ஒன்றுபட்டு எழுச்சி பெற்ற ஓராண்டு – ‘அகன்று செல்’ செயற்பாட்டின் ஓராண்டு மதிப்பீட்டு சர்வமத மாநாடு அலரி மாளிகையில் நடைபெற்றது! போதைப்பொருள் அச்சுறுத்தலை நாட்டிலிருந்து முற்றாக ஒழிக்கும் நோக்கில் முன்னெடுக்கப்படும் “அகன்று செல்” தேசிய செயற்பாட்டின் ஓராண்டு நிறைவையொட்டிய மதிப்பீட்டு சர்வமத மாநாடு, அதிமேதகு ஜனாதிபதி அநுர குமார திசாநாயக்க அவர்களின் தலைமையில் இன்று (05.11.2026) பிற்பகல் அலரி மாளிகையில் நடைபெற்றது. 'ஒன்றுபட்டு எழுச்சி பெற்ற ஓராண்டு' எனும் தொனிப்பொருளில் நடைபெற்ற இம்மாநாட்டில் உரையாற்றிய அதிமேதகு ஜனாதிபதி அவர்கள், இன, மத, வயது வேறுபாடுகளைக் கடந்து சிறுவர்கள் முதல் பெரியவர்கள் வரை சமூகத்தின் அனைத்துத் தரப்பினரையும் போதைப்பொருள் அச்சுறுத்தல் பாதித்துள்ளதாகச் சுட்டிக்காட்டினார். சமூகத்தில் மரியாதைக்குரியவர்களாகவும் வழிபாட்டுக்குரியவர்களாகவும் கருதப்படுபவர்கள் மத்தியிலும் இவ்வச்சுறுத்தல் பரவியுள்ளமை கவலைக்குரிய விடயமாகும் எனக் குறிப்பிட்ட அவர், போதைப்பொருள் அச்சுறுத்தலை முறியடிப்பது இன்றைய தேசத்தின் முன்னுள்ள முதன்மையான பொறுப்பாகும் என்றும் வலியுறுத்தினார். போதைப்பொருள் ஒழிப்பு நடவடிக்கைகளுக்கு அரசாங்கம் முன்னுரிமை வழங்கி வருவதுடன், கைது நடவடிக்கைகளுக்கான பொறிமுறையை வலுப்படுத்துதல், தேவையான சட்டத் திருத்தங்களை மேற்கொள்ளுதல் மற்றும் பலமான நிறுவனக் கட்டமைப்பை உருவாக்குதல் போன்ற நடவடிக்கைகளும் முன்னெடுக்கப்பட்டு வருவதாகத் தெரிவித்தார். அதேவேளை, இப்பேரழிவை முறியடிப்பதற்கு சமூகத்தின் சிந்தனை மற்றும் மனப்பாங்கில் மாற்றத்தை ஏற்படுத்துவது அவசியம் எனக் குறிப்பிட்ட ஜனாதிபதி, அதில் மதத் தலைவர்களுக்கும் மத வழிபாட்டுத் தலங்களுக்கும் மிக முக்கியமான பங்களிப்பு உண்டு எனத் தெரிவித்தார். பல வருடங்களாகத் தொடர்ச்சியாகவும் தளராது ஒருங்கிணைந்து செயற்பட்டால் போதைப்பொருள் பேரழிவிலிருந்து நாட்டை மீட்டெடுக்க முடியும் என்ற நம்பிக்கையையும் அவர் வெளிப்படுத்தினார். எதிர்காலச் சந்ததியினர் பெருமையுடனும் பாதுகாப்புடனும் வாழக்கூடிய நாட்டைக் கட்டியெழுப்பும் நோக்கில், போதைப்பொருள் ஒழிப்புக்கான இந்தத் தேசியச் செயற்பாட்டில் தீவிரமான பங்காளிகளாக இணையுமாறு அனைத்து மதத் தலைவர்களுக்கும் ஜனாதிபதி கௌரவமான அழைப்பு விடுத்தார்.
 
 
1 2 3 4 5 6 7 8 11 16 18 14 12 17 20
யாழ்ப்பாணம் உள்நாட்டு இறைவரி திணைக்களத்தின் யாழ்ப்பாணப் பிராந்திய ஆணையாளர் திரு. A. P. குணதுங்ஹ அவர்கள், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களை நேற்று (04.11.2026) மாவட்டச் செயலகத்தில் சந்தித்து கலந்துரையாடினார். இதன்போது, வரி செலுத்துநர் அடையாள இலக்கமான (TIN) இலக்கத்தைப் பெற்றுக்கொள்வதற்காக அண்மைய நாட்களாகப் பொதுமக்கள் மீண்டும் நீண்ட வரிசைகளில் காத்திருக்க வேண்டிய நிலை ஏற்பட்டுள்ளமை தொடர்பில் கலந்துரையாடப்பட்டது. இதன்போது, TIN இலக்கத்தைப் பெற்றுக்கொள்ளும் நடைமுறைகள் தொடர்பாக யாழ்ப்பாணப் பிராந்திய ஆணையாளர் பின்வரும் மேலதிக விபரங்களைத் தெரிவித்தார். நவம்பர் 01 ஆம் திகதி முதல் TIN சான்றிதழைச் சமர்ப்பிப்பது குறிப்பிட்ட எட்டு வகையான பரிவர்த்தனைகளுக்கு மாத்திரமே கட்டாயமாக்கப்பட்டுள்ளதாக யாழ்ப்பாண பிராந்திய ஆணையாளர் திரு. A. P. குணதுங்ஹ தெரிவித்துள்ளார். எனவே, அவசரமான அல்லது அத்தியாவசியமான தேவை இல்லாதவர்கள் உள்நாட்டு இறைவரித் திணைக்கள அலுவலகங்களுக்கு நேரில் வருகை தந்து சிரமங்களுக்கு உள்ளாவதைத் தவிர்த்துக் கொள்ளுமாறு அவர் பொதுமக்களிடம் கேட்டுக்கொண்டுள்ளார்.
TIN சான்றிதழ் கட்டாயமாக்கப்பட்டுள்ள எட்டு பரிவர்த்தனைகள்
2026 ஆம் ஆண்டின் 11 ஆம் இலக்கத் திருத்தச் சட்டத்தின் பிரகாரம், கீழ்வரும் எட்டு வகையான நடவடிக்கைகளின்போது மாத்திரமே செல்லுபடியாகும் TIN சான்றிதழைச் சமர்ப்பிக்க வேண்டும்.
1.வங்கி அல்லது நிதி நிறுவனமொன்றில் புதிய கணக்கொன்றைத் திறத்தல்.
2.கடன் அட்டையொன்றைப் (Credit Card) பெற்றுக்கொள்ளுதல்.
3.கட்டட நிர்மாணத் திட்டத்திற்கு அனுமதி பெற்றுக்கொள்ளுதல்.
4.மோட்டார் வாகனமொன்றைப் பதிவு செய்தல்.
5.மோட்டார் வாகன வருமான அனுமதிப்பத்திரத்தைப் புதுப்பித்தல்.
6.காணி அல்லது காணி உரிமையைப் பதிவு செய்தல்.
7.வியாபாரமொன்றைப் பதிவு செய்தல்.
8.நிறுவனமொன்றின் பங்குகளைப் பரிமாற்றம் செய்தல்.
இதன்போது பங்குகளைப் பரிமாற்றம் செய்பவர் மற்றும் பெற்றுக்கொள்பவர் ஆகிய இரு தரப்பினரும் TIN சான்றிதழைச் சமர்ப்பிக்க வேண்டும்.
மேற்குறிப்பிட்ட நடவடிக்கைகளைத் தவிர, அன்றாட வாழ்க்கையில் மேற்கொள்ளப்படும் ஏனைய பொதுவான நடவடிக்கைகளுக்கு TIN சான்றிதழைச் சமர்ப்பிப்பது கட்டாயமல்ல.
18 வயதைப் பூர்த்தி செய்த அனைவரும் TIN பெற வேண்டும் :
உள்நாட்டு இறைவரிச் சட்டம் மற்றும் அதிவிசேட வர்த்தமானி அறிவித்தல்களின் பிரகாரம், 18 வயதைப் பூர்த்தி செய்த அனைத்து வதிவிடப் பிரஜைகளும் TIN இலக்கத்தைப் பெற்றுக்கொள்ள வேண்டும். எனினும், TIN இலக்கத்தைப் பெற்றிருப்பதனால் ஒருவர் வரி செலுத்த வேண்டிய கட்டாயம் ஏற்படுவதில்லை. சட்டத்தினால் நிர்ணயிக்கப்பட்ட வருடாந்த வருமான வரம்பை மீறும் வருமானம் பெறுபவர்களிடமிருந்தே வரி அறவிடப்படும். TIN இலக்கம் என்பது வரி தொடர்பான பதிவுகளில் ஒருவரை அடையாளம் காண்பதற்காக வழங்கப்படும் இலக்கமாகும். இது வரி செலுத்துவதற்கான கட்டாயத்தைத் தானாகவே ஏற்படுத்துவதில்லை. வீட்டிலிருந்தே TIN இலக்கத்தைப் பெற்றுக்கொள்ளலாம் TIN இலக்கத்தைப் பெற்றுக்கொள்ள வேண்டிய தேவை உள்ளவர்கள் உள்நாட்டு இறைவரித் திணைக்களத்தின் உத்தியோகபூர்வ மின்னணுச் சேவை (e-Services) இணையத்தளத்தின் ஊடாக இலகுவாக விண்ணப்பித்துப் பெற்றுக்கொள்ள முடியும். அத்துடன், ஏற்கனவே தமக்கு TIN இலக்கம் வழங்கப்பட்டுள்ளதா என்பதையும் குறித்த இணையத்தளத்தின் ஊடாகச் சரிபார்த்துக் கொள்ள முடியும். இதனை உறுதிப்படுத்திய பின்னர், தேசிய அடையாள அட்டை இலக்கம் (NIC) மற்றும் TIN இலக்கம் ஆகியவற்றைக் கொண்ட அச்சுப் பிரதியைப் பெற்றுக்கொள்ளலாம். குறித்த எட்டு வகையான பரிவர்த்தனைகளுக்கும் இந்த அச்சுப் பிரதி செல்லுபடியாகும் ஆவணமாக ஏற்றுக்கொள்ளப்படும். எனவே, சட்ட மாற்றங்கள் தொடர்பில் பொதுமக்கள் குழப்பமடையாமல், டிஜிட்டல் சேவைகளைப் பயன்படுத்தி வீட்டிலிருந்தே இச்சேவைகளைப் பெற்றுக்கொள்ளுமாறு உள்நாட்டு இறைவரித் திணைக்களம் அறிவுறுத்தியுள்ளது.
மேலும், இதுவரை TIN இலக்கத்தைப் பெற்றுக்கொள்ளாதவர்கள் உள்நாட்டு இறைவரித் திணைக்களத்தின் மின்னணுச் சேவையின் ஊடாக விண்ணப்பித்து TIN இலக்கத்தைப் பெற்றுக்கொள்ள முடியும் எனவும் பிராந்திய ஆணையாளர் திரு. A. P. குணதுங்க அவர்கள் மேலும் தெரிவித்துள்ளார்.
TIN சான்றிதழ் இல்லாவிட்டாலும் வாகன வருமான அனுமதிப்பத்திரத்தைப் புதுப்பிக்க முடியும்!
TIN (வரி செலுத்துவோர் அடையாள இலக்கம்) சான்றிதழைப் பெறுவதில் ஏற்பட்டுள்ள தாமதத்தைக் கருத்திற்கொண்டு, TIN சான்றிதழ் இல்லாத காரணத்தால் வாகன வருமான அனுமதிப்பத்திரத்தைப் புதுப்பிப்பதைத் தாமதப்படுத்தவோ அல்லது நிராகரிக்கவோ கூடாது என வருமான வரித் திணைக்களம் அறிவித்துள்ளதாக வும் பிராந்திய ஆணையாளர் தெரிவித்துள்ளார். ஏற்கனவே TIN இலக்கத்தைப் பெற்றுக்கொண்டுள்ள வாகன உரிமையாளர்கள், அதன் சான்றிதழின் பிரதியை (கடதாசி வடிவிலோ அல்லது மென்பிரதியாகவோ) சமர்ப்பிக்க அனுமதிக்கப்பட வேண்டும். அசல் TIN சான்றிதழைப் பெற்றுக்கொள்ள வேண்டிய அவசியமில்லை. மாற்றாக, TIN இலக்கத்தை உறுதிப்படுத்தும் திரை அச்சுப் பிரதியையும் (Screen Printout) ஏற்றுக்கொள்ள முடியும் எனவும் தெரிவித்தார்.
யாழ்ப்பாண மாவட்டத்தில் வடகிழக்குப் பருவப்பெயர்ச்சி மழையினால் ஏற்படக்கூடிய அனர்த்தங்களை எதிர்கொள்வதற்கான முன்னாயத்தக் கலந்துரையாடல் இன்றைய தினம்(04.11.2026) அரசாங்க அதிபர் மருதலிங்கம் பிரதீபன் அவர்களின் தலைமையில் மாவட்டச் செயலக கேட்போர் கூடத்தில் நடைபெற்றது. இக்கலந்துரையாடலில் வடகிழக்குப் பருவப்பெயர்ச்சி மழையினால் ஏற்படக்கூடிய அனர்த்தங்களை எதிர்கொள்ளும் வழிமுறைகள், அனர்த்த அபாயங்களைக் குறைத்தல் மற்றும் அவற்றிலிருந்து மக்களைப் பாதுகாப்பதற்கான திட்டமிடல்கள் தொடர்பாக விரிவாக ஆராயப்பட்டன. இதன்போது, மாவட்ட அரசாங்க அதிபரின் தலைமை உரையைத் தொடர்ந்து, வளிமண்டலவியல் திணைக்களத்தின் வளிமண்டலவியலாளர் Zoom இணையவழி செயலி ஊடாகக் கலந்துகொண்டு, வடகிழக்குப் பருவப்பெயர்ச்சி மழை தொடர்பான எதிர்வுகூறல்கள் மற்றும் அதன் தாக்கங்கள் குறித்து விளக்கமளித்தார். குறிப்பாக, நவம்பர் மாதத்தில் யாழ்ப்பாண மாவட்டத்தில் 331 மில்லிமீற்றர் மழைவீழ்ச்சி பதிவாகக்கூடும் எனத் தெரிவிக்கப்பட்டது. தொடர்ந்து, அனர்த்த காலங்களில் மேற்கொள்ளப்பட வேண்டிய அத்தியாவசிய நடவடிக்கைகள், முன்னாயத்த ஏற்பாடுகள் மற்றும் துறைசார் தேவைகள் தொடர்பாகத் திணைக்களத் தலைவர்களுடன் விரிவாகக் கலந்துரையாடப்பட்டு முக்கிய தீர்மானங்கள் எட்டப்பட்டன.
கூட்டத்தில் எட்டப்பட்ட முக்கிய தீர்மானங்கள்:
01.பாதுகாப்பு நிலையங்களின் முன்னாயத்தம் :
யாழ்ப்பாண மாவட்டத்திலுள்ள 255 பாதுகாப்பு நிலையங்களின் தேவைகள் மற்றும் முன்னேற்பாட்டு நடவடிக்கைகள் தொடர்பாக ஆராயப்பட்டது. கிராம அலுவலர்களின் தலைமையில் கிராம மட்ட உத்தியோகத்தர்கள் தயார் நிலையில் இருக்க வேண்டும் எனவும், அரசாங்கச் சுற்றறிக்கைகளுக்கு அமைவாக சுகாதார நடைமுறைகளைப் பின்பற்றி சமைத்த உணவு அல்லது உலர் உணவுப் பொருட்களை வழங்குவதற்கும் தீர்மானிக்கப்பட்டது.
02.கிராம மட்ட உதவி மற்றும் உணவு விநியோகம் :
பாதுகாப்பு நிலையங்கள் உள்ளிட்ட கிராம மட்டங்களில் மேற்கொள்ளப்படும் உதவிச் செயற்பாடுகள் கிராம அலுவலர்களுக்கு அறிவிக்கப்பட்டு, அவர்களின் ஒருங்கிணைப்புடன் முன்னெடுக்கப்பட வேண்டும் என அறிவுறுத்தப்பட்டது. சுகாதார விதிமுறைகள் மற்றும் அரசாங்கச் சுற்றறிக்கைகளுக்கு அமைவாகவே உணவு விநியோகம் மேற்கொள்ளப்பட வேண்டும் என்பதுடன், வெளியில் இருந்து சமைத்த உணவுகளைக் கொண்டுவருவதற்கு அனுமதி வழங்கப்படமாட்டாது எனவும் தெரிவிக்கப்பட்டது. கிராம மட்டங்களில் சமைத்த உணவுகளை வழங்கும்போது சுகாதார நடைமுறைகளைக் கருத்திற்கொண்டு சமூக மட்ட அமைப்புகள் பொறுப்புணர்வுடன் செயற்பட வேண்டும் எனவும் வலியுறுத்தப்பட்டது.
03.ஆபத்தான மரங்களை அகற்றுதல் :
பிரதேச மட்ட அனர்த்த முகாமைத்துவக் குழுக்களைக் கூட்டி ஆராய்ந்து, அனர்த்த அபாயத்தை ஏற்படுத்தக்கூடிய ஆபத்தான மரங்களை அடையாளம் கண்டு அவற்றை அகற்றுவதற்கான நடவடிக்கைகளை மேற்கொள்ளத் தீர்மானிக்கப்பட்டது.
04.உவர் நீர் தடுப்பணைகளின் நீர் முகாமைத்துவம் :
அராலி, தொண்டைமானாறு மற்றும் அரியாலை உவர் நீர் தடுப்பணைகளிலிருந்து வெளியேறும் நீர் கடலுக்குச் சென்று வீணாகாமல் உரிய அளவில் தேக்கி வைப்பதன் மூலம் அப்பகுதிகளில் நன்னீர் மட்டத்தைப் பேணுவதுடன், அதேவேளை வெள்ள அனர்த்தங்கள் ஏற்படாத வகையில் நீர் முகாமைத்துவ நடவடிக்கைகளை முன்னெடுப்பது தொடர்பாக நீர்ப்பாசனத் திணைக்களத்துடன் கலந்துரையாடப்பட்டது.
05.தீவுப் பகுதிகளில் வசிக்கும் கர்ப்பிணித் தாய்மார்களுக்கான முன்னாயத்தம் :
நெடுந்தீவு, அனலைதீவு, நயினாதீவு உள்ளிட்ட தீவுப் பகுதிகளில் வசிக்கும் 36 வாரங்களைக் கடந்த கர்ப்பிணித் தாய்மார்கள், அனர்த்த காலங்களில் ஏற்படக்கூடிய ஆபத்தான கடல் போக்குவரத்தைக் கருத்திற்கொண்டு, யாழ்ப்பாண நகரப் பகுதியிலுள்ள உறவினர்களின் வீடுகளிலோ அல்லது ஊர்காவற்றுறை வைத்தியசாலையிலோ தங்கியிருந்து பாதுகாப்பான முறையில் பிரசவ நடவடிக்கைகளை மேற்கொள்ளுமாறு பிராந்திய சுகாதார சேவைகள் பணிப்பாளரினால் அறிவுறுத்தப்பட்டது.
06.எலிக்காய்ச்சல் தடுப்பு நடவடிக்கைகள் :
கடந்த வருடம் மற்றும் அதற்கு முந்தைய வருடங்களில் எலிக்காய்ச்சல் காரணமாக உயிரிழப்புகள் ஏற்பட்டமையைக் கருத்திற்கொண்டு, இந்நோயைத் தடுப்பதற்கான முன்னாயத்த நடவடிக்கைகள் தொடர்பாகக் கலந்துரையாடப்பட்டது. இதற்கமைய, வயல் நிலங்களில் பணியாற்றுவோர் தத்தமது சுகாதார வைத்திய அதிகாரி பணிமனைகளை அணுகி, எலிக்காய்ச்சல் தடுப்புக்கான மருந்துகளைப் பெற்றுக்கொள்ளுமாறு பிராந்திய சுகாதார சேவைகள் பணிப்பாளரினால் அறிவுறுத்தப்பட்டது.
இக் கலந்துரையாடலில் மேலதிக மாவட்ட அரசாங்க அதிபர், மேலதிக மாவட்ட அரசாங்க அதிபர் (காணி), பிரதேச சபைகளின் தவிசாளர்கள், மாவட்ட அனர்த்த முகாமைத்துவ உதவிப் பணிப்பாளர், பிராந்திய சுகாதார சேவைகள் பணிப்பாளர், பிரதேச செயலாளர்கள், துறைசார் திணைக்களங்களின் உயர் அதிகாரிகள் உள்ளிட்ட உத்தியோகத்தர்கள், முப்படையினர் மற்றும் கிராம மட்ட அமைப்புகளின் பிரதிநிதிகள் எனப் பல்வேறு தரப்பினரும் கலந்துகொண்டனர்.
1 2 3 4 5 6 7 8 9 10 11
குறிப்பிட்ட எட்டு வகையான பரிவர்த்தனைகளில் ஈடுபடும் தனிநபர்கள், வரி செலுத்துவோர் அடையாள இலக்கச் (TIN) சான்றிதழைச் சமர்ப்பிக்க வேண்டிய கட்டாய நடைமுறை 2027 ஏப்ரல் 01ஆம் திகதி வரை ஒத்திவைக்கப்பட்டுள்ளதாக உள்நாட்டு இறைவரித் திணைக்கள பணிப்பாளர் நாயகம் அறிவித்துள்ளார். இத் தகவலை, யாழ்ப்பாண பிராந்திய உள்நாட்டு இறைவரித் திணைக்கள ஆணையாளர் திரு. A. P. குணதுங்ஹ அவர்கள், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களுக்கு அறிவித்துள்ளார். 2026 நவம்பர் 01ஆம் திகதி முதல் நடைமுறைக்கு வரவிருந்த இந்தக் கட்டாய ஏற்பாடு, பொதுமக்களிடையே TIN சான்றிதழைப் பெற்றுக்கொள்வதற்கான அதிகளவிலான கேள்வி மற்றும் நெரிசல் காணப்படுவதைக் கருத்திற்கொண்டு ஒத்திவைக்கப்பட்டுள்ளது. 2026 செப்டெம்பர் 22ஆம் திகதியிடப்பட்ட SEC/PN/IT/2026/05 ஆம் இலக்க அறிவித்தலுக்கு அமைவாக, குறிப்பிட்ட எட்டு வகையான பரிவர்த்தனைகளில் ஈடுபடும் தனிநபர்கள் TIN சான்றிதழைச் சமர்ப்பிப்பது கட்டாயமாக்கப்பட்டிருந்தது. இந்நிலையில், நிதி அமைச்சின் அனுமதியுடன் குறித்த கட்டாய நடைமுறையை 2027 ஏப்ரல் 01ஆம் திகதி வரை ஒத்திவைக்கத் தீர்மானிக்கப்பட்டுள்ளது. இதற்கிடையில், ஏற்கனவே TIN இலக்கத்தைப் பெற்றுப் பதிவு செய்துள்ள தனிநபர்கள் தமது TIN சான்றிதழ்களைப் பெற்றுக்கொள்வதற்கான மாற்று மற்றும் இலகுவான நடைமுறைகளை உள்நாட்டு இறைவரித் திணைக்களம் அறிமுகப்படுத்தவுள்ளது. மேலும், இதுவரை TIN இலக்கத்தைப் பெற்றுக்கொள்ளாதவர்கள் இணையவழி மின்னணுச் சேவைகள் (e-Services) தளத்தைப் பயன்படுத்தி TIN இலக்கத்தைப் பெற்றுக்கொள்ளுமாறும் திணைக்களம் அறிவுறுத்தியுள்ளது.
தேசிய சிறுவர் பாதுகாப்பு அதிகார சபையும் யாழ்ப்பாண மாவட்ட செயலகமும் இணைந்து ஏற்பாடு செய்த 2026ஆம் ஆண்டுக்கான மாணவத் தூதுவர் நிகழ்ச்சித்திட்ட நிகழ்வு மேலதிக அரசாங்க அதிபர் திரு. கே. சிவகரன் தலைமையில், இன்றைய தினம் (04.11.2026) காலை 9.00 மணிக்கு யாழ்ப்பாண மாவட்ட செயலக கேட்போர் கூடத்தில் நடைபெற்றது. இந்நிகழ்வில், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் மற்றும் தேசிய சிறுவர் பாதுகாப்பு அதிகார சபையின் திட்டமிடல் மற்றும் ஊடகப் பிரிவின் பணிப்பாளர் திருமதி சாணிகா மலகொட ஆகியோர் கலந்துகொண்டனர்.
மாணவத் தூதுவர் செயற்திட்ட விளக்கவுரை :
மாணவத் தூதுவர் செயற்திட்டம் தொடர்பான விளக்கவுரையினை தேசிய சிறுவர் பாதுகாப்பு அதிகார சபையின் திட்டமிடல் மற்றும் ஊடகப் பிரிவின் உதவிப் பணிப்பாளர் திருமதி லக்சி நிகழ்த்தினார்.
அரசாங்க அதிபர் திரு. மருதலிங்கம் பிரதீபன் அவர்களின் உரை :
இந் நிகழ்வில் உரையாற்றிய அரசாங்க அதிபர் அவர்கள், மாணவர்கள் காலை 7.30 மணி முதல் பிற்பகல் 1.30 மணி வரை பாடசாலையில் கல்வி கற்கின்றனர். அதன் பின்னர் பிற்பகல் 2.00 மணி முதல் மாலை 6.00 மணி வரை பெரும்பாலான மாணவர்கள் தனியார் வகுப்புகளுக்குச் செல்கின்றனர். அதாவது, மாணவர்களின் நாளாந்த நேரத்தின் பெரும்பகுதி ஆசிரியர்களின் வழிகாட்டலுக்கும் கட்டுப்பாட்டுக்கும் உட்பட்டதாக அமைகின்றது. எனவே, மாணவர்களின் எதிர்காலத்தைச் சிறந்த முறையில் வழிநடத்துவதில் ஆசிரியர்களுக்கு மிகப்பெரிய பொறுப்பும் கடப்பாடும் காணப்படுகின்றது. அதேவேளை, மாணவர்களும் தங்களுடைய வாழ்க்கையைச் சரியான பாதையில் கொண்டு செல்வதற்கான பொறுப்பை உணர வேண்டும். குறிப்பாக, பெற்றோர்கள், அதிபர்கள் மற்றும் ஆசிரியர்கள் கூறும் நல்ல ஆலோசனைகளைக் கேட்டு அதற்கேற்ப நடந்துகொள்ளும் பண்பை வளர்த்துக்கொள்ள வேண்டும். இன்றைய இளைய தலைமுறையினரிடம் பெரியவர்களின் ஆலோசனைகளைக் கேட்டு நடக்கும் மனப்பாங்கு குறைந்து வருவது ஆரோக்கியமான சூழலாக அமையாது. 'நாங்கள் படித்த காலத்தில் இப்படித்தான் இருந்தோம் இன்றைய காலம் அப்படியில்லை' என்று கூறிக்கொண்டிருப்பதை விடுத்து, இன்றைய காலத்திற்குப் பொருத்தமான நல்ல மாற்றங்களை உருவாக்க வேண்டும். எனது பாடசாலைக் கால அனுபவங்களை நினைவுகூரும்போது, நாம் கல்வி கற்ற காலத்தில் ஆசிரியர்களின் கண்டிப்பும் ஒழுக்க வழிகாட்டலும் எவ்வாறு எங்களை வழிநடத்தியது என்பதை நினைவுகூர முடிகின்றது. அன்றைய காலத்தில் ஆசிரியர்களின் கண்டிப்பை பெற்றோர்களும் ஏற்றுக்கொண்டு, கல்வி மற்றும் ஒழுக்கத்திற்கு முக்கியத்துவம் அளித்தனர். அந்த அனுபவங்களிலிருந்து நாம் கற்றுக்கொள்ள வேண்டியது ஒழுக்கம், பொறுப்புணர்வு மற்றும் ஆசிரியர்களை மதிக்கும் பண்பாகும். அதேவேளை, மாணவர்களை அன்புடனும் புரிதலுடனும் வழிநடத்த வேண்டியதன் அவசியத்தையும் உணர வேண்டும். யாழ்ப்பாண மாவட்டத்திலுள்ள பாடசாலைகளின் மாணவத் தலைவர்களாக இந்தக் கலந்துரையாடலில் பங்கேற்றுள்ள உங்களிடம் பல்வேறு ஆளுமைத் திறன்கள் உள்ளன. அந்தத் திறன்களைச் சரியான முறையில் பயன்படுத்தி, உங்களை மேலும் வளர்த்துக்கொள்ள வேண்டும். உங்களுடைய எதிர்காலம் உங்கள் கைகளிலேயே உள்ளது. எனவே, சமூகத்திற்குச் சிறந்த முன்மாதிரியாகவும், திறமைகளையும் ஆளுமைகளையும் கொண்டவர்களாகவும், சமூகத்திற்கு நல்ல செய்திகளையும் சிந்தனைகளையும் எடுத்துச் செல்லக்கூடிய மாணவர்களாகவும் நீங்கள் உருவாக வேண்டும் எனக் கேட்டுக்கொள்கின்றேன் அரசாங்க அதிபர் தெரிவித்தார்.
ஆசிரியர்கள் மற்றும் மாணவர்களின் பங்கேற்பு :
யாழ்ப்பாண மாவட்டத்தின் ஐந்து கல்வி வலயங்களையும் சேர்ந்த தெரிவு செய்யப்பட்ட பாடசாலைகளின் சிரேஷ்ட மாணவத் தலைவர்கள் மற்றும் விடயப் பொறுப்பாசிரியர்கள் உள்ளிட்ட சுமார் 200 பேர் இந்நிகழ்ச்சித்திட்டத்தில் பங்கேற்றனர்.
வளவாளர்களின் கருத்துரைகள் :
சிறுவர் துஷ்பிரயோகங்களை அடையாளம் காணுதல் மற்றும் அவற்றைத் தடுப்பதில் பாடசாலைகளின் வகிபாகம் தொடர்பில் யாழ்ப்பாணம் போதனா வைத்தியசாலையின் சட்ட வைத்திய அதிகாரி வைத்திய கலாநிதி செ. பிரணவன் கருத்துரை வழங்கினார். மாணவத் தூதுவர் செயற்திட்ட நடவடிக்கைகள் தொடர்பான அறிமுகத்தை சிறுவர் பாதுகாப்பு உத்தியோகத்தர் ஆர். ரவிராஜ் வழங்கியதுடன், பாடசாலைகளில் அதிபர்கள் மற்றும் ஆசிரியர்களுக்கான பிள்ளைநேய அணுகுமுறைகள் தொடர்பில் சிறுவர் பாதுகாப்பு உத்தியோகத்தர் கே. ரஜீவன் விளக்கமளித்தார். மேலும், கருத்தரங்கின் குழுச் செயற்பாடுகள் மற்றும் செயற்திட்டப் பணிகள் தொடர்பான வழிகாட்டல்களை சிறுவர் பாதுகாப்பு உத்தியோகத்தர்களான ஆர். ரவிராஜ் மற்றும் இளவரசன் ஆகியோர் வழங்கினர்.
நிகழ்ச்சித்திட்டத்தின் பிரதான நோக்கம் :
பாடசாலைகளின் சிரேஷ்ட மாணவத் தலைவர்கள் மற்றும் விடயப் பொறுப்பாசிரியர்களை உள்ளடக்கி, சிறுவர் பாதுகாப்பு தொடர்பான விழிப்புணர்வு நடவடிக்கைகளில் மாணவர்களை நேரடியாக ஈடுபடுத்துவதன் மூலம் பாதுகாப்பான பாடசாலைச் சூழலை உருவாக்குவதே இம்மாணவத் தூதுவர் நிகழ்ச்சித்திட்டத்தின் பிரதான நோக்கமாகும்.
இதனூடாக,
1. சிறுவர் துஷ்பிரயோகம், வன்முறை, புறக்கணிப்பு மற்றும் சுரண்டல் ஆகியவற்றிலிருந்து சிறுவர்களைப் பாதுகாத்தல்.
2. சிறுவர் உரிமைகள் தொடர்பான அறிவையும் விழிப்புணர்வையும் மாணவர்களிடையே மேம்படுத்துதல்.
3. மாணவர்களின் தலைமைத்துவம், தன்னம்பிக்கை மற்றும் பொறுப்புணர்வை வளர்த்தல்.
4. சிறுவர் பாதுகாப்புச் செய்திகளை சக மாணவர்களுக்கும் பாடசாலைச் சமூகத்திற்கும் கொண்டு சேர்த்தல்.
5. சிறுவர் பாதுகாப்புக்கு அச்சுறுத்தலான சூழ்நிலைகளை அடையாளம் கண்டு உரிய தரப்பினருக்கு அறிவிக்கும் திறனை வளர்த்தல்.
6. மாணவர்களின் தொடர்பாடல் திறன், ஒத்துழைப்பு, ஒழுக்கம் மற்றும் சமூகப் பொறுப்புணர்வை மேம்படுத்துதல்.
7. பாடசாலைகள், பெற்றோர், அரச நிறுவனங்கள் மற்றும் சமூக அமைப்புகளுக்கிடையிலான ஒத்துழைப்பை வலுப்படுத்துதல்.
8. வன்முறை, துன்புறுத்தல் மற்றும் பாகுபாடற்ற சிறுவர் நட்பான பாடசாலைச் சூழலை உருவாக்குதல்.
9. மாணவத் தூதுவர் செயற்பாடுகளைத் தொடர்ச்சியாக முன்னெடுத்து அவற்றின் முன்னேற்றத்தை மதிப்பீடு செய்தல்.
10. ஒவ்வொரு சிறுவரும் அச்சமின்றி, உரிமைகளுடன் பாதுகாப்பாக வாழக்கூடிய சமூகத்தை உருவாக்குவதில் மாணவர்களைப் பங்காளர்களாக்குதல்.
எனப் பல்வேறு நோக்கங்கள் வலியுறுத்தப்பட்டன. மாணவத் தூதுவர் என்பது ஒரு பதவி மட்டுமல்ல; சிறுவர்களின் பாதுகாப்பையும் உரிமைகளையும் உறுதிப்படுத்துவதற்கான பொறுப்பும் சமூக அர்ப்பணிப்புமாகும்என்ற கருத்தும் இந்நிகழ்வில் வலியுறுத்தப்பட்டது. இந்நிகழ்வில் உதவி மாவட்டச் செயலாளர் செல்வி உ. தர்ஷினி, மாவட்ட சிறுவர் பாதுகாப்பு உத்தியோகத்தர் திரு. இ. செந்தூரன், பிரதேச சிறுவர் பாதுகாப்பு உத்தியோகத்தர்கள், பாடசாலைகளின் சிரேஷ்ட மாணவத் தலைவர்கள் மற்றும் விடயப் பொறுப்பாசிரியர்கள் உள்ளிட்ட பலரும் கலந்துகொண்டனர்.
 
1 2 3 5 7 8 9 10 11 12 13 14 15 17 19 20