உலக சுற்றாடல் தினம் ஆண்டுதோறும் ஜூன் மாதம் 05 ஆம் திகதி கொண்டாடப்படுகிறது. சுற்றாடல் அமைச்சு மே மாதம் 30ஆம் திகதி முதல் ஜூன் மாதம் 05ஆம் திகதி வரை சுற்றாடல் வாரமாக பிரகடனப்படுத்தி பல்வேறு விழிப்புணர்வு செயற்றிட்டங்களை பரவலாக முன்னெடுத்து வருகிறது. இந் நிலையில் யாழ்ப்பாண மாவட்டத்தின் சர்வதேச சுற்றாடல் தின நிகழ்வின் ஓர் அங்கமாக யாழ். A-Head Trust முன்பள்ளி மாணவர்களுக்கு சுற்றுச் சூழல் தொடர்பான விழிப்புணர்வு நிகழ்வு இன்றைய தினம்(04.06.2026) வியாழக்கிழமை காலை 08.30 மணிக்கு முன்னெடுக்கப்பட்டது.
யாழ். மாவட்ட செயலக சுற்றாடல் கிளையின் ஏற்பாட்டில் நடைபெற்ற இந் நிகழ்வில், யாழ். மாவட்ட அரசாங்க அதிபர் திரு.மருதலிங்கம் பிரதீபன் அவர்கள் கலந்து கொண்டு குறித்த நிகழ்வை ஆரம்பித்து வைத்து கருத்துத் தெரிவிக்கையில், முன்பள்ளி பருவம் பிள்ளைகளின் வாழ்க்கை மிக முக்கியமான பருவமாகும். இப் பருவம் குழந்தைகளின் எதிர்கால வளர்ச்சிக்கான வலுவான அடித்தளமாக அமைகின்றது எனவும், சமூகமயமாக்கல் செயற்பாடு என்பது முன்பள்ளிகளிலேயே ஆரம்பமாகின்றது எனவும் தெரிவித்தார். மேலும், குழந்தை பிறந்து தனது வீட்டு சூழலை விட்டு முதல்முதலாக வெளிச்சூழலுடன் பழகும் வாய்ப்பு முன்பள்ளிகளிலேயே ஏற்படுத்தப்படுகின்றது எனவும், பிள்ளைகளை சரியாக வழிப்படுத்தி நல்ல எதிர்காலத்தை ஏற்படுத்திக் கொடுப்பார்கள் என்ற நம்பிக்கையிலேயே பெற்றோர்கள் தமது பிள்ளைகளை அனுப்புகின்றனர் எனவும், எனவே இந்த சிறார்களை சரியான வழியில் வழிபடுத்த வேண்டிய பொறுப்பு ஆசிரியர்களுக்கு உள்ளது எனவும் தெரிவித்தார். மேலும், இச் சிறப்பான நிகழ்வாக ஒழுங்குபடுத்திய மாவட்ட செயலக உத்தியோகத்தருக்கும் தனது நன்றிகளை தெரிவித்துக் கொண்டதுடன், சர்வதேச சுற்றாடல் தினத்தை முன்னிட்டு இவ்வாறான செயற்பாடுகளை முன்னெடுத்தமைக்கும் தனது பாராட்டுகளையும் தெரிவித்தார். மேலும், இந்த செயற்பாடுகள் சிறப்பாக அமையவேண்டும் என்றும், சிறுவர்களின் எதிர்காலம் நல்ல நிலைக்கு வரவேண்டும் என்றும் அரசாங்க அதிபர் தனது வாழ்த்துக்களைத் தெரிவித்தார்.
இந் நிகழ்வில் மனப்பாங்கு மேம்பாட்டின் மூலம் சூழல் பாதுகாப்புக்கு பங்களித்தல் எனும் நோக்கில் விழிப்புணர்வு ஓவியங்களால் உருவாக்கப்பட்ட பிரசுரங்கள் சிறார்களுக்கு வழங்கி வைக்கப்பட்டு விளக்கமளிக்கப்பட்டன. மேலும், கழிவுகளை தரம் பிரித்து அகற்றும் மனப்பாங்கினை பள்ளிச்சிறார்களுக்கு ஏற்படுத்தும் முகமாக குப்பை தொட்டிகள் வழங்கி வைக்கப்பட்டதுடன், நிகழ்வின் நினைவாக வளாகத்தில் மரக்கன்றும் நாட்டி வைக்கப்பட்டது. தொடர்ந்து "சுற்றாடல் மாற்றங்களுக்கு எதிராக செயற்படுவோம்" எனும் தொனிப்பொருளில் விழிப்புணர்வு நிகழ்ச்சித் திட்டத்தினை சுற்றாடல் அபிவிருத்தி உத்தியோகத்தர் திருமதி. வி.பரணிதா நிகழ்த்தினார். இந் நிகழ்வில் யாழ் பல்கலைக்கழக மருத்துவ பீடத்தின் சிரேஷ்ட விரிவுரையாளர் Dr. P.A டினேஷ் குஞ்ஜே, A-Head Trust முன்பள்ளி இணைப்பாளர் திரு. G. சஜரூபன், மாவட்ட செயலக சுற்றாடல் கிளை உத்தியோகத்தர்கள், ஆசிரியர்கள் மற்றும் மாணவர்கள் உள்ளிட்டோர் கலந்து கொண்டனர்.
 
 
 
1 2 3 4 5 6 7 8 9 10 11 12 13 14 15
உலக YMCA ஸ்தாபகர் சேர் ஜோர்ஜ் வில்லியம் அவர்களின் ஸ்தாபக தினம் ஜூன் மாதம் 06ஆம் திகதி அனுஷ்டிக்கப்படுகிறது. இதனை முன்னிட்டு யாழ்ப்பாணம் YMCA ஜூன் மாதம் 01ஆம் திகதி தொடக்கம் 06ஆம் திகதி வரை "Avoid Polyethene to Save Nature" எனும் தொனிப்பொருளில் கொடிவாரத்தை முன்னெடுக்கின்றது. அந்த வகையில் இன்றைய தினம் (03.06.2026) யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களை YMCA இன் தலைவர் திரு.த.யூதராஜா, பொதுச் செயலாளர் திரு.எஸ். ஜெயராஜசிங்கம், முன்னாள் தலைவர் திரு.ஆர்.வினோத் மற்றும் நிறுவன பணியாளர்கள் சந்தித்து - கொடி அணிவிக்கப்பட்டு கொடிவார விழிப்புணர்வு முன்னெடுக்கப்பட்டது.
 
 
1 2 3 4
ஒவ்வொரு ஆண்டும் மே மாதம் 31ஆம் திகதி சர்வதேச புகைத்தல் மற்றும் போதை எதிர்ப்பு தினம் கடைப்பிடிக்கப்படுகிறது. அந்த வகையில் சர்வதேச புகைத்தல் மற்றும் போதை எதிர்ப்பு தினத்தின் யாழ்ப்பாண மாவட்ட மட்ட கொடித் தின நிகழ்ச்சித் திட்டத்தினை ஆரம்பித்து வைக்கும் நிகழ்வானது "போதையற்ற ஓர் எதிர்காலம் ஆரோக்கியமான ஓர் தேசம்" எனும் தொனிப்பொருளில் ஆவரங்கால் சிவசக்தி மணி மண்டபத்தில் இன்றைய தினம்(2026.05.31) ஞாயிற்றுக்கிழமை காலை 9.00 மணிக்கு நடைபெற்றது. யாழ்ப்பாண மாவட்ட சமுர்த்தி அபிவிருத்தி திணைக்களத்தின் பணிப்பாளர் பொ.ஸ்ரீவர்ணன் அவர்களின் தலைமையில் நடைபெற்ற இந்நிகழ்வில், பிரதம விருந்தினராக யாழ். மாவட்ட அரசாங்க அதிபரும் மேலதிக மாவட்ட பணிப்பாளர் நாயகமுமான திரு.மருதலிங்கம் பிரதீபன் அவர்களும், சிறப்பு விருந்தினர்களாக பிரதேச செயலாளர்கள் கலந்து கலந்து சிறப்பித்தனர்.
நிகழ்வில் மங்கல விளக்கேற்றல், வரவேற்பு நடனத்தினை தொடர்ந்து தலைமையுரையுடன் வரவேற்புரையினை மாவட்ட சமுர்த்திப் பணிப்பாளர் பொ.ஸ்ரீவர்ணன் அவர்கள் நிகழ்த்தினார். தொடர்ந்து சர்வதேச புகைத்தல் மற்றும் போதை எதிர்ப்பு தினம் மாவட்ட மட்ட கொடித் தின நிகழ்ச்சித் திட்டத்தினை அரசாங்க அதிபர் திரு.மருதலிங்கம் பிரதீபன் அவர்களால் சம்பிரதயாபூர்வமாக ஆரம்பித்து வைக்கப்பட்டது. மேலும் உத்தியோகத்தர்கள் மற்றும் சமுதாய மட்ட அமைப்பு பிரதிநிதிகளின் கௌரவிப்பு, குறுநாடகம், வங்கி தரப்படுத்தலில் சிறந்த பெறுபெறுகளை வெளிப்படுத்திய சமுர்த்தி வங்கிகளுக்கு தேசிய மட்டச் சான்றிதழ் வழங்கல், வங்கியில் கூடுதலான சேமிப்பை மேற்கொண்ட உத்தியோகத்தர் கெளரவிப்பு, சமுர்த்தி அபிவிருத்தி திணைக்களத்தினால் வழங்கப்பட்ட தொழிற்பயிற்சியினை பூர்த்தி செய்தவர்களுக்கு தொழில் பயிற்சிச் சான்றிதழ் வழங்கல் முதலான நிகழ்வுகள் சிறப்புற நடைபெற்றன. இந் நிகழ்வில் மேலதிக அரசாங்க அதிபர், பிரதம கணக்காளர், சமுர்த்தி கணக்காளர், பிரதேச செயலாளர்கள், சமுர்த்தி முகாமையாளர்கள், சமுர்த்தி அபிவிருத்தி உத்தியோகத்தர்கள் மற்றும் பொதுமக்கள் எனப் பலரும் கலந்துகொண்டனர்.
 
 
1 2 3 4 5 6 7 8 9 10 11 12 13 14 16 17 19 20 21 22 23
சமூக சக்தி - பன்முக வறுமை ஒழிப்புத் திட்டம் சனாதிபதி செயலகத்தின் வழிகாட்டுதலுடன், கிராமிய அபிவிருத்தி சமூக பாதுகாப்பு மற்றும் சமூக வலுவூட்டுகை அமைச்சினால் நடைமுறைப்படுத்தப்படுகின்ற பன்முக வறுமை ஒழிப்புத் திட்டம் நாடளாவிய ரீதியில் இன்றைய தினம் (2026.06.02) அங்குரார்ப்பணம் செய்யப்பட்டது. அந்தவகையில் "பிரஜாசக்தி ஆயிரம் கிராமங்களில் ஆயிரம் வேலைகள்" நிகழ்ச்சித் திட்டத்தின் யாழ்ப்பாண மாவட்ட அங்குரார்ப்பண நிகழ்வு இன்றைய தினம் (2026.06.02) செவ்வாய்க்கிழமை காலை 9.00 மணிக்கு பாராளுமன்ற உறுப்பினர் கெளரவ ஜெயச்சந்திரமூர்த்தி ரஜீவன் அவர்களினால் சண்டிலிப்பாய் பிரதேச செயலர் பிரிவின் மானிப்பாய் கிழக்கு கிராம அலுவலர் பிரிவில் ஆரம்பித்து வைக்கப்பட்டது. இந் நிகழ்வில் 02.00 மில்லியன் ரூபா ஒதுக்கீட்டில், தெரிவு செய்யப்பட்ட "வருமானம் குறைந்த 10 குடும்பங்களை இணைத்து காளான் வளர்ப்பு கருத்திட்டத்திற்கான அடிக்கல் நாட்டி வைக்கப்பட்டது .
இந் நிகழ்வில் விருந்தினர்கள் வரவேற்கப்பட்டதைத் தொடர்ந்து தேசிய கொடி ஏற்றபட்டு, தேசிய கீதம் இசைக்கப்பட்டது. தொடர்ந்து மங்கலவிளக்கேற்றபட்டு இறைவணக்கம் இடம்பெற்றது. அதனைத் தொடர்ந்து, அரசாங்க அதிபர் திரு.மருதலிங்கம் பிரதீபன் அவர்களின் வரவேற்புரையுடன், சமூக நிகழ்ச்சித் திட்டத்தின் நோக்கம் குறித்த சிறப்புரையினை கௌரவ பாராளுமன்ற உறுப்பினர் ஜெயச்சந்திரமூர்த்தி றஜீவன் அவர்கள் நிகழ்த்தினார். மேலும், குறித்த நிகழ்ச்சித் திட்டத்தினுள் உள்வாங்கப்பட்டுள்ள பயனாளிகள் தெரிவிற்கான சான்றிதழ்கள் நிகழ்வில் கலந்து கொண்டிருந்த விருந்தினர்களால் வழங்கி வைக்கப்பட்டன. அதனைத் தொடர்ந்து குறித்த நிகழ்ச்சித் திட்டத்திற்கான அடிக்கல் நாட்டபட்டு சம்பிரதாயபூர்வமாக ஆரம்பித்து வைக்கப்பட்டது. அதேவேளை யாழ் மாவட்டத்தின் ஏனைய பிரதேச செயலர் பிரிவுகளிலும் கௌரவ பாராளுமன்ற உறுப்பினர்கள் தலைமையில் குறித்த நிகழ்ச்சித் திட்டத்திற்கான அங்குரார்ப்பண நிகழ்வு இடம்பெற்றுவருகின்றதுடன், இவ் பன்முக வறுமை ஒழிப்புத் திட்டத்தினை நடைமுறைப்படுத்துவதற்காக யாழ்ப்பாண மாவட்டத்திற்கு இவ்வாண்டுக்கு ரூபா 651.96 மில்லியன் ஒதுக்கீடு கிடைக்கப்பெற்றுள்ளமை குறிப்பிடத்தக்கது.
இந் நிகழ்வில் சண்டிலிப்பாய் பிரதேச செயலாளர் திரு.குமாரசாமி பிரபாகரமூர்த்தி, மாவட்டச் செயலக திட்டமிடல் பணிப்பாளர் திரு. இ.சுரேந்திரநாதன், மானிப்பாய் கிழக்கு பிரஜா சக்தி குழுவின் தலைவரும் பிரதேச சபையின் உறுப்பினருமான திரு.ஞானரூபன், பிரதேச செயலக பதவிநிலை உத்தியோகத்தர்கள், சமூக வலுவூட்டல் உத்தியோகத்தர், துறைசார்ந்த திணைக்கள உத்தியோகத்தர்கள், கிராம சேவையாளர், பிரதேச செயலக உத்தியோகத்தர்கள், பயனாளிகள் மற்றும் கிராம மக்கள் உள்ளிட்ட பலரும் கலந்து கொண்டிருந்தனர்.
 
1 2 3 4 5 6 7 8 9 10 11 12 13 14 15 16
யாழ்ப்பாண மாவட்டச் செயலகத்தின் வெசாக் தின நிகழ்வு மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம்(30.05.2026) காலை 10.00மணிக்கு மாவட்ட செயலகத்தில் சிறப்பாக நடைபெற்றது. இந் நிகழ்வில் வணக்கத்துக்குரிய பௌத்த மதகுரு ஸ்ரீ நாகவிகாரை விகாராதிபதி மீஹாஹ ஜந்துறே ஸ்ரீவிமல தேரோ அவர்கள் கலந்துகொண்டு வெசாக் தினம் தொடர்பாக ஆசியுரை வழங்கியபோது, பெளத்தம் இந்தியாவில் தோற்றம் பெற்றதாகவும், புத்த பெருமான் பிறப்பு, ஞானம் அடைந்த மற்றும் முக்தி அடைந்த தினமே வெசாக் பௌர்ணமி தினம் எனவும், புத்த பகவான் விஷ்ணுவின் அவதாரமாக பெளத்த மக்களால் கருதப்படுவதாகவும் தெரிவித்தார். மேலும், உலகத்தின் அனைத்து மக்களும் தர்மத்தின் வழியில் வாழ வேண்டும் எனவும், இலங்கை வாழ் மக்களாகிய நாம் ஒற்றுமையாகவும் மகிழ்ச்சியாகவும், ஆரோக்கியமாகவும் வாழ வேண்டும் என இந்த வெசாக் பௌர்ணமி தினத்தில் ஆசீர்வாதம் செய்வதாகவும் குறிப்பிட்டார்.
இந் நிகழ்வில் வட மாகாண கடற்படைத் தளபதி, வடமாகாண விமானப்படைத் தளபதி, யாழ் மாவட்ட 51 வது படைப்பிரிவின் இராணுவ கட்டளைத் தளபதி, 512 ஆவது படைப்பிரிவின் இராணுவ தளபதி, சிரேஷ்ட பொலிஸ் அத்தியட்சகர், மாவட்ட மேலதிக அரசாங்க அதிபர், மாவட்ட மேலதிக அரசாங்க அதிபர் (காணி), பிரதம கணக்காளர், திட்டமிடல் பணிப்பாளர் , உதவி மாவட்டச் செயலாளர், மாவட்டச் செயலக பதவிநிலை உத்தியோகத்தர்கள் மற்றும் உத்தியோகத்தர்கள், இராணுவ அதிகாரிகள், பொலிஸ் உத்தியோகத்தர்கள், மாவட்ட செயலக உத்தியோகத்தர்கள் உள்ளிட்ட பலரும் கலந்து கொண்டு ஆசீர்வாதங்களை பெற்றுக் கொண்டனர்.
 
 
1 2 3 4 5 6 7 8 9 10 11 12 13 14 15 16