வட இலங்கையில் புதுப்பிக்கத்தக்க எரிசக்தி மேம்பாட்டிற்கான மூலோபாய சுற்றுச்சூழல் மதிப்பீடு (SEA) தொடர்பான செயலமர்வு இன்றைய தினம் (08.07.2026) காலை 09.30 மணிக்கு மாவட்டச் செயலக மாநாட்டு மண்டபத்தில் நடைபெற்றது. இச் செயலமர்வில் யாழ்ப்பாணம் மாவட்ட அரசாங்க அதிபர் திரு. மருதலிங்கம் பிரதீபன், மன்னார் மாவட்ட அரசாங்க அதிபர் திரு. கே. கனகேஸ்வரன், வட மாகாண பிரதி பிரதம செயலாளர் (பொறியியல்) எந்திரி என். சுதாகரன், SEA ஆலோசனை, நிறுவன பொது முகாமையாளர் டாக்டர். நரேந்திர டி சில்வா, Oriental Consultants Global Co அணியின் தலைவி திருமதி. டொமோகோ ஹட்டோரி ஆகியோர் பங்குபற்றினார்கள்.
இச் செயலமர்வின் தொடக்கவுரையாற்றிய யாழ்ப்பாண மாவட்ட அரசாங்க அதிபர் அவர்கள், இச் செயலமர்வின் கு வருகைதந்த அனைவரையும் வரவேற்றதுடன், நிலை பேண்தகு சக்தி அதிகார சபையினுடைய ஏற்பாட்டில் நடைமுறைப்படுத்தப்படும் இச் செயலமர்வில் வடக்கு மாகாணத்தை பிரதிநிதித்துவப்படுத்தி சக்திவளம் தொடர்பான கலந்துரையாடலாகவும் இச் செயலமர்வு ஏற்பாடு செய்யப்பட்டுள்ளதாகவும், வட மாகாணத்தின் மாவட்ட செயலாளர்கள் இது தொடர்பான விடய அறிந்துள்ளவர்களா இருப்பதனால், இது தொடர்பாக ஒவ்வொரு பிரதேச செயலாளர் பிரிவுகள் ரீதியாக நடைமுறைப்படுத்துவது தொடர்பாக ஏற்கனவே கலந்துரையாடப்பட்டதாகவும், மன்னார், கிளிநொச்சி, வவுனியா மற்றும் முல்லைத்தீவு மாவட்டங்களின் ஒவ்வொரு பிரதேச செயலாளர் பிரிவுகளிலும் இதனை நடைமுறைப்படுத்துவதற்கான விடையதானங்கள் சமர்ப்பிக்கப்பட்டு அது தொடர்பான ஆய்வுகளும் மேற்கொள்ளப்பட்டுள்ளதாகவும் தெரிவித்தார். பிரதேச செயலாளர்கள், பிரதேச சபையினுடைய செயலாளர்கள் மற்றும் அரச திணைக்களங்கள் மற்றும் ஏனைய நிறுவனங்களின் உதவியுடன் இச் செயற்பாடுகள் முன்னெடுக்கப்பட்டு வருவதாகவும், ஒவ்வொருவரும் தங்களுடைய பிரதேசம் மற்றும் கிராமத்தின் புதுப்பிக்கத்தக்க சக்தி வளம் தொடர்பான தமது ஆக்கபூர்வமான கருத்துக்களை வழங்கி ஒத்துழைப்பு வழங்குமாறும் அரசாங்க அதிபர் இதன்போது மேலும் தெரிவித்தார். திட்டத்தின் மூலோபாய
நோக்கமானது வட இலங்கையில் புதுப்பிக்கத்தக்க எரிசக்தி மேம்பாட்டை ஆதரிப்பதற்காக SLSEA ஒரு மூலோபாய சுற்றுச்சூழல் மதிப்பீட்டை (SEA) ஆரம்பித்துள்ளது. இது நாட்டின் எரிசக்தி மாற்றத்தில் தனியார் துறை முதலீடுகளை ஊக்குவிப்பதையும், மூலோபாய திட்டமிடலை வலுப்படுத்துவதையும் நோக்கமாக கொண்டுள்ளது ஆசிய அபிவிருத்தி வங்கி ADB-யின் தொழில்நுட்ப மற்றும் நிதி உதவியுடன் மத்திய சுற்றாடல் அதிகார சபை CEA 2025 செப்டம்பரில் வெளியிட்ட ToR-க்கு அமைய இது நடத்தப்படுகிறது.
SEA என்பது கொள்கைகள், திட்டங்கள் மற்றும் நிகழ்சிகளில் சுற்றுச்சூழல் பரிசீலனைகளை ஒருங்கிணைக்கும் முக்கிய திட்டமிடல் கருவியாகும் சுற்றுச்சூழல் மற்றும் சமூக சவால்களை அடையாளம் காணவும், தீர்வுகளை ஆராயவும், சிறந்த முடிவுகளை எடுக்கவும் உதவுகிறது. இச் செயலமர்வில் பங்குதாரர்களின் கருத்துகள் மற்றும் பரிந்துரைகள் பெறப்பட்டன. இச் செயலமர்வில் வட மாகாண மேலதிக அரசாங்க அதிபர்கள், பிரதேச செயலாளர்கள், மாகாண திணைக்களங்களின் தலைவர்கள், பிரதேச சபை செயலாளர்கள் உள்ளிட்ட பலர் கலந்து கொண்டனர்.

ஆரோக்கியமான குழந்தை வளர்ப்பும் மகிழ்வான மறுமலர்ச்சி வலைப்பின்னலும் மறுமலர்ச்சி நோக்கிய ஐந்து நாள் பயிற்சிப்பட்டறை இன்றைய தினம் (07.07.2026) வைத்தியசாலை வீதியிலுள்ள தொடர்பகம் மண்டபத்தில் ஆரம்பித்து வைக்கப்பட்டது. மாற்றம் அறக்கட்டளையினால் யாழ் மாகாண அமலமரித் தியாகிகள் மற்றும் வளர்பிறை உளவளத்துணை நிலையத்துடன் இணைந்து முன்னெடுக்கப்படும் ஒரு கூட்டு செயற்பாடாகும். இப் பயிற்சி நெறியின் ஆரம்ப நிகழ்வில் யாழ் மாவட்ட அரசாங்க அதிபர் திரு.மருதலிங்கம் பிரதீபன் அவர்கள் கலந்து கொண்டு ஆரம்பித்து வைத்து கருத்துத் தெரிவிக்கையில், இச் செயலமர்வின் தலைப்பிலேயே அதாவது ஆரோக்கியமான பிள்ளைகளுக்கு மகிழ்ச்சியான மறுமலர்ச்சியான வலைப்பின்னலும் என்ற தலைப்பிலேயே முழுமையான விடயமும் உள்வாங்கப்பட்டிருப்பதை காணக்கூடியதாக உள்ளதாகவும், மாற்றம் அறக்கட்டளை நிறுவனமானது சமூகத்தில் நல்ல மார்க்கங்களை கொண்டு வர வேண்டும் என்ற நீண்ட கால பணியில் தொடர்ந்து செயற்பட்டு வருவதாகவும், இவ்வாறானதொரு தலைமைத்துவம் மாற்றத்தை ஏற்படுத்த வேண்டும் சமூகத்திலே போதையற்ற வாழ்வை கொண்டு வர வேண்டும் என்ற மாற்றத்தின் முயற்சிக்கு தனது பாராட்டுகளையும் வாழ்த்துகளையும் தெரிவித்தார்.
மேலும் சமூக வலைப்பின்னல் என்ற விடயத்தை நோக்கும் போது சமூகத்தில் பல்வேறு பாதகமான வலைப்பின்னல்கள் அமைப்புக்கள் காணப்படுகின்றன. குறிப்பாக போதையை முனைப்பாக மேற்கொள்ளக்கூடிய வலைப் பின்னல் அமைப்புகள் செயற்பட்டு வருவதாகவும் அதற்கு முற்றுப்புள்ளி வைப்பதற்காக மாற்றம் அறக்கட்டளை நிறுவனம் தொடர்ச்சியாக பல்வேறு செயற்பாடுகளை மேற்கொண்டு வருவதாக தெரிவித்தார். பிரதேச மட்டத்தில் கடமையாற்றும் உத்தியோகத்தர்களுக்கு முதலில் நன்றிகளை தெரிவிக்க வேண்டும் எனவும், ஏனெனில் அவர்கள் பல்வேறு நெருக்கடிகளுக்கு மத்தியில் சமூகத்தில் மாற்றத்தை கொண்டு வரவேண்டும் என கடமையாற்றி வருவதாகவும் அவர்களின் நல்ல சிந்தனைகள் எண்ணங்கள் போன்றவை சமூகத்தில் ஆரோக்கியத்தை கொண்டு நல்ல மனப்பாங்கை வளர்க்க இப்பயிற்சிகள் உதவும் எனவும் "மற்றவர்களை மகிழ்வித்து மகிழ்வோம் "எனும் கோட்பாடு விழிப்புணர்வை ஏற்படுத்தும் கருத்தை கொண்டுள்ளதாகவும் தெரிவித்தார். மேலும் எமது மாவட்டத்தை பொறுத்தவரை போதைப்பொருள் கட்டுப்பாட்டுக்குள் கொண்டு வரப்பட்டு வருவதாகவும், அதனை கட்டுப்படுத்த அனைவரும் முனைப்புடன் செயற்பட்டுள்ளதாகவும் அதற்கு அனைவருக்கும் நன்றிகளை தெரிவித்துக் கொண்டதுடன் சிறுவர்களை, இளைஞர்களை, யுவதிகளை வழிப்படுத்த வேண்டும் எனவும் சமூகத்தில் இச் செயற்பாடுகளுக்கு முரண்பட்டு நிற்கின்ற வகுதியினரும் காணப்படுவதாகவும் அவர்களையும் ஆற்றுப்படுத்த வேண்டிய தேவை காணப்படுவதாகவும் கிராமங்களிலும் ஆரோக்கியமான மகிழ்ச்சியான சமுதாயத்தை உருவாக்க அனைவரும் ஒன்றினைய வேண்டும் எனத் தெரிவித்தார்.
ஒரு குடும்பத்தின் செயற்பாடுகள் எவ்வாறு அமைய வேண்டும் சமூகத்தில் செயற்பாடுகள் எவ்வாறு அமைய வேண்டும் குடும்பத்தையும் சமூகத்தையும் ஒருங்கிணைந்த வகையில் எவ்வாறு மேற்கொள்ள வேண்டும் என்ற பல்வேறு விடயங்களை இன்றைய வளவளர்கள் பயிற்சிகள் மூலம் வழங்கவுள்ளதாகவும் ஆற்றல்களை வளர்ப்பதோடு மட்டுமல்ல அறிவு திறனுடன் செயற்பட நல்ல மனப்பாங்கு தேவைப்படும் எனவும் அந்த மனப்பாங்குடன் இயன்றளவு சமுதாயத்தை மாற்ற வேண்டும். இளைய சமுதாயத்தை பாதுகாக்க வேண்டிய பொறுப்பு அனைவருக்கும் உண்டு எனவும் இதற்கு மாவட்டத்தில் உள்ள அனைத்து பிரதேச செயலாளர்களும் மாவட்ட செயலகமும் உறுதுணையாக நிற்கும் எனவும் தெரிவித்தார். இந் நிகழ்வில் யாழ் மறைமாவட்ட குருமுதல்வர் அருட்கலாநிதி ஜோசப்தாஸ் ஜெபரட்ணம் அடிகளார், யாழ் மாகாண அமலமரித்தியாகிகள் சபையின் முதன்மை ஆலோசகர் அருட்பணி பா.அன்றனி ஜேசுதாசன் அடிகளார், யாழ் மாவட்ட மேலதிக அரசாங்க அதிபர் க.சிவகரன், உதவி மாவட்ட செயலாளர் உ.தர்ஷினி, ஓய்வுநிலை பிரதிக் கல்விப்பணிப்பாளர் திருமதி கோகிலா மகேந்திரன் மற்றும் துறைசார்ந்த திணைக்கள உத்தியோகத்தர்கள் என பலரும் கலந்து கொண்டிருந்தனர்.
மேலும் இச் செயலமர்வில் "ஆரோக்கியமான குழந்தை வளர்ப்புத் திறன்கள்" எனும் தலைப்பில் ஓய்வுநிலை பிரதிக் கல்விப்பணிப்பாளர் திருமதி கோகிலா மகேந்திரன் அவர்களும், "சமகால போதைப்பாவனையில் எழும் சவால்களும் குடும்பக் குழப்பங்களும்" எனும் தலைப்பில் தேசிய அபாயகர ஔடதங்கள் கட்டுப்பாட்டுச் சபையின் யாழ் மாவட்ட மற்றும் வடமாகாண இணைப்பாளர் திருமதி சியாமினி வயலற் அயந்தன் அவர்களும், "போதை நீக்க உத்திகளும் குணமாக்கலுக்கான குழும மற்றும் சமூக அணுகுமுறைகளும்" எனும் தலைப்பில் மாற்றம் அறக்கட்டளை தாபகர் மற்றும் நிறைவேற்றுக் குழுத்தலைவர் அருட்கலாநிதி டேவிட் வின்சன் பற்றிக் அமதி அவர்களும், "சமூக விடியலுக்கான வலைப்பின்னலும் வழிகாட்டல் திறன்களும்" எனும் தலைப்பில்
வளர்பிறை உளவளத்துணை நிலைய இயக்குனர் அருட்பணி சூசை டேமியன் அமதி அவர்களும், "தலைமைத்துவமும் தகைமைகள் பகிர்தலும்" எனும் தலைப்பில் தேசிய கல்வியியல் கல்லூரியின் சிரேஸ்ட விரிவுரையாளர் மற்றும் கல்வியமைச்சின் நிபுணத்துவ ஆலோசகர் கலாநிதி பா. தனபாலன் அவர்களும், "மாணவர்களுக்கான ORAS தூண்டுதலும் குழு ஆதரவும்" எனும் தலைப்பில் யாழ் பல்கலைக்கழக சமூகவியல் துறை விரிவுரையாளர்திரு ராஜேஸ் கண்ணா அவர்களும், "தொடர்பாடலும் குணமாக்கலும்" எனும் தலைப்பில் இலங்கை திறந்த பல்கலைக்கழகத்தின் வருகைதரு விரிவுரையாளர் மாற்றம் இயக்குனர் அறக்கட்டளை திரு. பே. பெனிக்னஸ் ஆகியோர் தொடர்ந்து ஐந்து நாட்கள் விரிவுரையாற்றவுள்ளனர்.

யாழ்ப்பாணம் உள்நாட்டு இறைவரி திணைக்களத்தின் யாழ்ப்பாணப் பிராந்திய ஆணையாளர் திரு. A. P. குணதுங்ஹ அவர்கள் அரசாங்க அதிபர் திரு. மருதலிங்கம் பிரதீபன் அவர்களை இன்றைய தினம் (06.07.2026) அரசாங்க அலுவலகத்தில் சந்தித்து கலந்துரையாடினார். இதன் போது வரி செலுத்துநர் அடையாள இலக்கம் (TIN) பெற்றுக்கொள்வதற்காக அண்மைய நாட்களாக பொதுமக்கள் நீண்ட வரிசையில் நிற்பது தொடர்பாக அரசாங்க அதிபர் தம்முடன் தொலைபேசியில் கலந்துரையாடி பொதுமக்களுக்கான உரிய அறிவுறுத்தல்களை வழங்கியமைக்காக தமது நன்றியினைத் தெரிவித்துக்கொண்டார். இக் கலந்துரையாடலில் பின்வரும் மேலதிக விபரங்களை யாழ்ப்பாண பிராந்திய ஆணையாளர் தெரியப்படுத்தினார். 2023 ஆம் ஆண்டு வைகாசி 31 ஆம் திகதிய 2334/21 ஆம் இலக்க வர்த்தமானி அறிவித்தலுக்கு அமைவாக 18 வயதுக்கு மேற்பட்டவர்கள் 01/01/2024 முதல் கட்டாயமாக வரி செலுத்துனர் அடையாள இலக்கத்தினை உள்நாட்டு இறைவரித் திணைக்களத்தில் பதிவுசெய்து பெற்றுக் கொள்ள வேண்டும். மேலும் 2026 ஆம் ஆண்டு 11 ஆம் இலக்க உள்நாட்டு இறைவரித்திருத்தச்சட்டத்துக்கு அமைவாக 01/04/2026 முதல்
வரி செலுத்துநர் அடையாள இலக்கம் (TIN) பின்வரும் விடயங்களுக்கு அத்தியாவசியமானது எனத் தெரிவித்தார்.
1.வங்கிக் கணக்கைத் திறப்பதற்கு
2.கட்டடத் திட்டத்திற்கான ஒப்புதலைப் பெற்றுக்கொள்வதற்கு
3. ஒரு மோட்டார் வாகனத்தின் பதிவிற்கு
4.மோட்டார் வாகன உரிமம் புதுப்பிப்பதற்கு
5.நிலத்தின் பதிவு அல்லது நிலத்தின் உரிமை மாற்றத்திற்கு
6. இலங்கையில் கூட்டிணைக்கப்பட்ட ஒரு நிறுவனத்தின் பங்குகளை மாற்றுவதற்கு
7.கிரெடிட் கார்ட்டைப் பெற்றுக்கொள்வதற்கு அவசியமாகின்றது என ஆணையாளரால் தெரிவிக்கப்பட்டது.
மேலும், பின்வரும் இலகு நடவடிக்கை மூலம் வரி செலுத்துநர் அடையாள இலக்கம் (TIN) பெற்றுக்கொள்ள முடியும் எனவும் தெரியப்படுத்தினார்.
பதிவு செய்திருப்பின் QR குறியீட்டை பயன்படுத்தி அல்லது உள்நாட்டு இறைவரித் திணைக்களத்தின் இணையத்தளத்தில் IRD பதிவு / சான்றிதழை சரிபார்க்கவும் என்ற இணைப்பினூடாக மின்னஞ்சல் அல்லது தொலைபேசிக்கு OTP இலக்கத்தைப் பெற்று TIN. இலக்கத்தை பார்வையிட முடியும்.
வரி செலுத்துநர் அடையாள இலக்கம் உள்நாட்டு இறைவரித் திணைக்களத்தில் பதிவு செய்யப்பட்டிருக்காவிடின் நிகழ்நிலை (Online) முறைமை மூலமாகவோ அதாவது www.ird.gov.lk அல்லது உள்நாட்டு இறைவரித் திணைகளத்தில் உரிய விண்ணப்ப படிவத்தினை பூர்த்தி செய்து சமர்பிப்பதன் மூலமாகவோ பெற்றுக்கொள்ள முடியும். தற்போது பதிவுகளை மேற்கொள்பவர்களுக்கான TIN சான்றிதழ் தபால் மூலம் அனுப்பி வைக்கப்படும். மேலதிக விபரங்களுக்கு 0212217333 எனும் தொலைபேசி இலக்கத்திற்கு தொடர்பு கொண்டு அறிய முடியும் எனவும் ஆணையாளரால் தெரிவிக்கப்பட்டது. பிராந்திய ஆணையாளருடனான இக் கலந்துரையாடலில் மேலதிக அரசாங்க அதிபர் திரு.கே.சிவகரன், திட்மிடல் பணிப்பாளர் திரு. இ. சுரேந்திரநாதன் மற்றும் உதவி மாவட்டச் செயலாளர் செல்வி உ. தர்சினி ஆகியோரும் உடனிருந்தார்கள்.

வட மாகாண மக்களின் கண் சுகாதாரத்தை மேம்படுத்தும் நோக்கில் வடிவமைக்கப்பட்ட 'கிராமிய வாழ்விற்கான ஒளியூட்டல் திட்டத்தின்' யாழ் மாவட்ட அங்குரார்ப்பண நிகழ்வு நேற்றைய தினம் (06.07.2026) பிராந்திய சுகாதார சேவைகள் பணிமனையில் சிறப்புற நடைபெற்றது. யாழ் போதனா வைத்தியசாலையின் கண் சத்திரசிகிச்சை நிபுணர் வைத்தியர் எம்.மலரவன் அவர்களினால் உருவாக்கப்பட்ட இத்திட்டமானது கிளிநொச்சி மாவட்டத்தை தொடர்ந்து நேற்றைய தினம் யாழ் மாவட்டத்தில் உத்தியோகபூர்வமாக ஆரம்பித்து வைக்கப்பட்டுள்ளது.
இத் திட்டத்தின் முதற் கட்டமாக சுகாதார வைத்திய அதிகாரிகள், பொதுச்சுகாதார பரிசோதகர்கள், குடும்ப நல உத்தியோகத்தர்கள் ஆகியோருக்கான பயிற்சிகள் வழங்கப்பட்ட நிலையில் நேற்றைய தினம் இத்திட்டத்தில் அங்குரார்பண நிகழ்வுடன் சுகாதார அதிகாரிகளுக்கான விசேட பயிற்சிப் பட்டறையும் நடைபெற்றது. இதன்போது யாழ்ப்பாண போதனா வைத்தியசாலையின் கண் சத்திரசிகிச்சை நிபுணர் எம்.மலரவன் திட்டத்தின் நோக்கம் மற்றும் தொழில்நுட்பக் காரணிகள் குறித்து விளக்கமளித்தார். இதனூடாக 35 வயதுக்கு மேற்பட்டவர்களுக்கு தொற்றாநோய் பரிசோதனையுடன், கண் பரிசோதனைகளும் மேற்கொள்ளப்படும். தொடர்ந்து கண் பிரச்சினைகள் உள்ளவர்கள் இனங்காணப்பட்டு அவர்களுக்கு மூக்கு கண்ணாடி மற்றும் வெண்புரை சத்திர சிகிச்சை யாழ் போதனா வைத்தியசாலையில் மேற்கொள்ளப்படும்.
இத்திட்டத்தின் ஒரு பகுதியாக, கிராமப்புற மக்களின் கண் நோய்களை ஆரம்பத்திலேயே கண்டறிந்து சிகிச்சை அளிக்கும் பொருட்டு சுகாதார உத்தியோகத்தர்களுக்கான விசேட பயிற்சிப் பட்டறைகள் இரண்டு கட்டங்களாக நடைபெற்றிருந்தமை குறிப்பிடத்தக்கது. இந்நிகழ்வில் யாழ் மாவட்ட அரசாங்க அதிபர் மருதலிங்கம் பிரதீபன், வட மாகாண சுகாதார அமைச்சின் செயலாளர் திருமதி ப.ஜெயராணி, வடமாகாண சுகாதார சேவைகள் பணிப்பாளர் வைத்திய கலாநிதி வி.பி.எஸ்.டி.பத்திரண, யாழ் பிராந்திய சுகாதார சேவைகள் பணிப்பாளர் வைத்திய கலாநிதி கேதீஸ்வரன், மருத்துவ நிபுணர்கள், சுகாதார அதிகாரிகள் மற்றும் உத்தியோகத்தர்கள் எனப் பலரும் கலந்து கொண்டனர்.

மானிப்பாய் காளி விளையாட்டு கழகம் ஏற்பாடு செய்த 24 அரச திணைக்கள அணிகள் பங்கேற்ற மென்பந்து கிரிக்கெட் போட்டித் தொடர் வெற்றிகரமாக நடைபெற்றது. இத் தொடரில் மாவட்டச் செயலக அணி தொடர்ச்சியாக ஆறு போட்டிகளில் வெற்றி பெற்று இறுதிப் போட்டிக்குத் தகுதி பெற்றிருந்தது. இந் நிலையில் நேற்றைய தினம் (05.07.2026) நடைபெற்ற இறுதிப் போட்டியில் யாழ்ப்பாண மாவட்டச் செயலக அணியானது காங்கேசன்துறை பொலிஸ் அணியுடன் மோதியது. பரபரப்பாக நடைபெற்ற இவ் போட்டியில் யாழ்ப்பாண மாவட்டச் செயலக அணி சிறப்பான ஆட்டத்தை வெளிப்படுத்தி வெற்றிபெற்று சம்பியன் பட்டத்தை தமதாக்கி கொண்டது.
இதனைத் தொடர்ந்து, இன்றைய தினம் (06.07.2026) குறித்த அணியினர் யாழ் மாவட்ட அரசாங்க அதிபர் மருதலிங்கம் பிரதீபன் அவர்களை சந்தித்து கலந்துரையாடியதுடன் வெற்றிக் கிண்ணத்தினை அரசாங்க அதிபரிடம் ஒப்படைத்தனர். இதன் போது அணியினரின் சாதனையை பாராட்டிய அரசாங்க அதிபர் எதிர்காலத்திலும் இவ்வாறான போட்டித் தொடர்களில் பங்குபற்றி வெற்றிகளைப் பெற வாழ்த்துகளைத் தெரிவித்துக்கொண்டார். இதன்போது மேலதிக அரசாங்க அதிபர் திரு. க. சிவகரன் மற்றும் உதவி மாவட்ட செயலாளர் செல்வி. உ.தர்ஷினி ஆகியோர் உடனிருந்தார்கள்.








