மகளிர் மற்றும் சிறுவர் விவகார அமைச்சின் கீழ் உள்ள உத்தியோகத்தர்களுடானான முன்னேற்ற மீளாய்வுக் கூட்டமானது மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ் அவர்களின் தலைமையில் கடற்றொழில், நீரியல் மற்றும் கடல் வளங்கள் அமைச்சரும், ஒருங்கிணைப்புக் குழுவின் தலைவரும், பாராளுமன்ற உறுப்பினருமான கௌரவ இராமலிங்கம் சந்திரசேகர் அவர்களின் பங்குபற்றுதல்களுடன் இன்றைய தினம் (30.06.2026) பி. ப 2.30 மணிக்கு மாவட்ட செயலக கேட்போர் கூடத்தில் நடைபெற்றது. இக் கலந்துரையாடலில் பாராளுமன்ற உறுப்பினர் கெளரவ கருணநாதன் இளங்குமரன், யாழ்ப்பாண மாவட்ட அரசாங்க அதிபர் மருதலிங்கம் பிரதீபன் ஆகியோரும் பங்குபற்றினார்கள்.
யாழ்ப்பாணம் மாவட்ட அரசாங்க அதிபர் அவர்கள் இக் கூட்டத்திற்குவருகை தந்த கெளரவ அமைச்சர்கள், பாராளுமன்ற உறுப்பினர் உள்ளிட்டவர்களை வரவேற்றதுடன், சிறுவர் பெண்கள் தொடர்பான பிரச்சினைகளை நடப்பாண்டிலும் எதிர்வரும் காலங்களிலும் மாவட்டத்தில் எவ்வாறு கொண்டு செல்வது தொடர்பாக கௌரவ அமைச்சரின் அறிவுறுத்தலுக்கு அமைவாக இக் கூட்டம் ஏற்பாடு செய்யப்பட்டுள்ளதாகவும் தெரிவித்தார். மேலும், யாழ்ப்பாண மாவட்டத்தை பொறுத்தவரை 2025, 2026 ஆம் ஆண்டுகளில் கிடைக்கப்பெற்ற நிதிகளை மிக சிறப்பான முறையில் உத்தியோகத்தர்கள் பிரதேச செயலக ரீதியாக குறிப்பாக மகளிர் மற்றும் சிறுவர்கள் அலுவலர்கள் அமைச்சின் நிதி ஒதுக்கீட்டில் கிடைக்கப்பெற்ற நிதிகளை மிகச் சிறப்பான முறையில் செலவு செய்ததாகவும் அத்துடன் ஏனைய அமைச்சுக்களில் இருந்து கிடைக்கப்படும் நிதிகளையும் சரியான முறையில் பயன்படுத்தி உள்ளதாகவும் அனைத்து உத்தியோகத்தரையும் ஒருமுகப்படுத்தி ஒருங்கிணைந்த வகையிலே இக்கலந்துரையாடல் ஏற்பாடு செய்யப்பட்டுள்ளதாகவும் தெரிவித்தார். மேலும் எங்களுடைய பிரச்சினைகளை தமிழ் மொழியிலே கலந்துரையாடக்கூடிய ஓர் அமைச்சராக கௌரவ அமைச்சர் அவர்கள் வருகை தந்திருப்பது பெருமைப்படக்கூடிய ஒரு விடயமெனவும் உத்தியோகத்தர்கள் தங்கள் தேவைப்பாடுகளையும் கோரிக்கைகளையும் சரியான முறையில் முன்வைக்குமாறு கேட்டுக் கொண்டதுடன், உத்தியோகத்தர்களாகிய நாம் வினைத்திறனாகவும் சரியான முறையில் செயற்பாடுகளை முன்னெடுக்கின்ற போது அக்குடும்பம், பிள்ளைகளின் வாழ்க்கை சிறப்பாக அமையும் எனவும் உத்தியோகத்தர்களின் சிறப்பான அர்ப்பணிப்பான சேவைக்கு தனது நன்றிகளையும் தெரிவித்துக் கொண்டார்.
இக் கலந்துரையாடலில் கருத்து தெரிவித்த கடற்றொழி்ல் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்கள்,
எமது மகளிர் மற்றும் சிறுவர் விவகார அமைச்சர் அடிக்கடி யாழ்ப்பாணம் வருகைதந்து பெண்கள் மற்றும் சிறுவர் அபிவிருத்தியில் அக்கறை கொண்டவர் என்பதுடன், வடக்கு கிழக்கில் பாதிக்கப்பட்ட பெண்கள், கணவனை இழந்தவர்கள் சிறுவர்கள் ஆகியோருக்கு உதவிகள் வழங்க வேண்டும் என்பதில் அக்கறை கொண்டவர் எனவும் தெரிவித்து, இக் கலந்துரையாடலில் பங்குபற்றும் அதிகாரிகள் உத்தியோகத்தர்களுடன் ஒரு பரஸ்பர புரிந்துணர்வு ஏற்படும் எனவும் தெரிவித்தார். மேலும், முன்னேற்றத்தினை புள்ளிவிபர ரீதியாக குறிப்பிட்டாலும், அது எவ்வாறு யதார்த்தமாக உள்ளது என்பதனை தெளிவுபடுத்த வேண்டும் எனவும் தெரிவித்தார். மேலும், எமது சனாதிபதி அவர்களை ஏமாற்றிவிட முடியாது ஆகவே யாழ்ப்பாணம் மாவட்டத்தில் உள்ள பிரச்சினைகளை நல்ல முறையில் ஆராய வேண்டும் என்பதுடன் இக் கலந்துரையாடல் வினைத்திறனான அமைய வேண்டும் எனவும் தெரிவித்தார். தொடர்ந்து யாழ்ப்பாண மாவட்டத்தில் 2025 மற்றும் 2026 காலப்பகுதிகளில் சிறுவர் பெண்கள் சார்ந்த அபிவிருத்தி வேலை திட்டங்களின் முன்னேற்ற மீளாய்வு உதவி மாவட்ட செயலாளர் செல்வி உ.தர்ஷினி அவர்களினால் முன்னளிக்கை செய்யப்பட்டது.
இக் கலந்துரையாடலில் மகளிர் மற்றும் சிறுவர் விவகார அமைச்சர் கௌரவ சரோஜா சாவித்திரி போல்ராஜ் அவர்களால் பெண்கள் சிறுவர் அபிவிருத்தி தொடர்பாக பல விடயங்களும் அறிவுறுத்தல்களும் வழங்கப்பட்டன. இக் கலந்துரையாடலின் இறுதியில் உத்தியோகத்தர்களால் கோரிக்கைகள் முன்வைக்கப்பட்டு கெளரவ அமைச்சர் அவர்களினால் ஆராயப்பட்டன. இக் கலந்துரையாடலில் மாவட்ட செயலக பதவி நிலை உத்தியோகத்தர்கள், பிரதேச செயலாளர்கள், வலயக் கல்விப் பணிப்பாளர்கள், பெண் மற்றும் சிறுவர் அபிவிருத்தி உத்தியோகத்தர்கள், துறை சார்ந்த அரச உத்தியோகத்தர்கள், பொலீஸ் அதிகாரிகள், வெளிநாட்டு வேலை வாய்ப்பு பணியக உத்தியோகத்தர்கள் என பல்வேறு தரப்பினரும் கலந்து கொண்டிருந்தனர்.

உளவளத்துணை மற்றும் உள சமூக பணிகளை மேற்கொள்ளும் அரச மற்றும் அரச சாா்பற்ற நிறுவனங்களுக்கிடையிலான உளசமூக மன்ற கலந்துரையாடல் யாழ்ப்பாண மாவட்ட மேலதிக அரசாங்க அதிபர் திரு.க.சிவகரன் அவர்கள் தலைமையில் இன்றைய தினம் (30.06.2026) மாவட்டச் செயலக கேட்போர் கூடத்தில் நடைபெற்றது. இக் கலந்துரையாடலில் தலைமையுரையாற்றிய மேலதிக அரசாங்க அதிபர் அவர்கள்,உளவளத்துணை மற்றும் உள சமூக பணிகளை மேற்கொள்ளும் பிரதேச செயலக உத்தியோகத்தர்கள் மற்றும் துறைசார்ந்த திணைக்களங்களின் உத்தியோகத்தர்களை இக் கலந்துரையாடலுக்கு அழைத்துள்ளோம். உளவளத்துணை மற்றும் உள சமூக பணிகளின் செய்யற்படுகள் எமது மாவட்டத்திற்கு அதிக தேவைப்பாடுடையதாகும். இன்று ஊடகங்களில் உளவளத்துணை மற்றும் உள சமூக பிரச்சினைகள் தொடர்பில் அதிகமான செய்திகள் வெளிவருகின்றன. இவற்றை தடுப்பதற்கு அல்லது இல்லாமல் செய்வதற்கு இங்கு கூடியுள்ள அனைவருக்கும் பொறுப்பிருக்கிறது. மாவட்டச் செயலகம் மற்றும் பிரதேச செயலகங்களில் அமைச்சு மற்றும் பெண்கள் அபிவிருத்தி பிரிவு சார்ந்து இரண்டு உத்தியோகத்தர்களும், பாடசாலைகளில் உளவளத்துணை ஆசிரியர்களும், வைத்தியசாலைகள் சார்ந்தும் வைத்திய அதிகாரி பணிமனை சார்ந்த உளவளத்துணை ஆலோசனை உத்தியோகத்தர்களும் இருக்கின்றார்கள். இந் நிலையில் துறை சார்ந்து அனைத்து உத்தியோகத்தர்களும் ஒரு குடையின் கீழ் ஒருங்கிணைந்து செயற்படுவது காலத்தின் தேவைப்பாடாகும். அதன் அடிப்படையில் காலாண்டுக்கு ஒரு முறை அனைவரையும் ஒருங்கிணைத்து இக்கலந்துரையாடல் நடைபெறுகிறது. இதனூடாக சரியான திட்டமிடலுடன் எதிர்கால சந்ததியினரை பாதுகாக்க வேண்டியது முக்கியமானதாகும். இதற்கு அனைவரும் முன்வரவேண்டும் என கேட்டுக் கொண்டார்.
இதன்போது கடந்த கால கூட்டங்களின் முன்னேற்றம் தொடர்பில் ஆராயப்பட்டதுடன், உளவளத்துணை மற்றும் உளசமூக வேலைகளில் காணப்படும் இடைவெளிகள் மற்றும் சாவல்கள், மாவட்ட மட்ட உளசமூக பிரச்சினைகள் மற்றும் தலையீடுகள் தொடர்பிலும் கலந்துரையாடப்பட்டன. இக் கலந்துரையாடலில் உதவி மாவட்ட செயலாளர் செல்வி உ.தா்சினி, சுகாதார வைத்திய அதிகாரிகள், உள மருத்தவ வைத்திய அதிகாரிகள், மாவட்ட உளவளத் துணை இணைப்பாளர், துறைசார்ந்து பணியாற்றும் அரச மற்றும் அரச சாா்பற்ற நிறுவனங்களின் உத்தியோகத்தர்கள், வலயக்கல்வி அலுவலக ஆலோசகர்கள், பிரதேச செயலகங்களின் உளவளத்துணை உத்தியோகத்தர்கள் என பல்வேறு தரப்பினரும் கலந்து கொண்டனர்.

பலாலி பகுதிகளில் பாதுகாப்புப் படைகளின் பயன்பாட்டில் உள்ள அரச மற்றும் தனியார் காணிகள் தொடர்பான முன்னேற்ற ஆய்வுக் கூட்டம் கடந்த 2026.06.24 அன்று பாராளுமன்ற வளாகத்தில் நடைபெற்றது. காணி விவகாரங்கள் தொடர்பாக முன்னர் இடம்பெற்ற கலந்துரையாடல்களின் தொடர்ச்சியாக அமைந்த இந்தக் கூட்டத்திற்கு பாதுகாப்பு பிரதி அமைச்சர் கெளரவ மேஜர் ஜெனரல் அருண ஜயசேகர, கடற்றொழில், நீரியல் மற்றும் கடல்வள அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் துறைமுகங்கள், சிவில் விமானப் போக்குவரத்து மற்றும் எரிசக்தி அமைச்சர் கெளரவ அனுர கருணாதிலகமற்றும் துறைமுகங்கள் மற்றும் சிவில் விமானப் போக்குவரத்து பிரதி அமைச்சர் கெளரவ ஜனித ருவன் கொடிதுவக்கு ஆகியோர் இணைந்து தலைமை தாங்கினர்.
காணி உரிமை குறித்த மக்களின் குறைகளைத் தீர்ப்பதற்கான அரசாங்க முயற்சிகளை விரைவுபடுத்துதல், சமூக-பொருளாதார முன்னேற்றத்தை ஊக்குவித்தல் மற்றும் பிராந்திய நிர்வாக அமைப்புகளுடன் இணைந்து உட்கட்டமைப்பு அபிவிருத்தியை முன்னெடுத்துச் செல்லுதல் குறித்து கூட்டத்தில் ஆராயப்பட்டது. இந் நடவடிக்கைகள் தேசிய நல்லிணக்கம் மற்றும் மீள்குடியேற்ற செயற்பாடுகளின் முக்கிய அங்கங்களாகக் கருதப்படுகின்றன. குறிப்பாக எல்லை மறுசீரமைப்புகளை இறுதி செய்வது, இழப்பீட்டு வழங்கல் நடைமுறைகளை விரைவுபடுத்துவது மற்றும் எதிர்காலத்தில் உரிய உரிமையாளர்களிடம் மீள ஒப்படைக்கப்பட வேண்டிய காணிகளை முன்னுரிமைப்படுத்துவது ஆகிய விடயங்களுக்கு சிறப்பு கவனம் செலுத்தப்பட்டது.
இக் கூட்டத்தில் உரையாற்றிய பாதுகாப்பு பிரதி அமைச்சர் அவர்கள், கடந்த மாதம் யாழ்ப்பாணத் தீபகற்பத்தின் பல பகுதிகளுக்கு மேற்கொண்ட களப் பயணத்தின் போது பாதுகாப்புப் படைகளின் பயன்பாட்டில் உள்ள காணிகள் தொடர்பாகப் பெற்ற அனுபவங்களையும் அவதானிப்புகளையும் பகிர்ந்து கொண்டார். மேலும், தொடர்புடைய அரச நிறுவனங்கள் எதிர்கொள்ளும் சவால்கள் மற்றும் காணி மீளளிப்பு நடவடிக்கைகளை விரைவுபடுத்துவதற்கான நடைமுறை வழிமுறைகள் குறித்தும் கலந்துரையாடப்பட்டது. இறுதியில் உரிய காணிகளை விடுவிப்பது தொடர்பாக, தேசிய பாதுகாப்பு சபையில் கலந்துரையாடுவது எனத் தீர்மானிக்கப்பட்டது. இக் கூட்டத்தில் பாதுகாப்பு அமைச்சின் செயலாளர், இராணுவ மற்றும் விமானப்படைத் தளபதிகள், யாழ்ப்பாண மாவட்ட அரசாங்க அதிபர், தெல்லிப்பளை பிரதேச செயலர்,பாதுகாப்பு அமைச்சின் மூத்த அதிகாரிகள், இராணுவ மற்றும் விமானப்படை உயரதிகாரிகள் மற்றும் பல்வேறு அரச நிறுவனங்களின் பிரதிநிதிகளும் கலந்துகொண்டனர்.

தமிழ் மொழி தினத்தை சுவாமி விபுலானந்தரின் நினைவு தின கொண்டாட்டத்துடன் இணைந்த வகையில் யாழ்ப்பாணத்தில் கொண்டாடுவதற்கான முன்னாயத்த கலந்துரையாடல் இன்றைய தினம் (30.06.2026)யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் காலை 10.00 மணிக்கு அரசாங்க அதிபர் அலுவலகத்தில் நடைபெற்றது. அரச கரும மொழிகள் திணைக்களத்தின் வேண்டுகோளுக்கிணங்க யாழ்ப்பாண மாவட்ட செயலகத்துடன் யாழ்ப்பாண தமிழ் சங்கத்தினதும் யாழ்ப்பாண பல்கலைக்கழகத்தினது ஒத்துழைப்புடன் இந் நிகழ்வு எதிர்வரும் ஜூலை மாதத்தில் திருவள்ளுவர் மண்டபத்தில் கொண்டாடப்படவுள்ளது. இந் நிலையில் இந் நிகழ்வை சிறப்பாகக் கொண்டாடுவதற்கான முன்னாயத்த நடவடிக்கைகளை ஒருங்கிணைந்த முறையில் செயற்படுத்தும் முகமாக நிகழ்வுகளின் பொறுப்புக்கள் பகிர்தளிக்கப்பட்டன. நிகழ்வின் ஆரம்ப நிகழ்வாக யாழ்ப்பாணம் வைத்தீஸ்வரா கல்லூரியில் இருந்து மணிக்கூட்டு சந்தி ஊடாக திருவள்ளுவர் மண்டபத்திற்கு தமிழ் பண்பாட்டு பாரம்பரிய நிகழ்வுகளுடன் நடைபவனி நடத்துவதற்கு உத்தேசிக்கப்பட்டதுடன், நிகழ்வில் முன்னெடுக்கப்படவுள்ள பாரம்பரிய கலை கலாசார நிகழ்வுகள் மற்றும் நிகழ்ச்சி நிரல் உள்ளிட்ட விழா ஏற்பாடுகள் தொடர்பான பல்வேறு விடயங்கள் தொடர்பில் கலந்துரையாடப்பட்டன.
இக் கூட்டத்தில் மேலதிக அரசாங்க அதிபர் திரு க.சிவகரன் ,உதவிமாவட்ட செயலாளர் செல்வி.தர்சினி,உள்ளக மாவட்டச் செயலக பதவிநிலை உத்தியோகத்தர்கள், யாழ்ப்பாண பிரதேச செயலாளர் திருமதி உ. சிவகாமி, யாழ்ப்பாண தமிழ் சங்க பெருந்தலைவர் வாழ்நாட் பேராசிரியர் அருணாசலம் சண்முகதாஸ், ஆட்சிக்குழு உறுப்பினர் முனைவர் மனோன்மணி சண்முகதாஸ், யாழ்ப்பாண தமிழ்ச்சங்க உப செயலாளர் திரு.யோகேந்திரன் நிவேதன், யாழ் பல்கலைக்கழக தமிழ் துறை பேராசிரியர் கி.விசாகரூபன், வட மாகாண கல்வி அமைச்சின் சிரேஷ்ட உதவி செயலாளர் திரு. ஜி.பார்த்தீபன், போக்குவரத்து நெடுஞ்சாலைகள் மற்றும் நகர அபிவிருத்தி அமைச்சின் யாழ்ப்பாண மாவட்ட இணைப்பாளர் திரு.எஸ்.சிறிவாகீசன், மாகாண பண்பாட்டலுவல்கள் அலகின் சிரேஷ்ட கலாச்சார உத்தியோகத்தர் திரு. மா. அருள்ச்சந்திரன், தேசிய அரச கரும மொழிகள் திணைக்கள மாகாண பொறுப்பதிகாரி திரு. என்.உமானாத், வட மாகாண சிரேஷ்ட கலாசார உத்தியோகத்தர், மாவட்ட கலாச்சார பிரிவு உத்தியோகத்தர்கள் மற்றும் விடைய உத்தியோகத்தர்கள் உள்ளிட்ட பலரும் கலந்து கொண்டனர்.
மாலைதீவில் 18.06.2026 ஆம் திகதி தொடக்கம் 20.06.2026 ஆம் திகதி வரை நடைபெற்ற South Asia Speed Skating Championship (ஸ்கேற்றிங் விரைவோட்டம்) போட்டியில் Dreamer United Sports Academy சார்பில் யாழ்ப்பாண மாவட்டத்திலிருந்து ஒரே ஒரு மாணவியாக சாவகச்சேரி டிறிபேக் கல்லூரியில் ஆண்டு 09 இல் கல்வி கற்கும் மாணவி செல்வி ஷாருதி தர்மரூபன் அவர்கள் பங்குபற்றியிருந்தார். மாலைதீவில் நடைபெற்ற 2026 வேக ஸ்கேற்றிங் சாம்பியன்ஷிப் போட்டியில், Dreamers United Sports Academy சார்பில் பங்கேற்ற மாணவி செல்வி சாருதி இரண்டு வெள்ளிப் பதக்கங்களையும் ஒரு வெண்கலப் பதக்கத்தையும் வென்று பெருமை சேர்த்துள்ளார்.100 மீட்டர் சாலைப் போட்டி மற்றும் 500 மீட்டர் சாலைப் போட்டிகளில் இரண்டாம் இடத்தையும், 500 மீட்டர் தடகளப் போட்டியில் மூன்றாம் இடத்தையும் பெற்று தனது திறமையை வெளிப்படுத்தியுள்ளார்.
இதனையொட்டி இன்றைய தினம் (26.06.2026) அரசாங்க அதிபர் திரு. மருதலிங்கம் பிரதீபன் அவர்களை மாணவி சந்தித்து ஆசிபெற்றுக்கொண்டார் மேலும் அரசாங்க அதிபர் அவர்கள் யாழ்ப்பாண மாவட்டத்திற்கு பெருமையை தேடிதந்தமைக்காக தனது மகிழ்ச்சியினைத் தெரிவித்ததுடன், போட்டியில் இரண்டாம் மற்றும் மூன்றாம் இடத்தை பெற்றமைக்கு தமது வாழ்த்துக்களையும் மாணவிக்கு தெரிவித்துக்கொண்டதோடு பரிசிலும் வழங்கி கெளரவித்தார். இச் சந்திப்பில் தென்மராட்சி வலய கல்விப் பணிப்பாளர் திரு. கிரிஸ்தோபர் கமல்ராஜன், விளையாட்டு அபிவிருத்தி உத்தியோகத்தர் திரு. எல். அநுரகாந்தன், டிறிபேக் கல்லூரி ஆசிரியர்களான திரு. எஸ்.ஜெபநேசன், கு.ராஜதீபன்,மாணவியின் தாயார் திருமதி சிவசங்கரி தர்மரூபன் ஆகியோர் கலந்து கொண்டனர்.








