யாழ்ப்பாண மாவட்டச் செயலகத்தின் ஏற்பாட்டில் சர்வதேச முதியோர், மாற்றுத்திறனாளிகள் மற்றும் உளநல தின நிகழ்வு, யாழ்ப்பாண மாவட்ட மேலதிக அரசாங்க அதிபர் கை.சிவகரன் தலைமையில் இன்றைய தினம்(29.10.2026) காலை 9.00 மணிக்கு யாழ்ப்பாண மாவட்டச் செயலகக் கேட்போர் கூடத்தில் நடைபெற்றது.
முதன்மை விருந்தினர்கள் :
இந்நிகழ்வில், யாழ்ப்பாணம் போதனா வைத்தியசாலையின் உளவியல் மருத்துவ நிபுணர் சி.சிவதாஸ், யாழ்ப்பாண மாவட்டச் செயலகத்தின் ஓய்வுநிலை பிரதம கணக்காளர் கில்பேட் குணம் மற்றும் கோப்பாய் Crafttary நிறுவனத்தின் இயக்குநர் த. சுரேஸ்குமார் ஆகியோர் முதன்மை விருந்தினர்களாகக் கலந்து கொண்டனர்.
வரவேற்பும் தலைமையுரையும் :
நிகழ்வில் முதன்மை விருந்தினர்களுக்கு மாலை அணிவித்து வரவேற்பளிக்கப்பட்டதைத் தொடர்ந்து, யாழ்ப்பாண மாவட்டச் செயலக உதவி மாவட்டச் செயலாளர் உ. தர்ஷினி வரவேற்புரையாற்றினார். வரவேற்பு நடனத்தைத் தொடர்ந்து, நிகழ்வின் தலைமையுரையை மேலதிக அரசாங்க அதிபர் கை.சிவகரன் நிகழ்த்தினார். இதனைத் தொடர்ந்து, கலைநிகழ்வுகளுக்கு இடையிடையே முதன்மை விருந்தினர்களின் உரைகளும் இடம்பெற்றன.
அரசாங்க அதிபர் உரை :
யாழ்ப்பாண மாவட்டத்தில் மாற்றுத்திறனாளிகள் மிகச்சிறந்த திறன்களைக் கொண்ட கலைஞர்களாகத் திகழ்வதைக் கண்டு உண்மையிலேயே மகிழ்ச்சியடைவதுடன், பெருமிதமும் அடைவதாக அரசாங்க அதிபர் திரு மருதலிங்கம் பிரதீபன் அவர்கள் தெரிவித்தார்.குறிப்பாக, பார்வையற்றவர்களுக்கான தேசிய மட்டப் போட்டியில் இரண்டாம் இடத்தைப் பெற்ற செல்வி ரெ. கீர்த்தனா அவர்கள் பாடிய பாடல் சிறந்த சங்கீத ஞானத்தையும் திறமையையும் வெளிப்படுத்தியதாகக் குறிப்பிட்டார். அதேபோன்று, தேசிய மட்டப் போட்டியில் ஐந்தாம் இடத்தைப் பெற்ற திரு. கு. ஜெகதீசன் அவர்கள் பாடிய திரைப்படப் பாடல், அந்தத் திரைப்படத்தின் காட்சிகளை மனக்கண் முன் கொண்டுவரும் வகையில் அமைந்திருந்ததாகவும் பாராட்டினார். மேலும், யாழ்ப்பாண மாவட்டத்தில் மாவட்டப் பண்பாட்டுப் பெருவிழாக்கள் நடத்தப்பட்டு வருகின்ற நிலையில், மாற்றுத்திறனாளிகளின் கலைத் திறன்களை வெளிப்படுத்துவதற்கும் அவர்களைச் சமூகத்தில் மேலும் ஊக்குவிப்பதற்கும் தனியான மாவட்டப் பண்பாட்டுப் பெருவிழாவொன்றை ஏன் நடத்தக்கூடாது என்ற சிந்தனை தமக்கு ஏற்பட்டுள்ளதாகத் தெரிவித்தார். அதற்கமைய, 2027ஆம் ஆண்டில் யாழ்ப்பாண மாவட்ட மாற்றுத்திறனாளிகளுக்கான பண்பாட்டுப் பெருவிழாவொன்றை நடத்துவதற்கான யோசனையை முன்வைப்பதாகவும் குறிப்பிட்டார். மாற்றுத்திறனாளிகள் தமது சவால்களைத் தாண்டி, அர்ப்பணிப்புடனும் கடமை உணர்வுடனும் வாழ்ந்து தமது திறமைகளை வெளிப்படுத்தி வருவதாகவும், பிரதேச செயலாளர்கள் மற்றும் சமூக சேவைகள் உத்தியோகத்தர்களின் ஒத்துழைப்புடன் இவ்விழாவைச் சிறப்பாக ஏற்பாடு செய்ய முடியும் என்ற நம்பிக்கை தமக்கு இருப்பதாகவும் தெரிவித்தார். இன்றைய நிகழ்வில் முதியோர்களும் மாற்றுத்திறனாளிகளும் தமது தனித்துவமான திறமைகளை வெளிப்படுத்தியமை பாராட்டத்தக்கது எனக் குறிப்பிட்ட அவர், நிகழ்வின் மூன்று பிரிவுகளுக்கும் பொருத்தமான விருந்தினர்கள் அழைக்கப்பட்டிருந்தமையைச் சிறப்பாக எடுத்துரைத்தார். முதியோர்களைப் பிரதிநிதித்துவப்படுத்தும் வகையில் அரச சேவையிலிருந்து ஓய்வுபெற்ற திரு. கில்பேட் குணம் அவர்களும், மாற்றுத்திறனாளிகள் தினத்தின் நோக்கத்தையும் மாற்றுத்திறனாளிகள் தமது வாழ்க்கையில் மாற்றங்களை ஏற்படுத்தி முன்னேறுவதன் முக்கியத்துவத்தையும் எடுத்துரைக்கும் வகையில் தொழில்முயற்சியாளராக முன்னுதாரணமாகத் திகழும் திரு. த. சுரேஸ்குமார் அவர்களும் அழைக்கப்பட்டிருந்தமை சிறப்பம்சமாகும் என்றார். அத்துடன், உளவைத்திய நிபுணர் வைத்திய கலாநிதி சி. சிவதாஸ் அவர்கள் உள்ளார்ந்த அர்த்தமுள்ள கருத்துக்களை முன்வைத்தமையையும் பாராட்டினார்.
கலை நிகழ்ச்சிகள் :
முதியோர், மாற்றுத்திறனாளிகள் மற்றும் சமூகத்தினரின் கலைத்திறன்களை வெளிப்படுத்தும் வகையில் பல்வேறு கலை நிகழ்ச்சிகள் இடம்பெற்றன. தெல்லிப்பளை முதியோர் சங்க உறுப்பினர் பி. பரமசோதி, யாழ்ப்பாணப் பிரதேச செயலக சுயஉதவிக் குழுவினர், தேசிய மட்டப் போட்டியில் சாதனை படைத்த பார்வையற்ற கலைஞர்களான ரெ. கீர்த்தனா மற்றும் கு. ஜெகதீசன், மாவட்ட மற்றும் பிரதேச செயலக உத்தியோகத்தர்கள், தெல்லிப்பளை பிரதேச மட்ட முதியோர் சங்கத்தினர், தி. ஜேசுவா சால்மன் ஆகியோரின் தனிப்பாடல்கள், குழு நடனங்கள் மற்றும் நாடகம் ஆகியன நிகழ்வைச் சிறப்பித்தன.
தேசிய மட்டத்தில் சாதனை படைத்தவர்களுக்குக் கௌரவம் :
பார்வையற்றவர்களுக்கான 'ஸ்வர மஞ்சரி' தேசிய மட்டப் போட்டியில் பங்குபற்றி இரண்டாம் இடத்தைப் பெற்ற ரெ. கீர்த்தனா மற்றும் ஐந்தாம் இடத்தைப் பெற்ற கு. ஜெகதீசன் ஆகியோர் மாவட்ட அரசாங்க அதிபர், முதன்மை விருந்தினர்கள் மற்றும் பதவிநிலை உத்தியோகத்தர்களால் கௌரவிக்கப்பட்டுப் பரிசில்களும் வழங்கப்பட்டன. சமூக சேவைகள் திணைக்களத்தின் செயலாற்றுகையில் சிறந்த உத்தியோகத்தர்களுக்குப் பாராட்டு சமூக சேவைகள் திணைக்களத்தின் 2025ஆம் ஆண்டுக்கான செயலாற்றுகை மதிப்பீட்டில் சிறந்த பெறுபேறுகளைப் பெற்ற உத்தியோகத்தர்களுக்கும் இதன்போது சான்றிதழ்கள் வழங்கப்பட்டன. இதன்படி, முதலாம் இடத்தைப் பெற்ற கோப்பாய் பிரதேச செயலகத்தைச் சேர்ந்த திருமதி வி. கிருசாந்தி, இரண்டாம் இடத்தைப் பெற்ற காரைநகர் மற்றும் பருத்தித்துறை பிரதேச செயலகங்களைச் சேர்ந்த திருமதி சி. குயிலினி மற்றும் திருமதி வி. நிவேதனா ஆகியோர் கௌரவிக்கப்பட்டனர். நிகழ்வின் நன்றியுரையை உளவளத்துணை உத்தியோகத்தர் திருமதி சிந்துஜா நிகழ்த்தினார். இந்நிகழ்வில் மாவட்ட மேலதிக அரசாங்க அதிபர் (காணி) பா. ஜெயகரன், மாவட்டச் செயலகப் பதவிநிலை உத்தியோகத்தர்கள், பிரதேச செயலாளர்கள், மாவட்ட மற்றும் பிரதேச செயலகங்களின் சமூக சேவைகள் அபிவிருத்தி உத்தியோகத்தர்கள், உளவளத்துணை உத்தியோகத்தர்கள், முதியோர் உரிமை மேம்பாட்டு உத்தியோகத்தர்கள், மாவட்டச் செயலக உத்தியோகத்தர்கள், முதியோர் மற்றும் மாற்றுத்திறனாளிகள் எனப் பலரும் கலந்து கொண்டனர்.

யாழ்ப்பாண மாவட்ட செயலகம் மற்றும் யாழ் மாவட்டத்திலுள்ள பிரதேச செயலகங்கள் என்பவற்றிக்கு 2027ம் ஆண்டுக்கான நிர்மாணதாரர்கள் மற்றும் சேவை வழங்குநர்களை பதிவு செய்தல் தொடர்பான விளம்பரம் இத்துடன் இணைக்கப்பட்டுள்ளது. பதிவு செய்ய விரும்புபவர்கள் இணைக்கப்பட்டுள்ள அறிவுறுத்தல்களின் அடிப்படையில் தமது விண்ணப்படிவங்களை சமர்ப்பிக்க முடியும்.

சிவில் சமூக அமைப்புகளின் செயற்பாடுகளை முன்னேற்றுவதன் மூலம் கொள்கை ஊக்குவித்தல் மற்றும் உரிமைகளைப் பாதுகாத்தல் (CATALYZE) நிகழ்ச்சித் திட்டத்தின் கீழ், யாழ்ப்பாண மாவட்டப் பங்குதாரர்களுக்கான வழிகாட்டல் கலந்துரையாடல் கிரிசலிஸ் (Chrysalis) நிறுவனத்தின் பிராந்திய மற்றும் திட்ட முகாமையாளர் திரு. எம். பிரபாகரன் தலைமையில், இன்றைய தினம் (28.10.2026) தனியார் மண்டபமொன்றில் நடைபெற்றது. இக் கலந்துரையாடலில் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் சிறப்பு அழைப்பாளராக கலந்துகொண்டார்.
திட்டத்தின் நோக்கம் :
இலங்கையின் சமூகங்களில், குறிப்பாக வடக்கு மற்றும் கிழக்கு மாகாணங்களில், அர்த்தமுள்ளதும் நீண்டகாலத்திற்குப் பயனளிக்கக்கூடியதுமான மாற்றங்களை ஏற்படுத்தும் நோக்கில் இத்திட்டம் நடைமுறைப்படுத்தப்படுகிறது. நிலம், வாழ்வாதாரம் மற்றும் சுற்றுச்சூழல் தொடர்பான உரிமைகள் சார்ந்த சவால்களுக்குக் கூட்டு நடவடிக்கைகள், பங்கேற்பு அடிப்படையிலான ஆளுகை மற்றும் கொள்கை மாற்றங்கள் ஊடாக நிலையான தீர்வுகளை உருவாக்குவதற்கு சமூகங்களையும் சிவில் சமூக அமைப்புகளையும் வலுப்படுத்துவது இத்திட்டத்தின் முக்கிய நோக்கமாகும்.
வரவேற்புரை :
கிரிசலிஸ் நிறுவனத்தின் சிரேஷ்ட திட்ட ஒருங்கிணைப்பாளர் திரு. ஏ. அஜந்தன் வரவேற்புரையாற்றினார்.
அரசாங்க அதிபர் உரை :
யாழ்ப்பாண மாவட்டத்தில் அரசாங்கத்தின் அபிவிருத்தி முயற்சிகளுக்கு மேலும் வலுச்சேர்க்கும் வகையில், அரச சார்பற்ற நிறுவனங்கள், அரச நிர்வாகம் மற்றும் சமூக மட்ட அமைப்புகள் ஒன்றிணைந்து செயற்பட வேண்டும் என யாழ்ப்பாண மாவட்ட அரசாங்க அதிபர் மருதலிங்கம் பிரதீபன் வலியுறுத்தியுள்ளார். யாழ்ப்பாண மாவட்டத்தில் 2026ஆம் ஆண்டில் அரச சார்பற்ற நிறுவனங்களால் சுமார் 1,005 மில்லியன் ரூபாய் நிதி ஒதுக்கீடு அங்கீகரிக்கப்பட்டுள்ளதுடன், அரசாங்கத்தின் நிதி ஒதுக்கீடாகச் சுமார் 4,500 மில்லியன் ரூபாய் கிடைக்கப்பெற்றுள்ளதாகவும் அவர் தெரிவித்தார். மாவட்டத்தின் ஒட்டுமொத்த அபிவிருத்தியில் அரச சார்பற்ற நிறுவனங்களின் பங்களிப்பு முக்கியமானது எனக் குறிப்பிட்ட அவர், அரசாங்கத்தின் அபிவிருத்தித் திட்டங்களில் காணப்படும் இடைவெளிகளைக் குறைப்பதற்கு இந்நிறுவனங்களின் வளங்களையும் ஒத்துழைப்பையும் உரிய முறையில் பயன்படுத்திக்கொள்ள வேண்டும் என வலியுறுத்தினார். கடந்த காலங்களில் மக்களுக்கு வழங்கப்பட்ட வாழ்வாதார உதவிகளின் பயன்களை மீளாய்வு செய்ய வேண்டியதன் அவசியத்தையும் அரசாங்க அதிபர் சுட்டிக்காட்டினார். பசுக்கள், கோழிக்குஞ்சுகள் மற்றும் தையல் இயந்திரங்கள் போன்ற உதவிகள் வழங்கப்பட்டுள்ள போதிலும், அவற்றின் மூலம் நிலையான உற்பத்தி அதிகரிப்பு மற்றும் பொருளாதாரத் தன்னிறைவு எந்தளவுக்கு ஏற்பட்டுள்ளது என்பதை மதிப்பீடு செய்ய வேண்டும் எனத் தெரிவித்தார். மேலும், யாழ்ப்பாண மாவட்டத்தின் தேவைகளைப் பூர்த்தி செய்யும் வகையில் உள்ளூர் உற்பத்தியை அதிகரிப்பதற்கும், மக்களின் வாழ்வாதாரத்தை நிலையான முறையில் மேம்படுத்துவதற்கும் மாவட்டச் செயலகமும் பிரதேச செயலகங்களும் அரச சார்பற்ற நிறுவனங்களுடன் இணைந்து திட்டங்களை நடைமுறைப்படுத்த வேண்டும் எனக் கேட்டுக்கொண்டார். Chrysalis நிறுவனத்தினால் முன்னெடுக்கப்பட்ட 'ஊராட்சி முற்றம்' திட்டத்திற்காக 6.6 மில்லியன் ரூபாய் செலவிடப்பட்டு, 160 மில்லியன் ரூபாய் பெறுமதியான அடைவு எட்டப்பட்டுள்ளதாகத் தெரிவிக்கப்பட்டுள்ளமை வரவேற்கத்தக்கது எனக் குறிப்பிட்ட அரசாங்க அதிபர், இத்திட்டத்தை முன்னெடுப்பதில் குடிசார் அமைப்புகள் ஆற்றிய பங்களிப்பையும் பாராட்டினார். காணி, வாழ்வாதாரம் மற்றும் சுற்றுச்சூழல் ஆகிய மூன்று முக்கிய துறைகளையும் மையப்படுத்தி, சமூக மட்ட அமைப்புகளை வலுப்படுத்துவதன் மூலம் நிலையான அபிவிருத்தியை ஏற்படுத்த முடியும் எனவும் அவர் தெரிவித்தார். எனவே, அரச உத்தியோகத்தர்கள் தமக்குக் கிடைக்கும் வாய்ப்புகளையும் வளங்களையும் உரிய முறையில் பயன்படுத்தி, அரச சார்பற்ற நிறுவனங்கள் மற்றும் சமூக மட்ட அமைப்புகளின் ஒத்துழைப்புடன் மக்களுக்குப் பயனளிக்கும் நிலையான அபிவிருத்தித் திட்டங்களை முன்னெடுக்க வேண்டும் எனவும் அரசாங்க அதிபர் வலியுறுத்தினார். அத்துடன், மக்களின் பிரச்சினைகளை உரிய தரப்பினரின் கவனத்திற்குக் கொண்டுசென்று, நடைமுறைச் சாத்தியமான தீர்வுகளை உருவாக்குவதில் சிவில் சமூக அமைப்புகளின் பங்களிப்பு மேலும் வலுப்படுத்தப்பட வேண்டும் எனவும் குறிப்பிட்டார்.
திட்டத்தின் விளக்கவுரை :
திட்டத்தின் நோக்கங்கள், செயற்பாடுகள் மற்றும் எதிர்பார்க்கப்படும் பெறுபேறுகள் தொடர்பான விரிவான விளக்கத்தைத் திட்ட மற்றும் பிரதேச முகாமையாளர் திரு. எம். பிரபாகரன் காட்சிப்படுத்தல் மூலம் வழங்கினார்.
கலந்துரையாடல் :
தொடர்ந்து, கிரிசலிஸ் நிறுவனத்தினால் முன்னெடுக்கப்பட்ட திட்டங்களிலிருந்து பெறப்பட்ட சிறந்த நடைமுறைகள் மற்றும் அனுபவங்கள் பகிரப்பட்டதுடன், மாவட்ட மட்டத்தில் தொடர்புடைய துறைகளுக்கிடையிலான ஒத்துழைப்பை மேம்படுத்துவது தொடர்பாகவும் கலந்துரையாடப்பட்டது. இக் கலந்துரையாடலின் ஆரம்ப நிகழ்வில் மாவட்ட மேலதிக அரசாங்க அதிபர் கை. சிவகரன், மாவட்ட மேலதிக அரசாங்க அதிபர் (காணி) பா. ஜெயகரன், மாவட்ட திட்டமிடல் பணிப்பாளர் இ. சுரேந்திரநாதன், உதவி மாவட்டச் செயலாளர் உ. தர்ஷினி, அரச சார்பற்ற நிறுவனங்களின் மாவட்ட இணைப்பாளர் நா. தயாபரன், உதவிப் பிரதேச செயலாளர்கள், உள்ளூராட்சி உதவி ஆணையாளர், மாகாண கால்நடை சுகாதார வைத்தியப் பணிப்பாளர், பல்வேறு திணைக்களங்களின் உத்தியோகத்தர்கள், சமூகமட்ட அமைப்புகளின் பிரதிநிதிகள், மற்றும் உள்ளிட்ட பலர் கலந்துகொண்டனர்.

தூய்மையான சுற்றுச்சூழலைப் பேணிப் பாதுகாப்பதையும், சமூகப் பொறுப்புணர்வை வலுப்படுத்துவதையும் நோக்கமாகக் கொண்டு, “கிளீன் ஸ்ரீலங்கா” தேசிய நிகழ்ச்சித்திட்டத்தின் கீழ் முன்னெடுக்கப்படும் “அத்தம” தேசிய தூய்மை தின நிகழ்ச்சித்திட்டத்தின் மூன்றாம் கட்ட நிகழ்வு நாடளாவிய ரீதியில் எதிர்வரும் 31.10.2026ஆம் திகதி சனிக்கிழமை முன்னெடுக்கப்படவுள்ளது. இந்நிலையில் குறித்த நிகழ்ச்சித்திட்டத்தினை யாழ்ப்பாண மாவட்டத்தில் நடைமுறைப்படுத்துவது தொடர்பான முன்னாயத்த கலந்துரையாடல் இன்றைய தினம் (28.10.2026) அரசாங்க அதிபர் மருதலிங்கம் பிரதீபன் அவர்களின் தலைமையில், மாவட்ட அரசாங்க அதிபர் அலுவலகத்தில் நடைபெற்றது. இதன்போது, நிகழ்ச்சித்திட்டத்தின் மூன்றாம் கட்டத்தைத் திட்டமிட்ட முறையில் நடைமுறைப்படுத்துதல், கழிவு முகாமைத்துவத்தை முறையாகப் பேணுதல், சுற்றுச்சூழலைத் தூய்மையாகப் பேணுவதன் அவசியம் குறித்து மக்களுக்கு விழிப்புணர்வூட்டுதல், பொதுமக்களின் பங்களிப்பை ஊக்குவித்தல் மற்றும் சம்பந்தப்பட்ட தரப்பினருடன் இணைந்து மேற்கொள்ள வேண்டிய நடவடிக்கைகள் மற்றும் எதிர்காலச் செயற்பாடுகளை வினைத்திறனுடன் முன்னெடுத்துச் செல்வதற்கான வழிவகைகள் தொடர்பாக விரிவாகக் கலந்துரையாடப்பட்டன. தேசிய தூய்மை தின நிகழ்ச்சித்திட்டத்தின் மூன்றாம் கட்டத்தை வினைத்திறனுடனும் வெற்றிகரமாகவும் முன்னெடுப்பதற்கான தேவையான முன்னாயத்த நடவடிக்கைகளை ஒருங்கிணைத்து, சம்பந்தப்பட்ட அனைத்து தரப்பினரினதும் ஒத்துழைப்புடன் செயற்படுவது குறித்தும் இதன்போது வலியுறுத்தப்பட்டது. மேலும் மாவட்டச் செயலக முன்றலில் ஆரம்பமாகி கச்சேரி நல்லூர் வீதியின் முத்திரைச்சந்தி வரையான வீதியில் சுத்தமாக்கல் செயற்பாடுகள் தொடர்பில் விரிவாக ஆராயப்பட்டது. குறிப்பாக கச்சேரி நல்லூர் வீதியின் புகையிரத கடவை வரையான பகுதியை தூய்மைப்படுத்தி அழகுபடுத்துவதற்கான ஏற்பாடுகள் தொடர்பாக கலந்துரையாடப்பட்டதுடன் கலந்துரையாடலின் இறுதியில் குறித்த பகுதிக்குகள விஜயமொன்றும் மேற்கொள்ளப்பட்டது. இக் கலந்துரையாடலில் மேலதிக அரசாங்க அதிபர் கே. சிவகரன், மேலதிக அரசாங்க அதிபர்(காணி) பா. ஜெயகரன், கிளீன் ஸ்ரீலங்கா நிகழ்ச்சி திட்டத்தின் மாகாண இணைப்பாளரும், மாவட்ட ஒருங்கிணைப்பு குழு தலைவரின் இணைப்பாளரும் எஸ். கபிலன், மாநகர உறுப்பினர் கெளரவ அப்துல்லா, திட்டமிடல் பணிப்பாளர், பிரதம கணக்காளர், பொறியியலாளர், மாநகர சபை ஆணையாளர், உதவி மாவட்ட செயலாளர், இராணுவ பொலீஸ் அதிகாரிகள், துறைசார்ந்த திணைக்கள தலைவர்கள் உள்ளிட்ட உத்தியோகத்தர்கள், கிராம சேவகர்கள் பலர் கலந்துகொண்டனர். மேலும், இதே சம நேரத்தில் யாழ்ப்பாண மாவட்டத்தின் 15 பிரதேச செயலர் பிரிவுகள் ரீதியாகவும் குறித்த நிகழ்வுகள் முன்னெடுக்கப்படவுள்ளமை குறிப்பிடத்தக்கது.

தேசிய உற்பத்தித்திறன் போட்டியில் விசேட மெச்சுரை மற்றும் மெச்சுரை விருதுகளைப் பெற்றுக்கொண்ட வடக்கு, கிழக்கு மற்றும் வடமத்திய மாகாணங்களைச் சேர்ந்த 247 நிறுவனங்களைக் கௌரவிக்கும் நிகழ்வு இன்று (27.10.2026) கிளிநொச்சியில் உள்ள தனியார் மண்டபத்தில் நடைபெற்றது. இந்நிகழ்வில் பிரதம விருந்தினர்களாக வடக்கு மாகாண ஆளுநர் கௌரவ நாகலிங்கம் வேதநாயகன் மற்றும் கைத்தொழில் மற்றும் தொழில்முயற்சியாண்மை அபிவிருத்திப் பிரதி அமைச்சர் கௌரவ சதுரங்க அபயசிங்க ஆகியோர் கலந்துகொண்டனர். தேசிய உற்பத்தித்திறன் செயலகத்தினால் 2025/2026ஆம் ஆண்டுக்கான தேசிய உற்பத்தித்திறன் போட்டிக்கு விண்ணப்பங்கள் கோரப்பட்டபோது, நாடு முழுவதிலுமிருந்து 6,600-க்கும் மேற்பட்ட விண்ணப்பங்கள் பதிவு செய்யப்பட்டன. அவற்றில் 2,800-க்கும் மேற்பட்ட விண்ணப்பங்கள் கிடைக்கப்பெற்றன. முதற்கட்டத் தெரிவின் பின்னர், 2,056 நிறுவனங்கள் களவிஜயம் ஊடாக நேரடியாக ஆய்வுக்கு உட்படுத்தப்பட்டன. இவ்வாய்வுகளின் அடிப்படையில், 1,669 நிறுவனங்கள் விருதுகளுக்காகத் தெரிவுசெய்யப்பட்டன. தேசிய ரீதியில், ஆறு நிறுவனங்கள் தங்க விருதையும், 12 நிறுவனங்கள் முதலாமிடத்தையும், 99 நிறுவனங்கள் இரண்டாமிடத்தையும், 331 நிறுவனங்கள் மூன்றாமிடத்தையும் பெற்றுக்கொள்ளத் தகுதிபெற்றன. மேலும், 568 நிறுவனங்கள் விசேட மெச்சுரை விருதையும் (Special Commendation), 653 நிறுவனங்கள் மெச்சுரை விருதையும் (Commendation) பெற்றுக்கொள்ளத் தகுதிபெற்றன. யாழ்ப்பாண மாவட்டத்தில் 107 நிறுவனங்களளுக்கு கள விஜயம் செய்யப்பட்டு, அதில் மேற்படி விருதுகளுக்காக 95 நிறுவனங்கள் தெரிவு செய்யப்பட்டுள்ளமை குறிப்பிடத்தக்கது.
வடக்கு, கிழக்கு மற்றும் வடமத்திய மாகாணங்களைச் சேர்ந்த 247 நிறுவனங்கள் கௌரவிப்பு :
தேசிய உற்பத்தித்திறன் போட்டியில் வடக்கு, கிழக்கு மற்றும் வடமத்திய மாகாணங்களைச் சேர்ந்த நிறுவனங்களில் விசேட மெச்சுரை மற்றும் மெச்சுரை விருதுகளைப் பெற்றுக்கொள்ளத் தெரிவுசெய்யப்பட்ட 247 நிறுவனங்களுக்கான விருதுகள் இந்நிகழ்வில் வழங்கப்பட்டன. ஊர்காவற்றுறை, கோப்பாய், பருத்தித்துறை மற்றும் மருதங்கேணி பிரதேச செயலகங்களுக்கு விசேட மெச்சுரை வழங்கப்பட்டுள்ள மை குறிப்பிடத்தக்கது. இந் நிகழ்வில் தேசிய உற்பத்தித்திறன் செயலகத்தின் பணிப்பாளர் நாயகம், யாழ்ப்பாணம், கிளிநொச்சி, முல்லைத்தீவு மற்றும் அநுராதபுரம் மாவட்டங்களின் அரசாங்க அதிபர்கள், வடமத்திய மாகாணத்தின் பிரதம செயலாளர், மாகாண அமைச்சுக்களின் செயலாளர்கள் உள்ளிட்ட அரச அதிகாரிகள், தொடர்புடைய நிறுவனங்களின் பிரதிநிதிகள் மற்றும் கல்லூரி அதிபர்கள் எனப் பலரும் கலந்துகொண்டனர்.








