பாலின அடிப்படையிலான வன்முறைகளைத் தடுத்தல் மற்றும் அவற்றால் பாதிக்கப்படுபவர்களுக்குத் துரிதமான பதிலளிப்பு மற்றும் தீர்வுகளை வழங்குதல் தொடர்பில் அரச மற்றும் அரச சார்பற்ற நிறுவனங்களின் பங்குதாரர்களுடனான மாவட்ட மட்டக் கலந்துரையாடல், மாவட்ட மேலதிக அரசாங்க அதிபர் க. சிவகரன் அவர்களின் தலைமையில் இன்றைய தினம் (17.11.2026) மாவட்டச் செயலகக் கேட்போர் கூடத்தில் நடைபெற்றது. பிரதேச மட்டங்களில் அடையாளம் காணப்பட்டு, உரிய மட்டங்களில் தீர்க்கப்பட முடியாத பிரச்சினைகளுக்குத் தீர்வுகளைப் பெற்றுக்கொடுப்பதற்கான அணுகுமுறைகள் மற்றும் ஆலோசனைகளை முன்வைப்பதே இக்கலந்துரையாடலின் பிரதான நோக்கமாக அமைந்தது. இதன்போது, சிறுவர் மற்றும் பெண்கள் எதிர்கொள்ளும் பிரச்சினைகள், குடும்பப் பிரச்சினைகள், குடும்ப அட்டை தொடர்பான சிக்கல்கள், வீட்டுத்திட்ட உதவிகள், பிறப்புச் சான்றிதழ்களைப் பெற்றுக்கொள்ளுதல், கல்வி தொடர்பான பிரச்சினைகள், மனநலப் பாதிப்புக்குள்ளானவர்களுக்கான பராமரிப்பு இல்லங்களின் தேவை உள்ளிட்ட பல்வேறு விடயங்கள் ஆராயப்பட்டன. தீர்க்கப்படாமல் நிலுவையில் உள்ள பிரச்சினைகள் தொடர்பில் சம்பந்தப்பட்ட துறைசார் அதிகாரிகளின் ஊடாகத் தீர்வுகளைப் பெற்றுக்கொடுப்பதற்கான ஆலோசனைகளும் வழங்கப்பட்டன. இக்கலந்துரையாடலில் உதவி மாவட்டச் செயலாளர் உ. தர்ஷினி, யாழ்ப்பாணம் போதனா வைத்தியசாலையின் நட்பு நிலையப் பொறுப்பதிகாரி வைத்தியர் ஸ்ரீ ராம், மாவட்ட பெண்கள் அபிவிருத்தி உத்தியோகத்தர் கி. தயாபரி, வலயக் கல்விப் பணிப்பாளர்கள், நிர்வாக கிராம அலுவலர்கள், சமுர்த்தி இணைப்பாளர்கள், பெண்கள் அபிவிருத்தி உத்தியோகத்தர்கள், சிறுவர் பாதுகாப்பு உத்தியோகத்தர்கள், சமூக சேவை உத்தியோகத்தர்கள், பொலிஸ் உத்தியோகத்தர்கள் உள்ளிட்ட பல்வேறு துறைசார் உத்தியோகத்தர்கள் கலந்து கொண்டனர்.

சமூகசக்தி தேசிய இயக்கத்தின் கீழ் நிகழ்நிலைத் தரவு முறைமையில் தகவல்களை உள்ளீடு செய்வது தொடர்பான மாவட்ட மட்ட விழிப்புணர்வுச் செயலமர்வு, யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில் இன்று (17.11.2026) மாவட்டச் செயலக செயலமர்வு மண்டபத்தில் நடைபெற்றது.
நோக்கம் :
பிரஜாசக்தி தேசிய இயக்கத்தின் கீழ் கிராம மட்டத் தரவுகளைச் சேகரித்து, அவற்றை நிகழ்நிலைத் தரவு முறைமையில் உள்ளீடு செய்வதற்கான நடைமுறைகள் தொடர்பில் யாழ்ப்பாண மாவட்டத்திலுள்ள அனைத்துப் பிரதேச செயலாளர்கள், உதவிப் பிரதேச செயலாளர்கள் மற்றும் பிரதி, உதவிப் பணிப்பாளர்களுக்கு விழிப்புணர்வூட்டும் நோக்கில் இச் செயலமர்வு ஏற்பாடு செய்யப்பட்டிருந்தது.
தலைமையுரை :
சமூக சக்தி செயற்திட்டத்தின் அடுத்தகட்ட நடவடிக்கைகள் தரவுகளின் அடிப்படையில் திட்டமிடப்பட வேண்டும் – அரசாங்க அதிபர் மருதலிங்கம் பிரதீபன் இச் செயலமர்வில் தலைமையுரையாற்றிய அரசாங்க அதிபர், 2026ஆம் ஆண்டில் யாழ்ப்பாண மாவட்டத்தில் சமூக சக்தி செயற்திட்டத்தை வெற்றிகரமாக நடைமுறைப்படுத்துவதற்கு முழுமையான ஒத்துழைப்பை வழங்கிய பிரதேச செயலாளர்களுக்கும் உத்தியோகத்தர்களுக்கும் நன்றிகளைத் தெரிவித்தார். மேலும், இவ்வாண்டு மாவட்டத்திற்கு ஒதுக்கப்பட்ட நிதி மற்றும் நடைமுறைப்படுத்தப்பட்ட அபிவிருத்திச் செயற்பாடுகள் தொடர்பில் விளக்கமளித்த அவர், திட்டங்களை உரிய காலத்தில் ஆரம்பிப்பதிலும், நடைமுறைப்படுத்துவதிலும் ஏற்பட்ட சில சவால்களைச் சுட்டிக்காட்டினார். குறிப்பாக, திட்டங்களுக்கான உரிமை மற்றும் அனுமதிகளை முன்கூட்டியே உறுதிப்படுத்தாமை, போதிய திட்டமிடல் இல்லாமை போன்ற காரணங்களால் சில செயற்பாடுகளை முழுமையாக நிறைவேற்றுவதில் சிரமங்கள் ஏற்பட்டதாகக் குறிப்பிட்டார். வறுமை ஒழிப்பு என்பது பொருளாதார உதவிகளை வழங்குவதுடன் மட்டும் மட்டுப்படுத்தப்படக்கூடாது. குடிநீர், சுகாதாரம், உட்கட்டமைப்பு மற்றும் அடிப்படை வசதிகள் உள்ளிட்ட பல்வேறு அம்சங்களையும் உள்ளடக்கிய பன்முக வறுமையை அடையாளம் கண்டு அதற்கேற்ப தீர்வுகளை வழங்க வேண்டும் என அவர் வலியுறுத்தினார்.
இதற்காக ஒவ்வொரு கிராமத்தின் சமூக, பொருளாதார நிலைமைகளைப் பிரதிபலிக்கும் துல்லியமான அடிப்படைத் தரவுத்தளம் அவசியம் எனக் குறிப்பிட்ட அவர், தற்போது அறிமுகப்படுத்தப்பட்டுள்ள கிராம மட்டத் தரவுப் புத்தகத்தை மேலும் செம்மைப்படுத்தி, மாவட்டங்களின் தனித்துவமான தேவைகளையும் உள்ளடக்கியதாக இறுதிப்படுத்த வேண்டும் என்றார். இத்தரவுகள் பின்னர் டிஜிட்டல் மயப்படுத்தப்படுவதன் மூலம் அபிவிருத்தித் திட்டங்களின் முன்னேற்றத்தைக் கண்காணிக்கவும், அவற்றின் பயன்களை மதிப்பீடு செய்யவும் முடியும் எனத் தெரிவித்தார். அத்துடன், கிராம மட்டத்தில் திட்டங்களைத் தெரிவுசெய்யும்போது அரசியல் வேறுபாடுகளுக்கு அப்பால் அனைத்துத் தரப்பினரையும் உள்ளடக்கிய கலந்தாய்வுகள் நடத்தப்பட வேண்டும் என்றும், மக்களின் உண்மையான தேவைகளின் அடிப்படையில் முன்னுரிமைத் திட்டங்கள் தீர்மானிக்கப்பட வேண்டும் என்றும் வலியுறுத்தினார். 2027ஆம் ஆண்டுக்கான அபிவிருத்தித் திட்டங்களை முன்கூட்டியே திட்டமிட்டு, வீதி, சுகாதாரம், குடிநீர் மற்றும் ஏனைய அடிப்படைத் தேவைகள் தொடர்பான முன்னுரிமைப் பட்டியல்களைத் தயாரிக்க வேண்டும் எனவும் குறிப்பிட்டார். மாவட்டத்திற்கு ஒதுக்கப்படவுள்ள அபிவிருத்தி நிதிகளை வினைத்திறனுடனும் உரிய முறையிலும் பயன்படுத்துவதற்கு இத்தகைய தரவுத்தளம் முக்கிய பங்களிப்பை வழங்கும் என்றும் தெரிவித்தார். இச்செயற்பாட்டில் பிரதேச செயலகங்களின் திட்டமிடல் உத்தியோகத்தர்கள், உதவித் திட்டமிடல் பணிப்பாளர்கள் மற்றும் அபிவிருத்தி உத்தியோகத்தர்கள் விசேட கவனம் செலுத்தி, கிராம மட்டத் தரவுகளைச் சரிபார்த்து, தேவையான திருத்தங்கள் மற்றும் மேலதிக உள்ளடக்கங்களைப் பரிந்துரைக்க வேண்டும் என்றும் கேட்டுக்கொண்டார். இறுதியாக, இச் செயலமர்வினை வெறுமனே ஒரு கூட்டமாகக் கருதாமல், மாவட்டத்தின் எதிர்கால அபிவிருத்தித் திட்டமிடலுக்கான பயனுள்ள பணிமனையாகப் பயன்படுத்தி, அனைவரும் ஒருங்கிணைந்து செயற்பட வேண்டும் எனத் தெரிவித்தார்.
கிராமிய அபிவிருத்தி நூல்கள் அறிமுகம் :
'சிக்கலைப் புலப்படுத்துதல் – கிராமத் தரவுகளிலிருந்து தகவலறிந்த தீர்மானங்களை எடுத்தல் வரை 'என்ற நூல் மற்றும் கிராம அடிப்படையிலான அடிப்படைத் தரவு நூல் ஆகியவை அறிமுகப்படுத்தப்பட்டன.
வளவாளர்கள் :
டிஜிட்டல் முறைமைகள் தொடர்பான விளக்கங்களை ஜனாதிபதி செயலகத்தின் சிரேஷ்ட உதவிச் செயலாளர் செல்வி சரதாஞ்சலி மனோகரன் அவர்களும், கிராமிய அபிவிருத்திக் குழு (CDC) மட்டத்தில் அடிப்படைத் தரவுகளைச் சேகரித்தல் மற்றும் தரவு நூலில் தகவல்களை உள்ளீடு செய்தல் தொடர்பான விளக்கங்களை சமூகசக்தி செயலகத்தின் உதவிப் பணிப்பாளர் செல்வி என். யோகேஸ்வரன் அவர்களும் வளவாளர்களாகக் கலந்து கொண்டு வழங்கினர். மேலும், பிரதேச செயலாளர்களிடம் கிராம அடிப்படையிலான அடிப்படைத் தரவு நூல்கள் கையளிக்கப்பட்டதுடன், அவற்றைப் பயன்படுத்துதல் மற்றும் தரவுகளை முறையாகப் பதிவேற்றுதல் தொடர்பான விரிவான விளக்கங்களும் வழங்கப்பட்டன. இதனைத் தொடர்ந்து திறந்தவெளி கலந்துரையாடலும் இடம்பெற்றது. இச் செயலமர்வின் ஆரம்ப நிகழ்வில் மேலதிக அரசாங்க அதிபர் க. சிவகரன், மாவட்டத் திட்டமிடல் பணிப்பாளர் இ. சுரேந்திரநாதன் ஆகியோரும் கலந்துகொண்டனர்.

யாழ்ப்பாணப் பல்கலைக்கழகத்தில் கல்வி பயிலும் தேவையுடைய மாணவர்களின் பார்வைத் திறனை மேம்படுத்தும் நோக்கில், ஜனாதிபதி நிதியத்தின் ஏற்பாட்டில் இலவச மூக்குக்கண்ணாடிகள் வழங்கும் விசேட வேலைத்திட்டம் இன்றைய தினம் (14.11.2026) யாழ்ப்பாணப் பல்கலைக்கழக வளாகத்தில் நடைபெற்றது. ஜனாதிபதி நிதியத்தின் ஊடாக முன்னெடுக்கப்பட்ட இத்திட்டத்தின் கீழ், மாணவர்களுக்கு கண் பரிசோதனைகள் மேற்கொள்ளப்பட்டதுடன், தேவையுடைய மாணவர்களுக்கு மூக்குக்கண்ணாடிகளும் வழங்கப்பட்டன.
வரவேற்புரை :
இந்நிகழ்வில் யாழ்ப்பாணப் பல்கலைக்கழகத் துணைவேந்தர் பேராசிரியர் தி. வேல் நம்பி வரவேற்புரையாற்றினார்.
விளக்கவுரை :
ஜனாதிபதி நிதியத்தின் செயலாளர் திரு. ஜி. ஜி. எஸ். சி. ரொஷான் நிகழ்ச்சித் திட்டத்தின் நோக்கங்கள் தொடர்பாக விளக்கமளித்தார்.
அரசாங்க அதிபர் உரை :
அதிமேதகு ஜனாதிபதி அவர்களின் வழகாட்டலில் ஜனாதிபதி நிதியத்தின் பல செயற்பாடுகள் யாழ்ப்பாண மாவட்டத்தில் சிறப்பாக முன்னெடுக்கப்பட்டு வருகின்றன என அரசாங்க அதிபர் திரு மருதலிங்கம் பிரதீபன் அவர்கள் தெரிவித்தார். குறிப்பாக, பல்கலைக்கழக மாணவர்களை இலக்காகக் கொண்டு பல்வேறு நலத்திட்டங்கள் அண்மைக்காலமாக நடைமுறைப்படுத்தப்பட்டு வருகின்றன. மாற்றுத்திறனாளிகளான பல்கலைக்கழக மாணவர்களுக்கு ஒரு இலட்சம் ரூபாய் உதவித்தொகை வழங்கும் நிகழ்வு அண்மையில் கௌரவ பிரதமரின் பங்குபற்றுதலுடன் யாழ்ப்பாண மாவட்டச் செயலகத்தில் நடைபெற்றது. அதனைத் தொடர்ந்து, பல்கலைக்கழக அனுமதிக்காக ஒவ்வொரு துறையிலும் முதல் 20 இடங்களைப் பெற்ற மாணவர்களுக்கான உதவித்தொகை கிளிநொச்சி மாவட்டத்தில் அண்மையில் வழங்கப்பட்டது. அதன் தொடர்ச்சியாக, இன்று யாழ்ப்பாணப் பல்கலைக்கழகத்தில் கல்வி பயிலும் மாணவர்களுக்கு இலவச மூக்குக் கண்ணாடிகள் வழங்கும் நிகழ்வு நடைபெறுகின்றது. மேலும், ஜனாதிபதி நிதியத்தின் சேவைகளை மக்களிடம் இலகுவாகக் கொண்டு சேர்க்கும் வகையில் முக்கியமான மாற்றம் ஒன்று ஏற்படுத்தப்பட்டுள்ளது. தற்போது பிரதேச செயலகங்கள் ஊடாக விண்ணப்பங்களைச் சமர்ப்பித்து, உரிய கொடுப்பனவுகளைத் தமது பிரதேச செயலகங்களிலேயே பெற்றுக்கொள்ளக்கூடிய வசதி ஏற்படுத்தப்பட்டுள்ளது. இது மக்களைத் தேடிச் செல்லும் சிறந்த நிர்வாக அணுகுமுறையாகும். ஜனாதிபதி செயலகத்தின் செயலாளராகப் பணியாற்றும் திரு. ரோஷன் அவர்கள் அண்மையில் டிஜிட்டல் பொருளாதார அமைச்சின் செயலாளராகவும் பொறுப்பேற்றுள்ளார். அவரது அர்ப்பணிப்பும் விசேட கவனமும் காரணமாக, இத்தகைய சேவைகள் கிராம மட்டம் வரை விரிவுபடுத்தப்படுவதுடன், அரச சேவைகளை டிஜிட்டல் மயமாக்கும் முயற்சிகளும் முன்னெடுக்கப்பட்டு வருகின்றன. ஜனாதிபதி நிதியம் நோயாளர்களின் மருத்துவத் தேவைகள், பொருளாதார நெருக்கடிகள் உள்ளிட்ட பல்வேறு தேவைகளுக்காக மக்களுக்கு உதவிகளை வழங்கி வருகின்றது. இத்தகைய திட்டங்கள் தொடர்பான தகவல்களைப் பல்கலைக்கழக மாணவர்களாகிய நீங்களும் சமூகத்திற்குக் கொண்டு செல்ல வேண்டிய பொறுப்பைக் கொண்டிருக்கின்றீர்கள். அதேவேளை, அண்மையில் சமர்ப்பிக்கப்பட்ட வரவு செலவுத் திட்டத்தின் ஊடாக அபிவிருத்தித் திட்டங்களுக்கு கணிசமான நிதி ஒதுக்கீடுகள் மேற்கொள்ளப்பட்டுள்ளன. குறிப்பாக, இலங்கையின் 25 மாவட்டங்களுக்கும் எவ்வித வேறுபாடுகளுமின்றி ஒவ்வொரு மாவட்டத்திற்கும் 2,000 மில்லியன் ரூபாய் ஒதுக்கீடு செய்யப்பட்டுள்ளமை வரவேற்கத்தக்க விடயமாகும். ஒவ்வொரு மாவட்டமும் தனது அபிவிருத்தி இலக்குகளை அடைவதற்கு இந்நிதி முக்கியமான வாய்ப்பாக அமையும். அத்துடன், யாழ்ப்பாணம், கிளிநொச்சி உள்ளிட்ட நாட்டின் பல்கலைக்கழகங்களின் உட்கட்டமைப்பு வசதிகளை மேம்படுத்துவதற்கும் நிதி ஒதுக்கீடுகள் மேற்கொள்ளப்பட்டுள்ளன. எனவே, நாட்டின் ஒட்டுமொத்த அபிவிருத்தியையும் இலக்காகக் கொண்ட வரவு செலவுத் திட்டமாக இது அமைந்துள்ளது.
பல்கலைக்கழக மாணவர்களாகிய நீங்கள் பல்வேறு வசதிகளையும் வாய்ப்புகளையும் பயன்படுத்தி உயர்கல்வியைப் பெற்றுக்கொண்டு, எதிர்காலத்தில் நாட்டிற்குச் சிறந்த சேவையாற்ற வேண்டும் என்பதே இத்தகைய உதவிகளின் உயரிய நோக்கமாகும். மேலும், அதிமேதகு ஜனாதிபதி அவர்கள் தனது வரவு செலவுத் திட்ட உரையில், இலங்கையர்கள் தேசிய மட்டத்தில் மட்டுமன்றி சர்வதேச மட்டத்திலும் கல்வி மற்றும் அறிவுத்துறைகளில் உயர்ந்த நிலையை அடைய வேண்டும் என்ற எதிர்பார்ப்பை வெளிப்படுத்தியிருந்தார். அந்த எதிர்பார்ப்பை நிறைவேற்றும் வகையில், நீங்கள் ஒவ்வொருவரும் நாட்டின் சிறந்த நற்பிரஜைகளாகவும், உயர்ந்த கல்வியாளர்களாகவும், இந்த மண்ணின் பெருமையை உலகறியச் செய்பவர்களாகவும் உருவாக வேண்டும். உங்களுடைய எதிர்கால வளர்ச்சிக்கும் முன்னேற்றத்திற்கும் ஜனாதிபதி செயலகமும் ஜனாதிபதி நிதியமும் தொடர்ந்தும் பல்வேறு உதவிகளையும் வாய்ப்புகளையும் வழங்கும் என்ற நம்பிக்கையுடன், இந்நிகழ்வில் கலந்துகொள்ள எனக்கு வாய்ப்பளித்த அனைவருக்கும் மீண்டும் நன்றிகளைத் தெரிவித்துக்கொண்டார். WISH Foundation நிறுவனத்தின் பிரதிநிதிகளும் நிகழ்வில் உரையாற்றினர். இறுதியாக, யாழ்ப்பாணப் பல்கலைக்கழக மாணவர் பிரதிநிதியின் நன்றியுரையுடன் ஆரம்ப நிகழ்வுகள் நிறைவடைந்ததைத் தொடர்ந்து, மாணவர்களுக்கான கண் பரிசோதனைகளும் மூக்குக்கண்ணாடிகள் வழங்கும் நடவடிக்கைகளும் முன்னெடுக்கப்பட்டன.

தேசிய உற்பத்தித்திறன் விருதுடன் யாழ்ப்பாண மாவட்டச் செயலக உத்தியோகத்தர்களின் மகிழ்ச்சியான தருணம்!
அதிமேதகு ஜனாதிபதி அநுரகுமார திசாநாயக்க அவர்களிடமிருந்து, 2026.11.08 அன்று கொழும்பு பண்டாரநாயக்க சர்வதேச மாநாட்டு மண்டபத்தில் (BMICH) நடைபெற்ற தேசிய உற்பத்தித்திறன் விருது வழங்கும் விழாவில், தேசிய மட்டத்தில் முதலாம் இடத்திற்கான விருதை யாழ்ப்பாண மாவட்டச் செயலகம் பெற்றுக்கொண்டது. யாழ்ப்பாண மாவட்டச் செயலக உத்தியோகத்தர்கள், தமது மகிழ்ச்சியையும் பெருமிதத்தையும் விருதுடன் இணைந்து பகிர்ந்துகொண்ட இனிய தருணம்


காணாமல் போனோர் அலுவலகத்தின் செயற்பாடுகள், அதன் பணிகள் மற்றும் நடைமுறைகள் தொடர்பில் மாவட்ட மட்ட சிவில் சமூக அமைப்புகளின் புரிதலை வலுப்படுத்தும் நோக்கிலான பயிற்சிச் செயலமர்வு, மேலதிக அரசாங்க அதிபர் திரு. க. சிவகரன் தலைமையில், தேசிய சமாதானப் பேரவையின் நிறைவேற்றுப் பணிப்பாளர் கலாநிதி ஜெஹான் பெரேராவின் பங்கேற்புடன் இன்று (13.11.2026) யாழ்ப்பாண மாவட்டச் செயலக கேட்போர் கூடத்தில் நடைபெற்றது. இலங்கை தேசிய சமாதானப் பேரவை மற்றும் காணாமல் போன ஆட்கள் பற்றிய அலுவலகம் ஆகியன இணைந்து ஏற்பாடு செய்த இச் செயலமர்வினை ஏற்பாடு செய்யப்பட்டது.
நோக்கம் :
காணாமல் ஆக்கப்பட்டவர்கள் மற்றும் அவர்களது குடும்பத்தினரின் குறைகளைத் தீர்ப்பதற்காக காணாமல் போன ஆட்கள் பற்றிய அலுவலகம் முன்னெடுக்கும் பணிகள் மற்றும் நடைமுறைகள் குறித்து சிவில் சமூகப் பிரதிநிதிகளின் புரிதலை மேம்படுத்துவதுடன், அவர்களுக்கும் அலுவலகத்திற்கும் இடையிலான தொடர்பாடலையும் ஒத்துழைப்பையும் வலுப்படுத்துவதே இச்செயலமர்வின் முக்கிய நோக்கமாக அமைந்தது.
அறிமுக உரை :
அறிமுகம் மற்றும் வரவேற்புரையை தேசிய சமாதானப் பேரவையின் திரு. பென் பேரின்பநாயகம் ஆற்றினார்.
தொடக்க உரை :
யாழ்ப்பாண மாவட்ட அரச சார்பற்ற நிறுவனங்களின் இணையத்தின் தலைவரும், SOND நிறுவனத்தின் நிறைவேற்றுப் பணிப்பாளருமான திரு. செந்துராஜா ஆரம்ப உரையை நிகழ்த்தினார்.
தலைமையுரை :
இச் செயலமர்வில் தலைமையுரையாற்றிய மேலதிக அரசாங்க அதிபர் அவர்கள், யாழ்ப்பாண மாவட்டத்தில் காணாமல் ஆக்கப்பட்டோர் தொடர்பாக 2,249 பேர் பதிவு செய்யப்பட்டுள்ளனர். அவர்களில் 983 பேருக்கான இழப்பீடுகள் வழங்கப்பட்டுள்ளதுடன், இச்செயற்பாடுகள் தொடர்ந்தும் முன்னெடுக்கப்பட்டு வருகின்றன. காணாமல் ஆக்கப்பட்டோர் தொடர்பான விடயம் வெறுமனே இழப்பீடுகளை வழங்குவதுடன் முடிவடையும் ஒன்றல்ல. பாதிக்கப்பட்ட குடும்பங்களின் உணர்வுகள், எதிர்பார்ப்புகள், மனவேதனைகள் மற்றும் அவர்களின் நீண்டகாலக் கோரிக்கைகளையும் மனிதாபிமான அடிப்படையில் அணுக வேண்டியது அவசியமாகும். காணாமல் ஆக்கப்பட்டோர் அலுவலகத்தின் பணிகள் மற்றும் பொறுப்புகள் தொடர்பில் மக்களுக்கு முறையான விழிப்புணர்வை ஏற்படுத்துவதுடன், பாதிக்கப்பட்ட குடும்பங்களின் கருத்துக்களையும் தேவைகளையும் உள்வாங்கி, அவர்களுக்கான தீர்வுகளைப் பெற்றுக்கொடுப்பதில் சிவில் அமைப்புகள், அரச சார்பற்ற நிறுவனங்கள் மற்றும் சமூகப் பிரதிநிதிகளின் பங்களிப்பு மிகவும் முக்கியமானது. தேசிய சமாதானப் பேரவையின் பிரதிநிதிகளுடன் இணைந்து ஏற்பாடு செய்யப்பட்ட இக்கலந்துரையாடலின் முக்கிய நோக்கம், காணாமல் ஆக்கப்பட்டோர் தொடர்பான செயற்பாடுகளை மேலும் வினைத்திறனுடனும் ஒருங்கிணைந்த முறையிலும் முன்னெடுப்பதற்கான வழிமுறைகளை ஆராய்வதாகும். பல்வேறு சந்தர்ப்பங்களில் இவ்விடயம் தொடர்பில் கலந்துரையாடல்கள் இடம்பெற்றிருந்தாலும், பாதிக்கப்பட்ட மக்களின் எதிர்பார்ப்புகள் முழுமையாக நிறைவேற வேண்டிய தேவை இன்னமும் காணப்படுகின்றது. எனவே, சம்பந்தப்பட்ட அனைத்து தரப்பினரும் ஒருங்கிணைந்து செயற்பட்டு, காணாமல் ஆக்கப்பட்டோரின் குடும்பங்களுக்கு உரிய ஆதரவையும் தீர்வுகளையும் பெற்றுக்கொடுக்க ஒத்துழைக்க வேண்டும் என மேலதிக அரசாங்க அதிபர் தெரிவித்தார்.
கலாநிதி ஜெஹான் பெரேரா அவர்களின் உரை :
காணாமல் ஆக்கப்பட்டோர் தொடர்பான அலுவலகத்தை வலுப்படுத்த அரசாங்கமும் சிவில் சமூகமும் ஒன்றிணைய வேண்டும் – கலாநிதி ஜெஹான் பெரேரா காணாமல் ஆக்கப்பட்டோர் தொடர்பான அலுவலகத்தின் (OMP) செயற்பாடுகளை வலுப்படுத்துவதற்கும், பாதிக்கப்பட்ட குடும்பங்களுக்கு உண்மை, நீதி மற்றும் உரிய நிவாரணங்களைப் பெற்றுக்கொடுப்பதற்கும் அரசாங்க நிறுவனங்களும் சிவில் சமூக அமைப்புகளும் இணைந்து செயலாற்ற வேண்டும் என தேசிய சமாதானப் பேரவையின் நிறைவேற்றுப் பணிப்பாளர் கலாநிதி ஜெஹான் பெரேரா வலியுறுத்தினார். காணாமல் ஆக்கப்பட்டவர்களுக்கு என்ன நடந்தது என்பதைக் கண்டறிந்து, அவர்களது குடும்பங்களுக்கு உண்மையான தகவல்களை வழங்குவதே OMP அலுவலகத்தின் பிரதான நோக்கமாகும். கடந்த காலங்களில் இலங்கையின் பல்வேறு பகுதிகளில் காணாமல் ஆக்கப்பட்ட தமது கணவர்கள், பிள்ளைகள் மற்றும் உறவினர்கள் தொடர்பான உண்மைகளை அறிந்துகொள்ளும் எதிர்பார்ப்புடன் பல குடும்பங்கள் பல தசாப்தங்களாகக் காத்திருக்கின்றன. அண்மையில் மாத்தறையில் அரசாங்க அதிகாரிகள் மற்றும் சிவில் சமூகப் பிரதிநிதிகளுடன் இடம்பெற்ற சந்திப்பில், சுமார் 40 ஆண்டுகளுக்கு முன்னர் காணாமல் ஆக்கப்பட்ட தமது கணவர்களையும் உறவினர்களையும் தேடிக்கொண்டிருக்கும் தாய்மார்களும் பெண்களும் தமது துயரங்களைப் பகிர்ந்துகொண்டதாக அவர் குறிப்பிட்டார். கடந்த கால உண்மைகளைக் கண்டறிந்து, அவற்றிலிருந்து பாடங்களைக் கற்றுக்கொள்வதன் மூலமே பாதிக்கப்பட்ட மக்களுக்கு நீதி வழங்கவும், எதிர்காலத்தில் இத்தகைய சம்பவங்கள் மீண்டும் இடம்பெறாமல் தடுக்கவும் முடியும் என அவர் சுட்டிக்காட்டினார். மேலும், காணாமல் ஆக்கப்பட்டவர்கள் தொடர்பான தகவல்களைச் சேகரித்தல், விசாரணைகளை முன்னெடுத்தல் மற்றும் கண்டறியப்படும் உண்மைகளை உரிய தரப்புகளிடம் சமர்ப்பித்தல் ஆகியவையே OMP அலுவலகத்தின் பிரதான பணிகளாகும். இழப்பீடுகளை வழங்குவது அதன் நேரடிப் பொறுப்பல்ல. அதற்கென அரசாங்கத்தின் ஏனைய நிறுவனங்கள் செயற்பட வேண்டியுள்ளன என்றும் அவர் தெளிவுபடுத்தினார். அரசாங்கத்தால் தனித்து இப்பணிகளை முன்னெடுக்க முடியாது என்பதால், சிவில் சமூக அமைப்புகளின் ஒத்துழைப்பும் அவசியமானது. OMP அலுவலகம் தனித்து இயங்க முடியாத நிலையில், அரசாங்க நிறுவனங்கள், சிவில் சமூக அமைப்புகள் மற்றும் தொடர்புடைய தரப்புகள் ஒன்றிணைந்து செயற்பட வேண்டும். அத்துடன், இவ்விடயம் தொடர்பான விழிப்புணர்வையும் தகவல்களையும் பரந்துபட்ட சமூகத்திற்குக் கொண்டுசென்று, மேலும் பல சிவில் சமூக அமைப்புகளையும் இச்செயற்பாட்டில் இணைத்துக்கொள்ள வேண்டும். பாதிக்கப்பட்ட குடும்பங்களின் துயரங்களைக் குறைத்து, அவர்களுக்கான உரிய சேவைகள், நிவாரணங்கள் மற்றும் தீர்வுகளைப் பெற்றுக்கொடுப்பது அனைவரதும் கூட்டுப் பொறுப்பாகும் என கலாநிதி ஜெஹான் பெரேரா வலியுறுத்தினார்.
அரசாங்க அதிபர் உரை :
காணாமல் ஆக்கப்பட்டோரின் குடும்பங்களின் வலிகளைப் புரிந்துகொண்டு உத்தியோகத்தர்கள் செயற்பட வேண்டும் – அரசாங்க அதிபர் இச் செயலமர்வில் கலந்துகொண்டு உரையாற்றிய அரசாங்க அதிபர் திரு. மருதலிங்கம் பிரதீபன் அவர்கள் தமதுரையில், காணாமல் ஆக்கப்பட்டவர்களின் விவகாரத்தைக் கையாளும்போது, அரச உத்தியோகத்தர்கள் வழமையான நிர்வாக நடைமுறைகள் மற்றும் ஆவணங்களுக்கு அப்பால், பாதிக்கப்பட்ட குடும்பங்களின் உணர்வுகளையும் இழப்புகளையும் புரிந்துகொண்டு மனிதாபிமானத்துடன் செயற்பட வேண்டியது அவசியமாகும். காணாமல் ஆக்கப்பட்டவர்களைக் கண்டறிதல் மற்றும் அவர்களுக்கான உரிய தீர்வுகளைப் பெற்றுக்கொடுத்தல் முக்கியமானதாக இருந்தாலும், அதுவரையான காலப்பகுதியில் பாதிக்கப்பட்ட குடும்பங்களின் மனவேதனையைப் புரிந்துகொண்டு, அவர்களுக்கு உரிய ஆறுதலையும் வழிகாட்டுதலையும் வழங்க வேண்டிய பொறுப்பு அரச உத்தியோகத்தர்களுக்கு உள்ளது. காணாமல் ஆக்கப்பட்டவர்களை உறுதிப்படுத்தும் சான்றிதழ்கள், வாழ்வாதார உதவியாக அதிகபட்சம் 150,000 ரூபாய் வரையிலான நிதியுதவி மற்றும் மாதாந்தக் கொடுப்பனவுகள் போன்ற பல்வேறு உதவித் திட்டங்களை அரசாங்கம் நடைமுறைப்படுத்தியிருந்தாலும், இவை பாதிக்கப்பட்ட குடும்பங்கள் எதிர்பார்க்கும் முழுமையான தீர்வாக அமைந்துவிட முடியாது. அவர்களின் பிரதான எதிர்பார்ப்பு காணாமல் ஆக்கப்பட்ட தமது உறவினர்கள் தொடர்பான உண்மையையும் உரிய தீர்வையும் அறிந்துகொள்வதாகும். பிரதேச செயலாளர்கள் தங்களின் கீழ் பணியாற்றும் கிராம மட்ட உத்தியோகத்தர்களுக்கு இவ்விடயம் தொடர்பில் உரிய தெளிவூட்டல்களை வழங்கி, பாதிக்கப்பட்ட குடும்பங்களை அணுகும்போது மிகுந்த கரிசனையுடனும் மனிதாபிமானத்துடனும் செயற்பட வழிகாட்ட வேண்டும். பல ஆண்டுகளாகத் தமது குடும்ப உறுப்பினர்களையும் குடும்பத்தின் வாழ்வாதாரத்தையும் இழந்து தவிக்கும் மக்களின் வலியை அவர்களால் மட்டுமே முழுமையாக உணர முடியும். எனவே, அவர்களின் உணர்வுகளை மதித்து, தற்காலிக உதவிகளுடன் மட்டுப்படுத்தாமல், காணாமல் ஆக்கப்பட்டவர்கள் தொடர்பான உண்மையைக் கண்டறிந்து உரிய தீர்வுகளைப் பெற்றுக்கொடுப்பதற்கான முயற்சிகள் தொடர்ந்து முன்னெடுக்கப்பட வேண்டும். இந்தப் பணியில் தேசிய சமாதானப் பேரவையின் வழிகாட்டல்களும் ஆலோசனைகளும் அரசாங்கத்திற்கும் அரச உத்தியோகத்தர்களுக்கும் தொடர்ந்து கிடைக்கும் என நம்புவதாகத் தெரிவித்த அவர், இத்தகைய ஆக்கபூர்வமான கலந்துரையாடலை ஏற்பாடு செய்த அனைவருக்கும் நன்றியைத் தெரிவித்துக் கொண்டார்.
அலுவலகச் செயற்பாடுகள் தொடர்பில் விளக்கமளிப்பு :
காணாமல் போன ஆட்கள் பற்றிய அலுவலகத்தின் செயற்பாடுகள், பணிகள் மற்றும் நடைமுறைகள் தொடர்பில் அதன் பிராந்திய இணைப்பாளர் திரு. த. செல்வகுமார் விளக்கமளித்தார்.
விரிவான கலந்துரையாடல் :
காணாமல் போனோர் தொடர்பான விவகாரங்களில் சிவில் சமூக அமைப்புகளின் கரிசனைகள், எதிர்பார்ப்புகள் மற்றும் முன்வைக்கப்படும் சவால்கள் தொடர்பாக விரிவான கலந்துரையாடல் இடம்பெற்றது.
பங்குபற்றியவர்கள் :
இச்செயலமர்வில் மாவட்டத் திட்டமிடல் பணிப்பாளர் இ. சுரேந்திரநாதன், காணாமல் போன ஆட்கள் பற்றிய அலுவலகத்தின் ஆணையாளர் திருமதி ஜெயதீபா, சிரேஷ்ட திட்டப் பணிப்பாளர் செல்வி கனிஷ்கா, பிரதேச செயலாளர்கள், சிவில் சமூக அமைப்புகளின் பிரதிநிதிகள், காணாமல் போன ஆட்கள் பற்றிய அலுவலகம் மற்றும் இழப்பீட்டு அலுவலகத்தின் உத்தியோகத்தர்கள் எனப் பலரும் கலந்துகொண்டனர்.








