உளவளத்துணை மற்றும் உள சமூக பணிகளை மேற்கொள்ளும் அரச மற்றும் அரச சாா்பற்ற நிறுவனங்களுக்கிடையிலான உளசமூக மன்ற கலந்துரையாடல் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்கள் தலைமையில் இன்றைய தினம் (24.04.2026) காலை 10.00 மணிக்கு மாவட்டச் செயலக மாநாட்டு மண்டபத்தில் நடைபெற்றது. இக் கலந்துரையாடலில் தலைமையுரையாற்றிய அரசாங்க அதிபர் அவர்கள், அண்மைக்காலமாக வெள்ளிக்கிழமைகளில் ஆலயம் செல்வது குறைவடைந்து வருவதாகவும், இதனால் பிள்ளைகளின் அறநெறி சார்ந்த விடயங்கள் குறைவடைந்து காணப்படுவதால் வெள்ளிக்கிழமை மற்றும் ஞாயிற்றுக்கிழமைகளில் தனியார் கல்விநிறுவனங்களின் செயற்பாடுகளை மட்டுப்படுத்தி பிள்ளைகள் அறநெறி பாடசாலைகளுக்குச் செல்வதனை ஊக்கப்படுத்த அனைவரும் முன்வருமாறு கேட்டுக் கொண்டார்.
மேலும் அறநெறிப் பாடசாலைகளை வலுப்படுத்தல், உளவளத்துணை மற்றும் உள சமூக பணிகளை மேற்கொள்ளும் நிறுவனங்கள் தற்போது மாவட்ட மட்டத்தில் காணப்படும் உளசமூக பிரச்சனைகளை அடையாளமான கண்டு அவற்றுக்கு இணைந்த வகையில் தலையீடுகளை மேற்கொள்வது பொருத்தமானதாக அமையும் என்பது தொடர்பாகவும் அரசாங்க அதிபரால் கலந்துரையாடப்பட்டது. இக் கலந்துரையாடலில் உதவி மாவட்ட செயலாளர் செல்வி உ.தா்சினி, தெல்லிப்பளை சுகாதார வைத்திய அதிகாரி திரு. பரா.நந்தகுமார், உள மருத்தவ வைத்திய அதிகாரி திருமதி அ.வினோதா, மாவட்ட உளவளத் துணை இணைப்பாளர் திரு ந.உதயகுமார் , அரச மற்றும் அரச சாா்பற்ற நிறுவனங்களின் உத்தியோகத்தர்கள், வலயக்கல்வி அலுவலக ஆலோசகர்கள், பிரதேச செயலக உளவளத்துணை உத்தியோகத்தர்கள் ஆகியோர் கலந்து கொண்டனர்.
 
 
1 2 3 4 6
யாழ்ப்பாண மாவட்டத்தில் புதுப்பிக்கத்தக்க எரிசக்தி மேம்பாட்டிற்கான தந்திரோபாய சுற்றுச்சூழல் மதிப்பீடு (SEA) தொடர்பாக பங்குதார்களுடனான கலந்துரையாடல் அரசாங்க அதிபர் திரு மருதலிங்கம் பிரதீபன் அவர்களின் தலைமையில் இன்றைய தினம் (24.04.2026) காலை 09.30 மணிக்கு அரசாங்க அதிபர் அலுவலகத்தில் நடைபெற்றது. இக் கூட்டத்தில் தலைமையுரையாற்றிய அரசாங்க அதிபர் அவர்கள், இலங்கையின் வட மாகாணத்தில் புதுப்பிக்கத்தக்க ஆற்றல் மேம்பாட்டிற்கு ஆதரவளிக்கும் வகையில், இலங்கை நிலைபெறுதகு சக்தி அதிகார சபை (SLSEA) ஒரு உத்திசார் சுற்றுச்சூழல் மதிப்பீட்டை (SEA) தொடங்கியுள்ளது எனவும், அதற்கு அமைவாக யாழ்ப்பாண மாவட்டத்தில்இன்றைய கூட்டம் நடைபெறுவதாகவும், இதன் முக்கிய முன்னெடுப்பானது புதுப்பிக்கத்தக்க ஆற்றல் மேம்பாட்டைத் துரிதப்படுத்துவதையும், தந்திரோபாய திட்டமிடலை வலுப்படுத்துவதையும், நாட்டின் ஆற்றல் மாற்றத்தில் தனியார் துறை முதலீடுகளை ஊக்குவிப்பதையும் நோக்கமாகக் கொண்டுள்ளது எனவும் தெரிவித்தார். அந்த வகையில் நெடுந்தீவு, வேலணை, ஊர்காவற்றுறை, சங்கானை, பருத்தித்துறை, மருதங்கேணி ஆகிய பிரதேசங்களில் சாத்தியப்பாட்டு மதிப்பீடுகள் முதற்கட்டமாக மேற்கொள்ளப்படவுள்ளதாகவும் தெரிவித்தார்.
மேலும், ஏனைய பிரதேச செயலகங்களிலும் ஆய்வுகளை மேற்கொள்ளுமாறும், கடல்கடந்த தீவுகளான நெடுந்தீவு, அனலைதீவு, எழுவைதீவு, நயினாதீவு ஆகியவற்றுக்கான சீரான மின் விநியோகம் தொடர்பாகவும், அத் தீவுகளில் நீர் சுத்திகரிப்பு நிலையங்கள் உள்ளதாகவும் (RO Plant), மின்சாரம் தடைப்படும் போது நீர் விநியோகம் தடைப்படுவதாகவும், ஆதலால் இது தொடர்பில் கவனம் செலுத்துமாறும் கேட்டுக் கொண்டார். மேலும், வீடுகளின் கூரைகளில் சூரிய கலன்களை (Solar Plant) பொருத்தி மின்சார உற்பத்தி செய்வதற்கான விண்ணப்பங்கள் இலங்கை மின்சார சபைக்கு அனுப்பிவைக்கப்பட்டும், மின்பிறப்பாக்கி (Transformer) இயலளவு போதாமை காரணமாக இணைப்பு வழங்கப்படாமல் உள்ளதாகவும், இது தொடர்பிலும் கவனம் செலுத்துமாறும் அரசாங்க அதிபர் கேட்டுக்கொண்டார். சூரிய ஒளி, காற்றாலை மற்றும் கடல் அலை மூலமாக மின் வலுவினை உற்பத்தி செய்யக்கூடிய பொருத்தமான இடங்களையும் சாத்தியமான சூழல்களையும் ஆய்வு செய்து மேற்கொள்வது தொடர்பாக முன்னேற்பாடக பங்குதாரர்களுடான கலந்துரையாடலாக இக் கலந்துரையாடல் அமைந்திருந்தது.
தேசிய அளவில் முக்கியத்துவம் வாய்ந்த இந்த ஆய்வு, ஆசிய அபிவிருத்தி வங்கியின் (ADB) தொழில்நுட்ப மற்றும் நிதி உதவியுடன் மேற்கொள்ளப்படுகிறது. இது நிலையான அபிவிருத்தி மற்றும் ஆற்றல் மாற்றத்திற்கான அதன் அர்ப்பணிப்பை எடுத்துக்காட்டுகிறது. அதற்கமைவாக ஆலோசனைச் சேவைகள், ஜப்பானைச் சேர்ந்த ஓரியண்டல் கன்சல்டன்ட்ஸ் குளோபல் கோ.லிமிடெட் (OCG) நிறுவனத்திற்கும், இலங்கையைச் சேர்ந்த கன்சல்டிங் இன்ஜினியர்ஸ் அண்ட் ஆர்க்கிடெக்ட்ஸ் அசோசியேட்டட் (பிரைவேட்) லிமிடெட் (CEAA) நிறுவனத்திற்கும் இணைந்து வழங்கப்பட்டுள்ளன என்பது குறிப்பிடத்தக்கது. இக் கலந்துரையாடலில் இலங்கை நிலைபெறுதகு சக்தி அதிகார சபையின் (SLSEA) ஆராய்ச்சி மற்றும் மேம்பாட்டுப் பிரிவின் உதவி இயக்குனர் பொறியியலாளர் திரு. சதுர வன்னியாராச்சி, உதவி இயக்குநர் திரு. பாலித அபயரத்ன, மேலதிக அரசாங்க அதிபர் திரு. கே. சிவகரன், பிரதித் திட்டமிடல் பணிப்பாளர் திரு எஸ். சிவகுமாரன், ஜப்பானைச் சேர்ந்த ஓரியண்டல் கன்சல்டன்ட்ஸ் குளோபல் கோ. லிமிடெட் (OCG) நிறுவனத்தினைச் சேர்ந்த ஆலோசகர்கள் ,உதவி பிரதேச செயலாளர்கள் உள்ளிட்ட திணைக்களத் தலைவர்கள் கலந்து கொண்டனர்.
 
 
1 2 3 4 5 6 7 8 9
காணாமல் போன ஆட்கள் பற்றிய அலுவலகம் (OMP)காணாமல் போன நபர்களுடைய குடும்பங்களினை வலுப்படுத்துவதற்கும் OMP ஆணையினை சிறப்பாக நிறைவேற்றுவதற்குமான கூட்டான்மைகளை ஏற்படுத்துவதற்கு சமூக அமைப்புக்களுடன் இணைந்து செயல்பட்டு வருகின்றது. விசாரணைக் குழுக்களால் வழங்கப்படும் பரிந்துரைகளைத் திறம்படச் செயற்படுத்துவதற்கு, காணாமல் போனோர் மற்றும் அவர்களது குடும்பத்தினரின் தேவைகள் குறித்த ஒரு முழுமையான புரிதல் தேவைப்படுகிறது. இந்த நோக்கத்திற்காக, OMP யாழ்ப்பாண மாவட்டத்தில் உள்ள சிவில் சமூக அமைப்புகளுடன் ஒரு கலந்தாய்வு நிகழ்வினை காணமல் போன ஆட்கள் பற்றிய அலுவலக தலைமையக அதிகாரிகளின் பங்குபற்றலுடன் இன்றைய தினம் (23.04.2026) காலை 09.00 மணிக்கு மாவட்டச் செயலக மாநாட்டு மண்டபத்தில் நடைபெற்றது. யாழ்ப்பாண மாவட்டத்தில் உள்ள சிவில் சமூக அமைப்புக்களுக்கு காணாமல் போனவர்கள் அலுவலகத்தின் (OMP) சட்டத்தின் அம்சங்கள், சிவில் அமைப்புக்களின் பங்களிப்புகள் மற்றும் OMP யுடன் கூட்டாண்மையை வலுப்படுத்தும் வழிகள் குறித்து தெளிவூட்டல்களை வழங்கி வழிகாட்டுவதே இக் கலந்துரையாடலின் முக்கிய நோக்கமாகும். இக் கலந்தாய்வில் பின்வருவோரால் பின்வரும் தெளிவூட்டல்கள் வழங்கப்பட்டன.
01.காணாமல் போனோர் அலுவலகத்தின்(OMP) பங்கு, அதிகாரம் மற்றும் முன்னேற்றம் தொடர்பாக
திரு. ஏ. என். நுவான் அவர்களால் தெளிவூட்டல் வழங்கப்பட்டது.
02.காணாமல் போனவர்கள் பிரச்சினைகள் குறித்த கண்ணோட்டம், தற்போதைய நிலைமை மற்றும் புள்ளிவிவரங்கள் குறித்தும் உறுப்பினர் திரு. மீராக் ரஹீம் அவர்களால் தெளிவூட்டல் வழங்கப்பட்டது.
03.காணாமல் போன நபர்களின் குடும்பங்களின் தேவைகளை OMP பிரதிநிதியால் கண்டறிந்து புரிந்துகொள்ளுதல் தொடர்பாக உறுப்பினர் திரு. கிருஷ்ணமூர்த்தி அவர்களாலும் தெளிவூட்டல் வழங்கப்பட்டது.
04.காணாமல் ஆக்கப்பட்டமைக்கான சான்றிதழ் மற்றும் மரணச் சான்றிதழ் தொடர்பான விளக்கத்தினை வடமாகாண பிரதி பதிவாளர் நாயகம் செல்வி ஆனந்தி ஜெயரத்னம் அவர்கள் வழங்கினார்.
மேலும், உளவியல், சமூக மற்றும் பொருளாதாரத் தேவைகள் குறித்து விரிவான கலந்துரையாடப்பட்டதுடன், இது கேள்வி பதிலுடன் கூடிய கலந்துரையாடலாகவும் அமைந்திருந்தது. காணாமல் போனவர்களின் குடும்பங்களுக்கு எவ்வாறு உதவலாம் என்பது குறித்து சிவில் சமூக அமைப்புகள் கலந்துரையாடுவதற்கான தனி அமர்வுகளாகவும் அமைந்திருந்ததுடன், OMP பிரதிநிதியின் ஒத்துழைப்பு மற்றும் அடுத்தகட்ட நடவடிக்கைகள் பெற்றுக்கொள்ளுதல் தொடர்பாகவும் கலந்தாய்வு நடைபெற்றது. இக் கலந்தாய்வில் திட்டமிடல் பணிப்பாளர் திரு.இ. சுரேந்திரநாதன், காணாமல் போன ஆட்கள் அலுவலகத்தின் பிராந்திய இணைப்பாளர் திரு. த.செல்வகுமார், அரச சார்பற்ற நிறுவனங்களின் இணைப்பாளர் திரு ந.தயாபரன், அபிவிருத்தி உத்தியோகத்தர்களான திரு. ம கண்ணதாசன், திருமதி. சிவாஜினி புலேந்திரகுமார், திருமதி திவ்யா கஜேந்திரன், கிராம நிர்வாக அலுவலகர்கள், பெண்கள் அபிவிருத்தி உத்தியோகத்தர்கள் மற்றும் தேசிய நல்லிணக்க அபிவிருத்தி உத்தியவர்கள் சிவில் சமூக அமைப்புகளின் பிரதிநிதிகள் கலந்து கொண்டனர்.
 
 
1 2 3 4 5 6 7 8 9
 
யாழ்ப்பாண மாவட்டச் செயலக நலன்புரிச் சங்கம் நடாத்திய வருடாந்த உத்தியோகத்தர்களின் கெளரவிப்பு நிகழ்வு நலன்புரிச் சங்க தலைவரும் புள்ளிவிபர பிரதிப் பணிப்பாளருமான திரு. மனுவல் வித்தியானந்தநேசன் அவர்களின் தலைமையில் நேற்றையதினம் (22.04.2026) பி.ப 03.00 மணிக்கு மாவட்டச்செயலக கேட்போர் கூடத்தில் நடைபெற்றது. இந் நிகழ்வில் பிரதம விருந்தினராக அரசாங்க அதிபரும் நலன்புரி சங்கத்தின் போசகருமான திரு. மருதலிங்கம் பிரதீபன் அவர்கள் கலந்து சிறப்பித்தார். இந் நிகழ்வில் பிரதம விருந்தினர் உரையினை நிகழ்த்திய அரசாங்க அதிபர், மாவட்ட செயலகம் ஏனைய சக திணைக்களங்களுக்கும் பிரதேச செயலகங்களுக்கும் முன்னுதாரணமாக செயற்பட்டு வருகின்றது எனவும், அந்த வகையில் நலன்புரிச் சங்கத்தின் செயற்பாடுகள் பற்றி நோக்கும் போது
மாவட்டச் செயலகத்தில் கடமையாற்றி ஓய்வு பெற்ற உத்தியோகத்தர்கள், அரசசேவையில் 25 வருட சேவையை பூர்த்தி செய்த உத்தியோகத்தர்கள் மற்றும் இடமாற்றலாகிச் சென்ற உத்தியோகத்தர்கள் மற்றும் உத்தியோகத்தர்களின் பிள்ளைகள் - தரம் 5 புலமைப்பரிசில் பரீட்சையில் சித்தி பெற்ற மாணவர்கள், க.பொ.த சாதாரண தரப்பரீட்சையில் 9A அதிவிசேட சித்தி பெற்ற மாணவர்கள், பல்கலைக்கழகங்களுக்கு அனுமதி பெற்ற மாணவர்கள் ஆகியோர் கெளரவிக்கப்பட இருக்கின்றார்கள் எனவும், இம் முறை மாவட்டச் செயலக உத்தியோகத்தர் திரு. அனுரகாந்தன் அவர்களின் மகனும் ஹாட்லிக் கல்லூரி மாணவனுமான செல்வன் அ. விஸ்வகாந்தன் மாவட்ட ரீதியாக கணிதப் பிரிவில் முதல்நிலை பெற்றுள்ளமை பெருமைக்குரிய விடயம் எனவும், அதற்கு வாழ்த்துக்களை தெரிவித்தார். மேலும், கல்வியோடு மட்டும் நின்றுவிடாமல் இணைப்பாடவிதான செயற்பாடுகளில் மாவட்ட, மாகாண, தேசிய ரீதியாக சாதனை பெறுகின்ற பிள்ளைகளையும் கெளரவிக்கின்ற நிகழ்ச்சியையும் ஏற்பாடு செய்ய வேண்டும் என வேண்டுகோளையும் முன்வைத்தார். மேலும், மாவட்டச் செயலகம் ஓர் குடும்பமாக இணைந்து மேற்கொண்ட நலன்புரிக்கழகத்திற்கு நன்றிகளை தெரிவித்தவுடன், கெளரவம் பெறுபவர்கள் அனைவரது வாழ்வும் ஒளிமயமானதாக இருக்க வாழ்த்துக்களையும் தெரிவித்துக்கொண்டார்.
நிகழ்வில் ஓய்வு பெற்ற மற்றும் இடமாற்றலாகிச் சென்ற உத்தியோகத்தர்கள் தமது அனுபவப் பகிர்வினை வழங்கினார்கள். இறுதியாக மாவட்டச் செயலகத்தில் கடமையாற்றி ஓய்வு பெற்ற உத்தியோகத்தர்கள், அரசசேவையில் 25 வருட சேவையை பூர்த்தி செய்த உத்தியோகத்தர்கள் மற்றும் இடமாற்றலாகிச் சென்ற உத்தியோகத்தர்கள், 2024 மற்றும் 2025ஆம் ஆண்டு தரம் 5 புலமைப்பரிசில் பரீட்சையில் சித்தி பெற்ற உத்தியோகத்தர்களின் பிள்ளைகள், 2024 ஆம் ஆண்டு க.பொ.த சாதாரண தரப்பரீட்சையில் 9A அதிவிசேட சித்தி பெற்ற மாணவர்கள், 2024 ஆம் ஆண்டு பல்கலைக்கழகங்களுக்கு அனுமதி பெற்ற மாணவர்கள் ஆகியோர் கெளரவிக்கப்பட்டார்கள். இந் நிகழ்வில் மாவட்டச் செயலக பதவிநிலை உத்தியோகத்தர்கள் மற்றும் உத்தியோகத்தர்கள் கலந்து கொண்டார்கள்.
 
1 2 3 4 5 6 7 8 9 10 11 12 13 14 17 18 19 20 21 22 23 24 25 26 27 28 29 30 31 32 33 34 36
 
இலங்கையில் 10 நகரங்களை அபிவிருத்தி செய்யும் செயற்றிட்டத்திற்கு அமைய - வட மாகாணத்தில் யாழ்ப்பாணம் மற்றும் வவுனியா நகரங்களை அபிவிருத்தி செய்வதற்கு அரசாங்கத்தினால் நடவடிக்கை எடுக்கப்பட்டுள்ளது. அதற்கமைவாக பங்குபற்றுனர்களுடன் கருத்துக்களை கேட்கும் கலந்துரையாடல் போக்குவரத்து நெடுஞ்சாலைகள் மற்றும் நகர அபிவிருத்தி அமைச்சர் கெளரவ பிமல் ரத்நாயக்க அவர்களின் தலைமையில் இன்றைய தினம் (2026.04.22) பி. ப 03.30 மணிக்கு மாவட்ட செயலக மாநாட்டு மண்டபத்தில் நடைபெற்றது. இக் கூட்டத்தில் அரசாங்க அதிபர் திரு.மருதலிங்கம் பிரதீபன் அவர்களினால் வரவேற்புரையாற்றப்பட்டது. அதனைத் தொடர்ந்து, போக்குவரத்து நெடுஞ்சாலைகள் மற்றும் நகர அபிவிருத்தி அமைச்சர் கெளரவ பிமல் ரத்நாயக்க அவர்கள், யாழ் நகரை இவ்வாண்டிலிருந்து 05 ஆண்டு திட்டத்திற்கமைய அபிவிருத்தி செய்ய நடவடிக்கை எடுத்துள்ளதாகவும், இவ்வாண்டு முதற்கட்டமாக 250 மில்லியன் ரூபா நிதி ஒதுக்கீடு செய்யப்பட்டுள்ளதாகவும் தெரிவித்ததுடன், தொடர்ந்து யாழ் நகரை அபிவிருத்தி செய்வது தொடர்பாக பங்குதாரர்களுடன் ஆலோசனைகளையும், கருத்துக்களையும் கேட்டறிந்து கொண்டார்.
மேலும் பழைய பேரூந்து நிலையம் தொடர்பாகவும், யாழ் மாநகர சபையின் எல்லைக்குட்பட்ட பிரதேசத்தின் திண்மக்கழிவு அகற்றலில் உள்ள பிரச்சனை தொடர்பாகவும் இதற்கான முன்மொழிவுகள் மற்றும் எடுக்க வேண்டிய நடவடிக்கைகள் தொடர்பாகவும் கெளரவ அமைச்சர் விரிவாக ஆராய்ந்தார். மேலும், போக்குவரத்து சேவைகளை இலகுபடுத்த யாழ்ப்பாணத்திற்கு அடுத்த ஆண்டு 10 மெற்றோ பேரூந்துகளை (Metro Bus) வழங்க நடவடிக்கை எடுப்பதாகவும் கெளரவ அமைச்சரால் தெரிவிக்கப்பட்டது. இக் கலந்துரையாடலில் பாராளுமன்ற உறுப்பினர்களான கௌரவ கருணைநாதன் இளங்குமரன், கௌரவ சண்முகநாதன் ஸ்ரீபவானந்தராஜா, கெளரவ ஜெயசந்திரமூர்த்தி றஜீவன், மாநகர சபையின் கெளரவ முதல்வர் மதிவதனி விவேகானந்தராஜா, மாவட்ட ஒருங்கிணைப்பு குழுவின் இணைப்பாளரும் யாழ்ப்பாண மாநகர சபையின் உறுப்பினருமான கெளரவ எஸ்.கபிலன், அமைச்சரின் இணைப்பாளர் திரு. எஸ்.ஸ்ரீவாகீசன், நகர அபிவிருத்தி அதிகார சபையின் வட மாகாணப் பணிப்பாளர், மேலதிக அரசாங்க அதிபர் (காணி), மாவட்ட திட்டமிடல் பணிப்பாளர், வடக்கு மாகாண உள்ளூராட்சித் திணைக்களத்தின் ஆணையாளர், யாழ்ப்பாணம் மற்றும் நல்லூர் பிரதேச செயலாளர்கள், துறைசார்ந்த பல்வேறு திணைக்களங்களின் அதிகாரிகள், வர்த்தக சங்கத்தினர் உள்ளிட்ட பிரதிநிதிகள் என பல்வேறு தரப்பினரும் கலந்து கொண்டனர்.
 
 1 2 3 4 5 6 7 8 9 10 11