யாழ்ப்பாண மாவட்ட திட்டமிடல் உபகுழுக் கூட்டம் கடற்றொழில், நீரியல் மற்றும் கடல் வளங்கள் அமைச்சரும், மாவட்ட ஒருங்கிணைப்புக் குழுவின் தலைவரும், பாராளுமன்ற உறுப்பினருமான கௌரவ இராமலிங்கம் சந்திரசேகர் அவர்கள் தலைமையில் இன்றைய தினம் (17.07.2026) பி. ப 02.30 மணிக்கு யாழ்ப்பாண மாவட்டச் செயலக மாநாட்டு மண்டபத்தில் நடைபெற்றது. இக் கூட்டத்தில் அரசாங்க அதிபர் திரு மருதலிங்கம் பிரதீபன் அவர்களின் வரவேற்புரை மற்றும் முன்வைப்பினைத் தொடர்ந்து, துறை ரீதியாக முன்மொழியப்பட்ட வீட்டுத்திட்டம், சுகாதாரம், வீதிகள், போக்குவரத்து, வீட்டுத்திட்டத்திற்கான மணல் தேவைப்பாடு, தென்னை பயிர்ச் செய்கை சபையின் 2026 ஆம் ஆண்டுக்கான திட்டங்கள், குடிநீர் இணைப்புக்கள், யாழ்ப்பாண நகரத் திட்டம் (Jaffna 10 City progamme) என்பன விரிவாக ஆராயப்பட்டு உரிய அறிவுறுத்தல்கள் வழங்கப்பட்டன.
இக் கூட்டத்தில் கெளரவ அமைச்சர் குறிப்பிடுகையில், 2025, 2026ஆம் ஆண்டுகளில் மேற்கொள்ளப்பட்ட திட்டங்கள், கிடைக்கப்பெற்ற நிதி ஒதுக்கீடுகள், மக்களைச் சென்றடைந்த திட்டங்கள், நிறைவேறாத திட்டங்கள் என்பன தொடர்பாக அனைத்து தரவுகளையும் உள்ளடக்கி யாழ் மாவட்டத்தின் இருக்கும் திட்டங்களின் கொள்கைகளை தயாரிக்கும் திட்டமாக தீர்மானங்களை எடுப்பதற்காக இக் கூட்டம் ஒழுங்கு செய்யப்பட்டுள்ளதாக தெரிவித்ததுடன், மாகாணமும் மாவட்டமும் இணைந்து வேலைத்திட்டங்களின் சாத்தியக்கூறுகளை ஆராய்ந்து மேற்கொள்ளுமாறும், இக்கூட்டத்திற்கு முடிவுகளை எடுக்க வேண்டிய தேவைப்பாடு இருப்பதால் துறை ரீதியாக திணைக்களத் தலைவர்களை பங்களிப்பு அவசியம் எனத் தெரிவிக்கப்பட்டது. மேலும் திட்டங்களை துறை ரீதியாக ஆராய்வது என தீரமானிக்கப்பட்டு அடுத்த ஆகஸ்ட் மாத மாவட்ட திட்டமிடல் உப குழுக் கூட்டத்தில் சுகாதாரம், கல்வி தொடர்பாக ஆராய்வதற்கு ஏதுவாக பிரதேச செயலாளர்கள் தங்களுடன் தொடர்புடைய திணைக்களங்கள், சமூக மட்ட அமைப்புக்களுடன் தொடர்பு கொண்டு சுகாதாரம் ,கல்வி தொடர்பான தேவைப்பாடுகளை ஜீலை மாதம் 31 ஆம் திகதிக்கு முன்னதாக மாவட்ட செயலகத்திற்கு அனுப்பி வைக்குமாறும் தெரிவிக்கப்பட்டது.
இக் கலந்துரையாடலில் வடக்கு மாகாண , உதவிப் பிரதம செயலாளர் திருமதி. அனெற் நிந்துஸா அன்ரனி டினேஸ், மாவட்ட மேலதிக அரசாங்க அதிபர் க.சிவகரன், பிரதேச செயலாளர்கள், மாவட்ட செயலக பதவிநிலை உத்தியோகத்தர்கள், திணைக்களத் தலைவர்கள், மாவட்ட செயலக உத்தியோகத்தர்கள் என பல்வேறு தரப்பினரும் கலந்து கொண்டனர்.
 
1 2 3 4 5 6 7 8
யாழ்ப்பாண மாவட்டச் செயலகத்தின் கிளைகளுக்கிடையிலான உற்பத்தித்திறன் செயற்பாடுகளை மென்மேலும் ஊக்குவிக்கும் முகமாக காலாண்டுக்கான மதிப்பீடுகள் மேற்கொள்ளப்பட்டு வருகின்றன. அந்தவகையில், இவ் மதிப்பீடுகளுக்கமைய இன்றைய தினம்(17.07.2026) மாவட்ட அரசாங்க அதிபர் திரு. மருதலிங்கம் பிரதீபன் அவர்கள் ஒவ்வொரு கிளைகளுக்கும் சான்றிதழ்களை வழங்கி ஊக்கப்படுத்தினார். அந்த வகையில் AAA /AA /A / B /C என்ற வகைப்படுத்தலுக்கு அமைய குறித்த சான்றிதழ்கள் கிளைத்தலைவர்களிடம் வழங்கிவைக்கப்பட்டமை குறிப்பிடத்தக்கது. இந் நிகழ்வில் மேலதிக அரசாங்க அதிபர் கே.சிவகரன், மேலதிக அரசாங்க அதிபர்(காணி) பா. ஜெயகரன் உள்ளிட்ட பதவிநிலை உத்தியோகத்தர்கள் மற்றும் உத்தியோகத்தர்கள் பங்குபற்றினார்கள்.
 
1 2 3 4 5 6 7 8 9 10 11 12 13 14 15 16 17 18
யாழ்ப்பாண மாவட்டச் செயலக ஊழியர் நலன்புரிச் சங்கத்தின் ஏற்பாட்டில் ஆடிப்பிறப்பு விழா இன்றைய தினம்(17.07.2026) காலை 10.30 மணிக்கு மாவட்டச் செயலக கேட்போர் கூடத்தில் சிறப்புற நடைபெற்றது. இவ் ஆடிப்பிறப்பு விழாவில் கடற்றொழில், நீரியல் மற்றும் கடல் வளங்கள் அமைச்சரும், யாழ். மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர், யாழ். மாவட்ட அரசாங்க அதிபர் திரு.மருதலிங்கம் பிரதீபன் ஆகியோர் விருந்தினர்களாக கலந்து சிறப்பித்தார்கள். இந் நிகழ்வில் வரவேற்புரையை ஊழியர் நலன்புரிச் சங்கத்தின் செயலாளர் திருமதி தயாபரி கிரிதரன் அவர்கள் நிகழ்த்தினார். தொடர்ந்து மாவட்டச் செயலக உத்தியோகத்தர்களால் குழுப்பாடல், பல்லியம் இசை நிகழ்வுகளுடன் ஆடிப்பிறப்பின் மகிமை தொடர்பாக மாவட்டச் செயலக உத்தியோகத்தர் திருமதி க. குணதர்சனா அவர்களின் உரை உள்ளிட்ட கலை நிகழ்வுகள் சிறப்பாக இடம்பெற்றன.
இந் நிகழ்வில் உரையாற்றிய அரசாங்க அதிபர் திரு. மருதலிங்கம் பிரதீபன் அவர்கள், இன்றைய நிகழ்விற்கு வருகை தந்த கெளரவ அமைச்சர் அவர்களை வரவேற்றதுடன், மாவட்டச் செயலகத்தில் வருடாந்தம் ஆடிக் கூழ் குடித்தலுடன் மாத்திரமே ஆடிப்பிறப்பு கொண்டாட்டமானது முன்னெடுக்கப்படும். ஆனால் இம் முறை மாவட்ட செயலக உத்தியோகத்தர்களின் கலை நிகழ்வுகளுடன் கொண்டாடுவதற்கு தீர்மானிக்கப்பட்டதாகவும், இவ் கலை நிகழ்வினை ஆற்றிய உத்தியோகத்தர்களுக்கு தனது வாழ்த்துக்களையும் பாராட்டுக்களையும் தெரிவித்தார். மேலும், இவ்வாறான நிகழ்வுகளில் தமது திறமைகளை வெளிக் கொணராமல் கடமையாற்றும் உத்தியோகத்தர்களும் தமது திறமைகளை வெளிக்கொணர வேண்டும் என்றும் அறிவுரை வழங்கியதுடன், ஆடிப்பிறப்பின் மகிமை பற்றிய சிறப்புரை வழங்கிய உத்தியோகத்தருக்கும் தனது வாழ்த்துக்களையும் பாராட்டுக்களையும் தெரிவித்தார். மேலும், எதிர்வரும் 24 ஆம் திகதி நடைபெறவுள்ள தமிழ் மொழி தின மற்றும் விபுலானந்தர் நினைவு தின வைபவத்தில் தமிழ் தாய் வாழ்த்து ஒன்றை நிகழ்த்துவதற்கான வாய்ப்பும் மாவட்ட செயலக உத்தியோகத்தர்களுக்கு வழங்கப்பட்டுள்ளதாகவும், அலுவலகத்திற்கு வந்து கோவைகளுடன் மாத்திரமே தமது பணிகளை மேற்கொண்டு பின்னர் வீடு திரும்பும் செயற்பாடுகளுக்கு அப்பால் தமது துறை சார்ந்த ஏனைய திறமைகளையும் வெளிக்கொணர வேண்டும் என்பதற்கான களமாக இவ் நிகழ்வு அமைந்துள்ளதாகவும் தெரிவித்தார். கடந்த வாரம் அதிமேதகு ஜனாதிபதியுடனான மாவட்ட அரசாங்க அதிபர்களுக்கான கலந்துரையாடல் நடைபெற்ற போது அதில் மாவட்ட ரீதியான காட்சிப்படுத்தலில் எமது மாவட்டத்தின் காட்சிப்படுத்தல் முதல் நிலையில் திகழ்ந்தமை பெருமைக்குரிய விடயமாகும். இதற்கு உத்தியோகத்தர்கள் ஒவ்வொருவருடைய பங்களிப்புமே காரணம் என தெரிவித்த அரசாங்க அதிபர் இவ்வாறான மாவட்ட செயற்பாடுகளுக்கு மென்மேலும் ஒத்துழைப்புக்களை வழங்க வேண்டும் என்று மேலும் தெரிவித்தார்.
இவ் ஆடிப்பிறப்பு விழாவில் மேலதிக அரசாங்க அதிபர் கே.சிவகரன், மேலதிக அரசாங்க அதிபர்(காணி) பா.ஜெகரன், யாழ் மாவட்ட ஒருங்கிணைப்பு குழுவின் இணைப்பாளர் திரு.எஸ். கபிலன் உள்ளிட்ட மாவட்டச் செயலக பதவிநிலை உத்தியோகத்தர்கள் மற்றும் உத்தியோகத்தர்கள் கலந்து கொண்டனர்.
 
 
 
யாழ்ப்பாண மாவட்டச் செயலக நலன் நலன்புரிக் கழகம் ஏற்பாட்டில் ஆடிப்பிறப்பு விழா இன்றைய தினம் (17.07.2026) மாவட்டச் செயலக கேட்போர் கூடத்தில் சிறப்புற நடைபெற்றது. அரசாங்க அதிபரின் வழிப்படுத்தலில் கலைத்துறையுடன் தொடர்புடைய மாவட்டச் செயலக உத்தியோகத்தர்களின் குழுப்பாடல் மற்றும் பல்லியம் இசை நிகழ்வுகள் மேடையேற்றப்பட்டன. இக் கலை நிகழ்வை சிறப்பாக ஒழுங்குபடுத்தி வழங்கிய உத்தியோகத்தர்களை கௌரவிக்கும் நிகழ்வு சிறப்பாக நடைபெற்றது. நிகழ்வின் இறுதியில் கடற்றொழில், நீரியல் மற்றும் கடல் வளங்கள் அமைச்சரும், யாழ். மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் மற்றும் அரசாங்க அதிபர் திரு மருதலிங்கம் பிரதீபன் ஆகியோர் குறித்த உத்தியோகத்தர்களை பாராட்டி சான்றிதழ்கள் வழங்கிக் கௌரவித்திருந்தனர்.
இதன்போது குழுப்பாடலினை வழங்கிய திருமதி. நிரஞ்சலா ஸ்ரீரங்கன் (வயலின்), திருமதி.சுபேந்தினி லிங்கேஸ்வரன் (இசை), திருமதி.நிரஞ்சினி றகுணன் (இசை), திருமதி.மேகலா லக்ஸ்மன் (இசை), திருமதி.துக்ஷாந்தி பபிக்ஷன் (இசை), திருமதி. மஞ்சுளா அகிலன் (இசை), திருமதி.அபிசுஜா சஞ்சீவ் (இசை), திருமதி. சாந்திமலர் ஜெயபாஸ்கரன் (இசை), திருமதி அபிராமி துஜந்தன் (இசை), திரு.சதீஸ்குமார் நடராஜா (மிருதங்கம்), திரு.தே.விஜயச்சந்திரா (தபேலா) ஆகியோரும், 'பல்லியம்' இசை நிகழ்வினை வழங்கிய திருமதி. நிரஞ்சலா ஸ்ரீரங்கன் (வயலின்), திருமதி.சுபேந்தினி லிங்கேஸ்வரன் (வயலின்), திருமதி.நிரஞ்சினி றகுணன் (வயலின்), திருமதி. சிவகௌரி இந்திரஜித் (வயலின்), திருமதி. மேகலா லக்ஸ்மன் (ஓர்கன்), திருமதி. ஆர்த்தி தேவநாதன் (புல்லாங்குழல்), திருமதி. மஞ்சுளா அகிலன் (வீணை), திரு.சதீஸ்குமார் நடராஜா (மிருதங்கம்), திரு.தே.விஜயச்சந்திரா (தபேலா) ஆகியோர் கௌரவிக்கப்பட்டனர்.
1 2 3 4 5 6
 
 
"மக்கள் மைய நிர்வாகம்" பிரதேச உற்பத்தித் திறன் சுட்டி போட்டியில் (CITIZENS MIRROR INDEX 1.0) தேசிய மற்றும் மாவட்ட ரீதியாக வெற்றி பெற்ற பிரதேச செயலகங்கள் இன்றைய தினம்(16.07.2026) மாவட்டச் செயலக செயலமர்வு மண்டபத்தில் நடைபெற்ற நிகழ்வில் அரசாங்க அதிபர் திரு மருதலிங்கம் பிரதீபன் அவர்களினால் சான்றிதழ் வழங்கி கெளரவிக்கப்பட்டார்கள்.
இந் நிகழ்வில் அரசாங்க அதிபர் அவர்கள் கருத்து தெரிவிக்கையில், மாவட்ட ரீதியில் 14 பிரதேச செயலகங்கள் போட்டியில் விண்ணப்பங்களை சமர்ப்பித்து பிரதேச செயலக ரீதியாக தெரிவு செய்யப்பட்டமைக்காக முதலில் தனது வாழ்த்துக்களையும் மகிழ்ச்சியையும் தெரிவித்தார். மேலும் உற்பத்தித்திறன் செயற்பாடுகளில் மாவட்ட செயலகம் மற்றும் பிரதேச செயலகங்கள் சிறப்பாக செயற்பட்டு வருவதாகவும், அடுத்த 2026 ஆம் ஆண்டுக்கான தேசிய உற்பத்தி திறன் போட்டிகளில் பிரதேச செயலகங்கள் விண்ணப்பங்களை சமர்ப்பித்து அடைவு மட்டத்தைப் பெற்றுக் கொள்ள காத்திருப்பதாகவும் தெரிவித்தார். மேலும், உற்பத்தித்திறன் செயற்பாடுகள் பிரதேச செயலக ரீதியாக சிறப்பான தன்மையில் காணப்படுவதாகவும் ஒருங்கிணைந்த வகையிலே செயற்படுவதாகவும் அதற்கு வழிகாட்டலாக செயற்பட்ட பிரதேச செயலாளர்களுக்கும் பிரதேச செயலக பதவி நிலை உத்தியோகத்தர்களுக்கும் உற்பத்தி திறன் அபிவிருத்தி உத்தியோகத்தர்களுக்கும் நன்றிகளை தெரிவித்தார். 2025 ஆண்டுக்கான ஜனாதிபதி சுற்றுச்சூழல் விருதுகளை நல்லூர் பிரதேச செயலகம் பெற்றுக்கொண்டதுதாகவும், சிறந்த அரச அலுவலகத்திற்காக Merit Award மற்றும் அகில இலங்கை ரீதியாக சிறந்த சமூக வலைத்தளத்திற்கான (Facebook ) Special Jury Award ஆகிய இவ் இரண்டு விருதுகளையும், "மக்கள் மைய நிர்வாகம்" பிரதேச உற்பத்தித் திறன் சுட்டி போட்டியில் தேசிய ரீதியாக முதலிடம் பெற்றுக் கொண்டுள்ளதாகவும் தெரிவித்து நல்லூர் பிரதேச செயலாளர் திருமதி.யசோதா உதயகுமார் மற்றும் பிரதேச செயலக உத்தியோகத்தர்களுக்கு தனது வாழ்த்துக்களையும் பாராட்டுக்களையும் தெரிவித்துக் கொண்டார். அதேபோன்று சண்டிலிப்பாய் பிரதேச செயலகமும் சுற்றாடல், சூழல் சார்ந்த, உற்பத்தி திறன் சார்ந்த போட்டிகளில் பங்கு பற்றி அடைவு மட்டத்தை பெற்றுக் கொண்டுள்ளதாகவும் தெரிவித்தார். அனைத்து பிரதேச செயலகங்களும் தொடர்ந்தும் போட்டிகளில் பங்கு பற்றி ஒருங்கிணைந்து செயற்படும்போது அதன் ஒட்டுமொத்த வெளிப்பாடும் மாவட்டத்தை வந்தடையும் எனவும் அதற்கு ஒத்துழைப்பு நல்குமாறு அரசாங்க அதிபர் கேட்டுக் கொண்டார். அகில இலங்கை ரீதியாக 284 பிரதேச செயலகங்கள் போட்டிகளில் ஈடுபட்டு யாழ்ப்பாண மாவட்டம் மிகச்சிறந்த வெற்றியை தந்துள்ளமைக்கு பாராட்டுக்களை தெரிவித்ததுடன் மேலும் முழு மனதுடன் செயற்பட்டு வெற்றிகளை ஈட்ட வேண்டும் எனவும் தெரிவித்துக் கொண்டார்.மேலும் வினைத்திறனான சேவைக்கு நன்றிகளை தெரிவித்துக் கொண்டதுடன் அடுத்த 2026 ஆம் ஆண்டுக்கான உற்பத்தி திறன் செயற்பாட்டு மதிப்பீடுகளுக்கு உரிய செயற்பாடுகளை தயார் நிலையில் மேற்கொள்ளுமாறும் மாவட்ட, பிரதேச செயலக உத்தியோகத்தர்களை கேட்டுக்கொண்டார்
"மக்கள் மைய நிர்வாகம்" பிரதேச உற்பத்தித் திறன் சுட்டி போட்டியில் தேசிய, மாவட்ட ரீதியிலும் 96.23 புள்ளிகளையும் AAA தரத்தினையும் பெற்று நல்லூர் பிரதேச செயலகம் முதலாம் இடத்தினை பெற்றுக் கொண்டது. மாவட்ட ரீதியில் நல்லார் பிரதேச செயலகமும், 2 ஆம் இடத்தினை 87.17 புள்ளிகளையும் AAA தரத்தினை பெற்று கரவெட்டி பிரதேச செயலகமும், 3 ஆம் இடத்தில் 85. 97 புள்ளிகளையும் AAA தரத்தினை பெற்று சண்டிலிப்பாய் பிரதேச செயலகமும் பெற்றுக்கொண்டமை குறிப்பிடத்தக்கது. மேலும், புள்ளிகளின் அடிப்படையில் ஏனைய பிரதேச செயலகங்களுக்கு ம் சான்றிதழ் வழங்கப்பட்டன. "மக்கள் மைய நிர்வாகம்" பிரதேச உற்பத்தித் திறன் சுட்டி போட்டியில் 25 மாவட்டங்களில் மாவட்ட ரீதியாக பிரதேச செயலகங்கள் பெற்ற புள்ளிகளின் அடிப்படையில் யாழ்ப்பாண மாவட்டம் 7 ஆம் இடத்தினைபெற்றுள்ளது. இந் நிகழ்வில் "மக்கள் மைய நிர்வாகம்" பிரதேச உற்பத்தித் திறன் சுட்டி போட்டியில் தேசிய மற்றும் மாவட்ட ரீதியாக வெற்றி பெற்ற பிரதேச செயலகங்களுக்கு அரசாங்க அதிபர் அவர்களால் சான்றிதழ்கள் வழங்கிக் கெளரவிக்கப்பட்டனர். இந் நிகழ்வில் மேலதிக அரசாங்க அதிபர் க.சிவகரன், மேலதிக அரசாங்க அதிபர் (காணி) பா. ஜெயகரன், பதவி நிலை உத்தியோகத்தர்கள், பிரதேச செயலாளர்கள், உதவிப் பிரதேச செயலாளர்கள், உதவி மற்றும் பிரதித் திட்டமிடல் பணிப்பாளர்கள், மாவட்ட செயலக மற்றும் பிரதேச செயலகங்களின் உற்பத்தி திறன் உத்தியோகத்தர்கள் ஆகியோர் கலந்து கொண்டனர்.
 
01