மாற்றுத்திறனாளிகளின் வாழ்வாதாரத்தை மேம்படுத்தி, அவர்களைப் பொருளாதார ரீதியாக வலுவூட்டும் நோக்கில் வேலைவாய்ப்புகளை ஏற்படுத்திக் கொடுத்த நிறுவனங்கள், தனிநபர்கள் மற்றும் அரச உத்தியோகத்தர்களையும், வேலைவாய்ப்புகளைப் பெற்றுக்கொண்ட மாற்றுத்திறனாளிகளையும் பாராட்டிக் கௌரவிக்கும் வடக்கு மாகாண மட்ட விருது வழங்கும் விழா, யாழ்ப்பாண மாவட்ட மேலதிக அரசாங்க அதிபர் திரு. கே. சிவகரன் தலைமையில் இன்று (12.11.2026) காலை 9.30 மணிக்கு யாழ்ப்பாணத்திலுள்ள தனியார் விடுதியில் நடைபெற்றது.
பிரதம விருந்தினர் :
இந்நிகழ்வில் சமூக சேவைகள் திணைக்களத்தின் பணிப்பாளர் திருமதி தர்ஷனி கருணாரத்ன பிரதம விருந்தினராகக் கலந்துகொண்டார்.
நிகழ்வின் நோக்கம் :
மாற்றுத்திறனாளிகளின் திறமைகளையும் ஆற்றல்களையும் அங்கீகரித்து, அவர்களுக்குச் சமமான வேலைவாய்ப்புகளை உருவாக்குவதுடன், பொருளாதார ரீதியாகச் சுயாதீனமாகச் செயற்படுவதற்கு ஊக்குவிப்பதும் இந்நிகழ்வின் பிரதான நோக்கமாக அமைந்தது.
வரவேற்புரை :
மாவட்டச் செயலக உதவி மாவட்டச் செயலாளர் செல்வி உ. தர்ஷினி வரவேற்புரையாற்றினார்.
தலைமையுரை :
மாற்றுத்திறனாளிகளும் பொருளாதாரத்தில் பங்களிப்பவர்களாகவும் தொழில் முயற்சியாளர்களாகவும் உருவாக வேண்டும் – மேலதிக அரசாங்க அதிபர் மாற்றுத்திறனாளிகளுக்கு உரிய தொழில் வாய்ப்புகளையும் ஊக்குவிப்பையும் ஏற்படுத்திக் கொடுத்து, அவர்களின் சொந்த உழைப்பின் மூலம் வருமானம் ஈட்டி, சுயமரியாதையுடனும் கௌரவத்துடனும் வாழ்வதற்கான சூழலை உருவாக்குவது சமூகத்தின் முக்கிய பொறுப்பாகும் என யாழ்ப்பாண மாவட்ட மேலதிக அரசாங்க அதிபர் கே. சிவகரன் தெரிவித்தார். இன்று நாம் ஒன்றுகூடியிருப்பது வெறுமனே விருதுகளையும் சான்றிதழ்களையும் வழங்குவதற்காக மட்டுமல்ல. மாற்றுத்திறனாளிகளின் மனிதநேயம், தன்னம்பிக்கை, விடாமுயற்சி மற்றும் அவர்களுக்கான சமூக அங்கீகாரம் ஆகியவற்றைக் கொண்டாடுவதற்காகவுமேயாகும். வடக்கு மாகாணத்தைச் சேர்ந்த 102 மாற்றுத்திறனாளிகள் தனியார் நிறுவனங்களில் தொழில் வாய்ப்புகளுடன் இணைக்கப்பட்டுள்ளனர். இவர்களில் 68 பேர் யாழ்ப்பாண மாவட்டத்தைச் சேர்ந்தவர்கள். கடந்த ஆண்டுகளுடன் ஒப்பிடுகையில் இவ்வெண்ணிக்கை அதிகரித்து வருவது சமூக சேவை உத்தியோகத்தர்களின் அர்ப்பணிப்பையும் முயற்சியையும் வெளிப்படுத்துகின்றது. கடந்த ஆண்டு யாழ்ப்பாண மாவட்டத்தில் 40 இற்கும் மேற்பட்ட மாற்றுத்திறனாளிகள் இத்திட்டத்தின் ஊடாகத் தொழில் வாய்ப்புகளைப் பெற்றிருந்தனர். அதற்கு முந்தைய காலப்பகுதியில் 30 இற்கும் மேற்பட்டோர் இவ்வாறு தொழில்களுடன் இணைக்கப்பட்டிருந்தனர். ஆண்டுதோறும் அதிகரித்து வரும் இவ்வெண்ணிக்கை வரவேற்கத்தக்க முன்னேற்றமாகும். மாற்றுத்திறனாளிகளுக்கு வேலைவாய்ப்பு வழங்குவது அவர்களுக்கு வருமானத்தை ஏற்படுத்திக் கொடுப்பதுடன் மட்டுப்படுத்தப்படுவதில்லை. அது அவர்களின் தன்னம்பிக்கை, சுயமரியாதை, சுயாதீனமான வாழ்க்கை மற்றும் சமூக அங்கீகாரம் ஆகியவற்றையும் உறுதிப்படுத்துகின்றது. பல்வேறு உட்கட்டமைப்பு மற்றும் நடைமுறைச் சவால்களுக்கு மத்தியிலும் மாற்றுத்திறனாளிகளுக்கு வேலைவாய்ப்புகளை வழங்க முன்வந்த தொழில் வழங்குநர்களின் மனிதநேயத்தையும் சமூகப் பொறுப்புணர்வையும் அவர் பாராட்டினார். அதேவேளை, பல்வேறு சவால்களைக் கடந்து உழைத்து முன்னேறுகின்ற மாற்றுத்திறனாளிகளின் முயற்சிகளும் பாராட்டுக்குரியவை எனக் குறிப்பிட்டார்.
உடல் ரீதியான குறைபாடு என்பது ஒருவருடைய வாழ்க்கையின் முற்றுப்புள்ளி அல்ல. உரிய வாய்ப்புகளும் ஊக்குவிப்பும் கிடைத்தால் மாற்றுத்திறனாளிகளாலும் பல்வேறு துறைகளில் சாதிக்க முடியும். அவர்கள் உதவி பெறுபவர்களாக மட்டும் இல்லாமல், தமது திறமைகளையும் ஆற்றல்களையும் பயன்படுத்திப் பொருளாதாரத்தில் பங்களிப்பவர்களாகவும் தொழில் முயற்சியாளர்களாகவும் உருவாக வேண்டும் என வலியுறுத்தினார். கடந்த காலங்களில் ஜப்பான் சர்வதேச ஒத்துழைப்பு முகவரகத்தின் (JICA) நிதி அனுசரணையுடன் முன்னெடுக்கப்பட்ட இத்திட்டம், இவ்வாண்டு சமூக சேவைகள் திணைக்களத்தின் நிதி ஒதுக்கீட்டின் மூலம் தொடர்ந்து முன்னெடுக்கப்படுவது பாராட்டத்தக்க விடயமாகும். இத்திட்டத்தை வெற்றிகரமாகச் செயற்படுத்தி வரும் சமூக சேவைகள் திணைக்களம், வேலைவாய்ப்பு ஆதரவு அலகு மற்றும் தொடர்புடைய உத்தியோகத்தர்களுக்கும் அவர் தனது பாராட்டுகளைத் தெரிவித்தார். மாற்றுத்திறனாளிகள் சமூகத்தில் சமமான வாய்ப்புகளைப் பெற்று, சுயமரியாதையுடனும் சுயாதீனமாகவும் வாழ்வதற்கான உள்ளடக்கிய சமூகச் சூழலை உருவாக்குவதற்கு அரச நிறுவனங்கள், தனியார் துறையினர் மற்றும் பொதுமக்கள் அனைவரும் ஒன்றிணைந்து செயற்பட வேண்டும் எனவும் மேலதிக அரசாங்க அதிபர் தெரிவித்தார்.
பிரதம விருந்தினர் உரை:
மாற்றுத்திறனாளிகளைத் தொழிற்படையில் இணைத்து, அவர்களின் திறன்களை மேம்படுத்தி, சுயமாக வருமானம் ஈட்டக்கூடியவர்களாகவும் நாட்டின் பொருளாதார வளர்ச்சிக்குப் பங்களிப்புச் செய்பவர்களாகவும் உருவாக்கும் நோக்கில் முன்னெடுக்கப்படும் செயற்திட்டத்தின் கீழ், தேசிய ரீதியாக இதுவரை சுமார் 1,260 மாற்றுத்திறனாளிகள் தொழில் வாய்ப்புகளுடன் இணைக்கப்பட்டுள்ளனர் என சமூக சேவைகள் திணைக்களத்தின் பணிப்பாளர் திருமதி தர்ஷனி கருணாரத்ன தெரிவித்தார். மேலும், 2022ஆம் ஆண்டு 18 வெற்றிகரமான தொழில் இணைப்புகளுடன் காணப்பட்ட இச்செயற்பாடு, 2023ஆம் ஆண்டு 123 ஆகவும், 2024ஆம் ஆண்டு 257 ஆகவும், 2025ஆம் ஆண்டு 337 ஆகவும் வளர்ச்சியடைந்து, 2026ஆம் ஆண்டில் 525 என்ற இலக்கை எட்டியுள்ளதாகக் குறிப்பிட்டார். தொழிற்பயிற்சி நிறுவனங்கள் மற்றும் தொடர்புடைய 10 திணைக்களங்களின் பங்களிப்புடன் மாற்றுத்திறனாளிகளுக்குத் தொழில்சார் பயிற்சிகள் வழங்கப்பட்டு, அவர்களின் ஆற்றலுக்கும் திறமைக்கும் பொருத்தமான தொழில்களில் ஈடுபடுவதற்கான வாய்ப்புகள் ஏற்படுத்தப்பட்டுள்ளன. இத்திட்டத்தின் வெற்றியை உறுதிப்படுத்துவதற்காக மாவட்ட மற்றும் பிரதேச செயலகங்கள், பிரதேச செயலாளர்கள், மனிதவள அபிவிருத்தி உத்தியோகத்தர்கள் மற்றும் சமூக சேவை உத்தியோகத்தர்கள் ஆகியோர் அர்ப்பணிப்புடன் செயற்பட்டுள்ளனர். அவர்களின் ஒருங்கிணைந்த பங்களிப்பே இவ்வளர்ச்சிக்கான அடிப்படையாக அமைந்துள்ளதாகப் பணிப்பாளர் சுட்டிக்காட்டினார். மேலும், யாழ்ப்பாண மாவட்டம் இத்திட்டத்தின் கீழ் தேசிய மட்டத்தில் இரண்டாம் இடத்தைப் பெற்றுள்ளதுடன், வடக்கு மாகாணத்தில் முதலிடத்தைப் பெற்றுத் திகழ்கின்றது. அதேவேளை, வடக்கு மாகாணத்தின் ஏனைய மாவட்டங்களான கிளிநொச்சி, முல்லைத்தீவு, மன்னார் மற்றும் வவுனியா ஆகிய மாவட்டங்களின் பங்களிப்புகளும் பாராட்டப்பட்டன. தேசிய ரீதியாக சண்டிலிப்பாய் பிரதேச செயலாளர் பிரிவு கடந்த வருடம் அதிகளவிலான தொழில் வாய்ப்புகளை ஏற்படுத்திய பிரிவாக அடையாளம் காணப்பட்டுள்ளது. அதன் செயற்பாடுகள் ஏனைய பிரதேச செயலகப் பிரிவுகளுக்கும் முன்மாதிரியாக அமைய வேண்டும் எனவும் வலியுறுத்தப்பட்டது.
இத் திட்டத்தின் ஊடாகத் தொழிலில் ஈடுபடும் ஒவ்வொருவரும் மாதாந்தம் சராசரியாக 26,000 ரூபாய் வருமானம் ஈட்டுவதாகக் கணக்கிடப்பட்டுள்ளதுடன், இதன் மூலம் ஆண்டுக்கு சுமார் 263 மில்லியன் ரூபாய் பொருளாதாரப் பங்களிப்பு நாட்டுக்குக் கிடைப்பதாக மதிப்பிடப்பட்டுள்ளது. பொருளாதாரப் பயனைத் தாண்டி, மாற்றுத்திறனாளிகளின் சுயமரியாதை, தன்னம்பிக்கை மற்றும் சமூக அந்தஸ்தை மேம்படுத்துவதிலும் இத்திட்டம் முக்கியத்துவம் பெறுகின்றது. எதிர்காலத்தில் தொழிற்பயிற்சி வாய்ப்புகளை விரிவுபடுத்துதல், புதிய தொழில் வழங்குநர்களை இணைத்தல், இதுவரை இத்திட்டத்தில் உள்வாங்கப்படாத மாற்றுத்திறனாளிகளை அடையாளம் கண்டு பயிற்சியளித்தல் மற்றும் அவர்களுக்கான தொழில் வாய்ப்புகளை அதிகரித்தல் போன்ற நடவடிக்கைகள் முன்னெடுக்கப்படவுள்ளன. மாற்றுத்திறனாளிகள் சமூகத்தின் சுமையல்லர், நாட்டின் பொருளாதாரத்திற்கும் சமூக வளர்ச்சிக்கும் பங்களிப்புச் செய்யக்கூடிய ஆற்றல்மிக்க பிரஜைகள் என்பதை நடைமுறையில் உறுதிப்படுத்துவதே இச்செயற்திட்டத்தின் பிரதான நோக்கமாகும் எனப் பணிப்பாளர் மேலும் தெரிவித்தார்.
கௌரவிப்பு :
இந்நிகழ்வில் தொழில் வாய்ப்புகளைப் பெற்றுக்கொண்ட மாற்றுத்திறனாளிகள், அவர்களுக்கு வேலைவாய்ப்புகளை வழங்கிய நிறுவனங்கள் மற்றும் வேலைவாய்ப்புகளைப் பெற்றுக்கொடுப்பதற்கான ஒருங்கிணைப்புப் பணிகளில் ஈடுபட்ட அரச உத்தியோகத்தர்கள் என மூன்று தரப்பினரும் சான்றிதழ்கள் வழங்கிப் பாராட்டிக் கௌரவிக்கப்பட்டனர். அந்தவகையில், தொழில் வாய்ப்புகளைப் பெற்றுக்கொண்ட 102 மாற்றுத்திறனாளிகள் கௌரவிக்கப்பட்டனர். இவர்களில் யாழ்ப்பாண மாவட்டத்தைச் சேர்ந்த 68 பேரும், கிளிநொச்சி மாவட்டத்தைச் சேர்ந்த 10 பேரும், முல்லைத்தீவு மாவட்டத்தைச் சேர்ந்த 4 பேரும், மன்னார் மாவட்டத்தைச் சேர்ந்த 12 பேரும், வவுனியா மாவட்டத்தைச் சேர்ந்த 8 பேரும் அடங்குகின்றனர். அத்துடன், மாற்றுத்திறனாளிகளுக்கு வேலைவாய்ப்புகளை வழங்கிய 75 நிறுவனங்களும் கௌரவிக்கப்பட்டன.
மாற்றுத்திறனாளி ஊழியருக்கு ஒரு இலட்சம் ரூபாய் ஊக்குவிப்பு வழங்கிய நிறுவன உரிமையாளர் :
இந்நிகழ்வில், வவுனியாவைச் சேர்ந்த ஜீவன் வெளிநாட்டு வேலைவாய்ப்பு முகவர் நிலையத்தின் உரிமையாளர் திரு. செபஸ்டியாம்பிள்ளை ஜீவகுமார், தனது நிறுவனத்தில் கணக்காளராகப் பணியாற்றும் மாற்றுத்திறனாளி ஊழியர் ஒருவருக்கு ஒரு இலட்சம் ரூபாய் பெறுமதியான காசோலையை வழங்கி ஊக்குவித்தார். மாற்றுத்திறனாளிகளின் திறமைகளையும் உழைப்பையும் மதித்து, அவர்களின் தொழில் முன்னேற்றத்துக்கு ஆதரவளிக்கும் இச்செயல் நிகழ்வில் பாராட்டப்பட்டது.
வேலைவாய்ப்பு வழங்குநரின் சார்பில் கருத்துரை :
யாழ்ப்பாண மாவட்டச் செயலகத்தில் ஆரோக்கிய உணவகம் நடாத்தி வரும் அல்லை விவசாயி திரு. மகேசன் கிரிசன், மாற்றுத்திறனாளி ஒருவருக்கு வேலைவாய்ப்பை வழங்கி, அவருக்குச் சிறந்த ஊதியத்தையும் வழங்கி வருகின்றார். தனது அனுபவப் பகிர்வின்போது, மாற்றுத்திறனாளிகளும் ஏனையவர்களைப் போன்று திறமையுடனும் அர்ப்பணிப்புடனும் பணியாற்றக்கூடியவர்கள் என்பதைச் சுட்டிக்காட்டிய அவர், மேலும், மாற்றுத்திறனாளிகளுக்கு வேலைவாய்ப்புகளை வழங்குவதற்கு தான் முன்வந்துள்ளதாகவும் தெரிவித்தார். இத்தகைய சமூக அக்கறையுடன் மாற்றுத்திறனாளிகளுக்குத் தொழில்வாய்ப்புகளை வழங்கி, அவர்களின் பொருளாதாரத் தன்னிறைவுக்கு வழிவகுக்கும் நிறுவனங்கள், தொழில் முயற்சியாளர்கள் மற்றும் தனிநபர்கள் ஏனையோருக்கும் முன்னுதாரணமாகத் திகழ்கின்றனர்.
நன்றியுரை :
யாழ்ப்பாண மாவட்டச் செயலகத்தின் சமூக சேவைகள் அபிவிருத்தி உத்தியோகத்தர் திரு. தி. உமாசங்கர் நன்றியுரையாற்றினார்.
பங்குபற்றியவர்கள் :
இந்நிகழ்வில் சமூக சேவைகள் திணைக்களத்தின் வேலைவாய்ப்பு ஆதரவுப் பிரிவின் அதிகாரிகள், வடக்கு மாகாணத்தைச் சேர்ந்த பிரதேச செயலாளர்கள், உதவிப் பிரதேச செயலாளர்கள், சமூக சேவை உத்தியோகத்தர்கள், மனிதவள அபிவிருத்தி உத்தியோகத்தர்கள், தொழில்வாய்ப்புகளை வழங்கிய நிறுவனங்கள் உள்ளிட்ட பலர் கலந்துகொண்டனர்.
 
1 2 3 4 6 7 8 10 14 17 18 20
தேசிய சிறுவர் பாதுகாப்பு அதிகார சபையின் ஏற்பாட்டில், சிறுவர்களுக்கு எதிராக இடம்பெறும் இணையவழிக் குற்றங்களைத் தடுப்பது தொடர்பான பயிற்றுவிப்பாளர்களைப் பயிற்றுவிக்கும் செயலமர்வு (TOT), மாவட்ட மேலதிக அரசாங்க அதிபர் க. சிவகரன் அவர்களின் தலைமையில் இன்று(11.11.2026) யாழ்ப்பாண மாவட்டச் செயலக செயலமர்வு மண்டபத்தில் நடைபெற்றது.
தலைமையுரை :
சிறுவர் பாதுகாப்புடன் தொடர்புடைய கடமைகளை முன்னெடுத்து வரும் உத்தியோகத்தர்களுக்கு சைபர் குற்றங்கள் மற்றும் இணையவழி அச்சுறுத்தல்களிலிருந்து சிறுவர்களைப் பாதுகாப்பது தொடர்பான தெளிவான அறிவையும் விழிப்புணர்வையும் கொண்டிருப்பது இன்றைய காலகட்டத்தில் மிகவும் அவசியமானதாகும் என மேலதிக அரசாங்க அதிபர் தெரிவித்தார். தொழில்நுட்ப வளர்ச்சியின் காரணமாக ஸ்மார்ட்போன்களும் இணைய வசதிகளும் சிறுவர்களின் அன்றாட வாழ்க்கையின் ஓர் அங்கமாகிவிட்டன. இதன் மூலம் பல பயனுள்ள தகவல்களைப் பெற்றுக்கொள்ள முடிகின்ற அதேவேளை, பொருத்தமற்ற உள்ளடக்கங்கள், இணையவழித் துன்புறுத்தல்கள், மோசடிகள் மற்றும் பல்வேறு சைபர் குற்றங்களுக்கு அவர்கள் ஆளாகும் அபாயமும் அதிகரித்துள்ளது எனத் தெரிவித்தார். குறிப்பாக, செயற்கை நுண்ணறிவு(AI) மற்றும் சமூக ஊடகங்களின் வளர்ச்சியால் சிறுவர்கள் எதிர்கொள்ளும் இணையவழி ஆபத்துக்களும் புதிய வடிவங்களைப் பெற்றுள்ளன. எனவே, இத்தகைய ஆபத்துகளை அடையாளம் காண்பது, இணையத்தைப் பொறுப்புடன் பயன்படுத்துவது மற்றும் சிறுவர்களுக்குப் பாதுகாப்பான இணையச் சூழலை உருவாக்குவது தொடர்பில் நாம் தெளிவான அறிவைப் பெற்றிருக்க வேண்டும். இந்தப் பொறுப்பை உத்தியோகத்தர்கள் மாத்திரம் தனித்து முன்னெடுக்க முடியாது. பெற்றோர்கள், ஆசிரியர்கள், சமூகத் தலைவர்கள் உள்ளிட்ட அனைத்துத் தரப்பினருக்கும் உரிய விழிப்புணர்வை ஏற்படுத்தி, ஒருங்கிணைந்து செயற்படுவது அவசியமாகும். அதேவேளை, சைபர் குற்றங்கள் தொடர்பாக முறைப்பாடுகள் செய்யப்பட்ட பின்னர் அவற்றைக் கையாளும் நடைமுறைகள், சட்ட நடவடிக்கைகள் மற்றும் பாதிக்கப்பட்டவர்களுக்கு உரிய தீர்வுகளைப் பெற்றுக்கொடுப்பதற்கான வழிமுறைகள் குறித்தும் நாம் அறிந்திருக்க வேண்டும். குறிப்பாக, முறைப்பாடுகளுக்குப் பின்னரும் எதிர்பார்த்த தீர்வுகள் கிடைக்காத சந்தர்ப்பங்களில் அடுத்தகட்டமாக எவ்வாறு செயற்படுவது என்பதிலும் தெளிவு அவசியமாகும்.
சிறுவர்களின் உரிமைகளையும் பாதுகாப்பையும் உறுதிப்படுத்துவதில் உத்தியோகத்தர்களின் பங்களிப்பு மிகவும் முக்கியமானது. பாதிப்புகள் ஏற்பட்ட பின்னர் நடவடிக்கை எடுப்பதைவிட, அவை ஏற்படுவதற்கு முன்னரே ஆபத்துகளை அடையாளம் கண்டு தடுப்பதே எமது முதன்மையான பொறுப்பாகும் எனத் தெரிவித்தார். அந்த வகையில், இன்றைய பயிற்சியை வழங்குவதற்காக வருகை தந்துள்ள சைபர் அனலிஸ்ட் திரு. ஏ. எம். மிவ்ராஜ் அவர்கள் தனது அனுபவங்களையும் நிபுணத்துவ அறிவையும் உங்களுடன் பகிர்ந்துகொள்ளவுள்ளார். இந்தப் பயிற்சியை ஒரு சாதாரண நிகழ்வாகக் கருதாமல், சிறுவர் பாதுகாப்புப் பணிகளை மேலும் வினைத்திறனுடன் முன்னெடுப்பதற்கான முக்கியமான கற்றல் வாய்ப்பாகப் பயன்படுத்திக்கொள்ளுமாறு கேட்டுக்கொள்கின்றேன். உங்களின் சந்தேகங்களைத் தெளிவுபடுத்தி, நடைமுறை அனுபவங்களையும் பகிர்ந்து, பயிற்சியின் முழுமையான பயனைப் பெற்றுக்கொள்ளுமாறு கேட்டுக்கொண்டார்.
நோக்கம் :
இச்செயலமர்வில் தேசிய சிறுவர் பாதுகாப்பு அதிகார சபையின் தலைமை அலுவலுத்தின் இணையப் பாதுகாப்புப் பகுப்பாய்வாளர் திரு. ஏ. எம். மிவ்ராஜ் அவர்கள் வளவாளராகக் கலந்துகொண்டு, சிறுவர்களுக்கு எதிராக இடம்பெறும் இணையவழிக் குற்றங்கள் தொடர்பில் விரிவான விளக்கங்களை வழங்கினார். குறிப்பாக, கணினி, இணையம் மற்றும் தனிப்பட்ட தரவுகளை ஊடுருவல்காரர்களிடமிருந்து(Hackers) பாதுகாக்கும் வழிமுறைகள், அதற்குப் பயன்படுத்தப்படும் மென்பொருள்கள், சமூக ஊடகங்கள் ஊடாக இடம்பெறும் குற்றச்சம்பவங்களை இணையவழியில் முறைப்பாடு செய்வதற்கான நடைமுறைகள், முறைப்பாட்டின் பின்னரான நடவடிக்கைகள் மற்றும் சிறுவர்கள் இணையத்தைப் பயன்படுத்துவதற்கான நேர வரையறைகளை நிர்ணயிப்பதன் அவசியம் உள்ளிட்ட பல்வேறு விடயங்கள் தொடர்பில் தெளிவுபடுத்தினார். மேலும், மாவட்ட மற்றும் பிரதேச செயலக மட்டங்களில் தொழில்நுட்ப அறிவுசார் சிறுவர் பாதுகாப்புக் கட்டமைப்புகளை நிறுவனமயப்படுத்துதல், இணையவழி அச்சுறுத்தல்களை ஆரம்பத்திலேயே அடையாளம் காணுதல், டிஜிட்டல் ஆதாரங்களைச் சேகரித்தல் மற்றும் பரிந்துரை நடைமுறைகளைத் தரப்படுத்துதல் போன்ற விடயங்களும் இச் செயலமர்வில் முக்கியத்துவம் பெற்றன. இவ்வாறான நடைமுறைகளைப் பின்பற்றுவதன் ஊடாகச் சிறுவர்களுக்கு எதிரான இணையவழிச் சுரண்டல்கள் மற்றும் துஷ்பிரயோகங்களைத் தடுத்து, அவர்களுக்குப் பாதுகாப்பான டிஜிட்டல் சூழலை உருவாக்குவதற்குத் தொடர்புடைய உத்தியோகத்தர்களின் திறன்களையும் அறிவையும் மேம்படுத்துவதே இப்பயிற்சிச் செயலமர்வின் பிரதான நோக்கமாக அமைந்தது. இச் செயலமர்வின் ஆரம்ப நிகழ்வில் உதவி மாவட்டச் செயலாளர் உ. தர்ஷினி, சிறுவர் பாதுகாப்பு அபிவிருத்தி உத்தியோகத்தர் திரு. இ. செந்தூரன் மற்றும் மாவட்ட, பிரதேச செயலகங்களில் கடமையாற்றும் சிறுவர் பாதுகாப்பு உத்தியோகத்தர்கள், சிறுவர் உரிமைகள் மேம்பாட்டு உத்தியோகத்தர்கள், சிறுவர் நன்னடத்தை உத்தியோகத்தர்கள் உள்ளிட்டோர் கலந்துகொண்டனர்.
 
1 2 3 4 5 7 8 9 10
பெண்களின் தொழில்முயற்சிகளையும் பொருளாதார வலுவையும் ஊக்குவிக்கும் நோக்கில், FAIRMED Foundation நிறுவனம் யாழ்ப்பாணப் பெண்கள் சங்கங்களுடன் இணைந்து ஏற்பாடு செய்த மகளிர் சந்தை இன்று (10.11.2026) செவ்வாய்க்கிழமை காலை 10.00 மணிக்கு யாழ்ப்பாண மாவட்டச் செயலகத்திற்கு முன்பாக, பழைய பூங்கா வளாகத்தில் ஆரம்பமாகியது. பெண்கள் குழுக்களால் தயாரிக்கப்பட்ட உள்ளூர் உற்பத்திப் பொருட்களைக் காட்சிப்படுத்தி விற்பனை செய்வதற்கான வாய்ப்பை ஏற்படுத்தும் நோக்கில் இச்சந்தை ஏற்பாடு செய்யப்பட்டுள்ளது. இந் நிகழ்வின் பிரதம விருந்தினராகக் கலந்து கொண்ட யாழ்ப்பாண மாவட்ட மேலதிக அரசாங்க அதிபர் திரு. க. சிவகரன் அவர்கள் கண்காட்சியையும் விற்பனையையும் உத்தியோகபூர்வமாக ஆரம்பித்து வைத்தார். மேலும், இந் நிகழ்வில் FAIRMED நிறுவனத்தின் இலங்கைக்கான இணைப்பாளர் வைத்திய கலாநிதி நயனி சூரியாராச்சி, வடமாகாண கிராம அபிவிருத்தித் திணைக்களப் பணிப்பாளர் திருமதி கஜானி பார்த்தீபன், யாழ்ப்பாணப் பிரதேச செயலாளர் திருமதி சிவகாமி உமாகாந்தன், மாவட்டச் செயலக உதவி மாவட்டச் செயலாளர் செல்வி உ. தர்ஷினி உள்ளிட்ட பலரும் கலந்து கொண்டனர். இதில் உள்ளூர் இனிப்பு வகைகள், தேங்காய் எண்ணெய், தோல் பைகள், பனைசார் உற்பத்திப் பொருட்கள், ஆடைகள், சலவைத் திரவம், மெழுகுவர்த்திகள், மரவள்ளிக்கிழங்கு சிப்ஸ், மிளகாய்த்தூள், நொறுக்குத் தீனிகள் உள்ளிட்ட பல்வேறு உள்ளூர் உற்பத்திப் பொருட்கள் காட்சிப்படுத்தப்பட்டு விற்பனைக்கு வைக்கப்பட்டுள்ளன. பெண்களின் உற்பத்தித் திறனைச் சந்தை வாய்ப்புகளுடன் இணைத்து, சுயதொழில் முயற்சிகளை விரிவுபடுத்துவதற்கும், பெண்களின் பொருளாதார சுதந்திரத்தை வலுப்படுத்துவதற்கும் இத்தகைய சந்தைகள் முக்கிய பங்களிப்பை வழங்குகின்றன.
 
1 2 3 4 6 7 8 11 12 16 13 18 20
இளைஞர் விவகார மற்றும் விளையாட்டு அமைச்சினால் ஐக்கிய நாடுகள் சனத்தொகை நிதியத்தின் (UNFPA) தொழில்நுட்ப அனுசரணையுடன் தயாரிக்கப்பட்டுள்ள தேசிய இளைஞர் கொள்கையின் வரைவு தொடர்பான வடமாகாண மட்ட விழிப்புணர்வு மற்றும் கருத்துப் பரிமாற்றக் கலந்துரையாடல் மேலதிக அரசாங்க அதிபர் திரு. கே. சிவகரன் தலைமையில், பாராளுமன்ற உறுப்பினர் கௌரவ ஜெயசந்திரமூர்த்தி றஜீவன் அவர்களின் பங்கேற்புடன் இன்றைய தினம் (10.11.2026) காலை 9.00 மணிக்கு யாழ்ப்பாண மாவட்டச் செயலக கேட்போர் கூடத்தில் நடைபெற்றது. மேலும், இக் கலந்துரையாடலில் சர்வமதத் தலைவர்களும் பங்குபற்றினார்கள்.
நோக்கம்:
தேசிய இளைஞர் கொள்கையின் இறுதி வடிவத்தைத் தயாரிப்பதற்குத் தேவையான கருத்துக்கள், ஆலோசனைகள் மற்றும் முன்மொழிவுகளைப் பல்வேறு தரப்பினரிடமிருந்து பெற்றுக்கொள்வதுடன், இக்கொள்கை தொடர்பில் அரசியல் பிரதிநிதிகள், இளைஞர் அமைப்புகள், அரசாங்க அதிகாரிகள் மற்றும் ஏனைய பங்காளிகள் மத்தியில் விழிப்புணர்வை ஏற்படுத்தும் நோக்கில் இக்கலந்துரையாடல் ஏற்பாடு செய்யப்பட்டிருந்தது. மேலும், தேசிய இளைஞர் கொள்கையை நடைமுறைப்படுத்துவதற்கு முன்னர் அனைத்துத் தரப்பினரதும் கருத்துக்களையும் உள்வாங்கி, இளைஞர்களின் தேவைகள், எதிர்பார்ப்புகள், சவால்கள் மற்றும் எதிர்கால அபிலாஷைகளைப் பிரதிபலிக்கும் வகையில் கொள்கையைச் செம்மைப்படுத்தி, நடைமுறைச் சாத்தியமுள்ளதாக்குவதே இத்தகைய மாகாண மட்டக் கலந்துரையாடல்களின் பிரதான நோக்கமாகும்.
வரவேற்புரை :
இக் கலந்துரையாடலில் வரவேற்புரையை இளைஞர் விவகாரப் பணிப்பாளர் திரு. எரங்க தயரத்ன வழங்கினார்.
தலைமையுரை :
மேலதிக அரசாங்க அதிபர் கே. சிவகரன் அவர்களின் தொடக்கவுரையில், இன்றைய கலந்துரையாடலில் கலந்துகொண்டுள்ள கௌரவ பாராளுமன்ற உறுப்பினர் உள்ளிட்டவர்களை வரவேற்றதுடன், இக் கலந்துரையாடலின் முக்கிய நோக்கம், தேசிய இளைஞர் கொள்கை தொடர்பான விழிப்புணர்வை ஏற்படுத்துவதுடன், இளைஞர்களின் தேவைகள், எதிர்பார்ப்புகள், சவால்கள் மற்றும் கருத்துக்களை உள்வாங்கி, அவர்களின் பங்களிப்புடன் ஒரு வலுவான தேசிய இளைஞர் கொள்கையை உருவாக்குவதாகும். இலங்கையின் சனத்தொகையில் சுமார் 21.9 வீதமானோர் இளைஞர்களாக உள்ளனர். நாட்டின் பொருளாதார, சமூக மற்றும் கலாசார அபிவிருத்தியில் இவர்களின் பங்களிப்பு மிகவும் முக்கியமானதாகும். இளைஞர்களின் ஆற்றல், திறமை, புத்தாக்கச் சிந்தனை மற்றும் தலைமைத்துவப் பண்புகளைச் சரியான முறையில் வழிநடத்துவதன் மூலம் நாட்டின் எதிர்காலத்தை வலுப்படுத்த முடியும் எனத் தெரிவித்தார். குறிப்பாக, கிராமப்புற இளைஞர்கள், இளைஞர் யுவதிகள், தொழில்வாய்ப்பற்ற இளைஞர்கள் மற்றும் பல்வேறு சவால்களை எதிர்கொள்ளும் இளைய தலைமுறையினரின் தேவைகளும் இக்கொள்கையில் உரிய முறையில் கவனத்தில் கொள்ளப்பட வேண்டும். தற்போதைய தொழில்நுட்ப வளர்ச்சி, குறிப்பாக செயற்கை நுண்ணறிவின் விரைவான முன்னேற்றம், இளைஞர்களுக்குப் புதிய வாய்ப்புகளையும் சவால்களையும் உருவாக்கியுள்ளது. எனவே, மாறிவரும் உலகிற்கு ஏற்றவாறு இளைஞர்களின் திறன்களை மேம்படுத்துவதற்கான திட்டங்களும் கொள்கைகளும் அவசியமாகின்றன. அரசாங்கத்தினால் மாத்திரம் இளைஞர்களுக்கான கொள்கைகளைத் தீர்மானிக்காமல், இளைஞர்களின் நேரடிப் பங்கேற்பு, அனுபவங்கள் மற்றும் ஆலோசனைகளின் அடிப்படையில் அவை உருவாக்கப்பட வேண்டும். அந்த வகையில், இன்றைய கலந்துரையாடலில் முன்வைக்கப்படும் ஆக்கபூர்வமான கருத்துக்கள் தேசிய இளைஞர் கொள்கையை மேலும் வலுப்படுத்தும் என நம்புகின்றேன் எனத் தெரிவித்தார். எனவே, இங்கு கலந்துகொண்டுள்ள அனைவரும் தங்களது அனுபவங்களையும் பயனுள்ள ஆலோசனைகளையும் திறந்த மனதுடன் முன்வைத்து, இளைஞர்களின் எதிர்கால வளர்ச்சிக்கான சிறந்த கொள்கை உருவாக்கத்தில் பங்களிக்குமாறு கேட்டுக்கொண்டார்.
விளக்கவுரை, கருத்துரை மற்றும் திறந்த கலந்துரையாடல் :
தேசிய இளைஞர் கொள்கை தொடர்பான முதலாவது விளக்கவுரையை இளைஞர் விவகாரப் பணிப்பாளர் திரு. எரங்க தயரத்ன அவர்களும், இரண்டாவது விளக்கவுரையை உதவிப் பணிப்பாளர் திரு. நிமேஷா திவங்கரவும் நிகழ்த்தினர். தொடர்ந்து, ஐக்கிய நாடுகள் சனத்தொகை நிதியத்தின் (UNFPA) ஆய்வு மற்றும் கொள்கை அலுவலர் திரு. ஃபஹீம் அஸ்லாம் கருத்துரை வழங்கினார். மேலும், யாழ்ப்பாண மாவட்ட நாடாளுமன்ற உறுப்பினர் ஜெயசந்திரமூர்த்தி றஜீவன் அவர்கள் உரை நிகழ்த்தினார். இதனைத் தொடர்ந்து இடம்பெற்ற திறந்த கலந்துரையாடலில் பங்கேற்றவர்கள் தேசிய இளைஞர் கொள்கையின் வரைவு தொடர்பான தமது கருத்துக்கள், ஆலோசனைகள் மற்றும் முன்மொழிவுகளை முன்வைத்தனர். இளைஞர்களின் தற்போதைய தேவைகள், எதிர்கொள்ளும் சவால்கள், அவர்களுக்கான வாய்ப்புகள் மற்றும் எதிர்கால அபிவிருத்தி தொடர்பான பல்வேறு விடயங்களும் ஆராயப்பட்டன.
நன்றியுரை :
இந்நிகழ்வின் இறுதியில் தேசிய இளைஞர் சேவைகள் மன்றத்தின் (NYSC) மாகாணப் பணிப்பாளர் திரு. கே.டி.சி. காமினி நன்றியுரை வழங்கினார். இக் கலந்துரையாடலில் வடமாகாண கல்வி அமைச்சின் விளையாட்டு துறையின் பிரதிப் பணிப்பாளர், உதவி மாவட்டச் செயலாளர், உதவிப் பிரதேச செயலாளர்கள், இளைஞர் சேவைகள் மன்றத்தின் வட மாகாண மாவட்ட உதவிப் பணிப்பாளர்கள், வட மாகாண மாவட்டங்களின் விளையாட்டு துறை உத்தியோகத்தர்கள், கலாசார உத்தியோகத்தர்கள், இளைஞர் சேவைகள் மன்றத்தின் உறுப்பினர்கள் எனப் பலரும் கலந்துகொண்டனர்.
 
1 2 3 4 5 6 7 10 11 17 19 21
 
தேசிய உற்பத்தித்திறன் விருதுகள் 2025/2026 (National Productivity Awards) போட்டியில் பொதுத்துறைப் பிரிவில் யாழ்ப்பாண மாவட்டச் செயலகம் முதலாம் இடத்தைப் பெற்று தேசிய ரீதியில் சாதனை படைத்துள்ளது. இதற்கான விருது வழங்கும் நிகழ்வு இன்று (08.11.2026) பிற்பகல் கொழும்பு பண்டாரநாயக்க சர்வதேச மாநாட்டு மண்டபத்தில் (BMICH) நடைபெற்றது. இதன்போது, யாழ்ப்பாண மாவட்டச் செயலகத்திற்கான முதலாம் இடத்திற்குரிய விருதினை அதிமேதகு ஜனாதிபதி அநுரகுமார திசாநாயக்க அவர்கள், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களிடம் வழங்கி வைத்தார். இதன்போது கைத்தொழில் மற்றும் தொழில்முயற்சி அபிவிருத்தி அமைச்சர் கௌரவ சுனில் ஹந்துன்நெத்தி அவர்களும் உடனிருந்தார். மேலும், இந் நிகழ்வில் மேலதிக அரசாங்க அதிபர், பிரதம கணக்காளர், திட்டமிடல் பணிப்பாளர், உதவி மாவட்டச் செயலாளர் மற்றும் மாவட்டச் செயலக உத்தியோகத்தர்கள் ஆகியோரும் அரசாங்க அதிபருடன் இணைந்து விருதினைப் பெற்றுக்கொண்டனர். இந்தச் சாதனையானது யாழ்ப்பாண மாவட்டச் செயலகத்தின் சிறந்த தலைமைத்துவம், ஒருங்கிணைந்த முயற்சி, அர்ப்பணிப்பான உழைப்பு மற்றும் மக்களுக்கான சிறந்த சேவை வழங்கலுக்குக் கிடைத்துள்ள தேசிய அங்கீகாரமாகும்.
 
1 2 3 4 5 6 7 8 9