தென்னாசிய மற்றும் தேசிய ரீதியான போட்டிகளில் வெற்றியீட்டிய மாணவர்களுக்கான கெளரவிப்பு நிகழ்வு தென்மராட்சி வலயக் கல்விப் பணிப்பாளர் திரு. கி. கமலராஜன் தலைமையில் இன்றைய தினம் (03.07.2026) காலை 09.00 சாவகச்சேரி பொன்விழா மண்டபத்தில் நடைபெற்றது. இந் நிகழ்வில் பிரதம விருந்தினராக யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களும், சிறப்பு விருந்தினராக சாவகச்சேரி உதவிப் பிரதேச செயலாளர் திருமதி. லாகினி நிரூபராஜ் அவர்களும் கலந்து கொண்டார்கள். இந் நிகழ்வின் ஆரம்பத்தில் சாவகச்சேரி நகர சுற்றுவட்டத்திலிருந்து டிறிபேக் கல்லூரி மாணவர்களின் பான்ட் இசையுடன், விருந்தினர்கள், வெற்றியீட்டிய மாணவர்கள் ஊர்வலமாக பொன்விழா மண்டபத்திற்கு அழைத்துவரப்பட்டார்கள். அதனைத் தொடர்ந்து, மங்கல விளக்கேற்றல், தேசிய வலய கீதங்கள் இசைக்கப்பட்டதனைத் தொடர்ந்து தலைமையுரையும் இடம்பெற்றது.
இந் நிகழ்வில் பிரதம விருந்தினராக கலந்து கொண்ட அரசாங்க அதிபர் தமதுரையில், தென்மராட்சி கல்வி வலயமானது பாடசாலை அடைவு மட்டம் மற்றும் இணைப் பாடவிதான செயற்பாடுகளிலும் முன்னுதாரணமாக திகழ்கின்றமைக்கு தனது வாழ்த்துக்களையும் பாராட்டுக்களையும் தெரிவித்தார். அண்மையில் நடைபெற்ற கல்வி பொது தராதர உயர்தர பரீட்சையில் தேசிய, மாகாண, மாவட்ட ரீதியில் முதல் நிலை தேர்ச்சிகளைப் பெற்ற மாணவர்களை கொண்ட கல்வி வலயமாக திகழ்கின்றது எனவும், அவ்வாறே அண்மையில் நடைபெற்ற கல்வி பொது தராதர சாதாரண தரப்பரீட்சையில் வட மாகாணத்தில் காணப்படும் 13 கல்வி வலயங்களில் நான்காவது இடத்தை பெற்றுள்ளது எனவும், இவற்றோடு விளையாட்டு செயற்பாடுகளிலும் பல்வேறு சாதனையாளர்களைக் கொண்ட வலயமாக இது காணப்படுகின்றமை பாராட்டுக்குரிய விடயமாகும் எனத் தெரிவித்தார். தென்மராட்சி பிரதேசம் தேசிய மற்றும் ஆசிய ரீதியில் போட்டிகளில் பங்குபற்றுவது என்பதே சாதனைக்குரிய விடயமாகும் என்றும், இப் பிள்ளைகளுக்கு பல்வேறு பயிற்சிகளை வழங்கிய பயிற்றுவிப்பாளர்களுக்கும், பயிற்சிகளில் கலந்து கொள்ள உறுதுணையாக இருக்கும் பெற்றோர்களுக்கும் தனது நன்றிகளை தெரிவித்தார். இன்று பல பெற்றோர்கள் கல்வியில் மட்டும் தான் தமது பிள்ளைகளின் அடைவு மட்டங்களை முன்னிலைப்படுத்தி நிற்கின்ற நிலையில் இவ்வாறான விளையாட்டு செயற்பாடுகளிலும் பங்கு பெற்ற செய்த பெற்றோர்களுக்கும் தனது நன்றிகளையும் பாராட்டுகளையும் தெரிவித்தார். தென்பகுதி மாணவர்கள் பாடசாலை நேரத்திற்குப் பின்னர் பெரும்பாலான நேரத்தை விளையாட்டு மைதானங்களில் செலவிடுகின்றமையை பார்க்க முடிகின்றது. இவ்வாறான செயற்பாடுகள் ஒப்பிட்டளவில் எமது மாவட்டத்தில் குறைவாக காணப்படுகின்றமையை அவதானிக்க கூடியதாகவுள்ளதாகவும், எமது பெற்றோர் தனியார் கல்வி நிறுவனங்களிலேயே பிள்ளைகளை அனுப்பும் முனைப்பு அவர்களை விளையாட்டு மைதானத்திற்கு அனுப்பி விளையாட வைப்பதில் காட்டுவதில்லை. இவ்வாறான சவால்களுக்கு மத்தியில் இவ்வாறு தேசிய மற்றும் சர்வதேச ரீதியில் இப் பிள்ளைகளை பங்குபற்ற செய்து வெற்றியை ஈட்டிய இக்கல்வி வலயத்திற்கும் தனது நன்றியையும் பாராட்டுகளையும் தெரிவித்தார்.
மேலும் இந் நிகழ்வை ஏற்பாடு செய்த வலயக்கல்வி பணிப்பாளரின் முயற்சி என்பது மிகவும் வரவேற்கத்தக்க ஒன்றாகும். இவ் வீர வீராங்கனைகளை தனியாக பாராட்ட வேண்டும் என்ற அவரின் எண்ணம் உண்மையில் பாராட்டுக்குரிய விடயமாகும். இது எமது மாவட்டம் மற்றும் பிரதேசத்திற்கு ஒரு முன்னுதாரணமான செயற்பாடாக அமைய வேண்டும்.
கல்வி மட்டுமல்லாது அவர்களுடைய இணைப் பாடவிதான செயற்பாடுகளிலும் பிள்ளைகளை பங்கு பற்ற செய்வது என்பது அவர்களுடைய எதிர்காலத்திற்கு மிகவும் உறுதுணையாக அமையும் என்றும், விளையாட்டு உபகரணங்கள் உயர்ந்த தரத்தில் கிடைக்காவிட்டாலும், வசதி குறைந்த பிள்ளைகள் தமது குறைந்த வசதி வாய்ப்பை பயன்படுத்தியும் இவ்வாறான வெற்றிகளை ஈட்டுவது என்பது சாதனைக்குரிய விடயமாகும். வெற்றி தோல்வி என்பதற்கு அப்பால் இவ்வாறான போட்டிகளில் பங்குபெற்றுவது என்பதே பெருமைக்குரிய விடயமாகும் எனவும், தெற்காசிய ஸ்கேட்டிங் வேக ஒட்ட நிகழ்வின் சாதனைக்காக தனது பாராட்டுக்களைத் தெரிவித்ததோடு, எமது மாணவர்கள் இனிவரும் காலங்களில் சர்வதேச ரீதியாகவும் வெற்றி பெற வேண்டும் எனவும் அரசாங்க அதிபர் தெரிவித்து, தெற்காசிய மற்றும் தேசிய ரீதியாக வெற்றியீட்டிய மாணவர்களுக்கு தமது வாழ்த்துக்களையும் தெரிவித்துக் கொண்டார்.
இந் நிகழ்வில் பின்வரும் மாணவர்களும், பயிற்றுனர்களும் அரசாங்க அதிபரால் கெளரவிக்கப்பட்டார்கள்.
01.மாலைதீவில் அண்மையில் நடைபெற்ற South Asia Speed Skating Championship (ஸ்கேற்றிங் விரைவோட்டம்) சாவகச்சேரி டிறிபேக் கல்லூரியில் ஆண்டு 09 இல் கல்வி கற்கும் மாணவி செல்வி சாறுதி தர்மரூபன் அவர்கள் யாழ்ப்பாணத்திற்கும், தென்மராட்சி மண்ணுக்கும், இரண்டு 2ம் இடங்களையும் ஒரு 3ம் இடமுமாக மூன்று வெற்றிப் பதக்கங்களை வென்று சாதனை படைத்து பெருமை சேர்த்திருந்தார்.
02.தேசியப் போட்டியில் வீரசிங்கம் மத்திய கல்லூரி மாணவி செல்வி ஜே. ஜெனிஸ்ரா 20 வயதுப் பிரிவு பாடசாலை மட்ட தேசிய பளுதூக்கல் நிகழ்வில் மூன்றாம் இடத்தினை பெற்றிருந்தார்.
03.சாவகச்சேரி இந்துக் கல்லூரி மாணவர்கள் 20 வயதுப் பிரிவில்
செல்வன் எஸ். கஜானன் செல்வி பி.அபிசாளினி ஆகியோர் கோலுன்றிப் பாய்தல் போட்டியில் தேசிய ரீதியாக முதலாம் இடத்தினை பெற்று சாதனை படைத்திருந்தனர்.
04.ஸ்கேட்டிங் பயிற்றுநர்கள் செல்வி என்.வினுஷா, திரு எஸ்.ஜெபநேசன், திரு கு. ராஜதீபன் ஆகியோர் பாராட்டப்பட்டதோடு, குறிப்பாக இன்றைய தினம் றீமர்மஸ் யுனைடெட் ஸ்போர்ட்ஸ் அக்கடமி நிறைவேற்றுப் பணிப்பாளர் திரு என்.டெனா அவர்களுக்கு பொன்னாடை போர்த்தி நினைவுச் சின்னம் வழங்கி கௌரவிக்கப்பட்டிருந்தார். இவர் யாழ் மாவட்டத்தில் இந்த ஸ்கேட்டிங் விளையாட்டினை உருவாக்கி வளர்த்ததில் மிகக் காத்திரமான பங்கை வகித்தவர் என்பது குறிப்பிடத்தக்கது.
05.தென்மராட்சி வலயக் கல்வி அலுவலகத்தின் உடற்கல்வி ஆசிரிய ஆலோசகர் திரு.நடராசா.ஸ்ரீகாந்தா அவர்களும் இன்றைய தினம் பாராட்டி கௌரவிக்கப்பட்டார்.
06.சாவகச்சேரி இந்துக்கல்லூரி பயிற்றுனர் திரு. கே. கனதீபன் அவர்களும், மீசாலை வீரசிங்கம் மத்திய கல்லூரி பயிற்றுனர் திரு. பி. டிலக்சன் அவர்களும் அரசாங்க அதிபரால் கெளரவிக்கப்பட்டனர்.
இந் நிகழ்வில் தென்மராட்சி வலயக் கல்வி அலுவலக பிரதிக் கல்விப் பணிப்பாளர்கள், பாடசாலை அதிபர்கள், வலய கல்வி அலுவலக உத்தியோகத்தர்கள், மாணவர்கள், பெற்றோர்கள் எனப் பல பேர் கலந்து சிறப்பித்தார்கள்.

யாழ்ப்பாண மாவட்டத்தில் நடைமுறைப்படுத்தப்பட்டுவரும் அபிவிருத்தித் திட்டங்களின் முன்னேற்ற மீளாய்வுக் கூட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில், கடற்றொழில் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் மற்றும் பாராளுமன்ற உறுப்பினர் கெளரவ கருணநாதன் இளங்குமரன் ஆகியோரின் பங்குபற்றலுடன் இன்றைய தினம்(02.07.2026) மாவட்டச் செயலக அரசாங்க அதிபர் அலுவலகத்தில் நடைபெற்றது. இதன்போது யாழ்ப்பாண மாவட்டத்தில் நடைமுறைப்படுத்தப்பட்டு வரும் அபிவிருத்தித் திட்டங்களான வீதி அபிவிருத்தி நிகழ்ச்சித் திட்டம், பன்முகப்படுத்தப்பட்ட வரவு செலவுத்திட்டம், ஒருங்கிணைந்த கிராமிய அபிவிருத்தி திட்டம் மற்றும் பிரஜாசக்தி உள்ளிட்ட பல்வேறு திட்டங்களின் முன்னேற்றங்கள் தொடர்பாக ஆராயப்பட்டு உரிய அறிவுறுத்தல்கள் வழங்கப்பட்டன. இக் கலந்துரையாடலில் மேலதிக அரசாங்க அதிபர், பிரதம கணக்காளர், பிரதம பொறியியலாளர், உதவி மாவட்ட செயலாளர், பிரதேச செயலாளர்களள், மாவட்ட செயலகம் மற்றும் பிரதேச செயலகங்களின் பிரதி, உதவித் திட்டமிடல் பணிப்பாளர்கள் மற்றும் துறைசாா்ந்த விடைய உத்தியோகத்தர்கள் உள்ளிட்ட பலரும் கலந்து கொண்டனர்.

யாழ். தொழிநுட்பவியல் கல்லூரி மைதானத்தில் மாபெரும் குளிரூட்டப்பட்ட நடமாடும் கோள்மண்டலம் அரசாங்க அதிபரால் திறந்து வைப்பு! யாழ்ப்பாணம் தொழிநுட்பவியல் கல்லூரி மைதானத்தில் அமைக்கப்பட்டுள்ள மாபெரும் குளிரூட்டப்பட்ட நடமாடும் கோள்மண்டலம் இன்றைய தினம்(01.07.2026) காலை 10.00 மணியளவில் உத்தியோகபூர்வமாக யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களினால் திறந்து வைக்கப்பட்டது.
இந் நிகழ்வில் சர்வமதத் தலைவர்களின் ஆசியுரை இடம்பெற்றதை தொடர்ந்து மாவட்ட அரசாங்க அதிபர் அவர்கள் கருத்துத் தெரிவிக்கையில், யாழ்ப்பாண மாவட்டத்திலே இன்றைய தினம் ஆரம்பிக்கப்பட்டுள்ள கோள் மண்டல காட்சி தொகுப்பானது வடக்கு மாகாணத்துக்கும் யாழ்ப்பாண மாவட்டத்துக்கும் குறிப்பாக கல்வித் துறைக்கும் ஒரு சிறந்த மைல்கல்லாக அமைந்துள்ளதாகவும், கோள் மண்டலம் நவீன வசதிகளுடன் கூடிய குளிரூட்டப்பட்ட வசதிகளோடு ஆரம்பிக்கப்பட்டுள்ளதுடன், இவ்வாறான கோள்மண்டலம் சூரியன், நட்சத்திரங்கள் போன்ற விடயங்கள் காட்சியளிப்பது யதார்த்த பூர்வமாக விண்வெளியில் இருக்கத்தக்க வகையிலான உணர்வையும் பிரம்மிக்கத்தக்க வகையிலே நேரடியாக பிள்ளைகள் அறிவியல் சார்ந்த விடயங்களை பெற்றுக் கொள்ளக்கூடியதான வகையிலும் ஏற்பாடு செய்யப்பட்டுள்ளமைக்கு நன்றிகளையும் பாராட்டுகளையும் தெரிவித்தார்.
மேலும், கோள்மண்டலம் தொடர்பான அறிவியல் ரீதியாக அறிந்து கொள்ளக்கூடிய வாய்ப்பினை ஆரம்பித்திருப்பது வரவேற்கத்தக்க விடயமாகும் எனவும், இதன் மூலம் பாடசாலை மாணவர்கள் மட்டுமல்லாமல் பொதுமக்களும் அறிவியல் ரீதியாக அறிந்து கொள்ள கூடியதாகவும் ஒருங்கிணைப்பு செய்யப்பட்டுள்ளதாகவும், இதனை ஆரம்பித்திருப்பது அனைவருக்கும் பார்க்கக் கூடிய வாய்ப்பினை பெற்றுக் கொள்ளக் கூடியதாக இருப்பதாக மாவட்டத்திற்கு உள்ளேயே இவ்வாறான கோள்மண்டலத்தை நேரடியாக பார்த்து அறிவை வளர்த்துக் கொள்ளக்கூடிய சந்தர்ப்பத்தை பிள்ளைகளுக்கு ஏற்படுத்தி தந்தமைக்கு அனைவருக்கும் நன்றிகளை தெரிவித்தார்.
இந் நிகழ்வில் சர்வமதத் தலைவர்கள், யாழ். தொழிநுட்பவியல் கல்லூரி சமூகத்தினர், அனுசரணையாளர்கள்,
நடமாடும் கோள்மண்டலத்தின் இணைப்பாளர், தயாரிப்பாளர் உள்ளிட்ட குழுவினர், யாழ். தொழிநுட்பவியல் கல்லூரி மாணவர்கள் உள்ளிட்ட பல்வேறு தரப்பினரும் கலந்து கொண்டிருந்தனர். மேலும் குறித்த மாபெரும் குளிரூட்டப்பட்ட நடமாடும் கோள்மண்டலம் காட்சிக்கூடமானது ஜூலை 01ஆம் திகதி தொடக்கம் ஆகஸ்ட் 09 ஆம் திகதி வரை மாலை 05.00 மணி தொடக்கம் மாலை 06.30 மணிவரையும், இரவு 07.00 மணி தொடக்கம் இரவு 08.30 மணிவரை நடைபெறவுள்ளமை குறிப்பிடத்தக்கது. மாகாண கல்வி அமைச்சின் அனுமதி பெற்று இது நடைபெறுவதனால் மாணவர்கள் பாடசாலை ஊடாக முற்பதிவு செய்து வழங்கப்படும் நேரத்தில் இதனை பார்வையிட முடியும் என ஏற்பாட்டாளர்கள் தெரிவித்துள்ளனர். மேலதிக தகவல்களை 077 7826217 அல்லது 076 1089005 தொலைபேசி இலக்கம் மூலம் தொடர்பு கொண்டு மேலதிக தகவல்களை பெற்றுக்கொள்ள முடியும்.

யாழ்ப்பாண முஸ்லிம் மக்களின் தேவைப்பாடுகள் தொடர்பான கலந்துரையாடல் கடற்தொழில் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்பு குழுவின் தலைவருமான கௌரவ இராமலிங்கம் சந்திரசேகர் அவர்களின் தலைமையில் இன்றைய தினம் (01.07.2026) பிற்பகல் 03.00 மணிக்கு மாவட்ட கேட்போர் கூடத்தில் நடைபெற்றது
இக் கலந்துரையாடலில் யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள், இன்றைய கூட்டத்திற்கு வருகை தந்த கெளரவ கடற்றொழி்ல் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள், பாராளுமன்ற உறுப்பினர் கெளரவ கருணநாதன் இளங்குமரன் உள்ளிட்டவர்களை வரவேற்றதுடன், முஸ்லிம் மக்களின் தேவைப்பாடுகள் தொடர்பில் கலந்துரையாடுவதற்காக இக் கலந்துரையாடல் ஏற்பாடு செய்யப்பட்டுள்ளதாக தெரிவித்தார்.
கௌரவ அமைச்சர் இராமலிங்கம் சந்திரசேகர் அவர்களின் கோரிக்கைக்கு அமைவாக யாழ்ப்பாண மாவட்டத்தில் முஸ்லிம்கள் அதிகம் வசிக்கும் பிரதேசங்களிலுள்ள சமூக மட்ட அமைப்புக்களை அழைத்து அவர்களின் தேவைப்பாடுகள், பிரச்சினைகளை அடையாளம் கண்டு உதவித் திட்டங்கள் வழங்குவதே நோக்கமாகும். மேலும், ஒஸ்மானியா கல்லூரி விளையாட்டு மைதானத்தின் அபிவிருத்தி, உட்கட்டுமான தேவைப்பாடுகள், வாழ்வாதாரம், வீட்டுத் திட்டம் தொடர்பாகவும் கலந்துரையாடப்பட்டு அவர்களின் தேவைகள் பூர்த்தி செய்யக்கூடிய வகையில் இக் இக்கலந்துரையாடல் அமையும் எனவும் தெரிவித்தார்.
இக் கலந்துரையாடல் தலைமையுரையாற்றிய கெளரவ அமைச்சர் அவர்கள், முஸ்லிம் மக்களின் தேவைப்பாடுகளை கலந்துரையாடுவதற்கே இக் கலந்துரையாடல் ஒழுங்கு செய்யப்பட்டுள்ளதாகவும், ஆரோக்கியமான கலந்துரையாடலாக அமைய வேண்டும் எனவும் தெரிவித்தார். மேலும், முஸ்லிம் மக்களின் கல்வி, சுகாதாரம் தொழில்வாய்ப்பு உள்ளிட்ட பிரச்சினைகளை ஆராய்ந்து அவற்றுக்கான தீர்வுகளை படிப்டியாக காண வேண்டும் எனவும், இக் கலந்துரையாடலில் பழைய விடயங்களை தவிர்த்து முன்னோக்கிச் செல்ல வேண்டும் எனத் தெரிவித்து, கலந்துரையாடலில் பங்குபற்றியவர்களின் கருத்துக்களை கேட்டறிந்து கொண்டார். இக் கலந்துரையாடலில் முஸ்லிம் மக்களின் அடிப்படைத் தேவைகள் தொடர்பாக விரிவாக ஆராயப்பட்டது. இக் கலந்துரையாடலில் பாராளுமன்ற உறுப்பினர் கெளரவ கருணநாதன் இளங்குமரன், மேலதிக அரசாங்க அதிபர் திரு. கே. சிவகரன், திட்டமிடல் பணிப்பாளர் திரு.இ. சுரேந்திரநாதன் யாழ்ப்பாணம், சாவகச்சேரி பிரதேச செயலாளர்கள், உதவி மாவட்டச் செயலாளர் உள்ளிட்ட அதிகாரிகள், முஸ்லிம் மக்களின் பிரதிநிதிகள் மற்றும் சமூக மட்ட அமைப்புக்களின் பிரதிநிதிகள் கலந்து கொண்டனர்.

யாழ்ப்பாண மாவட்டச் செயலகமும் விதாதா பிரிவும் இணைந்து நடாத்தும் மாவட்ட வர்த்தக சந்தையும் விற்பனை கண்காட்சியும் இன்றைய தினம் (01.07.2026) யாழ்ப்பாண மாவட்ட செயலக வளாகத்தில் நடைபெற்றது. இக் கண்காட்சியினை பிரதம விருந்தினராக கலந்து கொண்ட அரசாங்க அதிபர் திரு மருதலிங்கம் பிரதீபன் அவர்கள் நாடா வெட்டி ஆரம்பித்து வைத்தார். இந் நிகழ்வில் உள்ளூர் உற்பத்திகளை ஊக்குவிக்கும் வகையிலும் தொழில் முயற்சியாளர்களை ஊக்கப்படுத்தும் நோக்கிலும் அவர்களுக்கான சந்தை வாய்ப்பினை ஏற்படுத்திக் கொடுக்கும் முகமாகவும் இக் கண்காட்சி அமைந்துள்ளது.
இந் நிகழ்வில் மேலதிக அரசாங்க அதிபர் திரு. கே. சிவகரன், யாழ்ப்பாணம் வணிகர் கழகத்தின் தலைவர் திரு. இ. ஜனத்குமார், பிரதம கணக்காளர் திரு. எஸ்.கிருபாகரன், திட்டமிடல் பணிப்பாளர் திரு. இ. சுரேந்திரநாதன், பிரதம பொறியியலாளர் திரு. க. திருக்குமார் உள்ளிட்ட மாவட்டச் செயலக பதவி நிலை உத்தியோகத்தர்கள், மாகாண திணைக்களத்தின் அதிகாரிகள், மாவட்ட பிரதேச செயலக விதாதா உத்தியோகத்தர்கள், உள்ளூர் உற்பத்தியாளர்கள், ஊடகவியாளர்கள் எனப் பலர் கலந்து சிறப்பித்தனர்.








