார உத்தியோகத்தர்கள் கலந்து கொண்டனர்.

யாழ்ப்பாண மாவட்டத்தில் நடைமுறைப்படுத்தப்படுகின்ற வீட்டுத்திட்டம் தொடர்பிலான முன்னேற்ற மீளாய்வுக் கலந்துரையாடல் வீடமைப்பு நிர்மாணிப்பு மற்றும் நீர் வழங்கல் பிரதி அமைச்சர் கௌரவ டீ.பி சரத் அவர்களின் தலைமையில் இன்றைய தினம் (16.06.2026) பி. ப. 02.30 மணிக்கு அரசாங்க அதிபர் அலுவலகத்தில் நடைபெற்றது. இக் கூட்டத்தில் பாராளுமன்ற உறுப்பினர்களான கெளரவ சண்முகநாதன் சிறிபவானந்தராஜா, கெளரவ கருணநாதன் இளங்குமரன், கெளரவ ஜெயசந்திரமூர்த்தி றஜீவன், அரசாங்க அதிபர் திரு.மருதலிங்கம் பிரதீபன் மற்றும் யாழ்ப்பாண மாவட்ட ஒருங்கிணைப்புக் குழுவின் இணைப்பாளர் திரு. எஸ். கபிலன் ஆகியோர் பங்குபற்றினார்கள். இக் கூட்டத்தில் வரவேற்புரையாற்றிய அரசாங்க அதிபர் அவர்கள், யாழ்ப்பாண மாவட்டத்திற்கு விஜயம் மேற்கொண்டுள்ள கெளரவ பிரதி அமைச்சர், கெளரவ பாராளுமன்ற உறுப்பினர்கள் உள்ளிட்ட உயர் அதிகாரிகளை வரவேற்று, யாழ்ப்பாண மாவட்டத்தில் இவ் அமைச்சின் ஊடாக நடைமுறைப்படுத்தப்படுகின்ற திட்டங்களின் முன்னேற்ற மீளாய்வு தொடர்பில் கலந்துரையாடுவதற்காக இங்கு கூடியுள்ளதக்கவும், இவ் வருடம் யாழ்ப்பாண மாவட்டத்திற்கு அமைச்சினால் 827 வீடுகளும், தேசிய வீடமைப்பு அதிகார சபை ஊடாக 281 வீடுகளும் நிர்மாணிக்கப்பட்டு வருவதாகவும் தெரிவித்தார்j.
மேலும், அமைச்சினால் நடைமுறைப்படுத்தப்படும் வீடுகளுக்கு - அமைச்சரவை மூலம் ஒரு வீட்டிற்கு 1.50 மில்லியன் ரூபாவிலிருந்து அதிகரித்து 2.00 மில்லியன் ரூபாவாக ஒதுக்கீடு செய்யப்பட்டுள்ளதாகவும், அதற்கு அதிமேதகு சனாதிபதி அவர்களுக்கும், வீடமைப்பு நிர்மாணிப்பு மற்றும் நீர் வழங்கல் பிரதி அமைச்சர் கௌரவ டீ.பி சரத் அவர்களுக்கும், கடற்றொழில் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்களுக்கும், கெளரவ பாராளுமன்ற உறுப்பினர்களுக்கும் தமது நன்றியினையும் தெரிவித்துக்கொண்டதுடன், கடல் கடந்த தீவுகளான நெடுந்தீவு, அனலைதீவு மற்றும் நயினாதீவு ஆகியவற்றில் நடைமுறைப்படுத்திவரும் வீடுகளுக்கான பொருட்களை கொண்டு செல்வதற்கான போக்குவரத்து செலவுகளை மேலதிகமாக வழங்குவதற்கான கோரிக்கையையும், தேசிய வீடமைப்பு அபிவிருத்தி அதிகார சபையினால் 2018 மற்றும் 2019 இடைநடுவில் கைவிடப்பட்ட வீடுகளுக்கான மிகுதி நிதி வழங்குதல் தொடர்பான கோரிக்கையையும் முன்வைத்தார்.
கெளரவ அமைச்சர் தலைமையில் நடைபெற்ற குறித்த கலந்துரையாடலில் - காணி இல்லாதவர்களுக்கான அடுக்குமாடி வீடுகளை நிர்மாணித்தல் தொடர்பாகவும், வீட்டுத்திட்டம் இல்லாதோர் விபரங்கள், வழங்கப்பட்ட வீட்டுத்திட்டங்களின் தற்போதைய முன்னேற்ற நிலைமைகள், எதிர்காலத்தில் தேவையான வீடுகள் என பல்வேறு விடயங்கள் தொடர்பில் கலந்துரையாடப்பட்டு, முன்வைக்கப்பட்ட கோரிக்கைகளை சாதகமாக பரிசீலித்து நடவடிக்கை எடுப்பதாகவும் கெளரவ பிரதி அமைச்சரால் தெரிவிக்கப்பட்டது. இக் கலந்துரையாடலில் மேலதிக அரசாங்க அதிபர், மேலதிக அரசாங்க அதிபர் (காணி), மாவட்ட செயலக பதவி நிலை உத்தியோகத்தர்கள், பிரதேச செயலாளர்கள் மற்றும் விடய உத்தியோகத்தர்கள் என பலரும் கலந்து கொண்டனர்.








